ඕස්ට්‍රේලියාවේ පදිංචිව සිටින හිටපු මාධ්‍යවේදිනියක් වන යුරේකා ද සිල්වා අත්අඩංගුවට ගැනීම සඳහා නියෝගයක් ලැබී ඇති බව වාර්තා වෙයි.
බලධාරීන්ට කොරෝනා වසංගතය පාලනය කර ගැනීමට නොහැකි වී තිබෙන බවත් ඒ නිසා හඳුනා නොගත් කොවිඩ්-19 ආසාදිත රෝගීන් මහ මඟ මිය යන බවත් සඳහන් වන ලිපියක් ඇය විසින් ෆේස්බුක් සමාජ මාධ්‍ය ඔස්සේ බෙදාගැනීම ඇයට විරුද්ධව එල්ලව තිබෙන චෝදනාව වේ.
පොලිස් මාධ්‍ය ප්‍රකාශක අජිත් රෝහණ මහතා ප්‍රකාශ කර සිටියේ යුරේකා ද සිල්වා සම්බන්ධයෙන් මේ වන විට පරික්ෂණයක් ආරම්භ කර ඇති බවයි.
යුරේකා ද සිල්වා සිරස මාධ්‍ය ජාලයේ මාධ්‍යවේදිනයක් ලෙස කටයුතු කර ඇති අතර එම මාධ්‍ය ජාලයේ නම හෙළි නොකළ පුද්ගලයෙකු ඒෂියන් මිරර් වෙත පවසා සිටියේ ඇය තවදුරටත් සිරස මාධ්‍ය ජාලය සමඟ සම්බන්ධතාවයක් නැති බවත්, ඇය සිය සැමියා සමඟ කාලයකට පෙර ඕස්ට්‍රේලියාවේ පදිංචිය සඳහා ගිය බවයි.
ජපානයේ සිටින ශ්‍රී ලාංකිකයෙකු ද මෙලෙස අසත්‍ය පුවත් ෆේස්බුක් සමාජ මාධ්‍ය ඔස්සේ බෙදා හරිමින් සිටින බවත් එම පුද්ගලයා සම්බන්ධයෙන් ද ආගමන විගමන කටයුතු දෙපාර්තුමේන්තුව සමඟ එක්ව පරික්ෂණයක් ආරම්භ කර ඇති බව පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසා සිටියේය.
ඔහු වැඩිදුරටත් කියා සිටියේ එම පුද්ගලයාද ශ්‍රී ලංකාවට පැමිණ විගස අත්අඩංගුවට ගැනීමට කටයුතු කරන බවයි.
මෙම අසත්‍ය පුවත් ප්‍රචාරය කිරීම සම්බන්ධයෙන් තවත් පුද්ගලියන් 27 දෙනෙකු ගැන පොලිස් පරික්ෂණ ආරම්භ කර ඇතැයිද පොලිස් මාධ්‍ය ප්‍රකාශකවරයා සඳහන් කළේය.
කෙසේ වෙතත් විපක්ෂය විසින් පාර්ලිමේන්තුවේ දී ආණ්ඩුවට චෝදනා කරමින් පවසා සිටියේ ආණ්ඩුව විසින් සමාජ මාධ්‍ය ඔස්සේ අදහස් ප්‍රකාශ කිරීමේ නිදහස භාවිත කරන පිරිස් හට එරෙහිව දඩයමක් දියත් කරමින් සිටින බවයි.
පාර්ලිමේන්තුවේදී අදහස් දක්වමින් සමගි ජන බලවේග පාර්ලිමේන්තු මන්ත්‍රී ඉම්තියාස් බාකීර් මාකර් මහතා කියා සිටියේ සමාජ මාධ්‍යවල “අසත්‍ය තොරතුරු” ප්‍රචාරය කිරීම සම්බන්ධයෙන් අත්අඩංගුවට ගැනීම සඳහා මාධ්‍යවේදීන් 200 දෙනෙකුගේ නම් සඳහන් ලැයිස්තුවක් රජය විසින් පොලීසියට භාර දී ඇති බවයි.
