මෙරට දැඩි කතාබහකට ලක්වූ යුක්‍රේන සංචාරකයින්ගේ පැමිණීම පිළිබඳව පක්ෂ විපක්ෂ දේශපාලනය තුළ දැඩි කතාබහක් ඇති වී තිබුණා.

මෙම සංචාරකයන් ගෙන්වීම සම්බන්ධව වැඩ කළේ උදයංග වීරතුංග මහතායි. මෙලෙස පැමිණි සංචාරකයින් පිළිබඳව විජේදාස රාජපක්ෂ මහතා කළ චෝදනාවක් සම්බන්ධව උදයංග වීරතුංග මහතා විසින් අභියෝගයක් කර තිබෙන්නේ විවාදයකට පැමිණෙන ලෙසද පවසමින්.

උදයංග වීරතුංග මහතා විසින් මේ සම්බන්ධව මාධ්‍ය නිවේදනයක් ද නිකුත් කර තිබුණු අතර එම ලිපිය පහතින්,

පසුගිය දවස්වල යහපාලන ආණ්ඩුවේ හිටපු ඇමතිවරුන් හා එම ආණ්ඩුවට පක්ෂපාත විවිධ මාධ්‍ය විසින් මා ගැන විටින් විට මත පල කරනු ලබයි. අද කැබිනට් ඇමතිකමක් නොලැබීම නිසා, “ජීවිතය විදවන්න මේ ලෝකෙට ආපු කෙනෙක් නෙමෙයි.. විදින්න ආපු කෙනෙක්..” බව කියමින්, ලගකදි සිදුකරන කැබිනට් සංශෝධනයෙදී තමන් ඇමතිකමක් බලාපොරොත්තු වන බවට ඉගියක් ද කරමින් රටෙහි ජනාධිපතිට ලියන ලද දුක්ගැනවිලි අතරින්, යුක්රේනියානු සංචාරකයන් පිළිබඳ මගේ නම ද පටලවා ඇති නිසා ගිරුවාපත්තුවේ විජේදාස මලයා ට මෙසේ ලියමි.

මෙම කොවිඩ් 19 වසංගත තත්ත්වය තුළ සංචාරකයින් සඳහා නැවත රට විවෘත කිරීමේ අභියෝගය සාර්ථක කර ගැනීමේ මුඛ්‍ය පරමාර්ථයේන් 2020 දෙසැම්බර් මස 28 වන දින සිට 2021 ජනවාරී මස 19 දා දක්වා නියමු ව්‍යාපෘතියක් ලෙස පූර්ණ සෞඛ්‍ය නිර්දේශ යටතේ ඉතා සාර්ථකව යුක්රේනියානු සංචාරකයන් මත්තල මහින්ද රාජපක්ෂ ගුවන්තොටුපලට රැගෙන ආවේ රාජපක්ෂ පරපුරේ “කුරහන් සාටකය” ආවාට – ගියාට කරටදමා ගත් එකක් නොවන බව විජේ - දාස ලට මතක්කර දෙන්නම යි.

‘සංචාරක බුබුල’ පිළිබඳ සංකල්පය යටතේ එසේ මෙරට පැමිණි යුක්රේනියානු, කසාක්ස්තානු හා රුසියානු සංචාරකයින්ගෙන් සියයට 99.6% ක්ම නිරෝගී වුවෝ බව මෙරට දී ඔහුන්ට සිදු කරන ලද PCR පරික්ෂණ වලින් සනාථ වී ඇති මොහොතක, “කොරෝනා බුබුළු” ගෙනාවා කියමින් ඔහුන්ගේ පැමිණීමට නිගරු කිරීම අපේ සංචාරක කර්මාන්තයේ නියුතු ලක්ෂ 30 ක් පමණ වූ ශ්‍රමිකයන් හට සිදුකරන මහා අසාධාරණයක් බව විජේ මලයාට නොතේරෙන්නේ තවම ඇමතිකමක් නැති නිසාම ද?

අද අසල්වැසි මාලදිවයින රාජ්‍යයේ සංචාරක කර්මාන්තය අත්කරගෙන ඇති සාර්ථකත්වය අපට යථාර්ථය තේරුම් ගැනීමට කදිම නිදසුනකි. මෙම වසරේ ජුලි 31 දිනට මාලදිවයිනට සංචාරකයන් 617,791 පැමිණි ඇති අතර එම පිරිස අතරින් යුක්රේනියානු, කසාක්ස්තානු හා රුසියානුවන්ගේ එකතුව පැමිණි සමස්ථ සංචාරකයන්ගෙන් 32% කි. එම කාලයේදී ශ්‍රී ලංකාවට පැමිණි සමස්ථ සංචාරක එකතුව 19,337 කි. ඇත්තටම මෙහිදී අපට වඩා 32 ගුණයක් වැඩියෙන් මාලදිවයිනට සංචාරකයන් පැමිණියේ ඔහෙලා වගේ කුහකයෝ විපක්ෂයේ ඉන්න නිසා බව ඔප්පු කරන්න ඕනෑම රුපවාහිනී නාලිකාවක “යුක්රේනියානු සංචාරක ආගමනය” පිළිබඳ විවාදයකට එන්න කියලා වලස්මුල්ලේ විජේදාස මලයා ට මම අභියෝග කිරීමට කැමතියි.

කොරෝනා වසංගත සමයේ වුවත් මාලදිවයින රජයට නිවරදි තීන්දු තීරණ ගන්න පුලුවන් වුනේ ඔහෙලා වගේ කුහකයන් මාලදිවයිනේ පාර්ලි‌‌මේන්තුවේ නැති නිසා. අපේ රටේ සංචාරක ව්‍යාපාරයේ නියතු ලක්ෂ 30 ක් පමණ වූ ලාංකිකයන් වෙනුවෙන් රජයට සංචාරක හිතකාමී වාතාවරණයක් සැදීමට නොහැකිවීම ඇත්තටම අප දකින්නේ අතට ලැබුණු වාසනාවන්ත ට පයින් ගැසීමක් ලෙසය. මොකද, අද ලංකාවේ ලියාපදිංචි හෝටල් 2900 ක කාමර 42,000 පමණ තිබෙන බව අමතක නොකර යුතුය.

ඔහේගේ ලියුමේ කියලා තියෙන්නේ පස් වතාවක් ඇමතිකම් ප්‍රතික්ෂේප කරා කියලා. එත් සමාජය දන්නවා හැමදාම ඇමතිකම් නැති වුණේ ඇයි කියලා. අද ඔහෙලට ඕන රටෙහි ආර්ථීකය විනාශ කරලා ආණ්ඩුව අල්ලාගෙන නැවත ඇමති කටුවක් සුප්පු කරන්න පමණක් බවත් ගිරුවාපත්තුවම කියනවා.

ඔහේ යවපු සන්දේශයේ ලියලා තියෙනවා “මම කාගෙන්වත් පළිගත්තේ නැහැ කියලා”. ඒ වචන, මගේ අමිහිරි මතකය අවදිකලා. එදා ඔහෙලාගේ යහපාලන යමපල්ලෝ මට එරෙහිව සිදුකල කූට දේශපාලන පළිගැනීම් පිළිබඳ, ගිරුවාපත්තුවේ උදයංග වයසින් වැඩිමහල් විජේදාස මලයා ට විවාදයේ දී පැණි රසට මතක්කර දෙන්න සූදානම්ව සිටින බව කියා සිටිමි.

උදයාංග වීරතුංග - රුසියාවේ හිටපු ශ්‍රි ලංකා තානාපති.