කොවිඩ් 19 රෝගී තත්ත්වයෙන් මිය යන රෝගීන් භූමිදානය කිරීම සඳහා රට තුළින් ඊට සුදුසු වියළි ඉඩමක් සොයන ලෙස ජනාධිපති ගෝඨාභය රාජපක්ෂ මහතා සෞඛ්‍ය බලධාරීන්ට උපදෙස් දුන් බව ඩේලි මිරර් පුවත්පත වාර්තා කරයි.
ඒ කොවිඩ් 19 රෝගී තත්ත්වය හේතුවෙන් මියයන සිය ජාතිකයින් භූමිදානය කිරීමට අවස්ථාව ලබා දෙන ලෙස මුස්ලිම් ප්‍රජාව දිගින් දිගටම කරන ඉල්ලීම හේතු කොට ගෙනය.
මේ වන විට කොවිඩ් 19 රෝගයෙන් මිය යන සියලු රෝගීන්ව ආදාහනය කිරීමට රජය ප්‍රතිපත්ති මේ තීරණයක් ගෙන තිබේ.
මෙම කරුණ පසුගිය කැබිනට් මණ්ඩල රැස්වීමේ දී ද සාකච්ඡා වූ බව වාර්තා කරන ඩේලි මිරර් පුවත්පත ජනාධිපතිවරයා හා කැබිනට් මණ්ඩල සාමාජිකයින් කිහිප දෙනෙක් ද මේ පිළිබඳව සාකච්ඡා කොට තිබෙන අතර එහිදී වෙනත් රටවල කොවිඩ් 19 රෝගීන් මිය යාමෙන් පසු භූමිදානය කරන ආකාරය පිළිබඳව අවධානය යොමු කර තිබේ.
මෙම ප්‍රශ්නය අධිකරණ ඇමැති ජනාධිපති නීතිඥ අලි සබ්රි මහතා විසින් කැබිනට් මණ්ඩලයේ දී මතු කර තිබෙන අතර එහිදී අන් රටවල කොවිඩ් 19 රෝගීන් භූමිදානය කරන ආකාරයට මෙරට ද සිදු කිරීමට තිබෙන හැකියාව පිළිබඳව ජනාධිපතිවරයාගේ අවධානය යොමු වී තිබේ.
මේ වන විට ජනාධිපතිවරයාගේ නියෝගය මත ඒ සඳහා සුදුසු ඉඩමක් සෞඛ්‍ය බලධාරීන් සොයමින් සිටින බව ද වාර්තා කරන ඩේලි මිරර් පුවත්පත මේ සම්බන්ධයෙන් සෞඛ්‍ය බලධාරීන් හා මුස්ලිම් ආගමික නායකයින් අතර සාකච්ඡාවක් සිදු වූ බව ද සදහන් කරයි.
