පාස්කු ඉරුදින ත්‍රස්ත ප්‍රහාර මාලාවේ දෙවැනි ඉලක්කය බවට පත්ව තිබී ඇත්තේ, දළදා පෙරහැර බව පාස්කු ජනාධිපති කොමිසමේ දී අනාවරණය වුණි.

කොමිසම හමුවේ සාක්ෂි දුන් බුද්ධි නිලධාරියකු පැවසුවේ, ඊට අවශ්‍ය ඇඳුම් පවා ත්‍රස්තවාදීන් සූදානම් කරගෙන තිබූ බවය.

සයින්දමර්දුහි නිවසේ දී මියගිය පුද්ගලයින් 12 දෙනෙකු මෙලෙස දෙවන ප්‍රහාරයක් සඳහා සුදානම්ව සිට ඇති බවත් අගෝස්තු මස තෙක් සැඟව සිටීමට මොවුන් අම්පාර දිස්ත්‍රික්කයෙන් ආරක්ෂක නිවාස 08ක් මිලදී ගෙන තිබු බවත් බුද්ධි නිලධාරියා ජනාධිපති කොමිසම හමුවේ හෙළිදරව් කළේය.

පළමු ප්‍රහාරයෙන් පසු රාජ්‍ය බුද්ධි සේවය සිදුකළ මෙහෙයුම් ඔස්සේ දෙවන ප්‍රහාරය වළක්වා ගැනීමට හැකිවු බවත් යම් හෙයකින් දළදා පෙරහැර ඉලක්ක කර දෙවන ප්‍රහාරයක් සිදු වුයේ නම් සිදුවිය හැකිව තිබු විනාශය සිතා ගැනීමට පවා නොහැකි බව බුද්ධි නිලධාරියා සාක්ෂි දෙමින් කියා සිටියේය.

මේ අතර ප්‍රහාරය පිළිබඳව ඉන්දීය "රෝ" සේවයට තොරතුරු ලබාදී ඇත්තේ, සහරාන් ත්‍රස්ත කණ්ඩායමේ සාමාජිකයෙකු බව ද ඔහු කොමිසම හමුවේ අනාවරණ කළේය.

සයින්දමර්දුහි වොලිවේරියන් ග්‍රාමයේ නිවසක් තුළ පසුගිය වසරේ අප්‍රේල් මස 26 වන දින සිදුවු පිපිරීම් මාලාව සම්බන්ධයෙන් ජනාධිපති කොමිසම සිදුකරන විමර්ශනවලට අදාළව නැගෙනහිර පළාතේ සේවයේ නියුතු රාජ්‍ය බුද්ධි සේවයේ බුද්ධි නිලධාරියෙකු කොමිසම හමුවේ සාක්ෂි ලබාදුන්නේය.

එහිදී ඔහු සඳහන් කළේ මුස්ලිම් කොංග්‍රසය නියෝජනය කළ හිටපු නැගෙනහිර පළාත් සභා මන්ත්‍රී ශිබ්ලි ෆාරුක් නැමැති පුද්ගලයා,  ජාතික තවුහිද් ජමාත් සංවිධානයට ප්‍රබල ලෙස දේශපාලනිකව ආධාර අනුබල දී ඇති බවය.

අදාළ මන්ත්‍රීවරයාගේ රියැදුරා ලෙස සහරාන්ගේ ත්‍රස්තවාදී කණ්ඩායමේ ප්‍රබල සමාජිකයෙකු වු ආමි මොහිදින් 2015-2016 කාල වකවානුව තුළ කටයුතු කර තිබේ.

සාක්ෂිකරු පැවසුවේ, 2017 මාර්තු මස 10 වැනිදා ආලියාර් මංසන්දියේ පැවැති ගැටුමක දී ශිබ්ලි ෆාරුක් විසින් ගැටුමට මැදිව සිටි සහරාන් හෂිම් ආරක්ෂිතව එම ස්ථානයෙන් ඉවත් කොට ආරක්ෂාව සපයා ඇති බවය. 

වැඩිදුරටත් කරුණු අනාවරණය කළ සාක්ෂිකරු සඳහන් කළේ ආලියාර් ගැටුම සම්බන්ධයෙන් මඩකලපුව මහේස්ත්‍රාත් අධිකරණයේ පැවති නඩුවේ දී සහරාන් පාර්ශවය වෙනුවෙන් නීතිඥ මෛත්‍රී ගුණරත්න මහතා පෙනී සිට ඇති බවය.

එම නඩුව වෙනුවෙන් කොළඹ සිටි නීතිඥ මෛත්‍රී ගුණරත්න මහතා කැඳවාගෙන ගොස් ඇත්තේ අබ්දුල් කාදර් අන්සාර් නැමැති සහරාන් හෂිම්ගේ බිරිඳගේ සහෝදරයා බව බුද්ධි නිලධාරියා සඳහන් කළේය.

මෙහිදී රජයේ අතිරේක සොලිසිටර් ජනරාල්වරිය සාක්ෂිකරුගෙන් ප්‍රශ්න කර සිටියේ සාරා ජෙස්මින් නැමැත්තියක් හඳුන්නනේද? යන්නයි.

එයට පිළිතුරු දෙමින් සාක්ෂිකරු කියා සිටියේ කටුවාපිටිය දේවස්ථානයේ මරාගෙන මැරෙන බෝම්බය පුපුරුවාගත් අච්චි මුහම්මදු  හස්තුන් නැමැත්තාගේ බිරිඳ සාරා ජෙස්මින් බවය.

කලවන්චිකුඩි, තේතාතිව් ප්‍රදේශයේ උපත ලැබු දමිළ කාන්තාවක් වූ ඇය ඉස්ලාම් ධර්මයට හරවා හස්තුන්ට විවාහ කර දී ඇත්තේ, අබ්දුල් රාසික් නැමැති  පුද්ගලයා බව සාක්ෂිකරු කියා සිටියේය.

ඇයට ජාතික හැඳුනුම්පත් දෙකක් ඇති අතර ඉන් පළමුවැන්න පුලස්තිනි මහේන්ද්‍රන් යන නමට 965672702V අංකයටද, දෙවැන්න සාරා ජෙස්මින් යන නමට 199656702702 යන අංකයටද ලියාපදිංචි වී ඇති බව බුද්ධි නිලධාරියා හෙළිදරව් කළේය.

මෙහිදී රජයේ අතිරේක සොලිසිටර් ජනරාල්වරිය සාක්ෂිකරුගෙන් විමසා සිටියේ සාරා ජෙස්මින් සෛයින්දමර්දු පිපිරීමෙන් මියගියේද නැතිනම් ජීවත්ව සිටින්නේද යන්නය.

සාක්ෂිකරු මෙහිදී පැවසුවේ, එම පිපිරීමෙන් ඇය මියගිය බවට රාජ්‍ය බුද්ධි සේවයද සැක පළ කළත් පසුව සිදුකළ DNA පරීක්ෂණවලදී ඇය මියගිය බවක් අනාවරණය නොවු බවය.

පසුව ඇය සෙවීම සඳහා කරන ලද පරීක්ෂණවලදී සයින්දමර්දු පිපිරීමෙන් පසුව සාරා ඇසින් දුටුවන්ගේ සාක්ෂි සටහන් කර විශේෂ වාර්තාවක් 2020 මැයි මස 31 වන දින රාජ්‍ය බුද්ධි සේවයේ ප්‍රධාන කාර්යාලයට යොමු කළ බව බුද්ධි නිලධාරියා පැවසීය.

පාස්කු ප්‍රහාරය ගැන ඉන්දියාව දැනගත් හැටි

මෙහිදී ජනාධිපති කොමිසමේ සභාපතිවරයා විමසා සිටියේ පාස්කු ප්‍රහාරය පිළිබඳ ඉන්දියාවේ "රෝ" බුද්ධි සේවය අප්‍රේල් 04 සහ 20 වන දින නිශ්චිත බුද්ධි තොරතුරු මඟින් අනතුරු ඇඟවීමක් කර ඇති පසුබිමක එවැනි නිශ්චිත තොරතුරක් ඔවුන් ලබාගන්නට ඇත්තේ කුමන මාර්ගයකින්ද යන්නය.

ඊට පිළිතුරු දුන් සාක්ෂිකරු කියා සිටියේ ප්‍රහාරයෙන් පසු සහරාන් හෂීම්ගේ ජාතික තවුහිද් ජමාත් සංවිධානයට සම්බන්ධ 97 දෙනෙකුගෙන් පමණ තමන් ප්‍රශ්න කළද, එයින් පාස්කු ප්‍රහාරය පිළිබඳ පෙර දැන සිටියායැයි තහවුරු වූයේ සහරාන්ගේ බිරිද හාදියා සහ සහරාන් සමීපව ඇසුරු කළ නව්ෆර් මව්ලවි පමණක් බවය.

ඒ අනුව රහසිගතව සැළසුම් කරන ලද මෙම ප්‍රහාරය පිළිබඳ බාහිර පාර්ශවයකට තොරතුරු අනාවරණය කරගත හැක්කේ ප්‍රහාරයට සෘජුවම සම්බන්ධ පුද්ගලයෙකුගෙන් පමණක් බව සාක්ෂිකරු අවධාරණය කළේය.

ඔහු මෙහිදී පෙන්වා දුන්නේ, වර්තමානය වන විට අපරාධ පරීක්ෂණ දෙපාර්තමේන්තුව භාරයේ සිටින සහරාන් හෂීම්ගේ බිරිඳ ලබා දී ඇති ප්‍රකාශ අනුව සාරා ජෙස්මින් මෙම ප්‍රහාරය පිළිබද සියලු තොරතුරු දැන සිට ඇති බව අනාවරණ වූ බවය.

ඒ පිළිබඳ වැඩිදුරත් පැහැදිලි කරමින් සාක්ෂිකරු කියා සිටියේ පාස්කු ප්‍රහාරයෙන් පසු අප්‍රේල් මස 23 වන දින සහරාන්ගේ බිරිඳ හාදියා සහ හස්තුන්ගේ බිරිඳ සාරා, නින්දවුර් නිවසේ දී හමුවී ඇති අතර එහිදී සාරා විසින් හස්තුන් එවා තිබු ප්‍රහාරයට දිවුරුම් දුන් අවස්ථාවේ ලබාගත් ඡායාරූප හාදියාට පෙන්වා ඇති බවය.

ඒ අනුව හස්තුන් හරහා ප්‍රහාරයේ සියලු තොරතුරු පුලස්තිනි මහේන්ද්‍රන් නොහොත් සාරා ජෙස්මින් දැන සිටින්නට ඇති බව සාක්ෂිකරු ජනාධිපති කොමිසමේ අවධානයට යොමු කළේය.

මෙහිදී කොමිසමේ සාමාජිකයෙකු ප්‍රශ්න කළේ, පාස්කු ප්‍රහාරයෙන් පසු ඔත්තුකරුවා නිරුපද්‍රිතව සිටියේ නම් එම පුද්ගලයා බේරාගැනීමට රෝ ඔත්තු සේවය කටයුතු කර ඇත්ද යන්නය. 

එහිදි බුද්ධි නිලධාරියා සඳහන් කළේ, තමන් කිසියම් මෙහෙයුමක් සඳහා ඔත්තුකරුවෙකු යෙදවුවේ නම් අනිවාර්යයෙන්ම මෙහෙයුම අවසානයේ ඔත්තුකරු නිරුපද්‍රිතව බේරා ගැනීමට කටයුතු කරන බවය.

මෙහිදී ජනාධිපති කොමිසම හමුවේ විශේෂ අනාවරණයක් කළ සාක්ෂිකරු කියා සිටියේ පාස්කු දෙවැනි ප්‍රහාරයක් එල්ල කිරීමට ත්‍රස්තවාදින්ගේ පැහැදිලි සැළසුමක් තිබු බව විමර්ශනවලින් අනාවරණ වූ බවය. 

ශ්‍රී ලංකා මැතිවරණ ඉතිහාසය තුළ වෙන කරදාකටවත් වඩා මෙවර මහා මැතිවරණය වෙනස්ම මුහුණුවරක් ගෙන ඇත. එයට හේතුව වී ඇත්තේ කොරෝනා වෛරසය ව්‍යාප්ත වීමත් සමඟ ඇති වී තිබෙන සෞඛ්‍යයම ගැටලුය.

ඒ නිසාම බොහෝ දේශපාලනඥයින්ට තමන්ගේ මැතිවරණ කටයුතු සුපුරුදු පරිදි කර ගැනීමට නොහැකි තත්ත්වයක් උද්ගත වී තිබේ.

කොරෝනා වෛරස් ව්‍යාප්ත හා සමානවම දේශපාලනඥයින්ට තවත් ගැටලුවක් වී ඇත්තේ පෝස්ටර් ඡන්ද කැම්පේන් ව්‍යාපාරය කර ගැනීමට නොහැකිව තිබීමයි. එයටද හේතුව වී තිබුණේ රටේ තරුණ තරුණියන් විසින් රට පුරාම ප්‍රසිද්ධ ස්ථානයන් හී ඇති තාප්ප, ලයිට් කනු වැනි බොහෝ ස්ථානයන් හී සිතුවම් ඇඳ තිබීමයි.