මෙරව එක්සත් අරාබි එමීර් රාජ්‍යයේ පැවැත්වෙන ඉන්දීය ප්‍රිමියර් ලීග් තරඟාවලියේ ඊයේ (06) දිනයෙ පැවැති තරගයෙන් රෝයල් චැලෙන්ජර්ස් බැංග්ලෝර් කණ්ඩායම තියුණු තරඟයකින් පසුව පරදා ජය ගැනීමට සන් රයිසස් හයිද්‍රාබාද් කණ්ඩායම සමත් විය.
මෙහිදී ඉන්දීයානු ජාතික කණ්ඩායමේ නායකත්වය දරන විරාට් කෝලීගේ නායකත්වයෙන් යුතු රෝයල් චැලෙන්ජ්ස් බැංග්ලෝර් කණ්ඩායම මුලින්ම පන්දුවට පහර දුන් අතර ඔවුන්ට පන්දුවාර 20 තුළ රැස් කර ගැනීමට හැකි වුණේ කඩුළු 07ක් දැවී ලකුණු 131ක් පමණයි.
මෙහිදී කණ්ඩායම වැඩි ලකුණු ප්‍රමාණයක් කරා ගෙන යාමට හුදකලා සටනක නිරත වුණු එබී ඩී. විලියර්ස් පන්දු 43ක් තුළ 4 පහර 5ක් සමඟින් ලකුණු 56ක් රැස් කර ගැනීමට සමත් විය.
පිළිතුරු ඉනිම ක්‍රීඩා කළ සන් රයිසස් හයිද්‍රාබාද් කණ්ඩායම මුල් කඩුළු කිහිපය අඩු ලකුණු සංඛ්‍යාවක් තුළ දැවී යාමත් සමඟ දැඩි අර්බුදයක නිරත වූ අතර නවසීලන්ත කණ්ඩායමේ නායකත්වය උසුලන කේන් විලියම්සන් විසින් කණ්ඩායම ජයග්‍රහණයේ මාවතට රැගෙන යාමට සමත් වූ අතර 05 වන කඩුල්ල ලෙස පිටියට පිවිසි කොදෙව් ක්‍රීඩක ජේසන් හොල්ඩර් විසින් සන් රයිසස් හයිද්‍රාබාද් කණ්ඩායම ජයග්‍රහණය වෙත තියුණු තරගයකින් පසුව රැගෙන ගියේය.
මෙහිදී කේන් විලියම්සන් විසින් පන්දු 44කදී ලකුණු 04 පහර 02ක් සහ 06 පහර 02ක් සමඟින් ලකුණු 50ක් රැස් කර ගැනීමට සමත් විය.
ඒ අනුව තරගය නිමාවන්නට පන්දු 02ක් ඉතිරිව තිබියදී කඩුළු 04කට ලකුණු 132ක් රැස් කරගනිමින් සන් රයිසස් හයිද්‍රාබාද් කණ්ඩායම ජයග්‍රහණය හිමි කරගත්තේ ය.
තරගයෙන් පසු මාධ්‍ය වෙත අදහස් දක්වමින් රෝයල් චැලේන්ජර්ස් බැංග්ලෝර් කණ්ඩායමේ නායක විරාට් කෝලි සඳහන් කර සිටියේ කේන් විලියම්සන් විසින් හතරේ සීමාව වෙතට ලබා දුන් උඩ පන්දුව රැක ගත්තා නම් තරගයේ ජයග්‍රහණය වෙනස් වීමට තිබූ බවයි.
