ශ්‍රී ලංකාවේ අන්තර්ජාලය ඔස්සේ බොහෝ ව්‍යාපාර කටයුතු සිදුවන බැවින් එම ව්‍යාපාරිකයන් සහ ව්‍යාපාර ආයතන මුහුණදෙන විශාල ගැටලුවකට දේශීය විසඳුමක් ලබාදීමට PayHere ආයතනය සැලසුම් කර ඇතැයි වාර්තා වේ.
ඒ සම්බන්ධයෙන් ඒෂියන් මිරර් වෙත අදහස් දක්වමින් එහි නිර්මාතෘවන ධනික පෙරේරා මහතා හඳුන්වාදීමට නියමිත නව තාක්ෂණික ක්‍රමවේද පිළිබඳ මෙලෙස සඳහන් කළේ ය.
ශ්‍රී ලංකාවේ අන්තර්ජාලය ඔස්සේ ව්‍යාපාර කරන බොහෝ දෙනෙක් මුහණදෙන විශාල ගැටලුව ලෙස ඔහු පෙන්වා දෙන්නේ අන්තර්ජාලය හරහා ගෙවීම් භාර ගැනීමේ නිසි ක්‍රමවේදයක් නොමැතිවීමයි.
එම ගැටලුවට විසඳුමක් ලෙස PayHere සේවාව හඳුන්වාදීමට අපේක්ෂා කරන බව ධනික පෙරේරා මහතා පෙන්වා දෙයි.
මේ වනවිට ශ්‍රී ලංකාවේ අන්තර්ජාලය හරහා ව්‍යාපාරික කටයුතු කිරීමේ වැඩි නැඹුරුතාවයක් දක්නට ලැබෙන අතර ඒවා බොහෝමයක් සිදුවන්නේ Facebook හෝ වෙබ්අඩවි හරහා බව ඔහු ප්‍රකාශ කරයි.
එම වෙළෙඳ භාණ්ඩ මිල දී ගැනීමේ දී ව්‍යාපාරිකයාට හෝ වෙළෙඳ සමාගමට දුරකතන ඇමතුමක් ලබා දී ඒ පිළිබඳ දැනුම් දිය යුතු වේ. එහි දී පාරිභෝගිකයා විසින් වෙළෙඳාම් කරන පුද්ගලයාගේ හෝ වෙළෙඳ ආයතනයේ බැංකු ගිණුමට අදාල මුදල් බැර කිරීමෙන් අනතුරු ව ලබාදෙන රිසිට්පතේ පිටපතක් ඔවුන් වෙත යැවිය යුතු ය. ඉන්පසු තැපෑල මගින් අදාල භාණ්ඩ පාරිභෝගිකයාට ලබාදීමට කටයුතු කරන අතර එහි අකාර්යක්ෂම බවක් පෙන්නුම් කරන බව ඔහු පවසයි.
ඊට මූලික හේතුව ලෙස ඔහු පෙන්වා දෙන්නේ වෙනත් රටවල මෙන් ශ්‍රී ලංකාවේ අන්තර්ජාලය හරහා මුදල් අය කර ගැනීමේ හැකියාව තවමත් නොමැතිවීමයි.
අන්තර්ජාලය හරහා ගෙවීම් භාර ගැනීමේ නිසි ක්‍රමවේදයක් නොමැති බව සඳහන් කරන ඔහු මේ වනවිට බැංකු internet payment gateway පහසුකම පැවතුන ද ඒවායේ මිල ගණන් අධික බව පෙන්වා දෙයි. ඒවායේ වාර්ෂික වියදමක් දැරීමට සිදුවන බවත් ස්ථාපනය කිරීම සඳහා ද වියදමක් දැරීමට සිදුවන බවත් ඔහු පවසයි. එම වියදම සුළු හා මධ්‍ය පරිමාන ව්‍යාපාරවලට දැරීමට අපහසු බව හෙතෙම සඳහන් කරයි.
මේ හේතුවෙන් PayHere නමැති නව තාක්ෂණික විසඳුම හරහා සිදු කෙරෙන්නේ අන්තර්ජාලය හරහා මුදල් ගෙවීමේ දී බැංකු හරහා ගනුදෙනු කිරීමට අවශ්‍යතාවයක් ඇති නොවන බව ඔහු පෙන්වා දෙයි. එහි දී සුළු හා මධ්‍ය පරිමාණ ව්‍යාපාරිකයන්ට PayHereහි ලියාපදිංචි වී PayHere ගිණුමක් ආරම්භ කළ හැකි බව ඔහු ප්‍රකාශ කළේ ය.
එහි දී ඔවුන්ගේ භාණ්ඩවලට පාරිභෝගිකයන්ගෙන් අය කරන මුදල් සම්පූර්ණයෙන් ම ඔවුන්ගේ PayHere ගිණුමට ලබාගත හැකි වේ. එමගින් තමන්ගේ බැංකු ගිණුමට පහසුවෙන් මුදල් බැර කර ගැනීමේ විශේෂ හැකියාව PayHere තුළින් අත්විඳීමට හැකිවක් පවතී.
වාර්ෂික වියදම් හෝ ස්ථාපනය කිරීමේ වියදමක් නොමැති බවත් සරළ ව කිවහොත් නොමිලේ එම සේවාව සැපයෙන බවත් ධනික පෙරේරා මහතා සඳහන් කරයි. එකම වියදමවන්නේ PayHere හරහා බාර කෙරෙන මුදලින් සුළු ප්‍රතිශතයක් ගනුදෙනු ගාස්තුවක් ලෙස අය කිරීමයි. බැංකුවල මෙන් වාර්ෂික වියදම් හෝ ස්ථාපනය කිරීමේ වියදමක් දැරීමට සිදු නොවන බව හෙතෙම වැඩිදුරටත් පෙන්වා දුන්නේ ය.
එසේ ම ශ්‍රී ලංකාවේ සුළු හා මධ්‍ය පරිමාන ව්‍යාපාරිකයන් බොහෝමයක් ශ්‍රී ලංකාවට PayPal සහාය ලැබෙතැයි අපේක්ෂාවෙන් සිටි බවත් එය සිදු නොවන බවට මේ වනවවිට ප්‍රත්‍යක්ෂ වී ඇති බවත් ඔහු පැවසී ය. PayPal එනතුරු බලා හිඳින්නේ නොමැති ව PayHere හරහා දේශීය විසඳුමක් සැපයීමට අපේක්ෂා කරන බවත් ධනික පෙරේරා මහතා පෙන්වා දුන්නේ ය.
PayHere දේශීය බැංකු හා ටෙලිකොම් ආයතනය සමග සම්බන්ධ වී දේශීය විසඳුමක් ලෙස සුළු හා මධ්‍ය පරිමාන ව්‍යාපාරිකයන් වෙත තව නොබෝ දිනකින් එළි දැක්වීමට අපේක්ෂා කරන බව ඔහු වැඩිදුරටත් සඳහන් කළේ ය.
