කලාවැව බලලුවැවේ දිය නෑමට ගිය මරදංකඩවල ප්‍රාදේශීය රෝහලේ වෛද්‍යවරයකුට පහර දී මුදල් හා බිරියගේ රන් මාලය කොල්ල කෑ බවට සැකපිට යුද හමුදා සෙබළෙක් හා තවත් පුද්ගලයෙකු කැකිරාව පොලිසියෙන් අත්අඩංගුවට ගෙන තිබේ.
තවත් පුද්ගලයෙකු අත්අඩංගුවට ගැනීමට නියමිත බවත්, වෛද්‍යවරයාගේ නාසයද තුවාල වී ඇති බවත්, ඔහු මරදංකඩවල රෝහලට ඇතුළු කළ බවත් පොලිසිය පැවසී ය.
වැව් ඉස්මත්තේ නවතා තිබූ තම මෝටර් රථය අසළ සැකකටයුතු ලෙස ත්‍රිරෝද රථයක් නවතා තිබෙනු අදාළ වෛද්‍යවරයා විසින් දැක ඇති බව වාර්තා වේ.
එහිදී මෝටර් රථය දෙසට ඔහු ගමන් කිරීමට උත්සහ කළ අවස්ථාවේදී ත්‍රිරෝද රථයේ සිටි පුද්ගලයෙකු විසින් වෛද්‍යවරයාට පහරදී තිබේ.
මෝටර් රථය තුළ තිබූ මුදල් සහ බිරිඳගේ රන් මාලයක්ද අදාළ පිරිස විසින් කොල්ලකා ඇති බව වෛද්‍යවරයා පොලීසියට ප්‍රකාශ කර ඇත.
