බන්ධුල අබේසේකර ශ්‍රී ලංකා පාර්ලිමේන්තු භෝජනාගාරයේ හිටපු ආහාර කළමනාකාරවයෙකි. 1970 වර්ෂයේදී සාමාන්‍ය සේවකයකු ලෙස පාර්ලිමේන්තු භෝජනාගාර සේවයට පැමිණි අබේසේකර මහතා එතෙක්‌ මෙතෙක්‌ කාලය පුරාවට රාජ්‍ය නායකයන් බොහෝ දෙනකුට මෙන්ම පාර්ලිමේන්තුව නියෝජනය කළ මැති ඇමැතිවරුන් දහසකට වැඩි සංඛ්‍යාවකට රස අහරෙන් බඩ කට පිර වූ රසවතෙකි. දැන් ඔහු පාර්ලිමේන්තු භෝජනාගාර සේවයට සමු දී ජනාධිපති බෞද්ධ කටයුතු සම්බන්ධීකාර නිලධාරියකු ලෙස සේවය කරන්නේය. ඔහුගේ වසර හතළිස්‌ දෙකක භෝජනාගාර වෘත්තීය මතක හරිම රසවත්ය. මේ, අබේසේකර මහතා දිවයින පුවත්පත සමග කරන ලද සාකච්චාවකි.
රනිල් මහත්තයා වෙන අය වගෙ නෙමෙයි කතාබහ අඩුයි. ඕනෑම කෙනකුව ඇසුරු කරන්නේ සීමා සහිතවයි. මමත් එක්‌ක වුණත්
හිතවත්කම තිබුණට නිතර නිතර කතාබහ කළේ නෑ. රනිල් මහත්තයා පාර්ලිමේන්තුවට තේරී පත්වෙලා එන්න ඉස්‌සර වෙල ඉඳලම මම එතුමාව දැනන් හිටියා. ඒ හිතවත්කම ගොඩනැගුනේ රනිල් මහත්තයා ඡේ. ආර්. මහත්තයා මුණගැහෙන්න නිතර නිතර පාර්ලිමේන්තුවට ආව ගිය අවස්‌ථාවල සංග්‍රහ කටයුතු කළේ මම නිසයි.
රනිල් මහත්තයා මුලින්ම පාර්ලිමේන්තුවට ආවේ 1977 අවුරුද්දේ පැවති මහ මැතිවරණයෙන් බියගම ආසනය ජයග්‍රහණය කරලා. එදා ඉඳලා අද වෙනකම්ම නොකඩවා එතුමා පාර්ලිමේන්තුව නියෝජනය කරනවා. ඒ වගේම ඡේ. ආර්. මහත්තයගේ ප්‍රතිපත්ති ඉදිරියට ගෙන යන දුරදර්ශී නුවණැති චරිතයක්‌. විද්වත් රැස්‌වීම් අමතන්න එතුමාට පරිගණක, කොළ කෑලි අවශ්‍ය නෑ. කරන්න ඕන දේශනය හරවත් අයුරින් කරන කෙනෙක්‌. මන්ත්‍රී කෙනෙක්‌ විදිහට පාර්ලිමේන්තුවට තේරීපත්වෙලා ආපු රනිල් වික්‍රමසිංහ මහත්තයා පාර්ලිමේන්තු ඇමැතිවරයෙක්‌ වුණා. පාර්ලිමේන්තු සභා නායක ධූරය හෙබවුවා. විපක්‍ෂ නායක වුණා... අගමැති වුණා... අදටත් විපක්‍ෂ නායක ධුරය හොබවන්නේ රනිල් මහත්තයයි...
පාර්ලිමේන්තු කාර්යමණ්‌ඩලයේ සෑම සුබසාධන වැඩකදීම රනිල් මහත්තයා ඉදිරිපත් වෙලා ඒ දේවල් අපට හොඳ විදිහට කරලා දෙනවා. රනිල් වික්‍රමසිංහ මහත්තයා අගමැති ධුරය දරන කාලේ පාර්ලිමේන්තු කාර්යමණ්‌ඩලයේ වැටුප් වැඩි කර දෙන්න විශාල පරිශ්‍රමයක දැරුවා.
පාර්ලිමේන්තු කාර්යමණ්‌ඩලයේ කවුරුහරි රනිල් මහත්තයගෙන් උදව්වක්‌ ඉල්ලුවොත් අනිවාර්යෙන්ම ඒ දේවල් කරලා දෙන ගතියක්‌ තිබුණා. ඒත් වැඩියෙන්ම පස්‌සෙන් ගිහින් එතුමාට කරදර කළොත් රනිල් මහත්තයා ඒ පුද්ගලයන්ව මගහරිනවා. මම නම් වැඩ කළේ එතුමාගේ ගතිපැවතුම් හොඳින් අවබෝධ කරගෙනයි.
දිවයිනෙන් බැහැරව නොසිටියොත් අනිවාර්යෙන්ම රනිල් මහත්තයා පාර්ලිමේන්තුවට එනවා. යුරෝපීය ඇඳුමෙන් සැරසිලා ක්‌ලින්ටන් ලෙවල් එකෙන් තමයි එතුමා පාර්ලිමේන්තුවට එන්නේ. එතුමා කිසිම දවසක සිංහල ඇඳුමෙන් පාර්ලිමේන්තුවට ඇවිත් නෑ. රනිල් මහත්තය පාර්ලිමේන්තුවේ කතා කරන සමහර අවස්‌ථාවල මම අහගෙන ඉන්නවා. කියන්න තියෙන දේ කරුණු කාරණා සහිතව බොහෝම පැහැදිලිව හොඳ අවබෝධයෙන් තමයි කතා කරන්නේ. එතුමා වගේ පාර්ලිමේන්තුවේ අවබෝධයෙන් කතා කරන තව කෙනෙක්‌ නැති තරම්.
රනිල් මහත්තයා පාර්ලිමේන්තුවට ආපු හැම දවසකම භෝජනාගාරයට ඇවිත් පේස්‌ටි්‍රයක්‌ කාලා තේ එකක්‌ හරි බීලා යන පුරුද්දක්‌ තිබුණා. පාර්ලිමේන්තු භෝජනාගාරය කියන්නේ ඕනෑම කෑමක්‌ තියෙන තැනක්‌. තම රුචිය මත කියලා කෑම හදාගන්න පුළුවන් තැනක්‌. ඒත් රනිල් මහත්තය කෑම දිහා බලන්නේවත් නෑ. පෑගෙන වැලි කැට නොරිදෙන තරමට හිමීට භෝජනාගාරයට ඇවිත් මේසෙකට වාඩි වෙනවා. එතුමා භෝජනාගාරයට එනවා දකිනකොටම අපි ක්‍රියාත්මක වෙනවා. දවල් කෑමට ආවොත් එළවළු සුප් චුට්‌ටක්‌ බීලා, එළවළු චුට්‌ටක්‌ එක්‌ක පුංචි රෝස්‌ චිකන් කෑල්ලක්‌ කනවා. එයිට එහාට කෑමක්‌ ගන්නේ නෑ. අතුරුපසට පලතුරු ටිකක්‌ කනවා. ගස්‌ලබුවලට වැඩි කැමැත්තක්‌ තිබුණා.
රනිල් මහත්තයා භෝජනාගාරයට ආවොත් අනිවාර්යෙන්ම දෙහි වීදුරුවක්‌ බොනවා. දෙහි බොන්න වේලාවක්‌ අවේලාවක්‌ තිබුණේ නෑ. හවස තේවලට භෝජනාගාරයට ආවොත් කෑවේ එළවළු ප්‍රේස්‌ටියක්‌ විතරයි. එකෙනුත් කන්නේ භාගෙටත් අඩුවෙන්. තේ එකක්‌ බොනවා එච්චරයි. සමහර දවස්‌වලට තේ එකක්‌ විතරක්‌ම බීලා යන අවස්‌ථාත් තියෙනවා.
රනිල් මහත්තයත් භෝජනාගාරයේ කොනක මේසෙකට වෙලා ලියන කියන දේවල් කරන අවස්‌ථාත් තිබුණා. එතුමා පාර්ලිමේන්තුවට ආපු බොහෝ වෙලාවට ඉන්නේ පාර්ලිමේන්තු පුස්‌තකාලේ. රනිල් මහත්තයට ලැබෙන පුංචි විවේකයේදීත් එතුමා පොතක්‌ කියනවා. පුදුම විදිහට පොත පත පරිශීලනය කරන නායකයෙක්‌. ඒ වගේම තමයි නොකර ශබ්ද හිටියට රනිල් මහත්තයා භෝජනාගාරයට ආපු වේලාවට පාක්‍ෂික මන්ත්‍රීවරුන්ට වඩා විපක්‍ෂ මන්ත්‍රීවරුන් එක්‌ක මිත්‍රශීලී කතා කරන ගතියක්‌ තිබුණා. අනිත් මන්ත්‍රීවරුන් එක්‌ක කතා නොකෙරුවා නෙමෙයි.
ඔය කවුරු කොහොම කිව්වත් රනිල් මහත්තයා පුංචි හිනාවත් සමග හැම කෙනා එක්‌කම වචනයක්‌ හෝ කතා කරනවා. මම මේව
කියන්නේ ඇහැට දැකලා කනට ඇහිලා. හැබැයි ඒ කිසිම කෙනෙක්‌ එක්‌ක වැඩි භජනයක්‌ නෑ. ටිකයි හොඳයි. භෝජනාගාරයේ එතුමාගෙ හොඳම හිතවතා පියල්. රනිල් මහත්තයා භෝජනාගාරයට ආපු වේලාවට පියල් නොපෙනෙන්න හිටියොත් හොයල බැලුවා. පියලුත් රනිල් මහත්තයගෙ හෙවණැල්ල වගේම ඉන්නවා. විපක්‍ෂ නායක කාර්යාලට ආව ගියෙත් පියල් තමයි. රනිල් මහත්තයා භෝජනාගාරයට එන වේලාවට පියල් නැති වුණොත් තමයි අපි එතුමාට සංග්‍රහ කරන්න ඉදිරිපත් වෙන්නේ.
එතෙක්‌ මෙතෙක්‌ පහළ වූ බොහෝ මන්ත්‍රීවරු එතුමන්ලගේ අමුත්තන්ව පාර්ලිමේන්තු භෝජනාගාරයට කැඳවගෙන ඇවිත් සංග්‍රහය
කරනවා. රනිල් මහත්තයා කිසිම දවසක එතුමාගේ අමුත්තෙක්‌ව පාර්ලිමේන්තු භෝජනාගාරයට කැඳවගෙන ඇවිත් සංග්‍රහ කරලා නෑ. මම දන්න කාලෙක එතුමාගේ අමුත්තෙක්‌ව භෝජනාගාරයට ගෙනත් සංග්‍රහ කළා නම් ඒ චරිත රත්වත්තේ මහත්තයා විතරයි. වෙන කිසිම අමුත්තෙක්‌ව පාර්ලිමේන්තු භෝජනාගාරයට කැඳවගෙන ඇවිත් නෑ. ඒ වගේම රනිල් මහත්තයව කවුරු කොහොම විවේචනය කළත් රනිල් මහත්තයා කිසිම දේශපාලන චරිතයක්‌ විවේචනය කරන්නේ නෑ. අටෝප නෑ. අලංකාර නෑ. ඒකයි එතුමාගේ තියෙන සුවිශේෂී ගුණාංග. අනිත් එක තමයි රනිල් මහත්තය අතේ කිසිම වේලාවක ජංගම දුරකථනයක්‌ නෑ. එතුමාගේ ජංගම දුරකථන තියෙන්නේ වික්‍රමසිංහ ලේකම්තුමා ළඟ. අත්‍යවශ්‍යම දුරකථන ඇමැතුම් විතරයි රනිල් මහත්තය අමතන්නේ. ගොඩක්‌ම වේලාවට දුරකථන ඇමතුම්වලට සවන් දෙන්නේම නැති තරම්.
රනිල් මහත්තය බලය අත්හරින තැනදී බොහෝම ගෞරවාන්විතව ඒ දේවල් කරනවා. 1994 මහ මැතිවරණයෙන් පසු පාර්ලිමේන්තුව සමබරයි. ආණ්‌ඩු පක්‍ෂයට මන්ත්‍රීවරු එකසිය දොළහයි. විපක්‍ෂයට මන්ත්‍රීවරු එකසිය දොළහයි. ඒ කාලේ රටේ අගමැති වෙලා හිටියේ රනිල් වික්‍රමසිංහ මහත්තයා. ඒ අවස්‌ථාවේ සුළු පක්‍ෂවල සහාය අරගෙන එක්‌සත් ජාතික පක්‍ෂ ආණ්‌ඩුවක්‌ පිහිටුවන්න ගාමිණි දිසානායක
මහත්තෙල උත්සාහ කළා. ගාමිණි දිසානායක මහත්තයා ඇතුළු මන්ත්‍රී කණ්‌ඩායමක්‌ අෂ්රොප් මහත්තයව මුණගැහෙන්න නැගෙනහිර පළාතට ගිහින් එනකොට රනිල් මහත්තයා අරලියගහ මන්දිරයෙන් පිට වෙලා තිබුණා. ඒ වගේම තමයි රනිල් මහත්තයා කියන්නේ ලක්‍ෂයක්‌ හූ කීවත් කම්පා නොවෙන ඕනෑම දේකට ඔරොත්තු දෙන චරිතයක්‌. එතුමා කියන්න තියෙන දේ කෙළින් කියනවා. අගයන්න ඕනා පුද්ගලයව මහ ඉහළින් අගයනවා. වරක්‌ මල්වතු සහ අස්‌ගිරි උභය පාර්ශ්වලින් මහින්ද රාජපක්‍ෂ මහත්තයට ශ්‍රී රෝහණ ජනරංජන පදවිය පිරිනැමුවා.
ඒ අවස්‌ථාවේ මුළු රටේම මහින්ද රාජපක්‍ෂ මහත්තයව ඇගයීමට ලක්‌ කරලා උත්සව සංවිධාන කළා. ජෙයරාඡ් ප්‍රනාන්දුපුලේ ඇමැතිතුමා මූලිකත්වය ගෙන මහින්ද රාජපක්‍ෂ මහත්තයව පිළිගන්න පාර්ලිමේන්තුවෙත් උත්සවයක්‌ සංවිධානය කළා. ඒ උත්සවයේදී ආර්. සම්බන්ධන්, හකීම් මහත්තයා, රත්නසිරි මහත්තයා මහින්ද රාජපක්‍ෂ මහත්තයාව අගයමින් කතා කළා. පාර්ලිමේන්තු කාර්යමණ්‌ඩලය වෙනුවෙන් උත්සවය අමතලා කතා කළේ මමයි. විපක්‍ෂයෙන් උත්සවය ඇමතීමට ආරාධනා කරලා තිබුණේ රනිල් වික්‍රමසිංහ මහත්තයටයි. කියන්න සතුටුයි එදා ඒ උත්සව අමතලා කතා කරපු අයගෙන් හරවත්ම කතාව කළේ රනිල් මහත්තයයි. 'ශ්‍රී ලංකා නිදහස්‌ පක්‍ෂය කැඩිලා බිඳිලා බිංදුවට වැටිලා ඉන්න වේලාවේ පාද යාත්‍රා පවත්වලා... ජන ඝෝෂා නංවලා නැවත ශ්‍රී ලංකා නිදහස්‌ පක්‍ෂයට ජීවය දුන්නේ මහින්ද රාජපක්‍ෂ කියන පුද්ගලයා. නැති වෙච්ච දේවල් ඇති කරන්න පුළුවන් සුවිශේෂී පුද්ගලයෙක්‌. ඒ නිසා එතුමාට මේ වගේ පදවියක්‌ ලබා දුන්න එක ගැන මම උන්වහන්සෙලාට ස්‌තූතිවන්ත වෙනවා. ඒ වගේම මමත් සතුටු වෙනවා. සම්බුද්ධ ශාසනයටත්, සංඝයා වහන්සේලාටත් විශාල උනන්නතියක්‌ ලැබෙන බව මට හොඳට විශ්වාසයි...' කියලා කතාව අහවර කළා.
රනිල් මහත්තෙල වගේ රටේ දැවැන්ත චරිත කතා කරන උත්සවය අමතන්න අබේසේකරටත් ඉඩක්‌ ලැබුණු එක ගැන මම අදටත් සතුටු වෙනවා.
(දිවයින)
