සෞඛ්‍ය අමාත්‍යාංශයේ කිසිදු අනුමැතියකින් තොරව වයස අවුරුදු දොළහක දැරියකට කොවිඩ් මර්දන එන්නත ලබා දෙන ලදැයි කියන සිද්ධියක් සම්බන්ධයෙන් පුත්තලම හලාවත කොක්කාවිල ප්‍රාථමික විදුහලේ එන්නත් මධ්‍යස්ථානය බාර වෛද්‍යවරයා සහ එහි පවුල් සෞඛ්‍ය සේවා නිලධාරිනියක පුත්තලම මූලික රෝහලේ කොරෝනා ප්‍රතිකාර ඒකකයට වහාම ක්‍රියාත්මක වන පරිදි මාරු කර යැවූ බව පුත්තලම ප්‍රාදේශීය සෞඛ්‍ය සේවා අධ්‍යක්ෂිකා වෛද්‍ය දිනූෂා ප්‍රනාන්දු මහත්මිය පැවසුවා.
කොවිඩ් මර්දන එන්නත ලබාදී ඇති මෙම දැරිය එම වෛද්‍යවරයාගේ දියණියක බවද ඇය සඳහන් කළා.
වෛද්‍යවරයාට වැඩ වරදී
මේ සිද්ධිය සම්බන්ධයෙන් විශේෂ විමර්ශනයක් අද (26) ආරම්භ කර තිබෙනවා. එම විමර්ශනයේ ප්‍රතිඵල මත අදාල වෛද්‍යවරයාට සහ පවුල් සෞඛ්‍ය සේවිකාවට එරෙහිව සුදුසු ක්‍රියාමාර්ග ගන්නා බවයි ප්‍රාදේශීය සෞඛ්‍ය සේවා අධ්‍යක්ෂවරිය කියා සිටියේ.
පුත්තලමේ එන්නත්කරණ වැඩපිළිවෙළ ඉතා සාර්ථකව ක්‍රියාත්මක වෙමින් තිබියදී මෙවැනි නීති විරෝධී හා සදාචාර විරෝධී සිද්ධියක් සිදුවීම ගැන තමා කනගාටුවන බවත් මෙවැනි සිදුවීම් ඉදිරියටද සිදුවීම වැළැක්වීම සඳහා තමා විශේෂ වැඩපිළිවෙළක් අරඹා ඇති බවත් වෛද්‍යවරිය සඳහන් කළා.
මේ අනුව එන්නත්කරණ කටයුතුවල යෙදෙන පුත්තලමේ සියලුම සෞඛ්‍ය කාර්ය මණ්ඩල සාමාජික සාමාජිකාවන්ට රජයේ එන්නත්කරණ වැඩපිළිවෙළ සම්බන්ධයෙන් පුළුල් දැනුවත් කිරීමක් 28 සිදුකිරීමට කටයුතු යොදා ඇතැයිද ඇය සඳහන් කළා.
සී.සී.ටී.වී වල සියල්ල සටහන් වෙලා
මේ සිද්ධියට අදාළ විමර්ශන ආරම්භ කිරීමෙන් පසුව එම එන්නත්කරණ මධ්‍යස්ථානයේ සී.සී.ටී.වී කැමරාවේ සටහන් වී ඇති දර්ශනද පරීක්ෂාවට ලක් කර තිබෙනවා.
එන්නත්කරණ මධ්‍යස්ථානයට පැමිණි වෛද්‍යවරයාගේ දියණිය එහි සිටි පොලිස් හා හමුදා නිලධාරීන් විසින් එම ස්ථානයෙන් ඉවතට ඉවතට යවනු ලැබූ අවස්ථාවේදී චෝදනාවට ලක්ව සිටින පවුල් සෞඛ්‍ය සේවිකාව ඇය නැවතත් කැඳවාගෙන විත් එන්නත ලබා දෙන ආකාරය එම සී.සී.ටී.වී දර්ශනවල දැක්වෙන බවයි පුත්තලම ප්‍රාදේශීය සෞඛ්‍ය සේවා අධ්‍යක්ෂ කාර්යාලය පවසන්නේ.
"මැඩම් මට සමාවෙන්න"
චෝදනා ලබා සිටින වෛද්‍යවරයාගෙන්ද මේ සිද්ධිය සම්බන්ධයෙන් ප්‍රාදේශීය සෞඛ්‍ය සේවා අධ්‍යක්ෂවරිය කරුණු විමසා ඇති අතර ඔහු ඒ සම්බන්ධයෙන් එහිදී කිසිදු ප්‍රකාශයක් කර නැත.
අධ්‍යක්ෂවරිය ඒ සම්බන්ධයෙන් තවදුරටත් ප්‍රශ්න කළ අවස්ථාවේදී වෛද්‍යවරයා "මැඩම් මට සමාවෙන්න" යනුවෙන් ප්‍රකාශ කර ඇතැයි දැනගන්නට තිබෙනවා.
මට ප්‍රහේලිකාවක්
වෛද්‍යවරයා කුමන මානසිකත්වයකින් දියණියට එන්නත ලබා දුන්නාදැයි තමාට ප්‍රහේලිකාවක් බව ප්‍රාදේශීය සෞඛ්‍ය සේවා අධ්‍යක්ෂවරිය පැවසුවාය.
මෙම චෝදනාවට ලක්වූ වෛද්‍යවරයා හලාවත කොක්කාවිල රෝහලේ ප්‍රධාන වෛද්‍යවරයා බව පැවසෙනවා.
කෙසේ වෙතත් සිද්ධියවන අවස්ථාවේදී එම වෛද්‍යවරයා එන්නත්කරණ මධ්‍යස්ථානයේ සිට නැති බවත් ඔහු ඒ අවස්ථාවේදී සිට ඇත්තේ ඊට නුදුරින් වූ වෙනත් එන්නත්කරණ මධ්‍යස්ථානයක බවත් වාර්තා වේ.
දියණියට දුන්නේ ෆයිසර් එන්නත්
චෝදනාවට ලක් වූ වෛද්‍යවරයාගේ දියණියට ලබාදී ඇත්තේ ෆයිසර් වර්ගයේ එන්නත් මාත්‍රාවක්ය.
මේ අතර කොක්කාවිල එන්නත්කරණ මධ්‍යස්ථානයට පිට පළාත්වලින් පැමිණි අයට එන්නත ලබා දුන් බවට චෝදනා කරමින් ප්‍රදේශවාසීන් පිරිසක් එම මධ්‍යස්ථානය අසල උද්ඝෝෂණයක යෙදීම නිසා එහි නොසන්සුන් තත්වයක් ඊයේ (25) ඇතිවිය.
කොවිඩ් මර්දන එන්නත ලබාදීමට සෞඛ්‍ය අමාත්‍යාංශය මෙතෙක් අනුමැතිය ලබා දී ඇත්තේ වයස 18ට වැඩි පුද්ගලයන්ට පමණි.
