September 24, 2017

ව්‍යාජ ෆේස්බුක් ගිණුම් රැසක් - අන්තර්ජාලය ගැන මාස හයට පැමිණිලි 1600 ක්

අන්තර්ජාලය අවභාවිතා කිරීම සම්බන්ධයෙන් 2017 වර්ෂයේ ජනවාරි මාසයේ සිට ජුනි මාසය දක්වා කාලය තුල පැමිණිලි 1600 ක් පමණ ලැබී ඇතැයි ශ්‍රී ලංකා පරිගණක හදිසි ප්‍රතිචාර සංසදය (Sri Lanka CERT) පවසයි.

මෙයින් සියයට අසුවක් පමණ පැමිණිලි ලැබී ඇත්තේ ව්‍යාජ ෆේස්බුක් ගිණුම්වලට අදාළව බව සංසදයේ ප්‍රධාන තොරතුරු ආරක්‍ෂක ඉංජිනේරු රොෂාන් චන්ද්‍රගුප්ත මහතා පැවසී ය.

අන්තර්ජාලය ඔස්සේ භාණ්ඩ අ‍ලෙවි කිරීමේ කිරීමේ නිරත ආයතන ලෙස පෙනී සිටිමින් කූට ලෙස මුදල් වංචා කිරීම් සම්බන්ධ පැමිණිලි කිහිපයක් ද ලැබී ඇතැයිද ඒ මහතා සඳහන් කළේය.

අන්තර්ජාලය ඔස්සේ සේවා ලබා ගැනීමට යොමු වීමේදී තමන් ගණුදෙනු කරන්නේ ව්‍යාජ පුද්ගලයින් සහ ආයතන සමග නොවන බවට මුලින්ම තහවුරු කර ගන්නා ලෙසද චන්ද්‍රගුප්ත මහතා ඉල්ලීමක් කරයි.

මීට සති කිහිපයකට ඉහතදී බ්‍රිතාන්‍යය යුක්රේනය ඇතුළු රටවල් කිහිපයකට එල්ල වු පරිගණක වෛරසයෙන් ශ්‍රී ලංකාවට බලපෑමක් වු බවට මෙතෙක් තොරතුරු ලැබී නැතැයිද චන්ද්‍රගුප්ත මහතා සදහන් කළේය. කෙසේ වෙතත් එවැනි තතත්වයන් ගැන තම සංසදය නිරතුරු අවධානයෙන් සිටින බවද චන්ද්‍රගුප්ත මහතා ප්‍රකාශ කළේය.

සැකසහිත ඉ-මේල් පණිවිඩ විවෘත කිරීමෙන් වැළකී සිටීම මෙන්ම තම පරිගණකයේ තිබෙන වැදගත් ලිපිගොණු පිංතූර දත්ත තොරතුරු තවත් තැනක පිටපත් කර තැබීමත් (backup) වඩාත් ආරක්‍ෂාකාරී උපක්‍රමයක් බවත් එසේම තම පරිගණකයේ ස්ථාපිත කර තිබෙන ප්‍රති වෛරස මෘදුකාංගය (Virus Guard) නිරන්තරයෙන් යාවත්කාලීන කර ගැනීමෙනුත් පරිගණකය වෛරසවලට ලක්වීම බෝහෝවිට වළකා ගැනීමට හැකිවන බවත් සංසදය සදහන් කරයි.

www.cert.gov.lk වෙබ් අඩවියට පිවිසීමෙන් මේ පිලිබද වැඩිදුර තොරතුරු දැන ගත හැකි වේ.

Rate this item
(0 votes)