මේ වන විට පාර්ලිමේන්තුවේ පැවැත්මෙන් තිබෙන්නේ 2022 අය - වැය විවාදයයි.
එසේ විවාද වන අය - වැය ඉදිරිපත් කරන ලද්දේ මුදල් ඇමති ඇමැති බැසිල් රාජපක්ෂ මහතා විසින්.
විපක්ෂය සොයන ඇමති
එහෙත් ඔහු පාර්ලිමේන්තුවේ නොසිටීම පිළිබඳ විපක්ෂයේ දිගින් දිගටම ප්‍රශ්න කළා.
අය - වැය විවාදයේ පළමු දිනය වූ ඉකුත් 13 වැනි දිනද විපක්ෂය වන සමගි ජන බලවේගය මේ සම්බන්ධයෙන් ප්‍රශ්න කළා.
ඒ අවස්ථාවේ ඊට පිළිතුරු දුන්නේ ආණ්ඩු පක්ෂයේ ප්‍රධාන සංවිධායක ජොන්ස්ටන් ප්‍රනාන්දු අමාත්‍යවරයා.
ආණ්ඩු පක්ෂ ප්‍රධාන සංවිධායකගේ පිළිතුර
ඔහු සඳහන් කළේ ඒ අවස්ථා වනවිට බැසිල් රාජපක්ෂ මහතා ප්‍රවෘත්ති දෙපාර්තමේන්තුවේ මාධ්‍ය හමුවක සිටින බවයි.
ඒ වගේම සමගි ජන බලවේගයේ නායක සජිත් ප්‍රේමදාස මහතාද පාර්ලිමේන්තුවේ නැති බවද ඒ අවස්ථාවේ අමාත්‍යවරයා පෙන්වා දුන්නා.
අදද (15) සමගි ජන බලවේගය බැසිල් රාජපක්ෂ මහතා ඉදිරිපත් කළ අය - වැය සම්බන්ධයෙන් තමන්ට තිබෙන ප්‍රශ්න වලට පිළිතුරු ලබා ගැනීමට ඔහු පාර්ලිමේන්තුවේ නැති බව යළිත් සඳහන් කළා.
රාජ්‍ය ඇමතිගේ උපදෙස
ඒ විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා විසින්.
අද ඊට පිළිතුරු දීමට නැගී සිටියේ ෂෙහාන් සේමසිංහ රාජ්‍ය අමාත්‍යවරයා.
ඔහු සඳහන් කළේ මුදල් අමාත්‍යාංශය පිළිබඳ ප්‍රශ්නයක් තිබේ නම් ඒ සම්බන්ධයෙන් තමන්ගෙන් විමසන ලෙසත් ඊට පිළිතුරු දීමට අනිකුත් අමාත්‍යවරුන් සූදානම් බවත්ය.
එනිසා බැසිල් රාජපක්ෂ මහතා සිටින්නේ කොහේදැයි සොය සොයා නොසිටින ලෙස ඔහු සමග ජන බලවේගයට දැනුම් දුන්නා.
