ඉදිරි මාස හය සදහා රටට අවශ්‍ය ඖෂධ පිළිබඳ පුර්ණ වාර්තාවක් අද (12) දින වන විට ලබාදෙන ලෙස සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා සෞඛ්‍ය ක්ෂේත්‍රයේ අදාළ නිලධාරීන්ට ඊයේ (11) උපදෙස් ලබා දී තිබෙනවා.
ඒ අනුව මාස තුන බැගින් වන කාර්තු දෙකකට අවශ්‍ය ඖෂධ පිළිබඳ ගණනය කරමින් මෙම වාර්තාව සකස් වියයුතු බව අමාත්‍යවරයා මෙහිදී අවධාරණය කර තිබෙනවා.
මෙම වර්ෂය තුළ මෙරටට අවශ්‍ය ඖෂධ සැපයුම සම්බන්ධයෙන් ඊයේ (11) සෞඛ්‍ය අමාත්‍යංශයේදී පැවති විශේෂ සාකච්ජාවකදී අමාත්‍යවරයා මෙම උපදෙස් ලබා දී ඇතැයි සෞඛ්‍ය අමාත්‍යාංශය සඳහන් කළා.
ගෝලීය වසංගතය තුළ කුමන බාධා පැමිණියද ජනතාවට අවශ්‍ය ඖෂධ හිඟයකින් තොරව ලබාදිය යුතු බවත් ඒ සඳහා රජය ප්‍රමුඛතාවයකින් කටයුතු කරන බවත් අමාත්‍යවරයා මෙහිදී පෙන්වා දුන්නා.
මෙරටට ඖෂධ ආනයනය කරන රටවල්හි එම ඖෂධ පිළිබද තොරතුරුද, රට තුළ නිෂ්පාදනය කරන ඖෂධ සම්බන්ධයෙන්ද අදාළ තොරතුරු ලබාදෙන ලෙස සෞඛ්‍ය අමාත්‍යවරයා විසින් ඖෂධ නිෂ්පාදන, සැපයුම් හා නියාමනය පිළබඳ රාජ්‍ය අමාත්‍යංශයේ ලේකම් වෛද්‍ය සමන් රත්නායක මහතාට මෙහිදී උපදෙස් ලබා දී තිබෙනවා.
ලොව පළමු රටවල් අතරට එක්වෙමින් මේ වනවිට එන්නත්කරණයෙන් ශ්‍රී ලංකාව ජාත්‍යන්තර ඇගයීමට ලක්ව ඇතැයිද ඒ තුළ එන්නත් මිලියන 51 ක් ඉක්මවා ගෙන ඒමට හැකිවීම ඉහළ ජයග්‍රහණයක් යැයි ද රඹුක්වැල්ල මහතා පැවසුවා.
කොවිඩ් මර්දනයට ඉහල ප්‍රමුඛතාවය ලබාදුන් සේ රජය ජනතාවට අවශ්‍ය ඖෂධ වෙනුවෙන්ද උපරිම සාධනීය පියවර ගන්නා බව හෙතෙම පෙන්වා දුන්නා.
ඖෂධ ආනයනයේදී මෙරට නිෂ්පාදනය කළ හැකි ඖෂධ පිළිබදව සැලකිලිමත්ව ඖෂධ ගෙන්විය යුතු බවත් එමෙන්ම එම ඖෂධ පිළිබදව නිසි අධ්‍යනයකින් ක්‍රියාත්මක වියයුතු බවත් මෙහිදී සාකච්ජාවට ලක්වුණා.
රටතුළ ඇතැම් ඖෂධ විශාල වශයෙන් නිෂ්පාදනය කරන නමුත් ජනතාව විවිධ සන්නාම යටතේ නිකුත් කෙරෙන ඖෂධ සදහා හුරුවී තිබීම හේතුවෙන් එම වර්ගයේම විවිධ සන්නාමයන්හි ඖෂධ ආනයනය කිරීමට සිදුවන බව මෙම සාකච්ජාවේදී අනාවරණය වුණා.
රටතුළ කිසිදු අයුරකින් කිසිදු මොහොතක ඖෂධ හිගයක් ඇති නොවීමට සෑම වර්ෂයකම එළඹෙන වර්ෂයට පෙර ඒ පිළිබදව පුර්ව අධ්‍යනයකින් කටයුතු කිරීම ඉතා වැදගත් යැයිද අමාත්‍යවරයා මෙහිදී සඳහන් කළා.
