August 11, 2020

රටේ වත්මන් ආර්ථික තත්වය සම්බන්ධයෙන් පැහැදිලි කරමින් හිටපු අග්‍රාමාත්‍ය, එක්සත් ජාතික පක්ෂයේ නායක රනිල් වික්‍රමසිංහ මහතා විසින් ප්‍රකාශයක් නිකුත් කර තිබේ. 

"කොරෝනා වසංගතය මුළු මහත් ලෝකයේම ආර්ථිකයට දැඩි ලෙස බලපෑම් කර තිබෙනවා. දැනට කර ඇති පුරෝකථන අනුව ඉදිරියේදී ලෝක ආර්ථික වර්ධනය 3%ක සෘණ අගයක් ගන්නවා. ලංකාවේ තත්වයත් එසේමයි. අපේ ඇඟළුම් කර්මාන්තයෙන් ලැබෙන ආදායම 60%කින් පහත වැටෙනවා. සංචාරක කර්මාන්තයෙන් ආදායම් ලැබෙන්නෙ නෑ. විදේශ රැකියා ආදායම් 20%කින් අඩුවෙනවා. විදේශ විනිමය ආදායම හොඳටම පහත වැටෙනවා.  අනෙක් අතින් රජයේ ආදායම් අඩුවෙලා. ඒ අතර ආණ්ඩුව විසින් ගත් යම් යම් ප්‍රතිපත්ති තීරණ නිසා රජයේ ආදායම් තවත් පහළ වැටෙමින් යනවා. මේ නිසා අපේ ආර්ථික වර්ධනය සෘණ 3.50ක් පමණ වනු ඇතැයි අපේක්ෂා කරනවා.  ඒ අතරතුර ආනයන තහංචි පැනවීම රටේ ආර්ථිකයට අහිතකර ලෙස බලපා තිබෙනවා. අපේ සිල්ලර වෙළඳාමෙන් සැලකිය යුතු ප්‍රතිශතයක් රඳා පවතින්නේ ආනයනික භාණ්ඩ මතයි. ඒවගේම ස්වදේශීය කර්මාන්ත ගණනාවක් තමන්ගේ නිෂ්පාදන අමුද්‍රව්‍ය ලෙස ආනයනික අමුද්‍රව්‍ය පාවිච්චි කරනවා.  ඒ සියල්ල මැද රුපියල් බිලියන 200ක මුදල් අච්චු ගසා වෙළඳපොලට නිකුත් කර තිබෙනවා. ආර්ථික වර්ධනය සෘණ අගයක් තියෙද්දී මුදල් අච්චු ගැසීමෙන් ඇතිවෙන්නේ ඉතා අහිතකර ප්‍රතිඵලයක්. "

"පසුගිය දිනවල රටබීම හල් ඉදිරිපිට තිබුණු පෝලිම් ගැන මාධ්‍ය ප්‍රවෘත්ති මැව්වාට දිගම පෝලිම තිබුණේ එතන නොවෙයි, උකස් බඩු කඩේ ඉදිරිපිටයි. ලොතරැයිපත් අලෙවි කරන්නාගේ සිට ත්‍රිරොද රථ රියදුරා දක්වාත් කම්කරුවාගේ සිට කලාකරුවාත් දෛනික ආදායමෙන් යැපෙන අය, ස්වයං රැකියා කරන අය අද අසරණ තත්වයකට පත්වෙලා. පුද්ගලික අංශයේ රැකියා ගණනාවක් අස්ථාවර වෙලා. අඩු තරමින් රැකියා ලක්ෂ 5ක් පමණ අහිමි වන බව පෙනෙනවා. දැනට ක්‍රියාත්මක කරන මේ පැලැස්තර විසඳුම් මඟින් අර්බුදය තවතවත් මෝරනවා මිස ලිහිල් වෙන්නේ නෑ. ආර්ථිකය ශක්තිමත් කිරීමේ හැකියාවක් ඇති දේශීය ක්ෂේත්‍ර ගණනාවක් කඩාවැටෙමින් පවතිනවා. මේ ක්ෂේත්‍රයන් ආරක්ෂා කරගැනීම සඳහා පිළිවෙතක් සැකසිය යුතුයි. ලෝකයේ බොහෝ රටවල් මේ ක්ෂේත්‍ර ආරක්ෂා කරගැනීම සඳහා විශාල වශයෙන් මුදල් වෙන්කර තිබෙනවා. බොහෝ රටවල් දළ දේශීය නිෂ්පාදනයෙන් 10%ක් පමණ මේ සඳහා යෙදවීමට ක්‍රියා කරගෙන යනවා. නමුත් කණගාටුවට අපේ රටේ වෙන්කර ඇත්තේ 2%ක පමණ ඉතා සුළු මුදලක්. එමඟින් ප්‍රතිඵලයක් අත්වන්නේ නෑ. මේ ක්ෂේත්‍ර කඩා නොවැටී පැවතීමට පියවර ගන්නේ නැතිනම් තවත් අවුරුදු ගණනාවකට අපේ රටට හිස් ඔසවන්නට ලැබෙන්නේ නෑ" යනුවෙන් ඒ මහතා සඳහන් කළේය. 

එක්සත් ජාතික පක්ෂයේ නායකයාගෙන් ඉවත් වූයේ ඒ සඳහා බලපෑ කරුණු ගණනාවක් තිබූ හෙයින් වන අතර නැවත එම උරචක්‍රමාලය බෙල්ලේ එල්ලා ගෙන ජනතා අප්‍රසාදයට පත් වීමට අවශ්‍ය නොමැති බව හිටපු පාර්ලිමේන්තු මන්ත්‍රී ෆීල්ඩ් මාෂල් සරත් ෆොන්සේකා මහතා අවධාරණය කරයි.

ඒ අනුව එක්සත් ජාතික පක්ෂය සමඟ සමඟි ජන බලවේගය කිසිලෙසකින්වත් එකතු නොවන බව ෆොන්සේකා මහතා පවසයි.

විපක්ෂය ලෙස මැතිවරණය කල් දමා ගැනීමට උත්සහ කරන්නේ එක්සත් ජාතික පක්ෂය හා සමඟි ජන බලවේගය නැවත එකතු වීමට යන ප්‍රචාර සම්පූර්ණයෙන් අසත්‍ය බව ඔහු සඳහන් කරයි.

එක්සත් ජාතික පක්ෂය සමඟ එකතු වී මැතිවරණයෙන් අතු ගෑවී යාමට හෝ ආණ්ඩුවක් කරගෙන යාමට නොහැකි තත්ත්වයට පත්වීමට හෝ එවැනි අසාර්ථක රාජ්‍ය පාලනයක් කිරීමට අවශ්‍ය නොමැති බවද ඔහු කියා සිටියි.

රාජිත සේනාරත්න මහතාගේ අත්අඩංගුවට ගැනීම දේශපාලන පළිගැනීමක් බවද සරත් ෆොන්සේකා මහතා  පවසන අතර එම සිදුවීම රටේ කිසිදු පුද්ගලයෙකුට වැදගත් දෙයක් නොවන අතර, රටේ අනාගතයට හෝ වර්තමානයට ද වැදගත් ප්‍රශ්නයක් නොවන බව ඔහු පෙන්වා දෙයි.

මැතිවරණ සමයේ දී ජාතික සමගි ජනබලවේගයේ නායක සජීත් ප්‍රේමදාස මහතාට හා ඔහුගේ හිතවාදීන්ට ප්‍රහාර එල්ල කිරීම සඳහා එක්සත් ජාතික පක්ෂ රනිල් වික්‍රමසිංහ මහතා විසින් වෙනමම බලකායක් නිර්මාණය කොට තිබෙන බව වාර්තා වේ.

හිටපු ඇමතිවරුන් වන වජිර අබේවර්ධන හා දයා ගමගේ , හිටපු රාජ්‍ය ඇමතිවරුන් වන පාලිත තෙවරප්පෙරුම, පාලිත රංගේ බණ්ඩාර හා රුවන් විජේවර්ධනත් හිටපු පාර්ලිමේන්තු මන්ත්‍රීවරුන් වන සංගීත් සමරසිංහ හා ලක්ෂ්මන් විජේමාන්න යන මහත්වරුන් ඒ බලකායට ඇතුළත් කොට තිබේ.

ජාතික සමගි ජනබලවේගයේ නායකයාට මෙන්ම එහි අපේක්ෂකයන්ට දැඩි වාග් ප්‍රහාර එල්ල කිරීම මෙම බලකායට පැවරී ඇති කාර්ය භාරය වේ. මේ වනවිටත් එහි නියෝජිතයන් විටෙන් විට සජිත් ප්‍රේමදාස පාර්ශවයට ප්‍රහාර එල්ල කරමින් සිටි.

මැතිවරණ කොමිසම විසින් ජුනි මස 20 වනදාට පැවැත්වීමට යෝජනා කර තිබෙන මහ මැතිවරණය එදිනට පැවැත්වීමට නොහැකි බව එක්සත් ජාතික පක්ෂ නායක, හිටපු අග්‍රාමාත්‍ය රනිල් වික්‍රමසිංහ මහතා ඉන්දියාවේ ද හින්දු පුවත්පත සමඟ සාකච්ඡාවකට එක්වෙමින් ප්‍රකාශ කර තිබේ.

පවතින කොරෝනා වසංගත තත්වය හමුවේ එදින මහා මැතිවරණයක් පැවැත්වීමට සුදුසු වාතාවරණයක් රටේ ඇති වෙතැයි සිතීම අපහසු බව වික්‍රමසිංහ මහතා එහිදී වැඩිදුරටත් සඳහන් කොට ඇත.

මේ අතර පැෆරල් සංවිධානයේ සභාපති රෝහණ හෙට්ටිආරච්චි මහතා ද ජුනි 20 මහමැතිවරණය පැවැත්වීමට නොහැකි බවත් එදිනට මහ මැතිවරණය පැවැත්වුවහොත් ඉතා සුළු පිරිසක් ඡන්දය දීමට පැමිණෙනු ඇති බව ඇතැම් රූපවාහිනි මාධ්‍ය අමතා ප්‍රකාශ කොට ඇත.

එළඹෙන මහ මැතිවරණය සම්බන්ධයෙන් එක්සත් ජාතික පක්ෂ නායක රනිල් වික්‍රමසිංහ මහතා හා එම පක්ෂයෙන් වෙන්ව ගිය සමගි ජනබලවේගය නායක සජිත් ප්‍රේමදාස මහතා අතර පරස්පර මත තිබෙන බව දේශපාලන ආරංචි මාර්ග සඳහන් කරයි.

පවතින කොරෝනා වසංගත තත්වය හමුවේ ප්‍රජාතන්ත්‍රවාදී හා සාධාරණ මැතිවරණයක් මෙම වසංගතය පහව යන තෙක් පැවැත්වීමට නොහැකි බව සජිත් ප්‍රේමදාස මහතාගේ හා ඔහුගේ පාර්ශවයේ මතය වී තිබෙන අතර එක්සත් ජාතික පක්ෂ නායක ඒ සම්බන්ධයෙන් කිසිදු අදහසක් ප්‍රකාශ කිරීමෙන් වැළකී සිටියි.

වික්‍රමසිංහ මහතා සතියකට වතාවක් ඔහු විසින්ම නිර්මාණය කොට මාධ්‍ය වෙත නිකුත් කරන වීඩියෝ පටයේ කොරෝනා වෛරස සම්බන්ධයෙන් අදහස් පළ කළ ද මැතිවරණය සම්බන්ධයෙන් කිසිඳු අදහසක් පළ නොකිරීමට ප්‍රවේශම් වී තිබේ.

රනිල් වික්‍රමසිංහ මහතා මේ වනවිට මැතිවරණය සම්බන්ධයෙන් ආණ්ඩුව දරන ස්ථාවරයට සමාන ස්ථාවරයක් දරමින් සිටින බවද දේශපාලන ආරංචි මාර්ග පෙන්වා දෙයි.

උද්ගතව තිබෙන කොරෝනා අර්බුදය හමුවේ යෝජිත මහ මැතිවරණය පැවැත්වීම අසීරු හෙයින් ජාතික ආණ්ඩුවක් පිහිටුවීම සඳහා වූ යෝජනාවක් එක්සත් ජාතික පක්ෂ නායක රනිල් වික්‍රමසිංහ මහතා විසින් ආණ්ඩුව වෙත ඉදිරිපත් කොට තිබෙන බව ඒෂියන් මිරර් වෙත වාර්තා වේ.

එජාප නායකයාගේ යෝජිත මෙම ජාතික ආණ්ඩුව විසුරුවන ලද පාර්ලිමේන්තුවේ නිල කාලය වන සැප්තැම්බර් මස දෙවැනි දා දක්වා පවත්වා ගෙන යාම සුදුසු බව යෝජනාව වී තිබේ.

දැනගන්නට තිබෙන ආකාරයට එම යෝජනාවට අග්‍රාමාත්‍යවරයාගේ සැලකිය යුතු විරෝධතාවයක් නොමැති අතර ජනාධිපතිවරයා විසින් ඊට තදින්ම විරුද්ධ වී තිබේ.

වික්‍රමසිංහ මහතාගේ යෝජිත ජාතික ආණ්ඩුවේ අමාත්‍ය ධූරවලින් තිහක් තමන්ට අවශ්‍ය බව වික්‍රමසිංහ මහතා පවසා ඇති අතර ඒ ආණ්ඩු පාර්ශවයේ දැඩි විරෝධයට හේතුවී තිබේ.

අමාත්‍ය ධුර 30ක් ලබා ගැනීම හරහා ඉන් අඩක් සජිත් පාර්ශ්වය වෙත පිරිනැමීමට වික්‍රමසිංහ මහතා සැලසුම් කර තිබෙන අතර ඒ හරහා සජිත් ප්‍රේමදාස පාර්ශවය දුර්වල කිරීම ඔහුගේ අරමුණ වී තිබුණ බවද වාර්තා වේ.

හිටපු අමාත්‍ය සහ හිටපු අග්‍රාමාත්‍ය කාර්ය මණ්ඩල ප්‍රධානී සාගල රත්නායක මහතා එක්සත් ජාතික පක්ෂය වෙනුවෙන් කොළඹ දිස්ත්‍රික්කයෙන් ඉදිරිපත් කිරීමට හිටපු අගමැති රනිල් වික්‍රමසිංහ මහතා දැරූ උත්සාහය රවි කරුණානායක මහතාගේ දැඩි විරෝධය නිසා ව්‍යර්ථ වී තිබේ.

කොළඹ දිස්ත්‍රික් එක්සත් ජාතික පක්ෂ නායකයා ලෙස කටයුතු කරන්නේ හිටපු අමාත්‍ය රවි රවී කරුණානායක මහතා ය.

වික්‍රමසිංහ මහතාට ඉතාම සමීපතමයෙකු වන සාගල රත්නායක මහතාට මෙම දිස්ත්‍රික්කයේ නාම යෝජනා ලබා දෙන්නේ නම් තමන් එම ලැයිස්තුවෙන් තරග නොකරන බව රවි කරුණානායක මහතා දැනුම් දී තිබේ.

ඒ අනුව රවි කරුණානායක මහතා අතුරලියේ රතන හිමියන්ගේ  අපේ ජන බල පක්ෂයෙන් කොළඹ දිස්ත්‍රික්කයට නාමයෝජනා අත්සන් කරන බව පක්ෂ නායකත්වයට දැනුම් දී තිබේ.

එක්සත් ජාතික පක්ෂ නායක රනිල් වික්‍රමසිංහ මහතා අද(24) සිය 71 වන ජන්ම දිනය සමරනු ලබන්නේ වසර හතරක එක්සත් ජාතික පක්ෂ ඉතිහාසයේ දරුණුතම බිඳවැටීමත් සමඟය.

පසුගිය පාර්ලිමේන්තුවේ දී එක්සත් ජාතික පක්ෂ පක්ෂය නියෝජනය කළ මන්ත්‍රීවරුන් 14 දෙනකු හැර දෙනෙකු හැර අන් සියල්ලම මේ වන විට එක්සත් ජාතික පක්ෂය කඩාගෙන ගොස් නිර්මාණය කළ සමග ජන ජන බලවේගය සමග එක්ව සිටී.

මීට පෙර එක්සත් ජාතික පක්ෂය දරුණුතම බෙදීමකට පත්වූයේ මීට වසර 28කට පෙර එනම් 1992 දී සජිත් ප්‍රේමදාස මහතාගේ පියාණන් වූ එවකට ජනපති ජනපතිව සිටි රණසිංහ ප්‍රේමදාස මහතාට එරෙහිව ලලිත් ඇතුලත්මුදලි, ගාමිණී දිසානායක, ජී.එම්.ප්‍රේමචන්ද්‍ර ඇතුළු පිරිසක් පක්ෂය කඩා ගෙන ගිය අවස්ථාවේදීය.

පක්ෂයේ පිරිසක් කඩාගෙන ගොස් ඇති පසුබිමක හා කොරෝනා වෛරසය හේතුවෙන් රට පුරා ඇඳිරි නීතිය පනවා ඇති පසුබිමක රනිල් වික්‍රමසිංහ මහතා අද දවසේ සිය 71ක් වන උපන්දිනය උපන් දිනය සමරන්නේ ඔහුගේ ජීවිතයේ සමරනු ලබන අවාසනාවන්තම උපන්දිනය ලෙසය.

කොවිඩ් 19 වෛරසය  පැතිරීම වැළැක්වීම සඳහා ශ්‍රී ලංකාව තුළ අවශ්‍ය වේලාවට නිසි පියවර නොගත් බවත් හිටපු අග්‍රාමාත්‍ය රනිල් වික්‍රමසිංහ මහතා පැවැසීය.

බැරෑරුම් තත්තවය අවබෝධ කර ගනිමින් විධිමත් සැලැස්මක් සකස් කළ යුතු බවත් ඔහු සඳහන් කරයි.

නීති තර්ක හරහා ආණ්ඩුවේ මුදල් හිරකොට කොරෝනා මර්ධන ව්‍යාපෘතිය අඩාල කිරීමේ දුෂ්ඨ උත්සාහය හෙළා දකින බව අග්‍රාමාත්‍ය මහින්ද රාජපක්ෂ මහතා පවසයි.

ඔහු නිවේදනයක් නිකුත් කරමින් මේ බව සඳහන් කරයි.

අග්‍රාමාත්‍යවරයාගේ නිවේදනය 

කොරෝනා වෛරසය ලංකාවේ තවදුරටත් පැතිරීම වැලැක්වීමට මුලු රට පුරාම ඇඳිරිනීතිය පැනවූ දිනයේම, එනම් 2020 මාර්තු 20 වන සිකුරාදා එ.ජා.ප නායක රනිල් වික්‍රමසිංහ මහතා විශේෂ නිවේදනයක් නිකුත් කරමින් පවසා සිටියේ, තමන් නායකත්වය දුන් පසුගිය ආන්ඩුව 2020 වසර වෙනුවෙන් අයවැයක් සම්මත නොකොට 2020 අප්‍රේල් 30 වනදා දක්වා පමණක් බලපවත්වන අතුරු සම්මත ගිණුමක් සම්මත කොට තිබීම හේතුවෙන් අප්‍රේල් 30 වනදායින් පසු, මොනම දෙයකටවත් මුදල් වියදම් කිරීමට ආණ්ඩුවට නෛයිතික බලයක් නැතිවෙන බවයි.  සජිත් ප්‍රේමදාස හිටපු විපක්‍ෂ නායකවරයාත්, මුහුණුපොත හරහා මේ තර්කයම ඉදිරිපත් කරමින් සිටි.

පාර්ලිමේන්තුව විසිරුවා හැර තිබෙන අවස්ථාවක රජයේ සේවාවන් පවත්වාගෙන යෑම සඳහා අවශ්‍ය කරන මුදල් ඒකාබද්ධ අරමුදලෙන් නිකුත් කිරීමට ශ්‍රී ලංකාවේ ආණ්ඩුක්‍රම ව්‍යවස්ථාවේ 150(3) වගන්තිය යටතේ ජනාධිපතිවරයාට බලය පැවරේ. මේ නිසා කොරෝනා වෛරසය මර්දන ව්‍යාපෘතිය හා රජයේ සෙසු සේවාවන් පවත්වාගෙන යෑම සඳහා මුදල් ප්‍රතිපාදන තිබේද නැත්ද යන්න ගැන මහජනතාව කිසිඳු බියක් ඇතිකරගත යුතු නැත.

පසුගිය පෙබරවාරි 20 වෙනිදා, යහපාලන ආණ්ඩුවේම බෙහෙත් හා පොහොර වැනි අත්‍යාවශ්‍ය භාණ්ඩ සැපයුම්කරුවන්ට හිඟ මුදල් ගෙවා සැපයුම අඛණ්ඩව පවත්වාගෙන යෑම සඳහා අපි යෝජනාවක් ඉදිරිපත් කළද, පාර්ලිමේන්තුවේ බහුතරය හිමිව සිටි සජිත් ප්‍රේමදාස විපක්‍ෂ නායකවරයා ඇතුලු පාර්ශවය අලුත් ආණ්ඩුව අපහසුතාවයට පත් කොට දේශපාලන වාසි ලබා ගැනීම සඳහා එයට විරුද්ධ විය.  

රටේ අත්‍යාවශ්‍ය සේවාවන් පවත්වාගෙන යෑමට අපිට මුදල් සොයා ගැනීමට හැකිවූයේ පාර්ලිමේන්තුව විසිරුවා හැරීමෙන් පසු, ආණ්ඩුක්‍රම ව්‍යවස්ථාවේ 150(3) වගන්තියෙන් ජනාධිපතිවරයාට ලැබෙන මුදල් බලතල නිසාය. මේ රටේ එකම කොරෝනා ආසාධිතයෙක්වත් නැති අවස්ථාවක 2020 මාර්තු 02 වනදා, ජනාධිපතිවරයා ආණ්ඩුක්‍රම ව්‍යවස්ථාවේ 70(1) වගන්තිය අනුව  පාර්ලිමේන්තුව විසුරුවා හැරියේය.

ඊට දින දහයකට පසු ලංකාවේ පළමු කොරෝනා රෝගියා සොයා ගැනීමත් සමඟම සජිත් ප්‍රේමදාස ප්‍රමුඛ විපක්‍ෂය කලේ පාර්ලිමේන්තු මැතිවරණය කල් දැමිය යුතු යැයි හඩ නැගීමය. අපේ ආණ්ඩුක්‍රම ව්‍යවස්ථාවේ 70(5) (අ) වගන්තියට අනුව පාර්ලිමේන්තුව විසිරුවා හරින ගැසට් පත්‍රයේම පාර්ලිමේන්තු මැතිවරණය පවත්වන දිනයත් අලුත් පාර්ලිමේන්තුව මුල් වරට රැස් වන දිනයත් නියම කළ යුතු වේ.

එම ප්‍රකාශය නිකුත් කළ පසුව, මොනම තත්වයක් යටතේවත් ඡන්දය පවත්වන දවස කල් දැමීමට ජනාධිපතිවරයාට බලය නැත. 1981 අංක 1 දරණ පාර්ලිමේන්තු මැතිවරණ පනතේ 24(3) වගන්තියට අනුව යම්කිසි අනපේක්‍ෂිත හෝ හදිසි තත්වයක් නිසා ඡන්දය පවත්වන දිනය කල් දැමීමේ බලය ලැබෙන්නේ මැතිවරණ කොමිසමටය. ඒ අනුව මැතිවරණ කොමිසම ඡන්දය පවත්වන දිනය කල්දමා ඇත.

මේ ආකාරයට මැතිවරණය පවත්වන දිනය කල් දමා තිබීමෙන්, ව්‍යවස්ථාවේ 150(3)  වගන්තිය යටතේ පාර්ලිමේන්තුව විසිරුවා හැර තිබෙන කාලය තුළ ජනාධිපතිවරයාට හිමි මුදල් බලතල කිසිවක් වෙනස්වන්නේ නැත. කොරෝනා වෛරස් උවඳුරෙන් දේශපාලන වාසි ලබා ගැනීමට එ.ජා.පයේ පාර්ශව දෙක තරඟයක නියැලී සිටින බව අපට පෙනේ. පසුගියදා පිටරට සිට ශ්‍රී ලංකාවට පැමිණ, නිරෝධායනයට යෑමට නොහැකි යැයි කියා ගුවන්තොටුපලේදී කලබල කළ පිරිස් දිරිගන්වමින් සජිත් ප්‍රේමදාස විපක්‍ෂ නායකවරයා ආණ්ඩුවේ නිරෝධායන වැඩ පිළිවෙලට අකුල් හෙලූ ආකාරය මුලු රටම දුටුවේය.

අලුත් ආණ්ඩුවේ මුදල් සැපයුම කපා හැරීමට යහපාලන පාර්ශවය පසුගිය මාසයේ පාර්ලිමේන්තුව තුළ ගත් උත්සාහය වැරදුනු පසු, දැන් ජනාධිපතිවරයාට ආණ්ඩුක්‍රම ව්‍යවස්ථාවෙන්ම ලබා දී ඇති මුදල් බලතල ගැන නීති තර්ක ඉදිරිපත් කොට, දරුණු වසන්ගතයක් මධ්‍යයේ රට අකර්මණ්‍ය කිරීමට ගන්නා මේ උත්සාහය අපි හෙළා දකිමු.

අවස්ථාවාදී පාර්ශව රටට එරෙහිව දියත් කරන මෙවන් කුමන්ත්‍රණ හමුවේ වුවත්, ජනතාව කොරෝනා වෛරස් උවදුරෙන් ගලවා ගැනීමට තම ජීවිතත් පරදුවට තබා දිවා රෑ නොබලා වෙහෙසෙන වෛද්‍යවරුන්, හෙදියන් ඇතුළු සියලුම සෞඛ්‍ය කාර්‍යමණ්ඩල වලටත්, ත්‍රිවිධ හමුදාවේ සියලු සාමාජිකයන්ටත්, අත්‍යාවශ්‍ය සේවා සපයන සෙසු පිරිසටත් මම මේ අවස්ථාවේදී මාගේ ප්‍රණාමය පුද කර සිටිමි. 

මහින්ද රාජපක්‍ෂ

අග්‍රාමාත්‍ය

Page 1 of 19

Live