February 27, 2021

වත්මන් තත්ත්වය මත සාමාන්‍ය පෙළ විභාගය නියමිත දිනයට පැවැත්වීම සුදුසු නොවන බවත් විභාගය පැවැත්වෙන නව දිනයන් සති 06 කට පෙර දැනුම් දීමට කටයුතු කරන බව අධ්‍යාපන අමාත්‍ය මහාචාර්ය ජි.එල්.පිරිස් පාර්ලිමේන්තුවේදී ප්‍රකාශ කර සිටියි.

දෙසැම්බර් මාසය පළමු සතිය වන විට අ.පො.ස (සාමාන්‍ය පෙළ) විභාගය සඳහා පෙනී සිටින සිසු සිසුවියන්ට අධ්‍යාපනය ලබාදීම සඳහා පාසැල් සියල්ලම විවෘත කිරීමට හැකියාවක් නොමැති බැවින් මෙම තීරණය ගනු ලැබූ බවයි අධ්‍යාපන අමාත්‍යවරයා වැඩිදුරටත් සඳහන් කලේය.

රටේ පවතින සෞඛ්‍ය තත්ත්වය සම්බන්ධයෙන් සති දෙකකට වරක් සමාලෝචනය කොට සාමාන්‍ය පෙළ විභාගය පැවැත්වීමේ නව දිනයන් සම්බන්ධයෙන් තීරණයක් ගන්නා බවයි අධ්‍යාපන අමාත්‍යවරයා වැඩිදුරටත් සඳහන් කලේය.

ලබන ජනවාරි මස 18 සිට 27 දක්වා පැවැත්වීමට නියමිතව තිබෙන අපොස සාමාන්‍ය පෙළ විභාගය එදිනට පැවැත්වීමට හැකි ද යන්න පිළිබඳව සාකච්ඡා කොට තීරණයක් ගන්නා බව අධ්‍යාපන ඇමැති මහාචාර්ය ජී.එල් පීරිස් මහතා පාර්ලිමේන්තුවේදී සඳහන් කරන ලදී.

දිවයිනේ තිබෙන පාසල් 10165න් මේ වන විට විවෘත කර තිබෙන්නේ පාසල් 5100ක් බවද පෙන්වා දෙන අධ්‍යාපන අමාත්‍යවරයා ඉදිරි සතිය හෝ දෙසතිය තුළ පාසල් සම්පූර්ණයෙන් විවෘත කිරීමට නොහැකි වූවොත් යෝජිත දිනට අපොස සාමාන්‍ය පෙළ විභාගය පැවැත්වීම වසා ඇති පාසල්වල දරුවන්ට කරන අසාධාරණයක් බවද අධ්‍යාපන අමාත්‍යවරයා පෙන්වා දෙන ලදී.

මේ නිසා සෞඛ්‍ය බලධාරීන් සමග සාකච්ඡා කොට ඉදිරි සතිය හෝ දෙසතිය තුළ වසා තිබෙන පාසල් ඇරීමට නොහැකි වුවහොත් අකමැත්තෙන් වුවත් අපොස සාමාන්‍ය පෙළ විභාගය කල් දැමීමට සිදුවන බවද අධ්‍යාපන අමාත්‍යවරයා අවධාරණය කරන ලදී.

කොවිඩ් 19 තත්වය හේතුවෙන් පාසල් විවෘත කරනවාද නැද්ද යන්න පිලිබඳ බලය කලාප අධ්‍යාපන කාර්යාලවලට හා අදාළ පාසල්වල විදුහල්පතිවරුන්ට පවරා ඇති බව අධ්‍යාපන ඇමති මහාචාර්ය ජි.එල්.පිරිස් මහතා පාර්ලිමේන්තුවේදී සඳහන් කරන ලදී.

අධ්‍යාපන අමාත්‍යවරයා ඒ බව සඳහන් කලේ විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා විසින් නඟන ලද ප්‍රශ්නයකට පිළිතුරු ලබා දෙමිනි.

මහනුවර දිස්ත්‍රික්කයේ පාසල් 60කට සිටින්නේ එක් මහජන සෞඛ්‍ය පරීක්ෂකවරයෙකු බවත් ඊයේ (25) මහනුවර පාසල් 45ක් හිටි හැටියේම කොවිඩ් අවධානම හේතුවෙන් වසා දමා තිබෙන බවද පෙන්වා දෙන කිරිඇල්ල මහතා මේ සම්බන්ධයෙන් අවශ්‍ය පියවර ගන්න ලෙස අධ්‍යාපන අමාත්‍යවරයාගෙන් ඉල්ලා සිටින ලදී.

කොවිඞ්-19 වසංගතය හේතුවෙන් පාසල් ආරම්භ වීම කල්දැමීම නිසා මේ වසරේ (2020) තුන්වැනි පාසල් වාරයට අදාළ විෂය නිර්දේශ ආවරණය වන පරිදි සිසුන් සඳහා ස්වයං ඉගෙනුම් කට්ටල සකස් කර විදුහල්පතිවරුන් මගින් ඒවා ලබාදීමට රජය පියවර ගෙන ඇතැයි අධ්‍යාපන ඇමැති මහාචාර්ය ජී.එල්. පීරිස් මහතා පැවසීය.

බත්තරමුල්ල, නෙළුම් මාවත, ශ‍්‍රී ලංකා පොදුජන පෙරමුණ පක්ෂ ප‍්‍රධාන කාර්යාලයේ පැවති මාධ්‍ය හමුවේදී එසේ පැවසූ අධ්‍යාපන ඇමැතිවරයා වැඩිදුරටත් මෙසේද සඳහන් කළේය.

දරුවන්ගේ සෞඛ්‍ය සම්බන්ධයෙන් ප‍්‍රමුඛ අවධානය යොමු කර පාසල් යළි විවෘත කිරීම සති දෙකකින් කල් දැමීමට රජය තීරණය කර තිබෙනවා. ඒ කාලය තුළ පාසල් දරුවන්ට දුරස්ථ ක‍්‍රමවේදය භාවිත කරමින් පාඩම් ලබාදීමට කටයුතු සලසා තිබෙනවා. ගුරු ගෙදර අධ්‍යාපන රූපවාහිනී නාලිකාව හරහා මේවන විටත් දරුවන්ගේ ප‍්‍රයෝජනය සඳහා පාඩම් 2700ක් පමණ විකාශය කිරීමට කටයුතු සූදානම් කර තිබෙනවා. දරුවන්ගේ අධ්‍යාපන අවස්ථාව අහිමි වීම අවම කරගැනීම සඳහා තුන්වන ශ්‍රේණියේ සිට දහතුන් වන ශ්‍රේණිය දක්වා විෂයයන් සිංහල, දමිළ, ඉංග‍්‍රීසි මාධ්‍යන්ගෙන් වීඩියෝ සකස් කර විකාශය කිරීමට සියලූ කටයුතු සූදානම් කර තිබෙනවා.

රූපවාහිනී විකාශයන් මගින් ආවරණය නොවන ප‍්‍රදේශවල සිටින හෝ රූපවාහිනී යන්ත‍්‍ර හෝ අන්තර්ජාල පහසුකම් නොමැති සිසුන් සඳහා ශ‍්‍රී ලංකා ගුවන් විදුලි සංස්ථාව මගින් එම පාඩම් විකාශය කිරීමට ප‍්‍රමාණවත් පරිදි ගුවන් කාලය ලබා ගැනීමටත් පියවර ගෙන තිබෙනවා. දුරස්ථ අධ්‍යාපන ක‍්‍රමවේදය ඔස්සේ ක‍්‍රියාත්මක කිරීම සඳහා ඊ තක්සලාව භාවිත කිරීමට දැනටමත් අවශ්‍ය පසුබිම සකස් කර තිබෙනවා.

2020 තුන්වන පාසල් වාරයට අදාළ විෂය නිර්දේශ ආවරණය වන පරිදි සිසුන් සඳහා ස්වයං ඉගෙනුම් කට්ටල ලබාදීමට මූලික පියවර ගෙන තිබෙනවා. ඒ අදාළ කට්ටල පාසල් විදුහල්පතිවරුන් මගින් සිසුන් වෙත ලබාදීමට රජය බලාපොරොත්තු වෙනවා. මේවාට සමගාමීව පළාත් නවයේම අධ්‍යාපන අධ්‍යක්ෂවරුන් විධිමත් හා නොවිධිමත් මට්ටමින් සිසුන්ගේ අධ්‍යාපන කටයුතු අඛණ්ඩව කරගෙන යෑම සඳහා වැඩසටහන් ක‍්‍රියාත්මක කරනවා. මේ කාලය තුළ ක‍්‍රියාත්මක වන මේ සමස්ත වැඩපිළිවෙළින් සිසුන්ට ප‍්‍රයෝජනයක් වෙයි කියා බලාපොරොත්තු වෙනවා.

ලබන ඉරිදා පැවැත්වීමට නියමිත 05 වසර ශිෂ්‍යත්ව විභාගය සහ ඊට පසු දින පැවැත්වීමට නියමිත උසස් පෙළ විභාගය නියමිත දිනට පවත්වනවාද නැද්ද යන්න අද සවස 2න් පසු දැනුම් දෙන බව අධ්‍යාපන අමාත්‍ය මහාචාර්ය ජි.එල්.පිරිස් මහතා පාර්ලිමේන්තුවේදී ප්‍රකාශ කරන ලදී.

මේ සම්බන්ධයෙන් අද දහවල් සෞඛ්‍ය සහ ආරක්ෂක අංශ සමඟ සාකච්ජාවක් පවත්වන බව අමාත්‍යවරයා එහිදී වැඩිදුරටත් සඳහන් කරන ලදී.

මිට පෙරත් කල් දමන ලද මෙම විභාග දෙක කඩිනමින් පවත්වන ලෙස දෙමව්පියන්ගේ ඉල්ලීමක් තිබෙන බව ද මහාචාර්ය පිරිස් පෙන්වා දෙන ලදී.