වී තොග සුරැකුම් ලෙස තබාගෙන වී මිලදී ගැනීමට වී අලෙවි මණ්ඩලයට ණය පහසුකම් සපයන ලෙස ජනාධිපති ගෝඨාභය රාජපක්ෂ මහතා ලංකා සහ මහජන බැංකු වෙත උපදෙස් දී තිබෙනවා.
තරගකාරී ලෙස වී මිලදී ගෙන රජය සතුව ප්‍රමාණවත් වී සංචිතයක් පවත්වාගෙන යාම ඉලක්ක කරගනිමින් වැඩපිළිවෙළ ක්‍රියාත්මක විය යුතු බවයි ජනාධිපතිවරයා සඳහන් කළේ.
කොළඹ පිහිටි වී අලෙවි මණ්ඩලයේ ප්‍රධාන කාර්යාලය අද (04) පෙරවරුවේ නිරීක්ෂණය කළ අවස්ථාවේ ජනාධිපතිවරයා මේ බව සඳහන් කළා.
මහ කන්නයේ වී මිලදී ගැනීම, තොග රැස් කිරීම, අලෙවිය සහ හිඟයකින් තොරව වෙළෙඳපොළ සහල් අවශ්‍යතාව අඛණ්ඩව පවත්වාගෙන යාමට ගත හැකි පියවර විමසා බැලීම ජනාධිපතිවරයාගේ හදිසි නිරීක්ෂණ චාරිකාවේ අරමුණ වූ බව ජනාධිපති මාධ්‍ය අංශය සඳහන් කළා.
අතරමැදියන්ගෙන් තොරව වී ගොවියාට සාධාරණ මිලක් ලබාදීම සහ වෙළෙඳපොළේ සහල් හිඟයක් පවතින අවස්ථාවක වී තොග නිකුත් කිරීම වී අලෙවි මණ්ඩලයේ ප්‍රමුඛ කාර්යය වනවා.
පසුගිය රජය යටතේ 2017 සහ 2019 වසරවල වී ඇටයක හෝ ප්‍රමාණයක් මිලදීගෙන නොතිබීම, පරිභෝජනයට ගත හැකි වී තොග සත්ව ආහාර සේ සලකා පෞද්ගලික අංශයේ ව්‍යාපාරිකයන් කිහිප දෙනෙකුට ඉතා අඩු මුදලට ලබාදීම හේතුවෙන් ආයතනයට විශාල පාඩුවක් සිදුකර ඇති බව නිලධාරීහු පෙන්වා දුන්නා.
වී වලට සාධාරණ මිලක් නොලැබීම, අතරමැදියන්ට කොමිස් මුදල් බෙදී යාම, වී මිලදී ගැනීමේ දී පනවා තිබූ කොන්දේසි, ගබඩා නිසි අයුරින් නඩත්තු නොකිරීම යන කරුණු හේතුවෙන් ගොවියා සහ වී අලෙවි මණ්ඩලය අතර සබඳතාව දුරස් වී තිබෙනවා.
2020ට පෙර වසර පහක කාලයක් පැවති රුපියල් 35කට වඩා අඩු පාලන මිල 2020 මහ කන්නයේ දී රුපියල් 55ක අවමයකට ගෙන ඒමටයි වත්මන් රජය කටයුතු කළේ.
2022 මහ කන්නය වන විට වී කිලෝවක මිල රුපියල් 95ක තරම් ඉහළ අගයකට පැමිණීමෙන් ඉහළ වී තොගයක් මිලදී ගෙන ගබඩා කිරීමට හැකි වූ බව වී අලෙවි මණ්ඩලයේ උප සභාපති, දුමින්ද ප්‍රියදර්ශන මහතා පැවසුවා.
වී අලෙවි මණ්ඩලයට මෙට්‍රික් ටොන් 315,000ක සංචිතයක් පවත්වාගෙන යාමේ ධාරිතාවක් තිබෙනවා. එය ලක්ෂ 04ක දක්වා ඉහළ නැංවීමට අවශ්‍ය පියවර ගන්නා ලෙස ජනාධිපතිවරයා උපදෙස් දෙනු ලැබුවා.
ගතවූ දෙවසර තුළ ශ්‍රී ලංකා යුද හමුදාවේ ශ්‍රම දායකත්වයෙන් අලුත්වැඩියා කළ ගබඩා සංඛ්‍යාව 315කි. ඉතිරිව ඇති ගබඩා 35 ද කඩිනමින් ප්‍රතිසංස්කරණය කළ යුතු බව ජනාධිපතිවරයා පැවසුවා.
වී මිලදී ගැනීම කඩිනම් කිරීම සඳහා සහකාර ප්‍රාදේශීය කළමනාකරුවන් ලෙස උපාධිධාරීන් 40 දෙනෙකු සහ ගබඩා කටයුතු සඳහා බහුකාර්ය නිලධාරීන් 200 දෙනෙකු වහාම අනියුක්ත කිරීමට තීරණය කෙරිණ.
වී ගබඩා ආරක්ෂාව සඳහා අලි වැට ඉදි කිරීමට පියවර ගැනීමේ අවශ්‍යතාව ජනාධිපතිවරයා පෙන්වා දුන්නා.
වී අලෙවි මණ්ඩලය ලාභ උපයන ආයතනයක් ලෙස ගොඩනගන අතර කිසිඳු අක්‍රමිකතාවකට ඉඩ නොතබන ලෙස ජනාධිපතිවරයා නිලධාරීන්ට උපදෙස් දෙනු ලැබුවා.
