මේ වන විට රට පාලනය කරන්නේ ජනාධිපති ගෝඨාභය රාජපක්ෂ මහතා හෝ මහින්ද රාජපක්ෂ මහතා නොවන අතර එය මංකොල්ලකාර කල්ලියක් විසින් සිදුකරමින් සිටින බව සමඟි ජන බලවේගයේ පාර්ලිමේන්තු මන්ත්‍රී හේෂා විතානගේ මහතා පැවසුවේය.
එය සීනි වංචාවෙන්ම පැහැදිලි වන බව මන්ත්‍රීවරයා සඳහන් කළේය.
ආණ්ඩුව මේ තරම් ඉක්මණින් හොරකම් කිරීමට හේතුව වී ඇත්තේ මාස හතරක් වැනි ඉතා කෙටි කාලයකින් ආණ්ඩුවේ ජනප්‍රියතාව එකපාරම කඩාගෙන වැටීම බව හෙතෙම පෙන්වා දුන්නේය.
''ආණ්ඩුවේ ජනප්‍රියතාව කඩාගෙන වැටීමත් හරහා ආණ්ඩුවේ ගමන එන්න එන්න කෙටි වෙනවා කියලා පේනවා. කෙටිවන ගමන හරහා මේකේ රැළි වැටිච්ච බඩවල් පුරවාගන්න ජාවාරම්කාරයෝ ටික, ආණ්ඩුව ගේන්න දඟලපු උදවිය දැන් හොරකම් කරන්න පටන් අරන් තියෙනවා. දැන් ආණ්ඩුවට එය කළමනාකරණය කරගන්න බැහැ''
අද මහින්ද රාජපක්ෂ මහතාට අවශ්‍ය දේ හෝ ගෝඨාභය රාජපක්ෂ මහතාට අවශ්‍ය දේ නොව වෙනත් කල්ලියකට අවශ්‍ය දේ සිදුවෙමින් පවතින් බව ඔහු සඳහන් කළේය.
කොළඹ වාරයේ නැගෙනහිර ජැටිය විකිණීමට සැරසෙන්නේ ද එහි ප්‍රතිඵලයක් ලෙස බව කියා සිටි හේෂා විතානගේ මහතා වැඩිදුරටත් කියා සිටියේ පෙර නොවූ විරූ ලෙස නැගෙනහිර ජැටිය බේරාගැනීම වෙනුවෙන් දේශපාලඥයින්ට එහා ගීය දේශප්‍රේමී කඳවුරක් නිර්මාණය වෙමින් තිබෙන බවය.
මන්ත්‍රීවරයා මෙම අදහස් පළකළේ ඊයේ (20) කොළඹදී පැවති මාධ්‍ය හමුවකදීය.
