September 28, 2020

යුරෝපා සංගමයෙන් ශ්‍රී ලංකාවේ කුරුඳු අපනයන කර්මාන්තය සඳහා සහාය

කුරුඳු පුහුණු විද්‍යායතනය (CTA) විසින් කොස්ගොඩ ප්‍රදේශයේ Bought Tree Factory (BTF) නමින් හඳුන්වනු ලබන කුරුඳු සැකසුම් ඒකකයක් ඉදිකිරීම ආරම්භ කිරීම සඳහා මුල්ගල තැබීමේ උත්සවය පසුගියදා පවත්වනු ලැබීය. මෙම අවස්ථාවට, යුරෝපා සංගමයේ ශ්‍රී ලංකා හා මාලදිවයින් සහයෝගිතා අධ්‍යක්‍ෂ ෆ්‍රෑන්ක් හෙස්, එක්සත් ජාතීන්ගේ කර්මාන්ත සංවර්ධන සංවිධානයේ (UNIDO) ජාත්‍යන්තර තාක්‍ෂණික විශේෂඥ ආචාර්ය හයිරෝ අන්ඩේ‍රස් විලමිල් ඩියැස්, දකුණු පළාත් සභාවේ ගාලු දිස්ත්‍රික් බලපිටිය ප්‍රාදේශීය සභාවේ සභාපති සමන් ද සිල්වා, බලපිටිය ප්‍රාදේශීය ලේකම් බී.පී.එස්. අනුරාධි, අපනයන කෘෂිකර්ම දෙපාර්තමේන්තුවේ අධ්‍යක්‍ෂ ආචාර්ය ජී. ජයසිංහ සහ CTA ආයතනයේ සභාපති සාරද ද සිල්වා සහ එහි අධ්‍යක්‍ෂ මණ්ඩලය ඇතුළු මහත්ම මහත්මීන් පිරිසක් සහභාගි විය.

CTA ආයතනයේ පුහුණු පරිශ්‍රය පුළුල් කොට මෙවැනි කුරුඳු සැකසුම් ඒකකයක් ඉදිකිරීම හරහා එහි මූල්‍ය ස්ථාවරත්වය සහ කාර්යසාධනය ඉහළ නංවා ගැනීම මෙමඟින් අරමුණු කොට ඇත. අස්වනු නෙළන කාලය වන විට පුහුණු කටයුතු වලට ඇති ඉල්ලුම අවම වී සැකසුම් අංශයේ ඉහළ ඉල්ලුමක් ඇති වන නිසා මෙම නව ඒකකය මඟින් ආයතනයට සැලකිය යුතු වාර්ෂික ආදායමක් උපයා ගැනීමට හැකිවනු ඇතැයි ද අපේක්‍ෂා කෙරේ. එමෙන්ම මෙම ඒකකය පිහිටුවීම හරහා බලපිටිය, කරන්දෙණිය සහ අම්බලන්ගොඩ යන ප්‍රදේශවල කුරුඳු ගොවීන්ට තම අස්වනු අතරමැදියෙකු නොමැතිව මෙම සැකසුම් ඒකකය වෙත ඍජුව අලෙවි කළ හැකි වන අතර මේ නිසා ඉහළ ලාභයක් ඉපයීමටද ඔවුන්ට අවස්ථාව සැලසෙනු ඇත.

වසර පුරාම මෙහෙයුම් කටයුතු සිදු කිරීමට අපේක්‍ෂිත මෙම නව කුරුඳු සැකසුම් ඒකකය කේන්ද්‍ර කොට ගනිමින් ඍජු රැකියා අවස්ථා 20ක් සහ වක්‍ර රැකියා අවස්ථා 100කට අධික ප්‍රමාණයක් ද නිර්මාණය වනු ඇතැයි බලාපොරොත්තු වේ. වර්ෂයකට අස්වනු නෙළුම් වාර දෙකකින් සමන්විත වන කුරුඳු වගාවකින් මාසයකට කුරුඳු ගස් 24,000කින් කුරුඳු කිලෝග්රෑම් 1,350ක පමණ ප්‍රමාණයක් ලබා ගැනීමට මෙම ඒකකයට හැකියාව ඇති අතර එහි උපරිම ධාරිතාව අනුව සලකා බලන විට මෙම ඒකයය මඟින් ක්‍ඕ ආයතනයට මාසිකව ඉපයිය හැකි ආදායම රු. මිලියන 2.7ක පමණ වේ.

උත්සවයේ පිළිගැනීමේ කතාව කළ සාරද ද සිල්වා මහතා, උත්සවයේ ප්‍රධාන අමුත්තා ලෙස ඇරයුම් ලැබ සිටි වැවිලි කර්මාන්ත සහ අපනයන කෘෂිකර්ම අමාත්‍යංශයේ හිටපු අමාත්‍ය ආචාර්ය රමේෂ් පතිරණ මහතා නැවත වරක් පාර්ලිමේන්තු මන්ත්‍රීවරයෙකු ලෙස තේරී පත්වීම පිළිබඳ සිය සුභාශිංෂණ පිරිනමනු ලැබූ අතර එතුමා කුරුඳු නිෂ්පාදනය ඇතුළු මෙරට කෘෂි අපනයන ක්‍ෂේත්‍රයේ අභිවෘද්ධිය උදෙසා දක්වනු ලැබූ දායකත්වයට ස්තුතිය ද පළ කළේය. මෙම නව ඒකකය ඉදිකිරීමේ කාර්යය වෙනුවෙන් යුරෝපා සංගමයෙන් ලද මූල්‍ය දායකත්වය සහ UNIDO සංවිධානයේ තාක්‍ෂණික සහය ද ඉතා අගය කොට සලකන බව ද සඳහන් කළේය. මෙරට වාණිජ වටිනාකමක් ඇති ව්‍යාපෘති සඳහා සහය වීමේ යුරෝපා සංගමයේ වැඩසැලසුම්වල අංගයක් ලෙසින් ක්‍රියාත්මක මෙම ව්‍යාපෘතිය ලෝක වෙළඳ මධ්‍යස්ථානයේ සහ ඹභෂෘධ සංවිධානයේ සම සහයෝගීතාව යටතේ වාණිජ දෙපාර්තමේන්තුව මඟින් ක්‍රියාත්මක කරනු ලබන්නකි.

උත්සවයේ ගෞරවණීය ආරාධිතයා වූ ෆ්‍රෑන්ක් හෙස් මහතා අදහස් දක්වමින් මෙම ව්‍යාපෘතිය හරහා CTA ආයතනයට ලැබී ඇති තවත් සුවිශේෂී අවස්ථාවක් පිළිබඳ සඳහන් කළේය. එනම්, තෘතීයික හා වෘත්තීය අධ්‍යාපන කොමිෂන් සභාව (TVEC) යටතේ නිකතු කරනු ලබන කුරුඳු නිෂ්පාදනය ක්‍ෂේත්‍රයේ ජාතික වෘත්තීය සුදුසුකම් (NVQ) මට්ටම් 3 සහ 4 සඳහා වන පුහුණුව ලබා දීමට CTA පුහුණු වැඩසටහන් හරහා හැකියාව ලැබීම සහ කුරුඳු නිෂ්පාදනය ආශ්‍රිත ජාතික නිපුණතා සම්මත (NCS) සඳහා TVEC අනුමැතිය ලැබීම නිසා මෙම ක්‍ෂේත්‍රයේ කර්මාන්තශාලා ආශ්‍රිත වෘත්තිමය අඩුපාඩු රැසක් මඟහරවා ගත හැකි වීමයි. NVQ සහතිකය ලැබූ පුහුණුලාභීන්ගේ ඵලදායීතාව 20%-30% අතර ප්‍රමාණයක් වර්ධනය වීම හේතුවක් ලෙසින් සැලකිය හැකි සේම මෙවැනි ජාතික වශයෙන් පිළිගැනීමක් ඇති උසස් අධ්‍යාපන වරප්‍රසාදයක් මෙම ක්‍ෂේත්‍රයට යොමු වන පිරිසට හිමි වීමත් අගය කළ යුතු කරුණකි. CTA ආයතනයට අමතරව මෙම ව්‍යාපෘතිය හරහා කුළුබඩු වෙළඳපොලේ සැපයුම් දාම සංවර්ධනයට ද මෙමඟින් ඉහළ රුකුලක් සැලසෙන බව සඳහන් කළ හැකිය. එමෙන්ම සිලෝන් කුරුඳු නැමැති සන්නාමයට ජාත්‍යන්තර වෙළඳපොළ තුළ ඉහළ වටිනාකමක් ලැබීමටත් භූගෝලීය දර්ශකය වශයෙන් ප්‍රමුඛකරණය (GI) කළ ප්‍රථම නිෂ්පාදනය බවට කුරුඳු පත් කිරීමේ ජාතික අරමුණ සාක්‍ෂාත් කරගැනීමටත් මෙම ව්‍යාපෘතිය උපකාරී වනු නොඅනුමානය. ඹභෂෘධ සංවිධානයේ තාක්‍ෂණික මඟපෙන්වීම සහ ශ්‍රී ලංකා අපනයන සංවර්ධන මණ්ඩලයේ සහයෝගීතාව යටතේ ඨෂ සඳහා වන අයදුම්පත් මේ වන විටත් යුරෝපා සංවිධානය වෙත භාරදී ඇත.

කොස්ගොඩ ප්‍රදේශය කේන්ද්‍ර කරගනිමින් 2013 වසරේදී ආරම්භ කරනු ලැබූ CTA ආයතනය කුරුඳු සැකසුම් ක්‍ෂේත්‍රයේ තාක්‍ෂණික අවශ්‍යතා වෙනුවෙන් පිහිටුවන ලද්දකි. එමෙන්ම රාජ්‍ය-පෞද්ගලික ව්‍යාපාර හවුල්කාරීත්වයේ එක් සාර්ථක ප්‍රතිඵලයක් ලෙසින් ද CTA ආයතනය හඳුන්වා දිය හැකිය. ලෝක වෙළඳ සංවිධානයේ (WTO) ප්‍රමිතීන් සහ වෙළඳ සංවර්ධන පහසුකම් (STDF) මෙන්ම ශ්‍රී ලංකා කුළුබඩු කවුන්සිලය (TSC) ද අපනයන සංවර්ධනය මණ්ඩලය (EDB) හරහා ශ්‍රී ලංකා රජය ද මෙම පිහිටුවීමට ආධාර දුන් ආයතන වේ. CTA ආයතනය කුරුඳු නිෂ්පාදන ක්‍ෂේත්‍රයේ වෘත්තීය පුහුණුව සහ ප්‍රවීණතා මට්ටම් සංවර්ධනය සඳහා ද දායකත්වය සපයන අතර නිෂ්පාදන ධාරිතාව ඉහළ නැංවීම, ජාත්‍යන්තර ආහාර සුරක්‍ෂිතතා ප්‍රමිතීන්ට අනුකූල වීම හා කුරුඳු කර්මාන්තයේ රැකියා අවස්ථා වැඩි කිරීම සඳහා අවශ්‍ය පුහුණු ශ්‍රමය මෙමඟින් සපයනු ලැබේ.

Rate this item
(0 votes)