බෝසතාණන් වහන්සේ සත්‍ය අවබෝධ කර ගැනීමට සය අවුරුද්දක් දුෂ්කර ක්‍රියා සිදු කළාක් මෙන් පස් අවුරුද්දක් දුෂ්කර ක්‍රියා කිරීමට මහජනතාවට සිදු වී ඇතැයි හිටපු ඇමැති පාලිත රංගේ බණ්ඩාර මහතා පැවැසීය.
පුත්තලමේදී පසුගියදා පැවති එක්සත් ජාතික පක්ෂ ප්‍රතිසංවිධාන වැඩසටහන අමතමින් ඒ මහතා මේ බව සඳහන් කළේය.
ඊයේ කොළඹ ජනතාව පාරට බැස කෑම ඉල්ලා යදින තත්ත්වයකට පත්ව ඇති බව කී ඒ මහතා සෞඛ්‍ය විෂයට ඇමැතිවරුන් හතරක් පත් කර තිබියදීත් කොරෝනා වසංගතය පාලනය කර ගැනීමට ආණ්ඩුව අසමත් වී ඇති බවද කීය.
මහින්ද රාජපක්ෂ මහතා ජනාධිපති ධුරය දරන විට අවස්ථා දෙකකදී රටේ දේපළ චීනයට සින්නක්කරව ලබා දුන් බවත් ශ්‍රැන්ග්‍රිලා හෝටලය ඉඳි කිරීමට හමුදා මූලස්ථානය පිහිටි භූමියත් කොළඹ වරාය නගරය ඉඳි කිරීමට කොළඹින් තවත් භූමියක් ලබා දුන් බවත් කී ඒ මහතා වැඩි දවසක් නොගිහින් පුත්තලමින්ද සින්නක්කරයට චීනයට ඉඩම් ලබා දීමට ආණ්ඩුව කටයුතු කරමින් සිටින බවත් කීය. නොරොච්චෝලේ විදුලි බලාගාරයේ හතර වැනි අදියර ඉඳි කිරීම සඳහා චීන සමාගමකට භූමිය ලබා දීමට කටයුතු සිදු වෙමින් පවතින බවත් කී ඒ මහතා එහි කිසිම අයිතියක් අප රටට හිමි නොවන බවත් සඳහන් කළේය.
එම ඉඩමේ නිෂ්පාදනය කරන විදුලි බලය මුදල් දී ලබා ගැනීමට අප රටට සිදු වන බවද කී ඒ මහතා ඉඩම සින්නක්කරයට විකිණීම සඳහා බාධාවක් වන මහජන උපයෝගීතා කොමිසම් සභාව වසා දැමීමට ආණ්ඩුව කටයුතු කළ බවද පැවැසීය.
