August 10, 2022

ඇමති සමඟ සාකච්ඡාවෙන් පසු තීරණය වෙනස් වෙයි

ඛනිජ තෙල් ප්‍රවාහන පෞද්ගලික ටැංකි රථ හිමියන්ගේ සංගමය විසින් දියත් කර තිබූ වැඩ වර්ජනය අත්හිටුවීමට තීරණය කර තිබෙනවා.

ඒ බලශක්ති අමාත්‍ය ගාමිණී ලොකුගේ මහතා සමඟ පැවැති සාකච්ඡාවකින් අනතුරුවයි.

ඩීසල් මිල වැඩිවීම සහ ඩොලරයේ රුපියල් අගය ඉහළ යාමත් සමග මතු වූ තත්ත්වය සැලකිල්ලට ගෙන 60% ක් ප්‍රවාහන ගාස්තු වැඩි කිරීමක් ඉල්ලමින් මෙම සංගමය විසින් ලංකා ඛනිජ තෙල් නීතිගත සංස්ථාවට ලිපියක් යොමු කර තිබුණා.

එයට පිළිතුරු වශයෙන් ඛණිජ තෙල් සංස්ථාව කියා සිටියේ උපරිම වශයෙන් 17% ගාස්තු වැඩි කිරීමක් සිදුකළ හැකි බවයි.

මෙම යෝජනාවට එකඟ නොවූ පෞද්ගලික ටැංකි රථ හිමියන්ගේ සංගමය ඊයේ (15) රාත්‍රියේ සිට ඛනිජ තෙල් ප්‍රවාහනයෙන් ඉවත් වුණා.

අද (16) පෙරවරුවේ බලශක්ති අමාත්‍යවරයා සමඟ පැවැති සාකච්ඡාවේදී ඩීසල් වැඩිවීමේ ප්‍රවාහන ගාස්තු සංශෝධනය වහාම සිදු කිරීමටත්, රුපියල අවප්‍රමාණය වීම හේතුවෙන් සිදුවන හානිය අප්‍රේල් 01 වන දින සිට ප්‍රතිපූර්ණය කිරීමටත් පොරොන්දු වී තිබෙනවා.

මේ අනුව පෞද්ගලික ටැංකි රථ හිමියන්ගේ සංගමය විසින් දියත් කළ වැඩ වර්ජනය අත්හිටුවීමටයි ඔවුන් තීරණය කර ඇත්තේ.

සබැඳි පුවත් - තෙල් බෙදා හැරීමත් නවතී - ඉන්ධන අවුල උඩු දුවයි

Rate this item
(0 votes)