April 14, 2021

ශ්‍රී ලංකා නිදහස් පක්ෂයත් සමග ආණ්ඩුවේම සිටින සන්ධානගත පක්ෂ 12 විකල්ප කණ්ඩායමත් එකට එකතු වී මැයි දිනය පැවැත්වීමට සූදානම් වීම හේතුවෙන් පොදුජන පෙරමුණ තුළ යම් නොසන්සුන්තාවයක් ඇතිව තිබෙන බව ආරංචි මාර්ග සඳහන් කරයි.

පසුගිය 8 වැනි දින විකල්ප කණ්ඩායමේ විමල් වීරවංශ, උදය ගම්මන්පිල, වාසුදේව නානයක්කාර අමාත්‍යවරුන් මෙන්ම හිටපු අමාත්‍යවරයෙකු වූ ඩීව් ගුණසේකර මහතා හිටපු ජනපති මෛත්‍රිපාල සිරිසේන මහතාව ශ්‍රීලනිප මූලස්ථානයේදී හමුවී ඒකාබද්ධ මැයි දිනයක් පැවැත්වීම පිළිබඳව අවධානය යොමු කොට ඇති බව ආරංචි මාර්ග පෙන්වා දෙයි.

මෙම සාකච්ඡාව සම්බන්ධයෙන් පොදුජන පෙරමුණේ විශේෂ අවධානයක් යොමුව තිබේ.

මේ සම්බන්ධයෙන් පොදුජන පෙරමුණේ මහ ලේකම් සාගර කාරියවසම් මහතාගේ ඒෂියන් මිරර් කළ විමසුමකට පිළිතුරු දෙමින් ඔහු සඳහන් කළේ " මැයි දිනය පැවැත්වීමේ සම්ප්‍රදාය වන්නේ පොදු ජන පෙරමුණ එහි සන්ධානගත පක්ෂ සියල්ලත් සමඟ එකට එකතු වී පැවැත්වීමයි. එසේ පැවැත්වීම පිළිබඳව අවශ්‍ය කටයුතු සූදානම් කරන්න මහජන එක්සත් පෙරමුණේ නායක දිනේෂ් ගුණවර්ධන අමාත්‍යවරයාගේ මූලිකත්වයෙන් කමිටුවක් පත් කොට තිබෙනවා" යන්නය.

දිනේෂ් ගුණවර්ධන අමාත්‍යවරයාද නායකත්වය දෙන්නේ පොදුජන පෙරමුණේ සන්ධානගත පක්ෂයක් වන මහජන එක්සත් පෙරමුණටය.

විමල් වීරවංශ, උදය ගම්මන්පිල, වාසුදේව නානායක්කාර යන අමාත්‍යවරුන් ප්‍රමුඛ පොදුජන පෙරමුණේ සන්ධානගත පක්ෂ 12කින් සමන්විත විකල්ප කණ්ඩායම නියෝජනය නොකරන පක්ෂ අතර මහජන එක්සත් පෙරමුණද සිටී.

ශ්‍රීලනිපය තනිව මැයි දිනයක් පැවැත්වීමට අවශ්‍ය කටයුතු මේවන විටත් සූදානම් කරමින් සිටින බව වාර්තා වේ.

ආණ්ඩු පක්ෂයේ හවුල්කාර පක්ෂ නායකයින් මීට සුළු මොහොතකට පෙර ශ්‍රී ලංකා නිදහස් පක්ෂ මූලස්ථානයේ විශේෂ රැස්වීමක් පවත්වා තිබේ.

මෙම රැස්වීම ශ්‍රීලනිප සභාපති හිටපු ජනාධිපති මෛත්‍රීපාල සිරිසේන මහතා සහ ආණ්ඩු පක්ෂයේ පක්ෂ නායකයින් වන විමල් වීරවංශ, උදය ගම්මන්පිල, ඩ්ව් ගුණසේකර යන මහත්වරුන් සහභාගී වී ඇතැයි වාර්තා වේ.

වර්තමාන දේශපාලන තත්වය, ඉදිරියේ පැවැත්වීමට නියමිත මැයි දිනය පිළිබඳවද එහිදී දීර්ඝ වශයෙන් සාකච්ඡා කර තිබේ.

මැල්කම් කාදිනල් රංජිත් කොළඹ අගරදගුරුතුමන් තමා සම්බන්ධයෙන් කළ ප්‍රකාශය ගැන කණගාටු වන බව ශ්‍රී ලංකා නිදහස් පක්‍ෂයේ සභාපති, හිටපු ජනාධිපති මෛත්‍රීපාල සිරිසේන මහතා පවසයි.

ඔහු මේ බව පැවසුවේ නාවලදී පැවති ශ්‍රී ලංකා නිදහස් සේවක සංගමයේ නියෝජිත මහා සභාවෙන් අනතුරුව මාධ්‍යවේදීන් නැගූ පැනයකට පිළිතුරු දෙමිනි.

එහිදී මාධ්‍ය වේදීන් හිටපු ජනාධිපතිවරයාගෙන් ප්‍රශ්න කර සිටියේ "කාදිනල් හිමිපාණන් කියපු දේ ගැන පිළිතුර කොහොමද? ඔබතුමා රෙදි ඇදගෙන ඉන්නේ ඇහුවා. මොකද ඔබතුමාට මොකක්ද කියන්න තියෙන්නේ ඒ සම්බන්ධයෙන්?"

"මම හරිම කනගාටුවෙනවා උන්වහන්සේගේ ප්‍රකාශය ගැන." යැයි ජනාධිපති මෛත්‍රීපාල සිරිසේන මහතා පිළිතුරු දුන්නේය.

ශ්‍රී ලංකා නිදහස් පක්‍ෂය පළාත් සභාවට තනිව තරඟ කරන්නේදැයි මෙහිදී මාධ්‍යවේදීන් නැගූ පැනයකට පිළිතුරු දුන් මෛත්‍රීපාල සිරිසේන මහතා පැවසුවේ ඒ ගැන සාකච්ඡා කළ යුත්තේ පළාත් සභා මැතිවරණයට අදාළ පනත සම්මතවීමෙන් පසුව බවය.

තවම පළාත් සභා මැතිවරණය පැවැත්වීම සම්බන්ධ පනත පාර්ලිමේන්තුවේ සම්මත විය යුතු බවත්, ඒ ගැන මෙතෙක් පක්‍ෂය සාකච්ඡා කර නොමැති බවත් හිටපු ජනාධිපතිවරයා පැවසීය.

ශ්‍රී ලංකා නිදහස් පක්ෂය 2025 දී වෙනම ආණ්ඩුවක් නිර්මාණය කිරීම පිළිබඳව හිටපු ජනපති, එහි සභාපති මෛත්‍රිපාල සිරිසේන මහතා ප්‍රසිද්ධියේම කරන ප්‍රකාශයට ආණ්ඩුවද පිළිතුරු දී තිබේ.

මේ සම්බන්ධයෙන් රජයේ මාධ්‍ය ප්‍රකාශක කෙහෙළිය රඹුක්වැල්ල ජනමාධ්‍ය අමාත්‍යවරයා ආණ්ඩුව වෙනුවෙන් සඳහන් කරන්නේ ආණ්ඩු හැදිල්ල හැමෝගෙම ආශාවක් බවත් ජවිපෙ අවුරුදු 55ක් තිස්සේම ඒ සඳහා උත්සාහ කරන බවත් රනිල් වික්‍රමසිංහ මහතා ආණ්ඩුවක් පිහිටුවනවා යයි ප්‍රකාශ කළොත් ඒ ගැන පුදුම විය යුතු නැති වන්නේ ආණ්ඩු පිහිටුවීම දේශපාලනයේ හැටි වන නිසා බවය.

මෛත්‍රිපාල සිරිසේන මහතාගේ වෙනම ආණ්ඩු කතාවට ප්‍රතිචාර දක්වමින් වැඩිදුරටත් රඹුක්වැල්ල අමාත්‍යවරයා සඳහන් කරන්නේ ආණ්ඩුවත් සමග සිටින පක්ෂ 11 න් එක් පක්ෂයක් සිරිසේන මහතා නියෝජනය කරන බවත් එවැනි එක් සන්ධානගත පක්ෂයක් කිව්වොත් අපි ආණ්ඩුවක් හදනවා කියා ඊට අපේ පූර්ණ ආශිර්වාදය ලබාදෙන බවද අවධාරණය කරයි.

ආණ්ඩු හදන බව ප්‍රකාශ කරන පක්ෂය ඒ සඳහා ආණ්ඩුවෙන් එළියට යෑමක් සිදුවනු ඇති බවද එය ආණ්ඩුවට ප්‍රශ්නයක් නොවන බවද අමාත්‍යවරයා පෙන්වා දෙයි.

ශ්‍රීලනිපය වෙනම ආණ්ඩුවක් පිහිටුවීම ගැන කතා කිරීමට හේතුවූ පොදුජන පෙරමුණ ආණ්ඩුව සිය හවුල්කාර පක්ෂවලට නොසලකන බවට කෙරෙන චෝදනාවන්ට පිළිතුරු දෙමින් අමාත්‍යවරයා සඳහන් කරන්නේ ඒක පුද්ගලයන්ගෙන් පුද්ගලයන්ට වෙනස් වන අතර ආණ්ඩුව තුළ අපූරුවට සිටින කට්ටියකුත් දෙපැත්තෙ කොයි පැත්තේ හිටියත් ඉන්න බැරි කට්ටියකුත් සිටින බවය.

ඒ අයට කොහේ හිටියත් ඉන්න බෑ බවද අමාත්‍යවරයා පෙන්වා දෙයි.

ප්‍රශ්න තිබෙනවා නම් ඒවා ඉදිරිපත් කිරීමට පොදුජන පෙරමුණ තුළ ඉඩකඩ තිබෙන බවත් ඒවා සාකච්ඡා කොට විසඳා ගැනීමට හැකි බවත් ඒ විසඳුම්වලට එකඟ වන අයට ආණ්ඩුව තුළ සිටීමට හැකි බවත් බැරි අයට ආණ්ඩුවෙන් එළියට යෑමට බාධාවක් නොමැති බව පෙන්වා දෙන අමාත්‍යවරයා කිසිදු හේතුවක් මත පොදුජන පෙරමුණ විනාශ කර ගැනීමට සූදානම් නැති බවද අවධාරණය කරයි.

කෙහෙළිය රඹුක්වැල්ල අමාත්‍යවරයා මෙම අදහස් පළ කර තිබුණේ සති අන්ත ජාතික පුවත් පතක් සමග සාකච්ඡාවකට එක්වෙමිනි.

"ශ්‍රී ලංකා නිදහස් පක්ෂයේ සියලුම සාමාජිකයින්ට කොන්ඳක් තිබෙනවා නම් වෙන පක්ෂ වලට මුක්කු ගැසීම ගැන කතා කිරීම නතර කොට පක්ෂය දිනවන්න කටයුතු කරන්න.නැතිනම් වෙනත් පක්ෂවල සාමාජිකත්වය ගන්න. මට පුළුවන් නියම ශ්‍රී ලංකා කාරයෝ එක්ක පක්ෂය නැගිට්ටවන්න" යයි පක්ෂ සභාපති හිටපු ජනපති මෛත්‍රිපාල සිරිසේන මහතා පක්ෂ මධ්‍යම කාරක සභාව අමතා ප්‍රකාශ කොට තිබෙන බව ආරංචි මාර්ග සඳහන් කරයි.

ශ්‍රීලනිපය යළි ප්‍රතිසංවිධානය කොට 2025 ශ්‍රීලනිප රජයක් පිහිටවීමේ වැඩපිළිවෙළ ආරම්භ කිරිම වෙනුවෙන් මාතලේ දී පැවති වැඩමුළුවක් අතරතුර පැවැත්වූ මධ්‍යම කාරක සභා රැස්වීමේ දී හිටපු ජනපතිවරයා මෙන්ම වත්මන් ශ්‍රීලනිප සභාපතිවරයාද වන මෛත්‍රිපාල සිරිසේන මහතා මේ බැව් සඳහන් කොට තිබේ.

හිටපු නියෝජ්‍ය අමාත්‍යවරයෙකු වූ  ලක්ෂ්මන් වසන්ත පෙරේරා මහතාට අයත් මාතලේ පිහිටි හෝටලයක පක්ෂයේ සියලු ප්‍රධාන නිලතල දරන්නන් ඇතුළු මධ්‍යම කාරක සභාව වෙනුවෙන් පැවැති මෙම වැඩමුළුව අතරතුර පැවැත්වූ මෙම විශේෂ මධ්‍යම කාරක සභා රැස්වීමේදී හිටපු ජනපතිවරයා වැඩිදුරටත් සඳහන් කොට තිබෙන්නේ "මුක්කු ගහන දේශපාලනය කරන්න ඕන නං පක්ෂය වහලා දාලා කැමති අය වෙන පක්ෂ වල සාමාජිකත්වය ගන්න. බොහෝ අය කියනවා අපට පොහොට්ටුවෙන් ගැළවෙන්න බැහැ කියනවා මම අහල තියෙනවා. අපි එකතුවෙලා පළාත් සභා ඉල්ලලා ආණ්ඩුව තරහ නොකරගෙන ඉමු කියන අයත් ඉන්නවා." කියාය.

හිටපු ජනපතිවරයාගේ ශ්‍රීලනිපය තනිව ගමනක් යෑමේ වැඩපිළිවෙළට මධ්‍යම කාරක සභාවේ උණුසුම් ප්‍රතිචාර ලැබුණු බව ද එම ආරංචි මාර්ග වැඩිදුරටත් පෙන්වා දෙයි.

මෙම වැඩමුළුව සඳහා හෝටලය ලබාදුන් වසන්ත ලක්ෂ්මන් පෙරේරා මහතා කලක් අග්‍රාමාත්‍ය මහින්ද මහින්ද රාජපක්ෂ මහතාගේ ඉතා කිට්ටු සමීපතයෙකු වීමද විශේෂත්වයකි.

ශ‍්‍රී ලංකා නිදහස් පක්‍ෂයේ සභාපති, හිටපු ජනාධිපති මෛත‍්‍රිපාල සිරිසේන මහතා එම පක්ෂයේ ප‍්‍රධාන පක්‍ෂ මධ්‍යම කාරක සභාවට "මාතලේ ප්‍රකාශය" නමින් විශේෂ ප‍්‍රකාශයක් සිදු කර තිබේ.

අනාගතයේදී රාජ්‍ය බලය ලබා ගැනීම සඳහා දැඩි කැපවීමෙන්, නොපසුබස්නා උත්සාහයෙන් සහ අධිෂ්ඨානශීලීව සිය පක්‍ෂය ජයග‍්‍රහණය කරා මෙහෙයවන බව මාතලේදී විශේෂ ප‍්‍රකාශයක් කරමින් හිටපු ජනාධිපතිවරයා සඳහන් කර ඇත.

එම පක්ෂයේ ඉදිරි උපාය මාර්ගික සැලසුම් සකස් කිරීමේ වැඩමුළුව පසුගියදා පැවැත්වූ අතර එම වැඩමුළුව අවසානයේදී ‘ඓතිහාසික මාතලේ ප‍්‍රකාශය’ නිකුත් කරමින් මෛත්‍රීපාල සිරිසේන හිටපු ජනාධිපතිවරයා මේ බව සඳහන් කළේය.

එම ප‍්‍රකාශයේ මෙසේද සඳහන් වෙයි.

ශ‍්‍රී බුද්ධ වර්ෂ 2564ක් වූ මැදින් අව දියවක හා තියවක නම් තිථිය ලත් බුධ ගුරු දෙදින හෙවත්, ව්‍යවහාර රාජ්‍ය වර්ෂයෙන් 2021ක් වූ මාර්තු මස 30 හා 31 දෙදින, ශ‍්‍රී ලංකා නිදහස් පක්‍ෂයේ නායකකාරකාදීන් හා මධ්‍යම කාරක සභාව විසින් ශී‍්‍ර සෙංවඩ ශෛලාභිධාන පුරවරයේදී උතුම් දළදා වහන්සේ වැඳපුදාගෙන, ජාතික වීරවරයන් සඳහා පුෂ්පෝපහාර පවත්වා, මහා නායක මාහිමිපාණන් වහන්සේ බැහැදැක ආශිර්වාද ලබා ගැනීමෙන් අනතුරුව, උතුම් ත‍්‍රිපිටක ධර්මය ග‍්‍රන්ථාරූඪ කළා වූද, 1848 තරම් මෑතකදී අධිරාජ්‍යවාදයට එරෙහිව තීරණාත්මක අරගලයක් වූ මහතලා හටනෙහි තීරණාත්මක සන්ධිස්ථානයක් වූද, නාලන්දා ගෙඩිගේ ස්ථාපනයෙන් ලංකාද්වීපයේ මධ්‍ය ප‍්‍රදේශය ලෙස හඳුනා ගැනුණා වූද, ඓතිහාසික මාතලේ පුරවරයේදී පවත්වන්නට යෙදුන උපාය මාර්ගික සැලසුම් සකස් කිරීමේ වැඩමුළුව අවසන ඉදිරිපත් කෙරෙන ඓතිහාසික මාතලේ ප‍්‍රකාශයයි.
 
 එස්. ඩබ්ලිව්. ආර්. ඞී. බණ්ඩාරනායක ශ‍්‍රීමතාණන්ගේ දර්ශනය මත පදනම් වෙමින්, සිරිමාවෝ බණ්ඩාරනායක මැතිනිය, චන්‍ද්‍රිකා බණ්ඩාරනායක මැතිනිය, මහින්ද රාජපක්‍ෂ මැතිතුමා ආදි නායක නායිකාවන්ගෙන් පෝෂණය වෙමින්, සෙසු පුරෝගාමී පාක්‍ෂිකයන්ගේ ලෙයින්, කඳුළින්, දහඩියෙන් ගොඩනැඟුණු අපේ පක්‍ෂය, වර්ෂ 1951න් පසුව ශ‍්‍රී ලංකාවේ දේශපාලන තන්ත‍්‍රයට කර ඇති දැවැන්ත දායකත්වය ගැඹුරින් සමාලෝචනය කරමින් අපේ ශක්තීන්, දුර්වලතා, අවස්ථා හා තර්ජන හඳුනාගනිමින් නිවැරදි, දුරදක්නා, දේශපේ‍්‍රමී ක‍්‍රමෝපායික දිශානතියක් ඔස්සේ පක්‍ෂය ශීඝ‍්‍ර‍්‍ර හා කාර්යක්‍ෂම සංවර්ධනයකට ලක් කළ යුතු බව තීරණය කළෙමු. වත්මන් රජයේ ප‍්‍රධාන පාර්ශ්වකරුවකු වශයෙන් අපි සෞභාග්‍යයේ දැක්ම ප‍්‍රතිපත්ති මාලාව සඳහා සහයෝගය ලබාදෙන අතරතුර සමස්ත ශ‍්‍රී ලාංකීය ජාතිය 21 වන ශතවර්ෂයේ නවමු ආර්ථික දේශපාලනික හා සාමාජීය අභියෝග ජය ගැනීම සඳහා පහත තේමා ඔස්සේ මෙහෙයවන්නෙමු.
 
 පක්‍ෂයේ ඓතිහාසික භූමිකාව සපථ කරමින් සමස්ත ශ‍්‍රී ලාංකීය ජාතියේත්, අප මාතෘ භූමියේත් අනාගතය සුරක්‍ෂිත හා සෞභාග්‍යසම්පන්න කරනු පිණිස පක්‍ෂයේ මතවාදී පදනම ශක්තිමත් කරමින්ද, පක්‍ෂයේ සම්පත් පැතිකඩ ප‍්‍රමාණාත්මකව හා ගුණාත්මකව සංවර්ධනය කරමින්ද, දියුණු හරයාත්මක හා සදාචාරවත් දේශපාලන සංස්කෘතියක් ශ‍්‍රී ලංකාවේ ස්ථාපනය කරමින්ද, සියලූ ජාතීන් හා වෙනත් සංස්කෘතික අනන්‍යතාවන් වෙනුවෙන් සමාජ ප‍්‍රජාතන්ත‍්‍රවාදය තහවුරු කරමින්ද, ශ‍්‍රී ලංකා ප‍්‍රජාතාන්ත‍්‍රික සමාජවාදී ජනරජයේ රාජ්‍ය බලය අනාගතයේදී ලබා ගැනීමට දැඩි කැපවීමෙන් නොපසුබස්නා උත්සාහයෙන්, අධිෂ්ඨානශීලීවත් කටයුතු කරන්නෙමු.

No photo description available.

වත්මන් රජයේ කටයුතුවලට සහයෝගය දෙන අතරම අනාගතයේදී ශ්‍රී ලංකා නිදහස් පක්‍ෂ ආණ්ඩුවක් පිහිටුවීම සඳහාත් කටයුතු කරගෙන යන බව එම පක්‍ෂයේ සභාපති, හිටපු ජනාධිපති මෛත්‍රීපාල සිරිසේන මහතා පවසයි.

හිටපු ජනාධිපතිවරයා මේ බව පැවසුවේ මහනුවර ග්‍රෑන්ඩ් කැන්ඩියන් හෝටලයේදී ඊයේ (30) පැවති මාධ්‍ය හමුවක් අමතමිනි. ශ්‍රී ලංකා නිදහස් පක්‍ෂ නව නිලධාරී මණ්ඩලය ඊයේ (30) මහනුවරට ගොස් දළඳා වහන්සේ වැඳපුදාගෙන ආශීර්වාද ලබාගැනීමෙන් අනතුරුව මෙම මාධ්‍ය හමුව පැවැත්විණි.

ඒ සඳහා සහය දැක්වීමට කැමති සියලු පාර්ශව එක් කරගනිමින් පක්‍ෂය ශක්තිමත් කිරීමේ වැඩ පිළිවෙලක් ක්‍රියාත්මක කරන බව ද හිටපු ජනාධිපතිවරයා පෙන්වා දුන්නේය.

බොහෝ අභියෝග එල්ල වුවත් ශ්‍රී ලංකා නිදහස් පක්ෂය පසුගිය පාර්ලිමේන්තු මැතිවරණයේදී මන්ත්‍රී ආසන 13 ක් දිනාගත් බවද හෙතෙම පැවසී ය.

එහිදී වැඩිදුරටත් අදහස් දැක්වූ ශ්‍රී ලංකා නිදහස් පක්ෂයේ සභාපති හිටපු ජනාධිපති මෛත්‍රීපාල සිරිසේන මහතා,

“පාර්ලිමේන්තු මැතිවරණයේදී අභියෝගය මැද නොයෙකුත් විවේචන විඳගනිමින් අපේ පක්ෂයේ ඡන්දයෙන් පත්වුණු 13දෙනා පාර්ලිමේන්තුවට ලේසියෙන් ගියේ නැහැ. අපේ බලාපොරොත්තුව නිදහස් පක්ෂයේ ආණ්ඩුවක් හදන එක. ශ්‍රී ලංකා නිදහස් පක්ෂ වටා එකතුවෙන්න කියලා. ජනතාවට ආරාධනා කරනවා. “

ශ්‍රී ලංකා නිදහස් පක්ෂයේ මුල් වූ ආණ්ඩුවක් පිහිටුවීම සඳහා අවශ්‍ය කටයුතු සූදානම් කරන ලෙස මල්වතු නාහිමියන් හිටපු ජනපති, ශ්‍රීලනිප සභාපති මෛත්‍රිපාල සිරිසේන මහතා හමුවේ ප්‍රකාශ කොට ඇති බැව් ශ්‍රීලනිප ආරංචි මාර්ග සඳහන් කරයි.

ඊයේ (30) හිටපු ජනපතිවරයා ශ්‍රීලනිපය යළි පුබුදුවීමේ වැඩ පිළිවෙළ මහනුවරින් ආරම්භ කරන ලදී.

ප්‍රථමයෙන්ම ශ්‍රී දළදා සමිඳුන් වැඳපුදා ගැනීමෙන් පසු අස්ගිරි - මල්වතු නා හිමියන් මෙන්ම ගැටබේ රජමහ විහාරාධිපති වහන්සේද බැහැදැක තිබේ.

මල්වතු මහා නාහිමියන් හිමියන් ඉහත සඳහන් ප්‍රකාශය හිටපු ජනපතිවරයා හමුවේ ප්‍රකාශ කොට තිබෙන්නේ ඒ අවස්ථාවේදීය.

අස්ගිරි මහා නාහිමියන්ද ඒ හා සමාන අදහසක් හිටපු ජනපතිවරයා හමුවේ ප්‍රකාශ කොට තිබෙන බවද ශ්‍රීලනිප ආරංචි මාර්ග වැඩිදුරටත් පෙන්වා දෙයි.

අස්ගිරි - මල්වතු මහනාහිමිවරුන් බැහැදැකීමෙන් පසු හිටපු ජනපතිවරයා ඇතුළු ශ්‍රීලනිප නිලධාරි මණ්ඩලය මහනුවරදී පාක්ෂිකයන් සමග සාකච්ඡාවක් පවත්වා ඇති අතර එහිදී පක්ෂයේ ඉදිරි වැඩපිළිවෙළ, පක්ෂය කාලීනව ප්‍රතිසංවිධානය විය යුතු ආකාරය, ඉදිරි මැතිවරණයට මුහුණ දෙන ආකාරය ආදි වැදගත් කරුණු රැසක් සම්බන්ධයෙන් අදහස් හුවමාරු කරගෙන තිබේ.

දළදා සමිඳුන් වැඳ පුදා ගැනීම, මහානාහිමිවරු බැහැදැකීම, පක්ෂ ක්‍රියාකාරීන් හමුවීම ආදී සියලු වැඩසටහන් සදහා හිටපු ජනපතිවරයා මෙන්ම ශ්‍රීලනිප නිලධාරි මණ්ඩලය ද සහභාගි වී තිබේ.

ශ්‍රී ලංකා නිදහස් පක්ෂය ශක්තිමත්ව ඉදිරියට ගෙන යාම ජනතා අපේක්ෂාවක් බව එම පක්ෂයේ සභාපති හිටපු ජනාධිපති මෛත්‍රීපාල සිරිසේන මහතා පවසයි.

ශ්‍රීලනිපය කියන යෝධයා යළි නැගිට්ටවලා ගන්නේ නැත්තේ ඇයි? කියා තමන්ට ලිපි ලැබෙන බවත් මේවන විට එම යෝධයා නැගිට්ටවීමේ වැඩපිළිවෙලේ සිටින බවත් සිරිසේන හිටපු ජනාධිපතිවරයා පැවසීය.

ඒ සඳහා ශක්තිමත් තරුණ පිරිසක් ශ්‍රී ලංකා නිදහස් පක්ෂය වටා එක්රොක් වෙමින් සිටින බවත් මේ කාලය තුළ ශ්‍රී ලංකා නිදහස් පක්ෂයට විශාල ඉල්ලුමක් තිබෙන බවත් හිටපු ජනාධිපතිවරයා පෙන්වා දුන්නේය.

වැඩිදුරටත් අදහස් දැක්වු ඒ මහතා,

“ලෝකයේ දුප්පතුන් නෙමෙයි වැඩිපුරම අසහනයෙන් සහ කණගාටුවෙන් ඉන්නේ. ලෝකයේ ඉන්න ඉහළම ධනවතුන්. සල්ලි අඩුවෙන්න අඩුවෙන්න ප්‍රශ්න අඩුවෙනවා. මිනිසෙකුට අවශ්‍ය වන්නේ, දවසේ ණය නොවී තුන්වේල කාලා සාමාන්‍ය වාහනයක් අරගෙන පුංචි ගෙයක් හදාගෙන සමාජයේ හොඳට ජීවත්වීමයි අවශ්‍ය වෙන්නේ. නැතුව හැමකෙනෙක්ම ධනවතුන් වීම නෙමෙයි. ශ්‍රී ලංකා නිදහස් පක්ෂයේ ප්‍රතිපත්තිය වෙන්නේ, ප්‍රධාන වශයෙන් ම ඉදිරි සංවර්ධන සැලැස්මේ දී පක්ෂය හදන මේ රටේ දුගීභාවය තුරන් කිරීමට වැඩපිළිවෙලක් සකස් කිරීමයි. මේ කාලය තුළ ශ්‍රී ලංකා නිදහස් පක්ෂයට විශාල ඉල්ලුමක් ඇවිල්ලා තියෙනවා. “

හිටපු ජනාධිපතිවරයා මේ බව සඳහන් කළේ ශ්‍රීලනිප පක්ෂ මූලස්ථානයේ, ඊයේ (28) පස්වරුවේ පැවති රැස්වීමක් අමතමිනි.

පළාත් සභා මැතිවරණය පිළිබඳව කැබිනට් තීන්දුව මෙම සතියේදී ලැබෙනතුරු ඒ ගැන කතා නොකරන ලෙස ශ්‍රී ලංකා නිදහස් පක්ෂ මධ්‍යම කාරක සභාවට පක්ෂ සභාපති මෛත්‍රිපාල සිරිසේන මහතා උපදෙස් දී තිබේ.

හිටපු ජනපතිවරයාගේ ප්‍රධානත්වයෙන් පැවතී ශ්‍රීලනිප මධ්‍යම කාරක සභා රැස්වීමේදී එළඹෙන පළාත් සභාවට සූදානම් වීමේ ආරම්භක පියවරක් ලෙස හෙට (30) මහනුවරදීත් අනිද්දා (31) මාතලේදීත් පැවැත්වීමට නියමිත වැඩසටහන් පිළිබඳවද එහිදී හිටපු ජනපතිවරයා මධ්‍යම කාරක සභිකයින් දැනුවත් කොට ඇති බව දැනගන්නට තිබේ.

හෙට (30) හිටපු ජනපති ප්‍රමුඛ ශ්‍රීලනිප ප්‍රධානීන් මහනුවර ඓතිහාසික දළදා මාළිගාවට ගොස් දළදා සමිඳුන්ගේ ආශිර්වාදය ලබා ගැනීමෙන් පසු එම වැඩසටහන ආරම්භ කිරීමටත් ඉන් පසුව මල්වතු - අස්ගිරි මහා නාහිමියන් බැහැ දැකීමටත් ශ්‍රීලනිපය තීරණය කොට ඇති අතර ඒ අවස්ථාවට සියලුම මධ්‍යම කාරක සභිකයින් සහභාගී යුතු බවට පක්ෂ මහ ලේකම් දයාසිරි ජයසේකර මහතාද උපදෙස් දී තිබෙන බවද වාර්තා වේ.

ශ්‍රීලනිප සභාපති මෛත්‍රීපාල සිරිසේන හිටපු ජනපතිවරයා ඉකුත් බ්‍රහස්පතින්දා පාර්ලිමේන්තුවේ පැවැති පාස්කු ප්‍රහාරය පිළිබඳ ජනපති කොමිසම් වාර්තාව සම්බන්ධයෙන් වූ විවාදයේදී කළ මතභේදාත්මක කතාව මේ වන විට ලාංකීය දේශපාලනයේ බොහෝ දෙනෙකුගේ අවධානයට යොමුව තිබේ.

හිටපු ජනපතිවරයා එළැඹෙන පළාත් සභා මැතිවරණය සඳහා ශ්‍රීලනිපය සූදානම් කරන්නේ මෙම මතභේදාත්මක කතාවේ උණුසුම යාමටත් මත්තෙන් වීම විශේෂත්වයකි.

මේ වනවිටත් එළැඹෙන පළාත් සභා මැතිවරණයට පොදුජන පෙරමුණ ලැයිස්තුවෙන් ඉවත් වී තනිව තරග කිරීම පිළිබඳව ශ්‍රීලනිපය අවධානය යොමු වී ඇති බවද ආරංචි මාර්ග පෙන්වා දෙයි.

පළාත් සභා මැතිවරණය පැවැත්වීම සම්බන්ධයෙන් මෙම සතියේ පැවැත්වෙන කැබිනට් මණ්ඩල රැස්වීමේදී තීරණයක් ගනු ඇති බව ආරංචි මාර්ග සඳහන් කරයි.

Page 1 of 10