කාන්තා සනීපාරක්ෂක තුවා සඳහා කිසිදු අතිරේක බද්දක් අයවැයෙන් යෝජනා කර නොමැති බව බන්දුල ගුණවර්ධන වෙළඳ අමාත්‍යවරයා පාර්ලිමේන්තුවේදී ප්‍රකාශ කරන ලදී.
කාන්තා සනීපාරක්ෂක තුවා සඳහා 15%ක බද්දක් පනවා ඇති බව බොරුවක් බවද අමාත්‍යවරයා පෙන්වා දෙයි.
විදේශයෙන් ආනයන කරන සනීපාරක්ෂක තුවා සඳහා 30%ක ආනයන බද්දක් දැනටමත් අයකරන බවත් අයවැයෙන් යෝජනා කර තිබෙන්නේ එම 30%න් 15%ක් ආනයන බදු ලෙසත් ඉතිරි 15% සෙස් බද්දක් ලෙස අය කිරීමටත් බවත්ය.
ඒ නිසා කිසිදු බදු වැඩිකිරීමක් සිදු නොවන බව පෙන්වා දෙන ගුණවර්ධන මහතා දේශීයව නිෂ්පාදනය කළ හැකි භාණ්ඩ ආනයනය කිරීම හැකිතාක් දුරට අඩු කොට දේශීය නිෂ්පාදිකයන්ට අවස්ථාව ලබා දීම බවද සඳහන් කරයි.
