ෙජනාධිපති ගෝඨාභය රාජපක්ෂ මහතා සහ ආණ්ඩුවෙන් ඉවත්ව ස්වාධීන වූ මන්ත්‍රීවරුන් කණ්ඩායම අතර ඊයේ (10) රාත්‍රියේ ජනාධිපති මන්දිරයේදී පැවැති සාකච්ඡාව පැය දෙකක පමණ කාලයක් තිස්සේ පැවැති බව ඒෂියන් මිරර් වෙත වාර්තා වුණා.
කෙසේ වෙතත් එම සාකච්ඡාවේදී අවසන් එකඟතාවකට නොපැමිණි බව දැනගන්නට තිබෙනවා.
රට තුළ පැන නැගී ඇති අර්බුදය හමුවේ සර්වපාක්ෂික අන්තර්කාලීන ආණ්ඩුවක් ස්ථාපිත කිරීම සම්බන්ධයෙනුයි එහිදී සාකච්ඡා කර තිබුණේ.
ජනපතිගෙන් සංශෝධන
අන්තර්කාලීන ආණ්ඩුවක් පිහිටුවීම සඳහා වන යෝජනා ස්වාධීන මන්ත්‍රී කණ්ඩායම විසින් ජනාධිපතිවරයාට ඉදිරිපත් කර කර තිබුණා. එහිදී ජනාධිපතිවරයාගේ පාර්ශ්වයෙන් ද ඒ සඳහා සංශෝධන ඉදිරිපත් වූ බව වාර්තා වනවා.
දෙපාර්ශ්වය අතර තවත් සාකච්ඡා වටයක් හෙට (12) දිනයේ පැවැත්වීමට ද එකගතා පළ වී තිබෙනවා.
ජනාධිපතිවරයාගේ පාර්ශවයෙන් ජනාධිපතිවරයා පමණක් මෙම සාකච්ඡාවට සහභාගි වී තිබූ අතර ස්වාධීන මන්ත්‍රී කණ්ඩායම වෙනුවෙන්, හිටපු ජනාධිපති මෛත්‍රීපාල සිරිසේන, ශ්‍රී ලංකා නිදහස් පක්ෂයේ මහ ලේකම් දයාසිරි ජයසේකර, ජ්‍යෙෂ්ඨ උප සභාපති නිමල් සිරිපාල ද සිල්වා, ජාතික සංවිධායක දුමින්ද දිසානායක, ජාතික නිදහස් පෙරමුණේ නායක, විමල් වීරවංශ, පිවිතුරු හෙළ උරුමයේ නායක උදය ගම්මන්පිල , අනුර ප්‍රියදර්ශන යාපා, සුසිල් ප්‍රේමජයන්ත, ජනාධිපති නීතිඥ විජයදාස රාජපක්ෂ, ටිරාන් අලස්, ගෙවිඳු කුමාරතුංග, අසංක නවරත්න යන මහත්වරු සහ පාර්ලිමේන්තු මන්ත්‍රී අතුරලියේ රතන හිමියෝ ද මෙම සාකච්ඡාවට සහභාගි වී තිබෙනවා.
ආරාධනය ජනපතිගෙන්
එම සාකච්ඡාවට එක්වූ හිටපු අමාත්‍ය වාසුදේව නානායක්කාර මහතා පැවසූවේ සාකච්ඡාවේදී අන්තර්කාලීන ආණ්ඩුව ගැන සාකච්ඡාවක් සිදුනොවූ බවයි.
ජනාධිපතිවරයා විසින් කරන ලද ආරාධනයකට අනුව දෙපාර්ශවය අතර මෙම සාකච්ඡාව පැවැත්වුණා.
රට අරාජික සහ අස්ථාවරවීම වැළැක්වීම සඳහා වන යෝජනා 11ක් ඇතුළත් ලිපියක් ස්වාධීන මන්ත්‍රී කණ්ඩායම විසින් ජනාධිපතිවරයාට ඉකුත් 08 වැනිදා යවනු ලැබුවා.
මෛත්‍රීගේ නිවසේත් සාකච්ඡා
රට පත්ව ඇති අර්බුදකාරී තත්වයෙන් ගොඩ ගැනීම සදහා සර්ව පාක්ෂික අන්තර්කාලීන ආණ්ඩුවක් පිහිටුවන්නැයි ස්වාධීන මන්ත්‍රීවරුන් කණ්ඩායම ජනාධිපතිවරයාට යැවූ ලිපියෙන් ඉල්ලීමක් කර තිබුණා.
ජනාධිපතිවරයා සමඟ සාකච්ඡා කරන්නට පෙර මෙම ස්වාධීන මන්ත්‍රී කණ්ඩායම හිටපු ජනාධිපති මෛත්‍රිපාල සිරිසේන මහතාගේ නිල නිවසේ දී ඊයේ (10) රැස් වී මේ සම්බන්ධයෙන් දීර්ඝ වශයෙන් සාකච්ඡා කර තිබෙනවා.
මේ සම්බන්ධයෙන් විපක්ෂ නායක සජිත් ප්‍රේමදාස මහතා ප්‍රමුඛ සමගි ජන බලවේගය සහ ජාතික ජන බලවේගය සමඟද සාකච්ඡා කිරීමට එම මන්ත්‍රීවරුන් මෙහිදී තීරණය කර තිබුණා.
එම මන්ත්‍රීවරුන් 41 දෙනාගේ සාකච්ඡාවෙන් අනතුරුව, ස්වාධීන මන්ත්‍රී කණ්ඩායමේ මන්ත්‍රීවරුන් පිරිසක් සහ විපක්ෂ නායක සජිත් ප්‍රේමදාස මහතා ප්‍රමුඛ සමගි ජන ජනබලවේගඅතරය සාකච්ඡාවක් ද, හිටපු ජනාධිපතිවරයාගේ නිල නිවසේදී ඊයේ පස්වරුවේ පවත්වා තිබුණා.
