තමා පැහැරගැනීමට ලක්වූයේ යැයි ස්විස් තානාපති නිලධාරිනි ගානියා බැනිස්ටර් ෆ්‍රැන්සිස් යන අය කළ කතාන්දරය බොරුවක් යැයි කොළඹ ස්විස් තානාපතිවරයාට දැනුම්දුන් බව ජනාධිපති ගෝඨාභය රාජපක්ෂ මහතා පැවසීය.  එම මුසාබස් පැවසීම ගැන සාක්ෂිද ලබාදීමට තානාපතිවරයා පවා සූදානම් යැයිද ජනාධිපතිවරයා පවසා තිබේ.

ශ්‍රී ලංකාවේ සිටින විදේශීය මාධ්‍ය ආයතන නියෝජිතවරුන් හමුවේ අදහස් දක්වමින් ජනාධිපති ගෝඨාභය රාජපක්ෂ මහතා ජනාධිපති ලේකම් කාර්යාලයේදී මේ බව පැවසුවේය.  ස්විස් තානාපති නිලධාරිනිය මුසාවක් පැවසූ බව සැකයකින් තොරව සනාථ වී ඇති  බවද, මෙම නිලධාරිනිය සමඟ ගනුදෙනු දුරස්ථව පවත්වාගෙන යන්නැයි තානාපතිවරයාට පැවසූ බවත් ජනාධිපතිවරයා වැඩිදුරටත් පැවසීය.

ඇය මුසාවක් පැවසූ නමුත් තානාපතිවරයාගේ ඉල්ලීම මත විශේෂ වරප්‍රසාද අපේක්ෂා කර සිටි බවත්, ඇයගේ අරමුණ කුමක්ද යන්න සොයාගන්නා තුරු විමර්ශන දිගින් දිගටම කෙරීගෙන යන බවත් ජනාධිපතිවරයා වැඩිදුරටත් පවසා සිටියේය.

" පසුගිය රජය යටතේ මාව අපරාධ පරීක්ෂණ දෙපාර්තමේන්තුවට කිහිප වතාවක් කැඳවා එහි යාමට සිදුවූ අවස්ථාවලදීත්, හිටපු ජනාධිපති මහින්ද රාජපක්ෂ මහතාව අපරාධ පරීක්ෂණ දෙපාර්තමේන්තුවට පැමිණ ප්‍රශ්න කළ අවස්ථාවේදීත්, එම නිලධාරීන්  වෙනත් කිසිවෙකුටත් අප සමඟ ඒමට ඉඩදුන්නේ නැහැ. එය සාමාන්‍ය ක්‍රමවේදයයි.“

“ නමුත් මේ සිදුවීමේදී, නිලධාරිනියගේ නීතිඥවරයාට ඇය සමඟ සිටීමට අවසර දී තිබෙනවා. තානාපතිවරයාගේ ඉල්ලීම අනුව එය ඇයට දුන් විශේෂ වරප්‍රසාදයක්. ඒ අනුව ඇයට අවශ්‍ය පහසුකම් සපයා දී තිබෙවා” යැයිද ජනාධිපතිවරයා පැවසීය.

(ඩේලි මිරර් ඇසුරිනි)

තමාට මඩ ගැසීමේ ව්‍යාපාරය අද වන විට ආරම්භ වී ඇති බව එක්සත් ජාතික පක්ෂ පාර්ලිමේන්තු මන්ත්‍රී සජිත් ප්‍රේමදාස මහතා පවසයි.

පසුගිය ජනාධිපතිවරණයේදී තමාට සහාය පළ කළ පාක්ෂිකයින්ට ස්තුතිය පළ කිරීම සඳහා පැවති ජන හමුවකට එක්වෙමින් ඔහු මේ බව සඳහන් කළේය.

එහිදී වැඩිදුර අදහස් දක්වමින් එක්සත් ජාතික පක්ෂ පාර්ලිමේන්තු මන්ත්‍රී සජිත් ප්‍රේමදාස මහතා මේ බව පැවසීය.

“පසුගිය මැතිවරණ ව්‍යාපාරය තුළ එක් දිනවල එක් එක් ගිනි කඳු නිර්මානය වුණා. එක වෙලාවක අර ගිවිසුම අත්සන් කරනවා කිව්වා. තවත් විවිධ ප්‍රකාශන නිකුත් වුණා. ඒ හැම දේයකින්ම ජනතාවට හිතගන්න පුළුවන් අත්දෙක විතරක් නෙමෙයි කකුල් දෙකක් බැඳලා තමයි සජිත් ප්‍රේමදාසට ජනාධිපතිවරණයේ අපේක්ෂකත්වය ලැබුණේ. මට බයක් තියෙනවා මට සිදු වුණ අසාධාරණය අපේ මන්ත්‍රීවරුන්ටක් සිදුවෙයි කියලා. කට ළඟටම ඇවිත් කියයි අරක දෙන්නම් මේක දෙන්නම් කියලා. දැන් කරන්න කියලා. හැබැයි මම එකක් කියන්න කැමතී ඒ කරන්න කියන ඒ වගකීම් සියල්ල දැම්ම බාර දුන්නොත් මම බාර ගන්නවා.  එහෙම නැතුව මම බාර ගන්නට යන්නේ නෑ. ඒ මට සිදුවුණ අකරතැබ්බය මම අපේ මන්ත්‍රීවරුන්ට වෙන්න දෙන්නේ නෑ. ඒ නිසා අද අළුත්ම ව්‍යාපාරයක් ආම්භ වෙලා තියනවා සජිත් ප්‍රේමදාසට මඩ ගැසීමේ ව්‍යාපාරය.“

එක්සත් ජාතික පක්ෂයේ හිටපු පළාත් සභා මන්ත්‍රි බෙවන් පෙරේරා තමාව මරා දැමීමට අපරාධ කල්ලියකට කොන්ත්‍රාත්තුවක් ලබාදීම පිළිබඳව තමා විසින් පොලිසියට කරන ලද පැමිණිලි පසුගිය ආණ්ඩුව සමයේ යට ගසනු ලැබූ බව ලෝක ශූර මෝටර් රථ ධාවකයකු වන ඩිලන්ත මාලගමුව මහතා පවසයි.

ස්විස් තානාපති කාර්යාල සේවිකාවගේ ප්‍රශ්ණයේදී නම සඳහන් වුණේ බෙවන් පෙරේරාගේ පුත්‍රයාගේය.

කොළඹදී මාධ්‍ය හමුවක් කැඳවමින් ඔහු කියා සිටියේ තමා ඝාතනය කිරීම සඳහා ලබාදුන් ආයුධය භාවිතයෙන් මාතර ප්‍රදේශයේ ස්වර්ණාභරණ අලෙවිසලක් කොල්ලකා ඇති බවයි.

ඝාතන කොන්ත්‍රාත්තුව ලබා ගත් පුද්ගලයා එම සිදුවීමට අදාළව පරීක්ෂණ පැවැත්වෙන අතරතුර පොලිස් වෙඩිපහරට ලක්ව මියගොස් ඇතැයිද පැවැසූ මාලගමුව මහතා වැඩිදුරටත් කියා සිටියේ, එකී සැකකරු මිය යෑමට පෙර ඒ සම්බන්ධයෙන් විස්තර පවසා ඇති බව උසස් පොලිස් නිලධාරියකු තමා වෙත දැනුම් දුන් බවයි.

ජනතා වතු සංවර්ධන මණ්ඩලයට අයත් අක්කර 965ක වතුයායක් කල්බදු පදනම මත වසර 50ක් සඳහා තමා ලබාගෙන තිබූ බවත් එම වතුයාය නීති විරෝධීව බෙවන් පෙරේරා විසින් පවරා ගැනීමට සැලසුම් කළ සමයේ මෙලෙස ඝාතන කොන්ත්‍රාත්තුව ලබාදී ඇති බවයි.

“බෙවන් පෙරේරා ජනතා වතු සංවර්ධන මණ්ඩලයේ ක්‍රියාකාරි අධ්‍යක්ෂවරයකු විධියට කාලයක් කටයුතු කළා. ඒ කාලේ මට කතා කරලා කිව්වා මේ වත්ත ඔහු පවර ගන්නවා කියලා. මට ඔහුගේ ගෙදරට එන්න කියලා කීවාම මම එහි ගියා. එහිදී ඔහු මට තර්ජනය කළා. මගේ සපත්තු දෙක පවා හැංගුවා. ඒ කාලේ තමයි මේ ඝාතන කොන්ත්‍රාත්තුවක් ලබාදී තියෙන්නේ. මම මේ ගැන අගමැතිවරයා පවා හමුවී දන්වා සිටියා. අගමැතිවරයා පොලිස්පතිවරයාට මේ බව දැනුම් දුන්නත් වැඩක් වුණේ නැහැ. කොළඹ අපරාධ කොට්ඨාසයෙන් පරීක්ෂණ ආරම්භ කළත් සති දෙකක් ගිය තැන ඒ සියල්ල යට ගියා” යැයි මාලගමුව මහතා සඳහන් කළා. මේ සිදුවීම් සම්බන්ධයෙන් ජනාධිපතිවරයාගේ අවධානය යොමු කොට තමාට ඇති ජීවිත තර්ජනය සම්බන්ධයෙන් ඇති ගැටලුව විසඳා දෙන ලෙසත් තමා ජනතා වතු සංවර්ධන මණ්ඩලයෙන් නීත්‍යනුකූලව ලබාගෙන ඇති වතුයාය නැවත තමාට ලබාදීමට කටයුතු කරන ලෙසත් ඔහු මෙහිදී ඉල්ලා සිටියා. 2018දී බෙවන් පෙරේරාගෙන් මරණ තර්ජනයක් ආවා. බෙවන් පෙරේරා ජනතා වතු සංවර්ධන මණ්ඩලයේ ක්‍රියාකාරි අධ්‍යක්ෂවරයකු විධියට වැඩ කළා. අවුරුදු 50ක ලීසිං ක්‍රමයට අපි නාවලපිටියෙන් ඉඩමක් ගත්තා. 2017දී නැවත බෙවන් පෙරේරා මට කතා කරලා කිව්වා ආපහු ඒ වත්ත ජනවසමට ගන්නවා කියලා. මං කිව්වා අපේ ගිවිසුම් අනුව එහෙම ගන්න බැහැ කියලා. පස්සේ ඔහු මට තර්ජනය කළා. පහුවදා මගේ යාළුවෙක් සමඟ ඔහු මුණගැහෙන්න ගියා. මං ඇතුළේ ඉඳන් කතා කරලා එළියට එනකොට මගේ සපත්තු දෙක තිබුණේ නැහැ. එයා සපත්තු දෙක හැංගුවේ මං හිතන්නේ සර්පයෙක් දාන්න."

"මොකද මං බූට්ස් අඳින්නේ. මොහු සල්ලි දෙන්න කිව්වා ඒ ප්‍රශ්නය විසඳලා දෙන්නම් කියලා. මං කිව්වා ශතයක් දෙන්නේ නැහැ කියලා. පස්සේ ඒ වත්ත බෙවන් පෙරේරාගේ නමට හරවාගෙන. මං ඊට පස්සේ ගිහින් ලක්ෂ්මන් කිරිඇල්ල ඇමැතිතුමාට මේ ගැන කිව්වා. මේ වගේ කෙනෙකුට ‘ජනවසමේ’ මෙහෙම තනතුරක් දුන්නේ ඇයි කියලා මං ඇහුවා. මොනවාද තියෙන සුදුසුකම් කියලා මං ඇහුවා. පස්සේ කිව්වා මට කරන්න දෙයක් නෑ ඩිලන්ත මෙයා රනිල්ගේ මනුස්සයෙක්. මං ටික දවසකට රේස් එකකට රට ගිහින් ඉඳලා ආවාම මගේ අක්කා කතා කරලා කිව්වා පොලිසියේ ඩී.අයි.ජී. කෙනෙක් මාව හොයනවා කියලා. ඒ ප්‍රියන්ත ජයකොඩි මහත්තයට මං කතා කළාම කිව්වා ඔයාට මරණ තර්ජනයක් තියෙනවා මේ දවස් ටිකේ ප්‍රවේශමෙන් ඉන්න කියලා. මාතර රන්බඩු කඩයක් කඩපු චාමර කියලා කෙනෙක් අහුවුණා. ඔහුගේ අතේ ආයුධයක් තිබිලා හම්බ වුණා. ඩිලන්ත මාලගමුව මරන්න බෙවන් පෙරේරා දුන්න ආයුධය මේකයි කියලා ඔහු කියලා තියෙනවා. පෑලියගොඩ පොලිසියෙන් මට එන්න කියලා කටඋත්තරයක් ගත්තා. පස්සේ ඒ ගැන මොකුත්ම නැහැ. මං ගිහින් අගමැතිතුමාට කිව්වා බෙවන් පෙරේරා මාව මරන්න හදනවා කියලා. අගමැතිතුමා කිව්වා පොලිස්පතිතුමාට කියන්නම් කියලා. රංජිත් මද්දුමබණ්ඩාර ඇමැතිතුමාටත් කිව්වා. කිසිම දෙයක් වුණේ නැහැ. කාලයකට පස්සේ කොළඹ අපරාධ කොට්ඨාසයෙන් මට කිව්වා වහාම හම්බවෙන්න කියලා. සී.අයි. දිලීප් කියන කෙනාව මාරු කරා සුමාන දෙකක් යන්නත් කලින්. හිටපු පොලිස්පතිතුමාට කතා කරා, දන්න හැමෝටම කතා කරා කිසිම දෙයක් වුණේ නැහැ. මහ ලොකුවට කිව්වා මං රනිල් වික්‍රමසිංහගේ දකුණු අත මට මුකුත් කරන්න බෑ. බෙවන් පෙරේරා හැමවෙලේම පිස්තෝලයක් ඉණේ ගහගෙන ඉන්නේ. එයාට දීලා තියෙන්නේ බලපත්‍ර සහිත පිස්තෝලයක්. මේ ආණ්ඩුව ආපු ගමන්ම මං ගිහින් වැඩබලන පොලිස්පතිතුමාට දැනුම් දුන්නා. කොළඹ අපරාධ කොට්ඨාසයටත් දැනුම් දීලා වහාම මේ ගැන පරීක්ෂණයක් කරන්න උපදෙස් දීලා තියෙනවා. කර්මය පල දෙනවා වගේ හරියටම කාලෙකට පස්සේ බෙවන් පෙරේරාගේ නම පහුගිය දවස් ටිකේ කරළියට ආවා. මං හිතනවා වර්තමාන ආණ්ඩුවෙන් ඔවුන් ගැන පරීක්ෂණයක් කරලා දඬුවම් කරයි කියලා බලාපොරොත්තු වෙනවා."

මහමැතිවරණය අග්‍රාමාත්‍ය මහින්ද රාජපක්ෂ මහතා විසින් මෙහෙයවන බවත්, යාන්ත්‍රණය බැසිල් රාජපක්ෂ මහතා විසින් ක්‍රියාත්මක කරනු ඇති බවත්  ජනාධිපතිවරයා ලෙස තමන් ඊට සහාය දක්වන බව ජනපති ගෝඨාභය රාජපක්ෂ මහතා පැවැසීය.

පුවත්පත් කතුවරුන් හා මාධ්‍ය ආයතන ප්‍රධානීන් හා පැවැති හමුවකදී ඔහු මේ බව පැවැසීය.

එසේම පළාත් සභා මැතිවරණය හැකි ඉක්මනින් පවත්වන බවත්, මහ මැතිවරණය අනිවාර්යයෙන් ජයග්‍රහණය කරන බවත් ඔහු ප්‍රකාශ කළේය.

“මහ මැතිවරණය වෙනුවෙන් අපේ පිලේ ඉන්න හොඳම දේශපාලනඥයා මහින්ද රාජපක්ෂ. එතුමා මැතිවරණය මෙහෙයවයි. යාන්ත්‍රණය දුවවන්නේ බැසිල් රාජපක්ෂ. ඒක හංගන්න දෙයක් නෑ. ජනාධිපතිවරයා ලෙස මම ඒකට සහයෝගය දෙනවා. තුනෙන් දෙකක් ගන්න බලාපොරොත්තු වෙනවා. වැඩි ඡන්දයක් ගන්න පුළුවන් ලකුණක් අපි යොදාගන්නවා”