කොළඹ 13 කොටහේන ප්‍රදේශයේ ක්‍රියාත්මක ක්‍්‍යෑක්‍ ව්‍යාපෘතියක සේවය කරන අතරතුර කොළඹ පොර්ට් සිටි ඉදිකිරීම් පරිශ්‍රයේ පිහිටි නවාතැන් ස්ථාන වලින් එකක තාවකාලිකව නවාතැන් ගෙන සිටි ශ්‍රී ලාංකික සේවකයන් දෙදෙනෙකුට සහ චීන ජාතික සේවකයන් සිව් දෙනෙකුට කොවිඩ් -19 රෝගය වැළඳී ඇති බව තහවුරු විය. අපගේ සමස්ත කාර්ය මණ්ඩලය පරීක්ෂාවන්ට භාජනය කිරීමේදී මෙම පුද්ගලයන්ට රෝගය ආසාදනය වී ඇති බව හඳුනාගන්නා ලදි. අදාළ නවාතැන් මධ්‍යස්ථානය භාවිතා කරන ලද්දේ අදාළ ව්‍යාපෘතියේ සේවය කරන්නන් විසින් පමණක් වන අතර, එම පුද්ගලයන් කොළඹ වරාය නගරය ව්‍යාපෘතියේ සේවය කරන්නන් නොවේ. එමෙන්ම එම පුද්ගලයන් කොළඹ වරාය නගර ව්‍යාපෘතියේ කටයුතු හෝ එහි සේවකයන් සමග කිසිදු සම්බන්ධතාවක් පවත්වා නොමැත.
මෙම ආසාදිතයන් වාර්තා වීමත් සමග, අදාළ නවාතැන් ස්ථානය හුදෙකලා කරන ලද අතර ඊට ඇතුළු වීම හා ඉන් පිටවීම සීමා කරන ලදි. මෙවැනි අවස්ථා සම්බන්ධයෙන් දැනට පවතින මාර්ගෝපදේශ අනුව පරිශ්‍රයේ නවාතැන් හා අනෙකුත් ස්ථාන විෂබීජහරණය කෙරිණි. කොළඹ වරාය නගර ව්‍යාපෘතියේ කටයුතු දෛනිකව ක්‍රියාත්මක වීම ආරම්භ වූ දා සිටම, ව්‍යාපෘතියට එක්වීමට පෙර සියලුම කාර්ය මණ්ඩල සාමාජිකයන් ඡක්‍ඍ පරීක්ෂණ වලට ලක්කරන ලද අතර, අඛණ්ඩව අහඹු පරීක්ෂණද සිදුකරන ලදි. එහෙත් මේ දක්වා එම පරීක්ෂණ වලින් කිසිදු ආසාදිතයෙකු වාර්තා නොවී ය.
පසුගිය මාර්තු මාසයේදී ශ්‍රී ලංකාව තුළ මුලින්ම කොවිඩ් -19 ආසාදිතයන් වාර්තා වූ අවස්ථාවේ සිටම රජයේ මාර්ගෝපදේශ වලට අනුකූලව, හැකි අයුරින් ඉදිකිරීම් කටයුතු අඛණ්ඩව සිදුකරන අතරම රෝගය පැතිරීමේ ඉඩකඩ අවම කිරීම සඳහා දැඩි ක්‍රියාමාර්ග ගැනීමට පොර්ට් සිටි සමාගම පියවර ගෙන තිබේ. තාවකාලික නවාතැන් ස්ථාන වල සිට සේවකයන් ඉදිකිරීම් පරිශ්‍ර වෙත ප්‍රවාහනය කිරීම සඳහා විශේෂ ප්‍රවාහන විධිවිධාන යෙදීම වැනි ක්‍රම ඔස්සේ, බාහිර සේවකයන් හා පෝර්ට් සිටි කාර්ය මණ්ඩලය අතර සම්බන්ධතා ඇතිවීමේ ඉඩකඩ අවම කෙරිණි.
තත්ත්වය සමීපව නිරීක්ෂණය කරමින්, අවශ්‍ය පරිදි හා හැකි ඉක්මනින් ජනතාව දැනුවත් කිරීමට කොළඹ වරාය නගර ව්‍යාපෘතිය අපේක්ෂා කරයි. වෛරසය පැතිරීම පාලනය කිරීමට හැකි සෑම පියවරක්ම ගන්නා අතර, ශ්‍රී ලංකා රජය, ජනාධිපති ලේකම් කාර්යාලය, සෞඛ්‍ය බලධාරීන්, ඉදිරිපෙළ කාර්ය මණ්ඩල සහ අනෙකුත් සියලුම පාර්ශ්වයන් විසින් ජනතාවගේ ආරක්ෂාව වෙනුවෙන් ගනු ලබන සියලුම පියවර සඳහා චෙක් පෝර්ට් සිටි කලම්බු සමාගම හැකි උපරිමයෙන් සහයෝගය ලබාදෙනු ඇත.
