අත්‍යවශ්‍ය නොවන භාණ්ඩ වර්ග මෙරටට ආනයනය කිරීම තහනම් කිරීම වෙනුවට කොන්දේසි තුනක් යටතේ ආනයනය කිරීමට රජය තීරණය කර තිබෙනවා.
අත්‍යවශ්‍ය නොවන භාණ්ඩ 600කට ආසන්න සංඛ්‍යාවක් මෙරටට ආනයනය කිරීම සීමා කරමින් නිකුත් කිරීමට නියමිත රෙගුලාසි ඇතුළත් කැබිනට් පත්‍රිකාවට කැබිනට් මණ්ඩල අනුමැතියද හිමිව තිබෙනවා.
විදේශ විනිමය රටින් පිටතට ගලා යෑම පාලනය කිරීම වෙනුවෙන් ආනයන අධෛර්යමත් කිරීම සඳහා මුදල් අමාත්‍යාංශය සහ ශ්‍රී ලංකා මහ බැංකුව එක්ව මෙලෙස අත්‍යවශ්‍ය නොවන යැයි හඳුනාගත් භාණ්ඩ වර්ග ලැයිස්තුවක් සකස් කර තිබුණා.
මෙම භාණ්ඩ වර්ග මෙරටට ආනයනය කිරීම තහනම් කිරීම වෙනුවට කොන්දේසි තුනක් යටතේ ආනයනය කිරීමට ඉඩප්‍රස්ථාව ලබාදීමට කැබිනට් මණ්ඩලය තීරණය කර තිබෙන බව වාර්තා වනවා.
ඒ අනුව ඇතැම් භාණ්ඩ මෙරටට ගෙන්වීමේ දී විශේෂිත බලපත්‍ර ක්‍රමයක් හඳුන්වා දීමට නියමිතයි.
තවත් භාණ්ඩ සංඛ්‍යාවකට පැනවෙන බදු ප්‍රතිශත ඉහළ නැංවනු ඇතැයි පැවසෙනවා.
මීට අමතරව ඉතිරි භාණ්ඩ වර්ග සිමා කරමින් මෙරටට ආනයනය කිරීමට අවශ්‍ය වෙනත් විකල්ප ක්‍රම අනුගමනය කෙරෙනු ඇතැැයි වාර්තා වනවා.
මෙම නව ආනයන සීමාවන්ට අදාළ ගැසට් නිවේදනය කඩිනමින් නිකුත් කිරීමට මුදල් අමාත්‍යාංශය කටයුතු කරනු ඇතැයි සඳහන්.
ශ්‍රී ලංකා මහ බැංකුවේ හිටපු අධිපති ඩබ්ලිව්.ඩී. ලක්ෂ්මන්ගේ මැදිහත්වීම මත මීට පෙරද අත්‍යවශ්‍ය නොවන යැයි නම්කරන ලද භාණ්ඩ වර්ග 623ක් සඳහා ආනයන සීමා පනවන ලද අතර වත්මන් අධිපති අජිත් නිවාඩ් කබ්රාල් එම ධුරයට පත්වීමත් සමග එම සීමාකිරීම් ඉවත් කෙරුණා.
