එක්සත් ජාතික පක්ෂයෙන් ඉවත් කළහොත් ශ්‍රීලනිප නායක, ජනාධිපති මෛත්‍රීපාල සිරිසේන මහතා වෙත එන්නැයි ඇමති විජයදාස රාජපක්ෂ මහතාට ශ්‍රීලනිප ඇමැතිවරයෙකු විසින් යෝජනාවක් ඉදිරිපත් කර තිබේ.

විජයදාස රාජපක්ෂ මහතා ශ්‍රී ලංකා නිදහස් පක්ෂයේ සිටි අයෙකු බවත් වර්තමාන කෝප් කමිටුවට පෙර තිබූ කෝප් කමිටුවේ සභාපති වූයේ විජේදාස රාජපක්ෂ මහතා බවත් විජයදාස රාජපක්ෂ මහතා හොරෙක් නොවන බවත් එම ඇමැතිවරයා ශ්‍රීලනිප සාකච්ඡාවකදී සඳහන් කර තිබේ.

එම කෝප් කමිටුව තුළින් හොරු සහ වංචාකාරයෝ පිළිබඳ විශාල හෙළිදරව් කීපයක් සිදුකළ බවත් එනිසාම එතුමාට මහින්ද රාජපක්ෂ මහතාගේ ආණ්ඩුවෙන් එළියට යාමට සිදු වූ බවත් එම ඇමැතිවරයා එහිදී පෙන්වා දී ඇත.

විජයදාස රාජපක්ෂ මහතා මහින්ද රාජපක්ෂ ආණ්ඩුවෙන් ඉවත් වූ පසු හිටපු ජනාධිපතිතුමාගේ ප්‍රධානත්වයෙන් අරලියගහ මන්දිරයේ තිබු රැස්වීමකදී ඒකාබද්ධ විපක්ෂයේ ඉඳන් අද විජයදාස ඇමැතිවරයාට එන්නැයි කියා ආරාධනා කරන මන්ත්‍රීවරු විජයදාස ඇමැතිවරයාව දැඩි ලෙස විවේචනයට ලක් කළ බවත් පෙන්වා දී ඇත.

ඒ අනුව එජාපයෙන් යම් තීන්දුවක් ගතහොත් ඇමති විජයදාස රාජපක්ෂ මහතා ශ්‍රීලනිපයට එක් කර ගත යුතු බවද එහිදී ඇමැතිවරයා අවධාරණය කර තිබේ.

කෙසේ වෙතත් එජාප ආරංචි මාර්ග සඳහන් කළේ අධිකරණ අමාත්‍ය විජයදාස රාජපක්ෂ මහතාට එරෙහිව විශ්වාසභංග යෝජනාවක් ගෙන ඒම සම්බන්ධයෙන් අවසන් තීරණය ලබන 17 වනදා රැස් වන එක්සත් ජාතික පක්ෂ කෘත්‍යාධිකාරි මණ්ඩලයේදී ගන්නා බවයි.

අමාත්‍ය මණ්ඩලයේ සාමුහිකත්වය කඩ කිරීම සහ අධිකරණ අමාත්‍ය ධුරයේ වගකීම නිසි ලෙස ඉටු නොකළ බව පවසමින් එක්සත් ජාතික පක්ෂයේ පසුපෙළ මන්ත්‍රීවරුන් පිරිසක් විජේදාස රාජපක්ෂට එරෙහිව විශ්වාසභංග යෝජනාවක් ගෙන ඒමට සූදානමක් තිබිණි.

කෙසේ වෙතත් ඒ සම්බන්ධයෙන් තවමත් අවසන් තීරණයක් ගෙන නොමැති බව වාර්තාවේ.

රවී කරුණානායක මහතාට එරෙහිව ගෙන විශ්වාසභංගයේ දී හෘද සාක්ෂියට එකගව ඡන්ද විමසිමක් තුළ එක්සත් ජාතික පක්ෂයේ සහය හිමිවන බව ඒකාබද්ධ විපක්ෂය පවසයි.

අමාත්‍ය රවී කරුණානායක මහතාට එරෙහිව ඊයේ (03) ඒකාබද්ධ විපක්ෂය විසින් කතානායක කාර්යාලය වෙත විශ්වාසභංග යෝජනාවක් බාර දුන්නේය.

පාර්ලිමේන්තු මන්ත‍්‍රී උදය ගම්මන්පිල මහතා සඳහන් කළේ තමා පෞද්ගලිකව හමුවී එක්සත් ජාතික පක්ෂයේ අමාත්‍යවරු කිහිප දෙනෙක්ම රවී කරුණානායක මහතාට එරෙහිව ගෙන එන විශ්වාසභංග යෝජනාවක් සඳහා සහය පළ කළ බවයි.

ඒ අනුව එජාපයේ කැබිනට් ඇමැතිවරයෙකු, නියෝජ්‍ය ඇමැතිවරයෙකු සහ මන්ත්‍රීවරුන් තිදෙනෙකු රවී කරුණානායක මහතාට එරෙහිව ගෙන එන විශ්වාසභංග යෝජනාවක් සඳහා පක්ෂව ඡන්දය ප්‍රකාශ කරන බවට පොරොන්දු වී බවත් “අපේ මිනිහා රකින්න එන්නේ නෑ“ යැයි තවත් එක් කැබිනට් ඇමැතිවරයෙකු සඳහන් කළ බවත් උදය ගම්මන්පිල මන්ත්‍රීවරයා හෙළි කළේය.

ත්‍රස්තවාදය සහමුලින්ම අවසන් වී නොමැති බවටත් එල්.ටී.ටී.ඊ. සංවිධානය මුලින්ම පටන්ගත්ත විදිහට නැවත එන්න හදන උත්සහය නැවත්විය යුතු බවට පොලිස්පති පූජිත ජයසුන්දර මහතා කියා සිටියේය.

පොලිස්පතිවරයා මේ බව කියා සිටියේ ඊයේ (01) යාපනය පොලීසියේ ශ්‍රවනාගාරයේදී සිවිල් සංවිධාන හා ආගමික නායකයින් සමග පැවති සාකච්ඡාවක් අමතමිනි.

එහිදී පොලිස්පතිවරයා මෙසේ අදහස් දැක්වීය.

“ඕනෑම රටක් ගත්තොත් එය අපේ රටට සමානයි ත්‍රස්තවාදයක් අවුරුදු 30 ක් වැනි කාලයක් පැවති රටක අපි ත්‍රස්තවාදය අවසන් කරයි.කිව්වට එහි යම් යම් බීජයන් ඒ ආකාරයෙන්ම අවසන් වුනයි කියල කාටවත් කියන්න බැහැ.මේ කරුනු මම කියන්න කැමතියි එකක් ත්‍රස්තවාදීන් විසින් පාවිච්චි කරපු අවි ආයුධ ලක්ෂ ගනනින් බාරදුන්නා.සියලු ආයුද ඉවරයි කියන්න බැහැ.අනිත් එක ඒ අයගෙ තිබුනු පුහුණුව ජීවන රටාවත් එක්ක ගියපු ආකල්ප වෙනස් වෙලා නැහැ.එකක් වුනා දෙකක් වුනා අපේ නිලධාරීන්ගෙත් වැරදි තිබුණා.මේක මේ විදිහට යන්න දෙන්න බැහැ.මේක නවත්තන්න වෙනවා.පොලීසිය හා පොලිස් විශේෂ කාර්ය බලකාය දැන් ආරක්ෂාව තහවුරු කරල තියනවා.නමුත් අපිට මහජනතාවගේ සහයත් අවවශ්‍යයි.එයයි මෙහි ප්‍රධානතම දේ.ප්‍රතිඵල දායක විදිහට ප්‍රජා පොලිස් කමිටු උපදේශක කමිටු, රාජ්‍ය නිලධාරීන් හා ප්‍රදේශයේ මහජනතාවගේ තියන සබඳතාවය,විශ්වාසය නැත්තම් මේ ගමන යන්න පහසු නැහැ.විවිධ අන්තවාදීන් හා සංවිධානවල පුද්ගලයින් විසින් විවිධාකාරයෙන් ජනමාධ්‍යත් යොදා ගෙන මේ සාමය හා ජනජීවිතය අවුල්සහගතවන අයුරින් වැරදි අර්ථකතනයන් දේශීය හා විදේශීව දෙන්න උත්සහ කරනවා හුදෙක් ඒ අයගේ පෞද්ගලික අවශ්‍යතා හා පැවත්ම මෙන්ම මුදල් හම්බ කිරීම උදෙසා එල්.ටී.ටී.ඊ සංවිධානයත් මුලින් ආව විදිහට තමයි මේ අය එන්න හදන්නේ.”

“මේකට අපි ඉඩ දිය යුතු නැහැ ඔබ එය නිවරදිව වටහාගන්න.මේකට දෙන්න පුලුවන් හොඳම උත්තරය තමයි නීතිය ක්‍රියාත්මක කිරීම හා සාමය සුරකීම ඉතාමත් ක්‍රමානුකූල විදිහට පෞද්ගලික න්‍යාය පත්‍රයන් තොරව එකිනෙකාගේ අවශ්‍යතා ඉෂ්ඨ කරන්න නොව සමස්ත ජනතාව වෙනුවෙන් තමුන්නාන්සේලා සියලු දෙනා වෙනුවෙන් තමයි මේ ශ්‍රිලංකා පොලීසිය තියෙන්නේ එයට සහයට ජාතික ආරක්ෂාව සහතික කිරීමට හමුදාමය තත්වයක් තියනවා.ඒ හැමදෙනෙක්ම එකතුවෙලා ඉන්නේ.පෞද්ගලිකව පලිගන්න ගහන්න විනාශ කරන්න බැහැ.එක් එක් වාහනවලින් සුදු වෑන්වලින් වගේ අරන් යන්න ඒවා කරන්න බැහැ.රටේ නීතියට අනුකූලව ප්‍රදේශයේ පරිපාලනයට අනුකූලව අවශ්‍ය සාක්ෂි සහිතව නීතිමය අයුරින් අත්අඩංගුවට ගෙන අධිකරණයට ඉදිරිපත් කිරීමයි.අපේ නිලධාරියෙකු කැපුවා අපේ නිලධාරියෙකු මැරුවයි කියලා අපි පලිගන්න යන්නෙ නැහැ.අපි එස්.ටී.එෆ් එකෙත් උදව් අරගෙන හමුදාවෙත් උදව් අරගෙන මිනිස්සුන්ට හිංසා වෙන කොයිම විදිහේ වැඩපිළිවලක්වත් දියත් කරන්නෙ නැහැ.අපි බොහොම ඉවසීමෙන් සංයමයෙන් එ සිද්ධි දිහා බලලා අදාල පුද්ගලයින් ගැන බුද්ධි අංශවලිනුත් තොරතුරු අරන් අපි සාකච්ඡා කරල තමයි අපි අත්අඩංගුවට ගන්නෙ අපි දැනටමත් පුද්ගලයින් දෙදෙනෙකු අත්අඩංගුව ගෙන තිබෙනවා ඒ අය පුනරුත්තාපනය නොවුනු හිටපු එල්.ටී.ටී.ඊ සංවිධානයට අයත් අය පොලීසියට පහර දීමට 15 විතර යතුරු පැදිවලින් පැමිණ තිබෙනවා.අපි ඒ අය එකින් එකා අත්අඩංගුවට ගන්නවා.නීතියට අනුව මේ පෞද්ගලිකත්වකින් තොරව මේ කාර්ය සාර්ථක කරගන්න නම් අපට මහජනතාවගේ සහයත් අවශ්‍ය වෙනවා.ඔබ මේ ගැන ඔබේ ප්‍රදේශයට ගොස් අනෙකුත් අය සමග සාකච්ඡා කොට ඔවුන්ට පැහැදිලි කරයි කියා මා හිතනවා.” යැයිද පොලිස්පතිවරයා පැවසීය.

(වන්නි රොමේෂ් මධුෂංඛ)

චයිනා මර්චන්ට් සමාගමට හම්බන්තොට වරාය ලබා දීමෙන් මේ ගිවිසුම පිටිපස්සේත් ඇලෝසියස් කෙනෙකු සිටින බව පැහැදිලි බව පාර්ලිමේන්තු මන්ත්‍රී නීතිඥ උදය ගම්මන්පිල මහතා පවසයි.

ඔහු මේ බව කියා සිටියේ අද(31) කොළඹදී පැවති මාධ්‍යහමුවකට එක්වෙමිනි.

ඒ ඇලෝසියස් කව්ද යන්න එපාට්මන්ට ගනුදෙනු වෙනකොට සොයාගත හැකිවනු ඇති බවත් ලක් අම්මා 2015 ජනවාරි 8 අප්පච්චිව අත් හැරලා බාප්පොච්චියෙක් සරණ ගිය බවත් අප්පච්චි ආදරයෙන් හැදූ දරුවන්ට ඒ බාප්පොච්චි වෙනස්කම් කරන බවත් හෙතෙම සඳහන් කළේය.
එමෙන්ම හම්බන්තොට වරාය විකුණා දැමීමට හේතු ලෙස ආණ්ඩුව පෙන්වා දෙන්නේ රාජපක්ෂ ණය බර බවත් එය මෙය ආණ්ඩුව විසින් පවසන පට්ටපල් බොරුවක් බවත් ගම්මන්පිල මහතා පෙන්වා දෙයි.

එහිදී වැඩිදුරටත් අදහස් දැක්වූ ඒ මහතා,

“හම්බන්තොට වරාය විකුණා දැමීමට හේතු ලෙස ආණ්ඩුව කියන්නේ රාජපක්ෂ ණය බරයි. මේක පට්ටපල් බොරුවක්. වරාය අධිකාරිය කිසිම අපහසුවකින් තොරව 2016 දක්වාම ණය සහ පොලී ගෙවා දැවැන්ත ලාභයක් ද ලැබුවා. ඉදිරියටත් කිසිම අමාරුවකින් තොරව ණය ගෙවන්න ප්‍රමාණවත් ආදායමක් තිබෙන බව වරාය අධිකාරියේ අනාගත ලාභ පුරෝකතන කිරීම් හරහා එහි මුල්‍ය අංශය වාර්ථාකොට තිබෙනවා. වරාය ඉදි කිරීම සඳහා ලබා ගත් ණය මුදල ඩොලර් මිලියන 1,266යි. 2036 දක්වා ගෙවිය යුතු සම්පූර්ණ ණය පොලිය ඩොලර් මිලියන 495යි. 2036 වන විට අපි ගෙවන සම්පූර්ණ මුදල ඩොමි 1,761යි. එයින් ඩො.මි 498ක් 2016 අග වන විට ගෙවා අවසන් කරලා තිබ්බේ. ඒ වගේම අනිත් අතට ණය බර නිසා නම් මේක විකුණුවේ විකුණා ලැබෙන ආදායමෙන් ණය කපා හරින්න ඕනෑ. මම ඉතාම වගකීමෙන් කියනවා වරාය විකුණා ලැබෙන මුදලින් එක ශත පහක් ණය කපා හරින්න මේ මුදල් ගන්නේ නෑ ගිවිසුමට අනුව. ජාතිය සතු මේ වටිනාම සම්පත විකුණලත් ණය බර ශත පහකින් වෙනස් වෙන්නේ නෑ. ඒ වෙනුවට අප සතු වටිනාම සම්පත විකුණා ලත් ඒ මුදල ගෙන්වා ගන්නේ භාණ්ඩාගාරයට. ආණ්ඩුවේ ඇමතිවරුන් සැප විඳින්න සවාරි ගහන්න ගත්තු ණය තමයි මේ මුදලින් ගෙවන්නේ.“

“මේ ගනුදෙනුවේ දැවැන්ත දූෂණයක් තිබෙනවා. වරායේ උපසභාපතිවරයාගේ ප්‍රධානත්වයෙන් පත් කළ පස් පුද්ගල කමිටුව චයිනා මර්චන්ට් සමාගම චයිනා හාබර් සමාගමෙන් ලබා දුන්නු යෝජනා දෙක අධ්‍යනය කළා. චයිනා මර්චන්ට් සමාගම වසර 99ට ආණ්ඩුවට ලබා දෙන්නේ ඩොමි 1,888ක ආදායමක්. නමුත් චයිනා හාබර් සමාගම වසර 50ට ඩොමි 3,281ක්. වසර 99ට නම් දළ වශයෙන් ඩො මි 6,560ක්. චයිනා හාබර් සමාගම දෙන මුදලෙන් තුනෙන් එකක්වත් දෙන්නේ නැති චයිනා මර්චන්ට් සමාගමට වරාය දීමෙන් මේ ගිවිසුම පිටිපස්සේත් ඇලෝසියස් කෙනෙකු සිටින බව පැහැදිලියි. ඒ ඇලෝසියස් කව්ද කියලා එපාට්මන්ට එහෙම ගනුදෙනු වෙනකොට සොයාගත හැකි වේවී.“

ලක් අම්මා 2015 ජනවාරි 8 අප්පච්චිව අත් හැරලා බාප්පොච්චියෙක් සරණ ගියා. ඉතින් අර අප්පච්චි ආදරයෙන් හැදූ දරුවන්ට ඒ බාප්පොච්චි වෙනස්කම් කරනවා. දරුවන්ව ඉන්දියාවට චීනයට මෙහෙවර කමේ යවනවා. දරුවන් හැදූ අප්පච්චිට වේදනාවයි. ළඟදීම අප්පච්චි තමන් හැදූ දරුවෝ රැක ගන්න එනවා කියලා අපි සිහිපත් කරනවා.නුදුරු අනාගතයේ බිහි වෙන අපේ ආණ්ඩුවකින් හම්බන්තොට වරාය යළි ජනසතු කරන බව අපි කිව්වාම සමහරු අහනවා පෝට් සිටි පවරා ගත්තා වගේ ද කියලා. සමහරු අපට උපදෙස් දෙනවා චීනය කියන්නේ අනාගත ලෝකයේ සුපිරි බලවතා. නිකන් කළු ගලේ ඔළුව ගසා ගන්න එපා කියලා. නමුත් හරි කලාවට කළු ගලේ ඔළුව ගැහුව්වොත් ඔළුව තුවාල වෙනවා වෙනුවට කළු ගල පුපුරා හැලෙන බව ඉතිහාසයේ තිබෙනවා.“ යැයි මන්ත්‍රීවරයා වැඩිදුරටත් පැවසී ය.