ජනාධිපති මහින්ද රාජපක්ෂ මහතා නැවත තේරී පත්වීමට සාක් රාජ්‍ය නායකයින්ගෙන් උණුසුම් සුබ පැතුම්, ඔහුගේ ජයග්‍රහණය පිළිබඳ ඔවුන් දැඩි විශ්වාසය පළ කරති.
18 වන සාක් සමුළුවට පරිබාහිර ව පැවති ද්විපාර්ශ්වික සාකච්ඡාවන්හි දී ජනාධිපති මහින්ද රාජපක්ෂ මහතා හමු වූ බොහෝ රාජ්‍ය නායකයන්, ඉදිරියේ දී පැවැත්වීමට නියමිත ජනාධිපතිවරණයේ දී එතුමා නැවත තේරී පත්වීම සඳහා සුබ පැතූ අතර එතුමාගේ ජයග්‍රහණය පිළිබඳ දැඩි විශ්වාසය පළ කළහ.
ජනාධිපති රාජපක්ෂ මහතා සමඟ පැවති සාකච්ඡාවේ දී මාල දිවයින් ජනාධිපති යමීන් අබ්දුල් ගයූම් (Yameen Abdul Gayoom) මහතා, "මැතිවරණය කැඳවීම පිළිබඳ ශුභාශිංසන. අපගේ හෘදයාංගම බලාපොරොත්තුව සහ ප්‍රාර්ථනාව පෙර අවස්ථාවල දී මෙන් ම විජයග්‍රහණයක් තුළින් ඔබ නැවත තේරී පත්වීමයි. මෙය කිසිසේත් ම ඔබට අපහසු කර්තව්‍යයක් විය නො හැකියි" යනුවෙන් පැවසුවේය.
ඉන්දීය අග්‍රාමාත්‍ය නරේන්ද්‍ර මෝදී (Narendra Modi) මැතිතුමා දහඅටවන සමුළුව විවෘත කරමින් රාජ්‍ය නායකයන් ඉදිරියේ කළ සිය දේශනයේ දී "ජනාධිපති රාජපක්ෂ ළඟදීම එකකට යනු ඇත (නැවත තේරී පත්වීම), මම ඔහුට සුබ පතනවා" යැයි අවධාරණය කළේය.
"ඔබට මාගේ සුබ පැතුම් අවශ්‍ය වන්නේ නැහැ නමුත් මම ඔබට සුබ පතනවා," යැයි සාක් සමුළුව අතරවාරයේ පැවැත්වූ ද්විපාර්ශ්වික සාකච්ඡාවේ දී භූතාන අග්‍රාමාත්‍ය ල්යොන්චෙන් සෙරිං තොබ්ගයි (Lyonchhen Tshering Tobgay) පැවසීය. "ඔබ දිනන බව මා දන්නවා."
ජනාධිපති රාජපක්ෂ මැතිතුමා නේපාල අග්‍රාමාතය සුෂිල් කොයිරාල (Sushil Koirala) සමඟ සාකච්ඡා පැවත්වූ අවස්ථාවේ, එම හමුවට එක් වී සිටි හිටපු නියෝජ්‍ය අග්‍රාමාත්‍ය හා විදේශ කටයුතු අමාත්‍ය සුජාතා කොයිරාල මෙනවිය (Sujata Koirala) "අපි ඔබව නැවත ජනාධිපති ලෙස දකීවී" යනුවෙන් පැවසීය.
