ඇඹිලිපිටිය නව නගරයේ පැවති මල්වර උත්සවයක සිදු වූ ගැටුමක් අතරතුරදී පොලිස් පහරදීමකින් මියගිය බව කියන සුමිත් ප්‍රසන්න ජයවර්ධන මහතාගේ මරණය සම්බන්ධ නඩු විභාගය ලබන නොවැම්බර් මස 23 වන දින දක්වා කල් තබා තිබේ.
ඒ, අද (24) එම නඩු විභාගය ඇඹිලිපිටිය අතිරේක මහේස්ත්‍රාක් ප්‍රසන්න ප්‍රනාන්දු මහතා ඉදිරියේ කැදවනු ලැබූ අවස්ථාවේදීය.
මෙම අවස්ථාව සදහා මියගිය සුමිත් ප්‍රසන්න මහතගේ මව, වැඩි මහල් සහෝදරයා මෙන්ම බිරිදගේ පියා පැමිණ සිටියේය.
නඩුව ආරම්භයේදීම අපරාධ පරික්ෂණ දෙපාර්තමේන්තුව වෙනුවෙන් පෙනී සිටි ප්‍රේමලාල් මහතා අධිකරණය හමුවේ වැඩිදුර වාර්තාවක් යොමු කරමින් කියාසිටියේ නඩුව සම්බන්ධව ඉදිරි කටයුතු සදහා නීතිපතිවරයාට රහස් පොලිස් පරික්ෂණ වාර්තාවේ පිටපතක් යවා ඇති බවත් ඒ සදහා තවමත් පිළිතුරු ලැබී නැති බවත්ය.
ඒ අනුව මෙම නඩු විභාගය නොවැම්බර් මස 23වන දිනට කල්තැබීය.
ඇඹිලිපිටිය - ප්‍රගීත් ජනක
