මහ මැතිවරණ සමයේ දේශපාලන වේදිකාවේ මතභේදාත්මක වාද විවාද කරගනිමින් වාග් ප්‍රහාරයට ලක්වු හිටපු ජනාධිපති මෛත්‍රිපාල සිරිසේන මහතා සහ රාජ්‍ය අමාත්‍ය රොෂාන් රණසිංහ මහතා අද (04) එකම ස්ථානයක එකට අසුන් ගෙන ඉතා සුහදව කතා කරමින් සිටියේය.
ඒ පොළොන්නරුව, පැරකුම් උයන ප්‍රදේශයේ ඉඳිකරන ලද වැඩිහිටි නිවාසය හිටපු ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් අද (04) උදෑසන විවෘත කළ අවස්ථාවේ දීය.
එහිදී ඔවුන් දෙපළ බොහෝ ළෙන්ගතු අයුරින් එකිනෙකාට ආචාර කරමින් සිනාමුසු මුහුණෙන් සිටිනු දක්නට ලැබුණි.
හිටපු ජනාධිපතිවරයාගේ සොහොයුරා වන ඩඩ්ලි සිරිසේන මහතාගේ මූල්‍ය ප්‍රතිපාදන මත එම වැඩිහිටි නිවාසය ඉඳිකර ඇත.
වැඩිහිටි නිවාසය විවෘත කිරීමේ අවස්ථාව සඳහා හිටපු ජනාධිපති මෛත්‍රීපාල සිරිසේන මහතා, ඉඩම් කළමනාකරණ කටයුතු රාජ්‍ය ව්‍යාපාර ඉඩම් හා දේපළ සංවර්ධන රාජ්‍ය අමාත්‍ය රොෂාන් රණසිංහ මහතා, පොළොන්නරුව දිස්ත්‍රික් පාර්ලිමේන්තු මන්ත්‍රී අමරකීර්ති අතුකෝරාළ සහ සමගි ජන බලවේගයේ පාර්ලිමේන්තු මන්ත්‍රී කිංස් නෙල්සන් යන මහත්වරු එක්ව සිටියේය.
