යුක්රේනයත් රුසියාවත් අතර, බෙලරූස් දේශසීමාවේ, සාම කතා පැවැත්වෙද්දී, රුසියන් හමුදා යුක්රේනයේ කියෙව් අගනුවර වට කර ඇති බවත්, චන්ද්‍රිකා ඡායාරූප අනුව, රුසියන් හමුදා රථ නගරය අද්දර සිට කිලෝ මීටර් 64 ක් දුරට විහිදී තිබෙනු දකින්න ලැබෙන බවත් ඇමෙරිකාව පවසනවා.
ඇමෙරිකාවට කිලෝ මීටර් 64 ක් දුරට විහිදී ඇති රුසියන් සන්නද්ධ රථ, යුද ටැංකි ආදිය දකින්න ලැබී ඇත්තේ ඔවුන්ගේ ඔත්තු නිරීක්ෂණ චන්ද්‍රිකා ආධාරයෙන්.
මේ අතර, කියෙව් අගනුවරට පහර දීමට සූදානමින්, දකුණුදිග බෙලරූසයේ රුසියන් ප්‍රහාරක හෙලිකොප්ටර් යානා සීරුවෙන් තබා ඇතැයි ද චන්ද්‍රිකා ඡායාරූප අනුව දකින්න ලැබෙන බව ඇමෙරිකාව පවසනවා.
යුක්රේන නියෝජිතයන් සහ රුසියන් නියෝජිතයන් අතර සාම කතා බෙලරූස් රාජ්‍යයේ දේශසීමාවේ පැවැත්වූයේ බෙලරූස් ජනාධිපති ලුකෂෙන්කෝගේ මැදිහත් වීමෙන්.
ලුකෂෙන්කෝ යනු රුසියන් ජනාධිපති ව්ලැදිමීර් පුටින්ගේ සමීපතම මිතුරෙක්.
බෙලරූසය පිහිටා ඇත්තේ යුක්රේනයේ උතුරු දෙසට මායිම් වෙමින්.
රුසියන් හමුදා කියෙව් අගනුවර ආක්‍රමණය සඳහා පැමිණෙන්නේ බෙලරූසය දෙසින්.
රුසියන් ජනාධිපති පුටින්ට, යුක්රේනය ආක්‍රමණය කිරීමට සහාය දැක්වීම හේතුවෙන් බටහිර රටවල් මේ වනවිට බෙලරූසයට ද සම්බාධක පැනැවීමක් සිදු කර තිබෙනවා.
රුසියාවට මෙන්ම, බෙලරූසයට ද ජගත් ක්‍රීඩා තරඟ පවා තහනම් කර තිබෙනවා.
