ශ්‍රී ලංකාව හා අප්‍රිකාව අතර වයස 19න් පහල තරඟ තුනකින් සමන්විත එක්දින ක්‍රිකට් තරඟාවලිය ඊයේ (11) කොළඹ NCC ක්‍රීඩාංගණයේ දී පැවැතිවිණි.

ඒ අනුව ඊයේ පැවති ශ්‍රී ලංකා වයස 19 න් පහළ පිල සහ දකුණු අප්‍රිකානු වයස 19 න් පහළ පිල අතර පැවති දෙවැනි තරඟයෙන් ශ්‍රී ලංකා යොවුන් ක්‍රීඩකයෝ ලකුණු 12 ක (ඩක්වත් ලුවිස් න්‍යායට) ජයක් ලැබීමට සමත් වූහ.

ශ්‍රී ලංකාව ලැබූ මෙම ජයග්‍රහණයත් සමඟ තරගාවලිය 1-1 ක් ලෙස සම තත්ත්වයට පත්විය.

ඊයේ පස්වරු 5.20 ට පමණ ඇති වූ වර්ෂාව හේතුවෙන් තරඟය අත්හිටුවන විට ලකුණු 210 ක ඉලක්කය හඹාගිය දකුණු අප්‍රිකානු යොවුන් පිල ඕවර 47.4 කදී කඩුලු 8 ක් දැවී ලකුණු 184 රැස්කර සිටියේය.

දකුණු අප්‍රිකානු පිල ජය ලැබීමට නම් ඩක්වත් ලුවිස් න්‍යායට අනුව ඕවර 47.4 කදී කඩුලු 8 ක් දැවී ලකුණු 196 ක් රැස්කර තිබිය යුතුය.

ශ්‍රී ලංකා යොවුන් ක්‍රීඩකයන් වෙතින් පහසු උඩ පන්දු 03ක් ගිලිහි ගිය අතර එම උඩපන්දු රැකගත්තේ නම් ජයග්‍රහණය මීට වඩා පහසු වීමට ඉඩ තිබුණි.