මේ වනවිට ගෝලීය වානේ කර්මාන්තය දැඩි අර්බුදයකට මුහුණ පා ඇතැයි විදෙස් මාධ්‍ය සඳහන් වාර්තා සඳහන් කරයි.
එහි ප්‍රතිඵලයක් ලෙසින් ඉන්දියාවේ විශාලතම වානේ නිෂ්පාදකයාවන ටාටා වානේ සමාගම සිය එක්සත් රාජධානියේ ව්‍යාපාරික කටයුතු විකුණා දැමීමට පියවර ගෙන තිබේ. ඒ හේතුවෙන් දහස් සංඛ්‍යාත රැකියා ප්‍රමාණයක් අහිමිවීමේ අවදානමක් පවතින බව එම වාර්තා වැඩිදුරටත් පෙන්වා දෙයි.
ගෝලීය වශයෙන් වානේ සැපයුම ඉහළ යාමත්, මිල අඩු හා ආදේශක නිෂ්පාදිත යුරෝපානු වෙළෙඳපොළට පැමිණීමත් හේතුවෙන් යුරෝපය තුළ වානේ නිෂ්පාදනය අර්බුදයට පත් ව ඇති බව මේ සම්බන්ධයෙන් අදහස් දක්වමින් ටාටා ස්ටීල්හි ප්‍රකාශකයෙකු කියා සිටියේ ය.
එසේම දේශීය වශයෙන් ඉල්ලුම පහළ බැසීම, නිෂ්පාදන පිරිවැය ඉහළ යාම සහ විනිමය අනුපාත උච්ඡාවචනයන් ද කර්මාන්තය කෙරෙහි අහිතකර ලෙස බලපා තිබෙන බව ඔහු වැඩිදුරටත් කියා සිටියේ ය.
