කොවිඩ් 19 වසංගත තත්ත්වය හේතුවෙන් ආර්ථිකයේ පසුබෑමක් සිදු වුව ද මසක් තුළ ඉතිහාසයේ වැඩිම අපනයන ආදායම වාර්තා කරමින් පසුගිය ජූලි මාසයේ රුපියල් කෝටි 19,800 ඉක්මවූ අපනයන ආදායමක් ශ්‍රී ලංකාවට හිමි ව තිබේ.

ශ්‍රී ලංකා රේගු සංඛ්‍යා ලේඛනවලට අනුව මේ වසරේ (2021) ජූලි මාසයේ දී රුපියල් කෝටි 21,768.32ක (අමෙරිකානු ඩොලර් මිලියන 1,099.41) අපනයන ආදායමක් වාර්තා කර ඇති අතර එය එක් මාසයක් තුළ වැඩිම අපනයන ආදායම ලෙස ඉතිහාසයට එක් වන බව අපනයන සංවර්ධන මණ්ඩලය පෙන්වා දෙයි.

පසුගිය 2020 වසරේ ජූලි මාසයේ දී අපනයන ආදායම ඇමෙරිකානු ඩොලර් මිලියන 1,085ක් වූ බව පෙන්වා දෙන අපනයන සංවර්ධන මණ්ඩලය එම අගය ඉක්මවා යමින් මේ වසරේ ජූලි මාසයේ දී අපනයන ආදායම ඉහළ ගොස් ඇතැයි පවසයි.

වැඩිම අපනයන ආදායම ඇඟලුම් අංශයෙන් ලැබී ඇති අතර එය අමෙරිකානු ඩොලර් මිලියන 452.55 ක් වේ. එසේම තේ අපනයනයෙන් අමෙරිකානු ඩොලර් මිලියන 115.13 ක ආදායමක් උපයාගෙන තිබෙන අතර රබර් ආශ්‍රිත නිෂ්පාදන අපනයනයෙන් ඇමෙරිකානු ඩොලර් මිලියන 96.65 ක් ද ලැබී ඇත. පොල් ආශ්‍රිත නිෂ්පාදන අපනයනයෙන් අමෙරිකානු ඩොලර් මිලියන 76.67 ක් වශයෙන් අපනයන ආදායම සඳහා ඉහළ දායකත්වයක් දුන් අංශ අතර වෙයි.