ප්‍රාදේශීය සභා මන්ත්‍රීවරයාගේ සිට පාර්ලිමේන්තු මන්ත්‍රීවරයා දක්‌වා සෑම මහජන නියෝජිතයකු සඳහාම චර්යා ධර්ම පද්ධතියක්‌ පෙබරවාරි 02 වැනිදා පාර්ලිමේන්තුවට ඉදිරිපත් කරන බව සෞඛ්‍ය අමාත්‍ය වෛද්‍ය රාජිත සේනාරත්න මහතා පවසයි.
අමාත්‍යවරයා මේ බව පැවසූවේ ඊයේ (21) පැවති ප්‍රවෘත්ති සාකච්ඡාවකට එක්වෙමිනි.
මෙරට දේශපාලන ඉතිහාසයේ ප්‍රථම වරට මහජන නියෝජිතයන් සඳහා මෙවැනි චර්යාධර්ම පද්ධතියක්‌ හඳුන්වාදෙන පළමු අවස්‌ථාව මෙය බව ද ජාතික විධායක සභාවේ තීරණයක්‌ මත මෙය ගෙන එන බව ද ඇමැතිවරයා පැවසී ය.
මන්ත්‍රීවරුන්ගේ චර්යාධර්ම පද්ධතිය කෙටුම්පත් කිරීමේ වගකීම රජය විසින් ජනතා විමුක්‌ති පෙරමුණේ නායක අනුර කුමාර දිසානායක මහතාට පවරා ඇතැයි ද මෙම චර්යා ධර්ම පද්ධතියට අනුව අද මන්ත්‍රීවරයා ලෙස හඳුන්වන පුද්ගලයා සම්පූර්ණයෙන් ම මහජන සේවකයකු බවට පත්වන බව ද රාජිත සේනාරත්න මහතා පෙන්වා දුන්නේය.
චර්යාධර්ම පද්ධතිය හඳුන්වා දීමෙන් පසුව එහි තිබෙන නීති රීති අනුව මන්ත්‍රීවරයකු වීමට ඉදිරිපත් වන පුද්ගලයකුට දෙවරක්‌ නොව දසවරක්‌ සිතා බලා නාමයෝජනා ලබා දීමට සිදුවන බව ද හෙතෙම වැඩිදුරටත් පැවසීය.
