මෙලෙස ප්‍රහාරය එල්ල වී ඇත්තේ ගලහගම ධර්මරාජ විද්‍යාලය අසල පිහිටි කාර්යාලයට වන අතර එම කාර්යාලය ස්ථාපනය කොට ඇත්තේ ආර්.ඩී.ආරියදාස නැමැති පුද්ගලයාට අයත් එළවළු වෙළඳසලක කොටසකය. 

 

එම කාර්යාලයේ පරිහරණය සඳහා යොදාගත් ත්‍රිරෝද රථයකට ද මැර කණ්ඩායම විසින් ගිනි තබා ඇති බවත් එම ප්‍රහාරයෙන් වෙළඳසැලට සහ ත්‍රිරෝද රථයට අලාභ සිදුවී ඇති බවත් එම සංවිධානය පෙන්වා දෙයි. මෙම ප්‍රහාරයෙන් UP- WG 4629 දරණ ත්‍රීරෝද රථය භාවිතයට ගත නොහැකි තරමටම විනාශ වී ඇත. 

 

බදුල්ල දිස්ත්‍රික් එක්සත් ජාතික පක්ෂ අපේක්ෂක ජයන්ත කන්නන්ගර මහතා පවසන්නේ මෙම ප්‍රහාරය එක්සත් ජනතා නිදහස් සන්ධානයේ අපේක්ෂ ඒ.එම්.බුද්ධදාස මහතාගේ ආධාරකරුවන් විසින් සිදු කර ඇති බවයි. 

 

”එජාප ප්‍රධාන ඇමති අපේක්ෂක හරීන් ප්‍රනාන්දු මහතාගේ සහභාගීත්වයෙන් අප මෙම ස්ථානයේ සාර්ථක රැස්වීමක් පැවැත්වූවා. එයින් පසුව එම රැස්වීම සංවිධානය කළ අයට රාත්‍රි කාලයේ ජීප් රථ වලින් පැමිණෙන කණ්ඩායම් තර්ජනය කරනවා.‘ යැයි ද කන්නංගර මහතා තම සංවිධානය වෙත යොමුකළ පැමිණිල්ලක දැක්වෙන බව කැෆේ සංවිධානය කියයි. 

 

මේ අතර ඌව පළාත් සභාවට මොණරාගල දිස්ත්‍රීක්කයෙන් තරඟ කරන ප්‍රජාතන්ත්‍රවාදී පක්ෂයේ අපේක්ෂක වැල්ලාන විතානගේ ප්‍රියන්ත කුමාර මහතාට අද (21)අළුයම 2.00 ට පමණ මැර කණ්ඩායමක් විසින් පහර දී ඇති අතර ඔහු සහ ඔහුගේ ආධාරකරුවන් දෙදෙනෙකු කතරගම රෝහළට ඇතුළත් කර ඇතැයි ද එම සංවිධානය සඳහන් කරයි. 

 

පළාත් සභා මැතිවරණය ආරම්භවීමෙන් පසුව මේ දක්වා බදුල්ල දිස්ත්‍රික්කයෙන් ප්‍රචණ්ඩක්‍රියා 4 ක් වාර්තා වී ඇති අතර හාලිඇල ප්‍රදේශයෙන් 2 ක්, මහියංගනය 1ක් සහ ඌව පරණගම 1ක් ලෙස මෙම සිදුවීම් වාර්තා වී ඇත. 

 

මොණරාගල දිස්ත්‍රික්කයෙන් ප්‍රචණ්ඩ ක්‍රියා 2ක් වාර්තා වී ඇති අතර ඒ වැල්ලවාය, හඳපානාගල සහ කතරගමින් වශයෙනි.