යතුරු පැදිකරුවන්ට ෆුල්ෆේස් හෙල්මට් භාවිතා කිරීමේ නීතිය ක්‍රියාත්මක නොකිරීමට තීරණය කිරීමට නියමිත බව මහජන සාමය, ආපදා කළමනාකරණ හා ක්‍රිස්තියානු කටයුතු පිළිබඳ අමාත්‍ය ජෝන් අමරතුංග මහතා ඒෂීයන්මිරර් වෙබ් අඩවියට පැවසුවේය.
එම ෆුල්ෆේස් හෙල්මට් තහනම ගැන විවිධ පුද්ගලයින්ගෙන් විශාල වශයෙන් චෝදනා එල්ල වන බවත් යතුරු පැදියකින් ගමන් කිරීමේදී සිය ආරක්ෂාව වෙනුවෙන් ෆුල්ෆේස් හෙල්මට් භාවිත කරන බවට එම පුද්ගලයින් ප්‍රකාශ කර ඇති බවත් අමාත්‍යවරයා පැවසී ය.
මේ හේතුවෙන් එම නීතිය ක්‍රියාත්මක කිරීම දැනට සිදු නොකරන ලෙස අදාල නිලධාරීන්ට දැනුම් දීමට නියමිත බවද ඔහු වැඩිදුරටත් පැවසී ය.
මුහුණ ආවරණය වන පරිදි හිස් ආවරණ පැලඳ සිදුකළ කොල්ලකෑම් පිළිබඳ සිද්ධීන් 14ක් මේ වන විට වාර්තා වීම හේතුවෙන් යතුරු පැදිකරුවන්ට ෆුල්ෆේස් හෙල්මට් පැළඳීම ලබන 21 වැනිදා සිට තහනම් කරන බව පොලිසීය පසුගියදා පැවසී ය.
ඒ අනුව ලබන 20 වැනිදායින් පසු ෆුල්ෆේස් හෙල්මට් භාවිත කරන්නන්ට එරෙහිව නීතිය කි‍්‍රයාත්මක කරන බව පොලිස් මාධ්‍ය ප්රකාශක, ජ්‍යෙෂ්ඨ පොලිස් අධිකාරී අජිත් රෝහණ මහතා සඳහන් කර තිබිණි.
යතුරු පැදිකරුවන් භාවිතා කරන සම්පූර්ණ මුහුණ ආවරණය වන සහ කළු ආවරණ සහත හිස් වැසුම් භාවිත කරන්නන් සම්බන්ධයෙන් නීතිය තරාතිරම නොබලා ක්‍රියාත්මක කරන බව ද ඔහු පැවසිය.
ෆුල් ෆේස් හෙල්මට් තහනම් කරමින් මීට පෙරද නීති ගෙනඒමට සැලසුම් කළද ඊට එරෙහිව ගොඩනැගුණු විරෝධතා හේතුවෙන් එය ව්‍යර්ථ විය.
පොලිස් මාධ්‍ය ප්රකාශක අජිත් රෝහණ මහතා විසින් මේ සම්බන්ධයෙන් මීට පෙර නිකුත් කර ඇති නිවේදනය මෙසේය.
ආරක්‍ෂිත හිස් වැසුම් සම්බන්ධ නිතිය 1991 ජනවාරි 11 වන දින අංක 644 / 26 දරණ අති විශේෂ ගැසටි පත‍්‍රයේ රෙගූලාසි වල සදහන්ව ඇති අතර එම රෙගූලාසි 1981 අංක 21 දරණ මෝටර් වාහන පනතේ 158 (2) හා 237 වගන්තිය යටතේ ප‍්‍රවාහන විෂය භාර අමාත්‍යවරයා විසින් සාදා ඇත.
