එම්. එම්. බී. එල්. පාත්ෆයින්ඩර් සමූහ ව්‍යාපාරයට අනුබද්ධ උපදේශන සේවා සමාගම ජාත්‍යත්තර ප්‍රමුණ තොරතුරු සහ සන්නිවේදන තාක්ෂණ සේවා සමාගමක් වන හුවාවේ සමග ශ්‍රී ලංකාවේ තොරතුරු සන්නිවේදන තාක්ෂණික භාවිතය පැතිරීම දිරිමත් කරන ගිවිසුමක් අත්සන් කර තිබේ. මෙම හවුල්කාර ගිවිසුම අනුව දෙපාර්ශවය අතර ගැඹුරු අවබෝධයක් ඇතිකරගැනීමට අවස්ථාව ලැබෙන අතර ශ්‍රී ලංකාවට තොරතුරු සන්නිවේදන අවකාශය සම්බන්ධයෙන් නවතම අවකාශයක් නිර්මාණය වෙයි.
ඉතාම දියුණු තාක්ෂණය රටට ලබාගැනීමට හැකිවන පරිදි මෙම ගිවිසුමට එළැඹ ඇති බව එය අත්සන් කරමින් පාත්ෆයින්ඩර් උපදේශන සේවා සමාගම සහ පාත්ෆයින්ඩර් පදනමේ සභාපති බර්නාඞ් ගුණතිලක මහතා ප්‍රකාශ කරයි. කෘතීම බුද්ධිය හා නවෝත්පාදනය සම්බන්ධ අලුත්ම තාක්ෂණය රටට හඳුන්වාදීම අරමුණු කරගෙන මෙම අවබෝධතාව ඉතා වැදගත් බව හුවාවේ සමාගමේ ශ්‍රී ලාකේය ප්‍රධාන විධායක නිලධාරී ලින්ග් යී මහතා මෙහි දී සඳහන් කළේය. මෙරට සන්නිවේදන අවශ්‍යතා වෙනුවෙන් වේගවත් හා පැතිරුණ සේවා සමූහයක් සම්පාදනයට හුවාවේ සමාගම ආයෝජනය කර ඇති අතර මෙමගින් ශ්‍රී ලංකාව හොඳ අන්තර් ජාල සම්බන්ධතා සහිතව ජාත්‍යන්තරයේ පෙනී සිටිනු ඇති බව ද හෙතෙම කියා සිටී.
මෙම අවබෝධතා ගිවිසුම අනුව ශ්‍රී ලංකාවට ගැලපෙන තාක්ෂණය වෙනුවෙන් පාත්ෆයින්ඩර් උපදේශන සමාගම සමග එකතු වී අලුත් අවස්ථා සොයා බලනු ඇති අතර තොරතුරු සන්නිවේදන හා කෘතීම බුද්ධියට අදාල අංශ භාවිතා කරන වරාය, ගුවන් තොටුපොල, අධ්‍යාපන සහ කෘෂි ක්ෂේත්‍රයන්හි ව්‍යාපෘති වෙනුවෙන් විශේෂ අවධානය යොමු කරනු ඇත. දෙපාර්ශවය සමග එකතු වී තොරතරු සන්නිවේදනය ක්ෂේත්‍රය පොෂණය කරන නියාමන ව්‍යාපෘති ක්‍රියාත්මක කිරීමට ද ගිවිසුමෙන් අවස්ථාව සැලසේ. හුවාවේ සමාගම 1998 වසරේ සිට ව්‍යාපාර අරඹා ඇති අතර රජය හා මෙරට ප්‍රමුඛ සන්නිවේදන ආයතන සමග එකතු වී මෙහෙයුම් කරගෙන යයි.
