ඔමික්‍රෝන් කොවිඩ් 19 ප්‍රභේදය ආසාදනය වූ තවත් පුද්ගලයින් කිහිප දෙනෙකු මෙරටින් හමු වී ඇති බව වාර්තා වෙනවා.
එම ආසාදිතයින් ප්‍රමාණය 03 දෙනෙකු බව සඳහන්.
මේ බව ශ‍්‍රී ජයවර්ධනපුර විශ්වවවිද්‍යාලයේ වෛද්‍ය පීඨයේ අසාත්මිකතා ප‍්‍රතිශක්තිවේදය හා සෛල ජීව විද්‍යා අංශයේ ප‍්‍රධානි ආචාර්ය චන්දිම ජීවන්දර මහතා ද තහවුරු කළා.
ඔහු පැවසූවේ අදාළ කොවිඩ් ආසාදිතයින්ට ශරීරගත වී ඇත්තේ ඔමික්‍රෝන් ප්‍රභේදය බවට සිය විද්‍යාගාරය තුළ දී තහවුරු වූ බව යි.
මේ අයුරින් ඔමික්‍රෝන් ආසාදිතයින් තවදුරටත් හමුවනු ඇති බවට අපේක්ෂා කළ හැකි බව ද ජීවන්දර මහතා සඳහන් කළා.
මෙවන් තත්ත්වයක් හමුවේ බූස්ටර් එන්නත් මාත්‍රාව ලබා ගැනීම ඉතා වැදගත් බව ද ඔහු පෙන්වා දෙනවා.
මීට පෙර ද එක් ඔමික්‍රෝන් ආසාදිතයෙකු මෙරටින් හමු වූවා.
ඒ අනුව මෙරටින් හමුව ඇති ඔමික්‍රෝන් කොවිඩ් 19 ප්‍රභේදය ආසාදනය වූවන්ගේ ගණන 04ක්.
ඔමික්‍රෝන් ප්‍රභේදය
ඔමික්‍රෝන් කොවිඩ් 19 ප්‍රභේදය ප්‍රථමයෙන්ම සොයාගනු ලැබුනේ දකුණු අප්‍රිකානු විද්‍යාඥයින් පිරිසක් විසින්.
ඒ එරට එක් පළාතක පැතිර යමින් තිබිය දී.
කෙසේ වෙතත් විද්‍යාඥයින් අදාළ ප්‍රභේදය සොයාගත් බවට ලොවට අනාවරණය කිරීමත් සමගම ලොව විවිධ රටවල් දකුණු අප්‍රිකාව ඇතුළු අසල්වැසි රටවල් වෙතට සංචාරක සීමා පැනවීමට කටයුතු යෙදුවත් දින කිහිපයක් තුළ එය ලොව වටා පැතිරීම ආරම්භ වූවා.
භයානක ද?
බරපතළම කරුණ වන්නේ මෙතෙක් හමුව ඇති කොවිඩ් 19 වෛරස ප්‍රභේදයන් සියල්ලම හා සැසඳූ විට ඔමික්‍රෝන් ප්‍රභේදය ලොව දරුණුතම සහ භයානකම කොවිඩ් 19 වෛරස ප්‍රභේදය බවට පත් විය හැකි යැයි විද්‍යාඥයින් අනුමාන කිරීම යි.
එහෙත් ඊට ප්‍රතිවිරුද්ධ අදහසක් ද ඇතැම් විද්‍යාඥයින් ඉදිරිපත් කරන අතර ඔවුන් පවසන්නේ අනෙකුත් ප්‍රභේදවලට වඩා මෙය දරුණු බවින් වැඩි යැයි ප්‍රකාශ කිරීමට තරම් සාධක මේවන තෙක් ප්‍රමාණවත් නොවන බව යි.
කෙසේ වෙතත් එහි විකෘති ප්‍රමාණය ඉහළ අගයක් ගැනීම හේතුවෙන් විද්‍යාඥයන් පවා පුදුමට පත්ව ඇති බව සඳහන්.
දකුණූ අප්‍රිකානු වසංගත ප්‍රතිචාර මධ්‍යස්ථානයේ අධ්‍යක්ෂ මහාචාර්ය ටූලියෝ දි ඔලිවේරා මහතා පවසන්නේ මෙම ප්‍රභේදයේ ඇත්තේ අසාමාන්‍ය විකෘති ප්‍රමාණයක් බව යි.
එමෙන්ම මෙතෙක් ලොව පුරා වාර්තා වූ ප්‍රභේද සමග සැසඳීමේ දී බොහෝ වෙනස්කම් මෙම නව ප්‍රභේදයෙහි දක්නට ඇති බව ද ඔහු පවසනවා.
“මේ ප්‍රභේදය අපිව පුදුමයට පත් කළා. වෛරසයේ පරිණාමය අතින් ගත් විට මෙය ලොකු පිම්මක්. මේ සොයාගැනීමත් සමග ඉදිරි කාලයේ දී පැමිණිය හැකි තවත් විකෘති ප්‍රභේද ගණනාවක් පිළිබඳව අපි බලාපොරොත්තු විය යුතු වනවා”
මහාචාර්ය ඔලිවේරා වැඩිදුරටත් පවසන්නේ නව ප්‍රභේදය තුළ විකෘති 50ක් පමණ සොයාගෙන ඇති බව යි.
ඉන් 30කටත් වඩා වෛරසයේ “ස්පයික් ප්‍රෝටීනවල” සිදුව ඇති බව ඔහු පෙන්වා දෙනවා.
ස්පයික් ප්‍රෝටීන විකෘති
කොවිඩ් 19 වෛරසය මිනිස් සිරුරෙහි සෛල සමග සම්බන්ධ වී සිරුරට ඇතුළු වීමට භාවිත කරන්නේ මෙම ස්පයික් ප්‍රෝටීන යි.
එමෙන්ම නිපදවා ඇති කොවිඩ් මර්ධන එන්නත් බොහොමයක ඉලක්කය ද වෛරසය වටා පවතින ස්පයික් ප්‍රෝටීන වනවා.
මෙවන් තත්ත්වයක් මත නව ප්‍රභේදයේ ස්පයික් ප්‍රෝටීනවල සිදුව ඇති විකෘතිතා ලෝකයට දරුණු බලපෑම් එල්ල කළ හැකි බවට යි මත පළව තිබෙන්නේ.
මීට පෙර ලෝකය පුරා පැතිර ගොස් ජීවිත විශාල ගණනක් බිළිගත් ඩෙල්ටා ප්‍රභේදයේ ස්පයික් ප්‍රෝටීන විකෘතිතා පැවැතුණේ 02ක් පමණයි.
විකෘති 02ක් හේතුවෙන් සිදු වූ විනාශය ගණන් බලන විට ස්පයික් ප්‍රෝටීන විකෘතිතා 30කට වඩා පවතින නව ප්‍රභේදය ලොව පුරා ව්‍යාප්ත වුවහොත් කොපමණ විනාශයක් සිදු කරයිදැයි තමන් හට සිතා ගැනීමට ද නොහැකි බව ඇතැම් විද්‍යාඥයින් බිය පළ කරනවා.
මෙවන් මට්ටමක විකෘති ගොන්නකින් යුතු නව ප්‍රභේදය ආසාදනය වුවහොත් එය මර්ධනය කර ජය ගන්නට මිනිස් සිරුරෙහි ප්‍රතිශක්තීකරණ පද්ධතියට බෙහෙවින් අසීරුවනු ඇති බව ද ඔවුන් පවසනවා.
චීනයේ වූහාන් ප්‍රදේශයෙන් හමු වූ කොවිඩ් 19 මුල් වෛරසය ඉලක්ක කොටගෙන මේවන විට භාවිතයේ පවතින එන්නත් සියල්ලම පාහේ නිපදවා ඇති හෙයින් මේ මට්ටමේ විකෘති ගොන්නක් සමග පැමිණෙන නව ප්‍රභේදය එම එන්නත්වලට ද මැඩපැවැත්විය නොහැකිවනු ඇති බවට ද විද්‍යාඥයින් අනතුරු අඟවනවා.
