2030 සංවර්ධන සැළැස්ම නිසා ආසියානු රටවලට ඩොලර් ට්‍රිලියන 5 ක වෙළෙඳ අවස්ථාවක් ලැබී තිබෙන බව UNIDO නිත්‍ය නියෝජිත ආචාර්යය රෙනේ වෑන් පවසයි.
එක්සත් ජාතින්ගේ කර්මාන්ත සංවර්ධන සංවිධානය (UNIDO) විසින් සංවිධානය කරනු ලැබූ තිරසාර සංවර්ධනය පිළිබඳව කර්මාන්තකරුවන් දැනුවත් කිරීමේ වැඩසටහනක් පසුගියදා කර්මාන්ත හා වාණිජ කටයුතු අමාත්‍ය රිෂාඩ් බදියුදීන් මහතාගේ ප්‍රධානත්වයෙන් සතොස මූලස්ථානයේ දී පැවැත්විණි.
එහිදී 2030 වන විට එක්සත් ජාතීන්ගේ සංවිධානය විසින් ලෝකය පුරා ක්‍රියාත්මක කිරීමට නියමිත තිරසර සංවර්ධන සැලැස්ම හා එම සැලැසුම තම ව්‍යාපාර සඳහා ආදේශ කර ගන්නා ආකාරය පිළිබඳව කර්මාන්තකරුවන් දැනුවත් කරන ලදී.
එක්සත් ජාතීන්ගේ සංවිධානය ක්‍රියාත්මක කරන 2030 තිරසර සංවර්ධන සැළස්මට අනුව ශ්‍රී ලංකාවේ රාජ්‍ය හා පුද්ගලික අංශයේ කර්මාන්ත සඳහා ජාත්‍යන්තර ප්‍රමීතීන් හඳුන්වාදීම මෙම වැඩසටහනේ මූලික අරමුණ විය.මෙම තිරසර වැඩසටහන් සැළැස්මට ඉළක්ක 17ක් අයත්ය.
ඒ අතරින් දුගී භාවය තුරන් කිරීම, සෞඛ්‍ය ක්‍ෂේත්‍රය නගා සිටුවීම, දළ ජාතික නිෂ්පාදිතය සඳහා කර්මාන්තවල දායකත්වය වැඩි කිරීම, කාර්මික ක්‍ෂේත්‍රයේ රැකියා නියුක්තිය වැඩි කිරීම, අගය එකතු කළ නිෂ්පාදන ප්‍රතිශතය වැඩි කිරීම වැනි ඉළක්ක ප්‍රධාන වේ.
මෙහිදී 2030 තිරසර සංවර්ධන සැළැස්ම පිළිබඳව කර්මාන්තකරුවන් දැනුවත් කළ යුනිඩෝ (UNIDO) නිත්‍ය නියෝජිත ආචාර්යය රෙනේ වෑන් බර්කල් මහතා (Rene Van Berkel) ප්‍රකාශ කෙළේ මෙම සැලසුම හරහා ආසියානු රටවලට ඇමරිකානු ඩොලර් ට්‍රිලියන 05ක වෙළෙඳ අවස්ථා හිමි වන බවයි.
මෙම අවස්ථාවේදී රිෂාඩ් බදියුදීන් අමාත්‍යවරයා මෙසේ අදහස් දැක්වීය.
" ශ්‍රී ලංකාවේ කර්මාන්ත ක්‍ෂේත්‍රයේ ශීඝ්‍ර වර්ධනයක් පසුගිය කාලයේ පෙන්නුම් කර තිබෙනවා. අපේ දළ ජාතික නිෂ්පාදිතයෙන් 30%ක දායකත්වයක් කර්මාන්ත අංශයෙන් ලබා දෙනවා. එය ජපානය ඕස්ට්‍රියාව, ස්පාඤ්ඤය වැනි දියුණු රටවලින් ලබා දෙන අනුපාතයට සමානයි. රටක ආර්ථික සංවර්ධන දැක්මේ ප්‍රධාන ස්ථානයක් අපනයන ක්‍ෂේත්‍රයට හිමිවෙනවා. එම නිසා අපනයන සම්බන්ධ කර්මාන්තවල වැදගත්කම තවත් වැඩිවෙනවා. පසුගිය වර්ෂයේදී (2016) අපි ඇමරිකානු ඩොලර් බිලියන 7.7ක් වටිනා කාර්මික අපනයන සිදු කළා. එය අපගේ සමස්ථ අපනයන ආදායමෙන් 2/3 ක් වෙනවා "
මේවන විට එක්සත් ජාතින්ගේ කර්මාන්ත සංවර්ධන සංවිධානය (UNIDO) විසින් ඇමරිකානු ඩොලර් මිලියන 10 ක ව්‍යාපෘති ශ්‍රී ලංකාව තුළ ක්‍රියාත්මක කරයි.
