යල කන්නය තුළ වී මිල දී ගැනීම ඍජුවම වී අලෙවි මණ්ඩලය විසින් සිදුකිරීම සඳහා ආහාර සුරක්ෂිතතාව පිළිබඳ අමාත්‍ය ගාමිණී ජයවික්‍රම පෙරේරා විසින් ඉදිරිපත් කළ කැබිනට් පත්‍රිකාවකට අමාත්‍ය මණ්ඩල අනුමැතිය හිමි ව තිබේ.
ඒ අනුව යල කන්නයේ දී කීරි සම්බා සහ අනෙකුත් සම්බා වර්ගවල වී සඳහා කිලෝග්‍රෑමයක් රුපියල් 50 බැගින් ද නාඩු වර්ගයේ වී කිලෝග්‍රෑමයක් සඳහා රුපියල් 45 බැගින් ද මිල දී ගනු ඇත.
ඒ සඳහා අවශ්‍ය සම්බන්ධීකරණය අදාළ දිස්ත්‍රික්වල දිසාපතිවරු, ප්‍රාදේශීය ලේකම්වරු සහ ග්‍රාමීය මට්ටමේ නිලධාරීන් විසින් සිදුකිරීමට නියමිතයි.
ඊට අමතර ව අග්‍රාමාත්‍ය රනිල් වික්‍රමසිංහ විසින් වී මිල දී ගැනීම් නියමිත පරිදි සිදුකිරීම පිළිබඳ තහවුරු කර ගැනීම සඳහා මුදල් අමාත්‍යාංශ ලේකම්වරයාගේ ප්‍රධානත්වයෙන් පත් කළ කමිටුවකට ද අමාත්‍ය මණ්ඩලයේ අනුමැතිය හිමි ව තිබේ.
