February 27, 2021

එක්සත් ජාතික පක්ෂයේ උප සභාපති ධූරයකින් පිදුම් ලැබූ සාගල රත්නායක මහතාද ඒ සම්බන්ධයෙන් සතුටකින් පසු නොවන බව සිරිකොත ආරංචි මාර්ග පෙන්වා දෙයි.

පක්ෂ නායක රනිල් වික්‍රමසිංහ මහතාගේ ඉතාමත්ම සමීප කිට්ටුවන්තයෙකු වන රත්නායක මහතා බොහෝ කලක සිට පක්ෂ මහලේකම් ධුරය බලාපොරොත්තුවෙන් සිටි බව ප්‍රකට කරුණකි.

එහෙත් රනිල් වික්‍රමසිංහ මහතා පක්ෂයේ සෙස්සන්ගේ ඉල්ලීමකට කන් දෙමින් පාලිත රංගේ බණ්ඩාර මහතාව පක්ෂ මහලේකම් ධූරයට පත් කරන ලදී.

මේ හේතුවෙන් ඉකුත් 21 දින සිරිකොතේ පැවැති එක්සත් ජාතික පක්ෂයේ නිලතල වලට පත් නව නිලධාරි මණ්ඩලය නිල වශයෙන් සිය රාජකාරි කටයුතු භාර ගැනීමේ අවස්ථාවටද රත්නායක මහතා සම්බන්ධ නොවීය.

මීට පෙර වික්‍රමසිංහ මහතාගේ තවත් කිට්ටු සමිපතයෙකු වන අකිල විරාජ් කාරියවසම් මහතා ද ජාතික ලැයිස්තු මන්ත්‍රීධූරය ඉල්ලමින් වික්‍රමසිංහ මහතා සමග ගැටුම්කාරී පසුබිමක් නිර්මාණයක කොටගෙන තිබූ බව ද ප්‍රකට කරුණකි.

තමා හොඳ පෞරුෂයක් තියෙන පුද්ගලයකු බැවින් යහපාලන ආණ්ඩු සමයේ දැරූ නීතිය හා සාමය කටයුතු අමාත්‍ය ධූරයෙන් ඉල්ලා අස් වූ බව සාගල රත්නායක මහතා පාස්කු ඉරුදින ‍ප්‍රහාරය පිළිබඳව සෙවීමට පත් කර තිබෙන විශේෂ ජනාධිපති කොමිසම හමුවේ ප්‍රකාශ කොට තිබේ.

එවකට සිටි ජනාධිපතිවරයා වූ මෛත්‍රිපාල සිරිසේන මහතා තමාට දිගින් දිගටම නීතියට පිටින් කටයුතු කරන ලෙස කරන ලද බලපෑම් මත තමා එම තීරණය ගත් බවද රත්නායක මහතා එහිදී ප්‍රකාශ කොට තිබේ.

විශේෂයෙන්ම බරපතළ චෝදනා එල්ල වී සිටි ප්‍රබල දේශපාලනඥයින්ට එරෙහිව නීතිමය ක්‍රියාමාර්ග නොගන්නා ලෙස හිටපු ජනපතිවරයා තමන්ට බලපෑම් එල්ල කළ බව රත්නායක මහතා වැඩිදුරටත් එම කොමිසම හමුවේ සඳහන් කොට තිබේ.

ඉදිරියේදී පැවැත්වෙන මැතිවරණවලදී එක්සත් ජාතික පක්ෂය ජයග්‍රහණය කරා මෙහෙය වීමට අවශ්‍ය සැලසුම් සකස් කිරීමේ වගකීම පක්ෂ නායක රනිල් වික්‍රමසිංහ මහතා විසින් සාගල රත්නායක මහතාට භාරදී තිබේ.

සාගල රත්නායක මහතාට ඒ සඳහා ආචාර්ය කරුණාසේන කොඩිතුවක්කු මහතාගේද සහාය ලබා ගන්නා ලෙස වික්‍රමසිංහ මහතා රත්නායක මහතාට දැනුම් දී තිබේ.

එක්සත් ජාතික පක්ෂය අන්ත පරාජයක් ලැබූ පසුගිය පාර්ලිමේන්තු මැතිවරණයේ දී මැතිවරණ මෙහෙයුම් ප්‍රධානියා ලෙස ද සාගල රත්නායක මහතාව රනිල් වික්‍රමසිංහ මහතා විසින් පත් කොට තිබුණි.

තමන් නීතිය හා සාමය විෂයභාර අමාත්‍යවරයා ලෙස කටයුතු කළ කාලය තුළ ජාතික ආරක්ෂක කවුන්සිලයේදී සහරාන් හෂීම් පිළිබඳ සාකච්ඡා නොවූ බව හිටපු අමාත්‍ය සාගල රත්නායක මහතා පැවසීය.

පාස්කු ප්‍රහාරය පිළිබඳ විමර්ශනය කරන ජනාධිපති කොමිසම හමුවේ සාක්ෂි ලබාදෙමින් ඔහු මේ බව සඳහන් කළේය.

පාස්කු ප්‍රහාරය පිළිබඳ විමර්ශනය කරන ජනාධිපති කොමිසම හමුවට සාක්ෂි ලබාදීම සඳහා පසුගිය ආණ්ඩුව සමයේ හිටපු නීතිය හා සාමය පිළිබඳ අමාත්‍යවරයා ලෙස කටයුතු කළ සාගල රත්නායක මහතා පැමිණියේ පළමු වරටය.

එහිදී සාක්ෂි ලබාදෙමින් හිටපු අමාත්‍යවරයා කියා සිටියේ 2015 වර්ෂයේ යහපාලන රජය බලයට පත්වීමෙන් පසු එතෙක් එකම අමාත්‍යාංශයක් යටතට වැටුණු ආරක්ෂාව සහ නීතිය හා සාමය යන විෂය පථයන් අමාත්‍යංශ දෙකක් යටතේ පවතින ලෙස වෙන් කෙරුණු බවය.

එහිදී රජයේ ජ්‍යෙෂ්ඨ අධිනීතිඥවරිය විමසා සිටියේ ඔබ නීතිය හා සාමය විෂයභාර අමාත්‍යවරයාව සිටි කාලය තුළ යුද හමුදා බුද්ධි අංශවලින් සහ රාජ්‍ය බුද්ධි සේවයෙන් ඔබ වෙත වාර්තා සැපයීමක් සිදු කළේද යන්නය.

සාගල රත්නායක මහතා ඊට මෙසේ පිළිතුරු ලබාදී තිබුණි.

"රාජ්‍ය බුද්ධි සේවය තොරතුරු වාර්තා කළේ ආරක්ෂක ලේකම්වරයාට පමණයි. නමුත් නීතිය හා සාමය සම්බන්ධයෙන් වැදගත් වෙන වාර්තා මට යොමු කරනවා. මට ඒ වගේ වාර්තා 407 ක් පමණ ලැබිලා තියෙනවා. යුද හමුදා බුද්ධි අංශ නම් මට වාර්තා ඉදිරිපත් කළේ නැහැ." 

ජාතික ආරක්ෂක අධ්‍යයන ආයතනය නැමැති ආයතනයක් හරහා බුද්ධි තොරතුරු විශ්ලේෂණය කර ඉදිරිපත් කෙරෙන බව ඔබ දැනසිටියේදැයි මෙහිදී රජයේ ජ්‍යෙෂ්ඨ අධිනීතිඥවරිය ප්‍රශ්න කළ අතර එයට පිළිතුරු ලෙස සාගල රත්නායක මහතා කියා සිටියේ තමන් මෙම අවස්ථාව වන තෙක් එවැනි ආයතනයක් හෝ එවැනි ක්‍රියාවලියක් පිළිබද දැන නොසිටි බවය.

එහිදි රජයේ ජ්‍යෙෂ්ඨ අධිනීතිඥවරිය විමසා සිටියේ ඔබ බුද්ධි සම්බන්ධිකරණ රැස්වීම් කොපමණ ප්‍රමාණයකට සහභාගී වුණා ද යන්නය.

එයට පිළිතුරු දුන් සාගල රත්නායක මහතා, තමන් සහභාගී වු බුද්ධි සම්බන්ධිකරණ රැස්වීම් ගණන පිළිබඳ නිශ්චිත මතකයක් නොමැති වුවද, ජාතික ආරක්ෂක කවුන්සිල 09 කට පමණ ආරාධනා ලැබි ඇති අතර ඉන් බොහෝ ප්‍රමාණයකට සහභාගි වූ බව පැවසීය.

එහිදි රජයේ ජ්‍යෙෂ්ඨ අධිනීතිඥවරිය පෙරළා ප්‍රශ්න කළේ ඔබ සහභාගී වු ජාතික ආරක්ෂක කවුන්සිල රැස්වීම්වල දී සහරාන් හෂීම් පිළිබඳ සාකච්ඡා වුයේ ද යන්නය.

"නැහැ මට එහෙම මතකයක් නැහැ. එහෙම කතා වුණානම් මම ගත්තු පියවර ගැන සොයා බලනවා. නීති උපදෙස් ගත්තද කියලා සොයා බලනවා," යනුවෙන් හිටපු අමාත්‍යවරයා පිළිතුරු ලබාදී තිබුණි.

එම ජාතික ආරක්ෂක කවුන්සිලවල දී සහරාන් අත්අඩංගුවට ගන්න කියා එවකට ජනාධිපතිවරයා විසින් පොලිස්පතිවරයාට නියෝග කර තිබුණේ ද යන්න එහිදී රජයේ ජ්‍යෙෂ්ඨ අධිනීතිඥවරිය විමසා සිටියාය.

සාගල රත්නායක මහතා ජනාධිපති කොමිසම හමුවේ ඊට පිළිතුරු ලබාදෙමින් සඳහන් කර සිටියේ" නැහැ.. කිසිදු අවස්ථාවක නැහැ." යනුවෙනි.

මේ වර්ෂයේ අග හෝ ලබන වර්ෂය මුල දැනට එක්සත් ජාතික පක්ෂයේ නියෝජ්‍ය නායකධුරය දරන රුවන් විජේවර්ධන මහතා පක්ෂයේ නායකත්වයට පත් කිරීමෙන් පසු පක්ෂය ගොඩ නැගීමට ඔහුට සහාය දීම සඳහා පත් කළ යුතු කණ්ඩායම් පිළිබඳව ද පක්ෂ නායක රනිල් වික්‍රමසිංහ මහතා තුළ පැහැදිලි සැලැස්මක් තිබෙන බව සිරිකොත ආරංචි මාර්ග සඳහන් කරයි.

ඒ අනුව රුවන් විජේවර්ධන මහතා පක්ෂ නායකයා ලෙස පත් වීමෙන් පසු පුරප්පාඩු වන නියෝජ්‍ය නායක ධුරයට අකිල විරාජ් කාරියවසම් මහතාවද කාරියවසම් මහතා එම තනතුරට පත් කිරීමෙන් පුරප්පාඩු වන මහලේකම් ධූරය සඳහා සාගල රත්නායක මහතාවද පත්කිරීම වික්‍රමසිංහ මහතාගේ සැලැස්ම වෙයි.

සාගල රත්නායක මහතා බොහෝ කලක සිට පක්ෂ මහලේකම් ධූරය බලාපොරොත්තුවෙන් සිටින බව ප්‍රකට කරුණකි.

මෙම පත්කිරීම් සඳහා පක්ෂ කෘත්‍යාධිකාරී මණ්ඩලයේ දැනට සිටින සාමාජිකයින් හතළිස් දෙනාගෙන් බහුතරයකගේ කැමැත්ත අවශ්‍ය වන අතර එම කැමැත්ත ලබා ගැනීමේ ගැටලුවක් වික්‍රමසිංහ මහතාට නොමැති බවද සිරිකොත ආරංචි මාර්ග වැඩිදුරටත් සඳහන් කරයි.

එක්සත් ජාතික පක්ෂ කෘත්‍යාධිකාරි මණ්ඩලයේ බහුතරයක් පත් කරනු ලබන්නේ පක්ෂ නායකයා විසිනි.

එක්සත් ජාතික පක්ෂ මහ ලේකම් අකිල විරාජ් කාරියවසම් මහතා සම්බන්ධයෙන් පක්ෂ නායක රනිල් වික්‍රමසිංහ මහතා තුළ තිබූ විශ්වාසය බිඳ වැටි ඇති බැව් සිරිකොත ආරංචි මාර්ග සඳහන් කරයි.

මේ දෙදෙනා අතර ගැටුමක් ඇති කිරීමට මුල් වී තිබෙන්නේ වික්‍රමසිංහ මහතාගේ ඉතාම සමීපතයෙකු වන හිටපු අමාත්‍යවරයෙකු වූ සාගර රත්නායක මහතා බවද වාර්තා වෙයි.

දැනගන්නට තිබෙන ආකාරයට කාරියවසම් මහතා යම් යම් දේශපාලන හා පෞද්ගලික කාරණා කිහිපයක් මුල් කොටගෙන වික්‍රමසිංහ මහතාට දෙස් පවසා ඇති අතර ඒ අවස්ථා ඉන් උරන වූ වික්‍රමසිංහ මහතා කාරියවසම් මහතාට බැන පන්නාගෙන තිබේ.

ඉන්පසු වික්‍රමසිංහ මහතා මෙම සිද්ධිය හිතවතුන් කිහිප දෙනෙකුට දැනුම් දී තිබෙන අතර කළක් අමනාපව සිටි මලික් වික්‍රමසිංහ මහතාද ඒ අතර වේ.

එළැඹෙන මහා මැතිවරණයට පෙර එක්සත් ජාතික පක්ෂයේ ප්‍රධාන තනතුරු කිහිපයක වෙනසක් සිදු කිරීමට එජාප නායක රනිල් වික්‍රමසිංහ මහතා සැලසුම් කර තිබේ.

සජිත් ප්‍රේමදාස මහතා දැරූ නියෝජ්‍ය නායක ධූරය රවී කරුණානායක මහතාටත් ඔහු දැරූ උප නායක ධූරය අකිල විරාජ් කාරියවසම් මහතාටත්, කාරියවසම් මහතා දැරූ මහා ලේකම් ධූරය සාගල රත්නායක මහතාටත් ලබා දීමට නියමිත බව වාර්තා වෙයි. නවීන් දිසානායක මහතා ජාතික සංවිධායක ධූරයේම තැබීමට වික්‍රමසිංහ මහතා බලාපොරොත්තු වෙයි.

මේ වන විට කෘත්‍යාධිකාරී මණ්ඩලයට නව සාමාජිකයන් 09 දෙනෙකු පත් කර ඇති අතර ඉදිරියේ දී තවත් සාමාජිකයන් 21 දෙනෙකු වික්‍රමසිංහ මහතා විසින් පත් කිරීමට නියමිතය.

මෙම වෙනස් කිරීම් සමඟ ඉදිරි මහා මැතිවරණය මුහුණ දීම එජාප නායකයාගේ ඉල්ලකය වී තිබේ.

එක්සත් ජාතික පෙරමුණු රජයේ හිටපු අමාත්‍යවරයෙකු මෙන්ම එක්සත් ජාතික පක්ෂ නායක රනිල් වික්‍රමසිංහ මහතාගේ ඉතාම සමීපතමයෙකු වන සාගල රත්නායක මහතාට මෙවර ජාතික ලයිස්තුව මෙන්ම මාතර දිස්ත්‍රික් නාමයෝජනා ලැයිස්තුව ද අහිමි වී තිබේ.

මාතර දිස්ත්‍රික්කයෙන් එක්සත් ජාතික පක්ෂය යටතේ තරඟ කිරීමට සාගල රත්නායක මහතා අකමැත්තක් දක්වා ඇති අතර ඒ වෙනුවට ඔහු ජාතික ලැයිස්තු මන්ත්‍රී ධුරයක් බලාපොරොත්තු වී තිබේ.

එක්සත් ජාතික පක්ෂ ජාතික ලැයිස්තුවේ සිටින සෙසු අපේක්ෂකයන් එයට දැඩි විරෝධයක් දක්වා ඇති අතර සාගල රත්නායක මහතා ජාතික ලැයිස්තුවට ඇතුළත් කරන්නේ නම් තමන් එම ලැයිස්තුවෙන් ඉවත් වන බවට පක්ෂ නායකයින්ට දැනුම්දී තිබේ .

ඉන්පසු අවසාන මොහොතේ මාතර දිස්ත්‍රික් එක්සත් ජාතික පක්ෂ අපේක්ෂක ලැයිස්තුවේ අපේක්ෂකත්වය රත්නායක මහතාට ලබාදීමට උත්සාහ කළද ඒ වන විට එම ලැයිස්තුව වෙනස් කිරීමට නොහැකි තත්වයක් උදා වී තිබේ.

පොදුජන පෙරමුණු ජනපති අපේක්ෂක ගෝඨාභය රාජපක්ෂ මහතාට සහය දීම සඳහා අග්‍රාමාත්‍ය රනිල් වික්‍රමසිංහ මහතාට ඉතාමත්ම සමීප ඇමතිවරයෙකු පැමිණෙන බවට විපක්ෂ නායක මහින්ද රාජපක්ෂ මහතා නිරන්තරයෙන් කරන ප්‍රකාශය පිළිබඳව සමාජයේ දැඩි අවධානයක් යොමු වී තිබේ.

එම අමාත්‍යවරයා වන්නේ රනිල් වික්‍රමසිංහ මහතාට ඉතාමත් කිට්ටු වරාය සහ දක්ෂිණ සංවර්ධන අමාත්‍ය සාගල රත්නායක මහතා බවට තොරතුරු ඒෂියන් මිරර් වෙත වාර්තා වේ.

නව ප්‍රජාතන්ත්‍රවාදී පෙරමුණේ ජනපති අපේක්ෂක සජිත් ප්‍රේමදාස මහතාගේ මැතිවරණ කටයුතු සඳහා සාගල රත්නායක මහතා මේ වන තුරුත් කිසිදු සක්‍රීය දායකත්වයක් සපයා නොමැත. 

සජිත් ප්‍රේමදාස මහතාට අපේක්ෂකත්වය දීමට රනිල් වික්‍රමසිංහ මහතා එකඟවීම පිළිබඳව සාගල රත්නායක මහතා සිටින්නේ දැඩි කළ කිරීමකිනි. 

මාතර දිස්ත්‍රික්කය නියෝජනය කරන එක්සත් ජාතික පක්ෂය නියෝජනය කරන පාර්ලිමේන්තු මන්ත්‍රීවරුන් තිදෙනාගෙන් සාගල රත්නායක මහතා එක් අයෙකු වන අතර අන් දෙදෙනා වන මංගල සමරවීර සහ බුද්ධික පතිරණ යන මහත්වරුන් සජිත් ප්‍රේමදාස මහතාගේ ජයග්‍රහණය වෙනුවෙන් කැප වීමෙන් කටයුතු කරන බව දකින්නට තිබේ. මේ නිසා යම් හෙයකින් සජිත් ප්‍රේමදාස මහතා ජයග්‍රහණය කළ හොත් තමන්ගේ දේශපාලන අනාගතය දැඩි බලපෑමකට ලක් වන බැවින් සාගල රත්නායක මහතා ගෝඨාභය රාජපක්ෂ මහතාට සහය දීමට සූදානමින් සිටින බව වාර්තා වේ. 

එක්සත් ජාතික පාක්ෂිකයන්  ඡන්දය  දී පත්කර ගත් මෛත‍්‍රීපාල සිරිසේන ජනාධිපතිතුමා වෙනත් පක්ෂයක් බදාගෙන එක්සත් ජාතික පක්ෂයට  වින කරන නිසා එක්සත් ජාතික පක්ෂයේම පුද්ගලයෙක් ජනාධිපති තනතුරට පත් කරගෙන පක්ෂයේම  අගමැතිවරයෙක් සහ කැබිනට් මණ්ඩලයක් පත්කරගැනීමට එක්සත් ජාතික පාක්ෂිකයින්  වගකීම ගත යුතුයැයි වරාය හා නාවික කටයුතු සහ දක්‍ෂිණ සංවර්ධන අමාත්‍ය සාගල රත්නායක මහතා පවසයි.

ඌරුබොක්ක පස්ගොඩ පැවති පක්ෂ  ක‍්‍රියාකාරින් දැනුවත් කිරිමේ රැස්විමකදි  ඔහු මේ බව පැවසීය.

එහිදි තවදුරටත් අදහස් දැක්වු අමාත්‍යවරයා,

“එක්සත් ජාතික පක්‍ෂ ආණ්ඩුව පසුගිය කාල සිමාවේ හුඟාක් වැඩ කළා. වැඩ කරගෙන යනකොට නොයෙක් බාධා ආවා. ගංවතුරක් ආවා. නියඟයක් ආවා. කුණු කන්දක් කඩා වැටුණා. දින පනස් දෙකක් ආවා. පාස්කු ප‍්‍රහාරය ආවා. ඒ වගේ ගොඩාක්  බාධක ආවා. අපි එකතු වෙලා පත්කර ගත්තු අපේ ජනාධිපතිතුමා ගිහින්  පක්‍ෂයක් බදාගත්ත එක තමයි ලොකුම බාධාව වුණේ. ඒ පක්‍ෂය බදාගෙන ඒකට නැවත පණ දෙන්න උත්සාහ කරපු වෙලාවේ තමයි අපිට බාධා එන්න පටන් ගත්තේ. එක්සත් ජාතික පාක්‍ෂිකයන් තමයි ඡන්දේ දිලා එතුමා පත් කරගත්තේ අන්තිමට හිරිහැර විදින්න සිදුවුණෙත් එක්සත් ජාතික පාක්‍ෂිකයන්ටම තමයි. කොච්චර කකුලෙන් ඇද්දත් අපි රටේ සංවර්ධනය ඉලක්ක කරගෙන ලොකු වැඩ කොටසකුත් කළා. කොච්චර අමාරු වුණත් මහින්ද මහතා  සහ චන්‍ද්‍රීකා මහත්මිය  පාලනය කළ විසි අවුරුදු කාලයට වඩා වැඩි සංවර්ධනයක් පසුගිය අවුරුදු හතර හමාර තුළ  සිදු කෙරුණා. පාරවල් හැදුවේ නැති වුණාට නෙවෙයි පාක්‍ෂිකයෝ තරමක්  හිතේ අමාරුවෙන් ඉන්නේ.  ඒ අයගේ සමහර පුද්ගලික ප‍්‍රශ්න අපිට බලන්න බැරිවුණාට. අපේම ජනාධිපති කෙනෙක් ආවාම ඒ ප‍්‍රශ්න සියල්ල විසඳන්ට බැරි වුණත් බොහෝ ප‍්‍රශ්න විසඳන්නට පුළුවන් වෙයි. දේශපාලන පළිගැනීම් වලට ලක්වූ අයට විසඳුම් ගේන්න යෝජනා කැබිනට් එක දක්වා අපි ගෙනාවා."

"නමුත් එතනදි නතර වුණා. අපේම ජනාධිපති කෙනෙක් ආවොත් කැබිනට් මණ්ඩලය තමයි වෙනස් වෙන්නේ. එහෙම වුණොත් මේ හිරවුණ තීන්දු තීරණ ගන්න පුළුවන් වෙනවා. දැන් බලන්න රක්‍ෂිත නොවන ඉඩම්වල අයිතියක් නැතුව පරම්පරා ගණනක් ජීවත්වන අය ඉන්නවා. ඉඩමක අයිතිය කෙනෙකුට ඉතාම වැදගත්. ඒ අයිතිය දෙන්න අපි ඉඩම් පනත ගෙනාවා. හතර පස් වතාවක් කැබිනට් එක තුළ  කතා කළා. ජනාධිපතිතුමත් කැමති නොවුණ නිසා අපට සම්මත කරගන්න බැරිවුණා. ඒක බලපෑවේ යූඇන්පී කාරයාට විතරක් නෙවෙයි. සමස්ත ජනතාවටම ඒක බලපෑවා. මෙන්න  මේ නිසයි අපි කියන්නේ අවුරුදු විසි පහකට පස්සේ අපි අපේ ජනාධිපති කෙනෙක්, අපේ අගමැති කෙනෙක්, අපේම කැබිනට් මණ්ඩලයක් පත් කරගෙන ඉදිරියට යමු කියලා. ඊට පස්සේ අපේම පළාත් සභාවකුත් අනතුරුව අපේම ප‍්‍රාදේශීය සභාවලූත් පත්කරගෙන ඉදිරියට යායුතුයි.  මේ යාන්ත‍්‍රණය අපේ පක්‍ෂය සතුව තිබ්බා නම් වැඩකටයුතු නිම කරන්න පහසු වෙනවා. නිහඬව සිටි එක්සත් ජාතික පක්‍ෂිකයන් සජිත් මහත්තයා ආවත් එක්ක දැන් අපිත් එක්ක යළි සම්බන්ධවෙලා  තියෙනවා. එක කණ්ඩායමක ඡන්ද වලින් කාටවත් දිනන්න බෑ. පොහොට්ටුවේ ඡන්දවලින් ගෝඨාභය මහත්තයට දිනන්නත් බෑ. යූඇන්පී ඡන්ද වලින් සජිත් මහත්තයට දිනන්නත් බෑ. අපි මැද ඉන්න අයයි දිනාගන්න  ඕනෑ”  යනුවෙන් අමාත්‍යවරයා වැඩිදුරටත් පැවසීය.

Page 1 of 2