May 26, 2018

එජාපයේ මහ ලේකම් වූ ලාබාලතම නායකයා අකිල

එක්සත් ජාතික පක්ෂයේ මහ ලේකම් තනතුර සඳහා  දැනට නියෝජ්‍ය මහ ලේකම් තනතුර දරන අමාත්‍ය අකිල විරාජ් කාරියවසම් මහතා පත් කිරීමට එක්‌සත් ජාතික පක්‍ෂ දේශපාලන මණ්‌ඩලය පෙරේදා (25 ) පියවර ගනු ලැබීය.

1995 වසරේ දී කුලියාපිටිය ආසනයේ ජාතික යොවුන් පෙරමුණේ සභාපතිවරයා ලෙසින් තේරී පත්වූ අකිල විරාජ් කාරියවසම්, 1996වසරේ දී යොවුන් පෙරමුණු කුරුණෑගල දිස්ත‍්‍රික් සභාපති ධූරයටත්, ඉන් අනතුරුව ජාතික යොවුන් පෙරමුණේ කෘත්‍යාධිකාරී මණ්ඩලයේ සාමාජිකයෙකු ලෙසත් පත්විය. ඒ අ.පො.ස. උසස් පෙළ සමත් වී කොළඹ විශ්වවිද්‍යාලයට ඇතුළු වී අධ්‍යාපනය හදාරන අවදියේ දී මය.

එයින් ද නොනැවතී ජාතික යොවුන් පෙරමුණේ සමස්ත ලංකා උපසභාපතිවරයා ලෙසත් ඉන්පසු 1999 වසරේ දී එහි ප‍්‍රධාන ලේකම්වරයා ලෙසත් තේරී පත්වීම ක‍්‍රියාකාරී දේශපාලන භූමිකාව තුළ ඔහු හිනිපෙත්තට ඔසවා තබන මාවත වර්ණවත් කළේය.

විශ්වවිද්‍යාල දේශපාලනය තුළ ද කැපී පෙනුණු භූමිකාවකට පණ පෙවූ මේ තරුණ නායකයා, සරසවි යොවුන් පෙරමුණට නායකත්වය දුන්හ. ඒ, 1999 වසරේ දී බලය හෙබ වූ චන්ද්‍රිකා කුමාරණතුංග රජයේ ඊනියා අධ්‍යාපන ප‍්‍රතිසංස්කරණවලට එරෙහි ව රට පුරා ගෙන ගිය දැවැන්ත ශිෂ්‍ය අරගලයට ජීවය ලබා දෙමිනි. එහි දී අත්අඩංගුවට පත් මේ තරුණ දේශපාලන නායකයා සිරභාරයට ද පත් විය.

ඉන් තම ජීවිතයේ සටන්කාමී දේශපාලනය තවදුරටත් මුවහත් කරගත් ඔහු 2001 පාර්ලිමේන්තු මහමැතිවරණයේ දී කුරුණෑගල දිස්ත‍්‍රික්කයෙන් පාර්ලිමේන්තුවට තරඟ වදිනුයේ, කිසිදු ආසන සංවිධායක ධූරයක් හෝ නොදරමින් සිටි පසුබිමක වයස අවුරුදු 28 දී යි.

ඉන් අනතුරුව 2003 වසරේ දී පඬුවස්නුවර එක්සත් ජාතික පක්ෂ සංවිධායක ධුරයට තේරී පත්වන අකිල විරාජ් කාරියවසම් මහතා2004 පාර්ලිමේන්තු මැතිවරණයේ දී මනාප ඡන්ද 83,114ක් ලබාගෙන කුරුණෑගල මනාප ලයිස්තුවේ තුන්වැනි තැන හිමි කර ගනිමින් පාර්ලිමේන්තුවට තේරී පත් විණි.

2004 වසරේ දී පාර්ලිමේන්තුව විසුරුවා හැර එක්සත් ජාතික පක්ෂය විපක්ෂය බවට නැවත තල්ලූ කර දැමූ මොහොතක වුව ද,ධෛර්යය සම්පන්න ව අභියෝගවලට මුහුණ දෙමින් විපක්ෂයේ භූමිකාවට සක්‍රීය ලෙස සිය දායකත්වය සැපයූ මේ තරුණ නායකයා, දශකයකටත් වැඩි කාලයක් එක්සත් ජාතික පක්ෂ ඡායා කැබිනට්ටුව තුළ අධ්‍යාපන විෂය භාර මන්ත්‍රිවරයා ලෙසින් සිය මෙහෙවර ඉටු කළේය.

ඒ, රටේ අධ්‍යාපනය පිළිබඳ ආණ්ඩුව ගන්නා තීන්දු තීරණ ගැන හා රටේ දරු පරපුර පිළිබඳ සිය නිරන්තර අවධානය යොමු කරමිනි. අගය කළ යුතු දේ අගයමින්, හෙළා දැකිය යුතු දේ හෙළා දකිමින් සිය විපක්ෂ කාර්යයභාරය මැනවින් ඉටු කළ අකිල විරාජ් කාරියවසම් මහතා, 2005 වසරේ දී කුලියාපිටිය එක්සත් ජාතික පක්ෂ ආසන සංවිධායක ධූරයට පත්විය.

තරුණ ජවය පක්ෂය වටා ගොණු කරමින් සිය සටන්කාමී දේශපාලනය ක්‍රියාත්මක කළ ඔහුට 2007 වසරේ දී ජාතික යොවුන් පෙරමුණේ සභාපති තනතුර ද හිමිවිය. ගමින් ගමට ගොස් යොවුන් පෙරමුණ ප‍්‍රතිසංවිධානය කිරීමේ වගකීම එතුමා සිය උර මතට ගන්නේ ජීවිත තර්ජන, බිය වැද්දීම් සහ අනේකවිධ අභියෝග රාශියක් මැදය.

එමෙන්ම ශ්‍රී ලංකාවේ විශ්වවිද්‍යාල මගින් උපාධි දෙකක් ලබාගත් එමෙන්ම  නීතිවේදියෙකු වන ඔහු සරසවි යොවුන් පෙරමුණට නායකත්වය දෙනු ලැබීය.

2010 වසරේ පැවති මහමැතිවරණයේ දී කුරුණෑගල දිස්ත‍්‍රික්කයේ දෙවැනි ස්ථානයට තේරී පත් වූ හෙතෙම පක්ෂයට අභියෝග, අපවාද එල්ලවන සෑම අවස්ථාවල දී ම පක්ෂයේ උන්නතියත් පාක්ෂිකයන්ගේ අභිලාසයත් වෙනුවෙන් නිරන්තරයෙන් පෙනී සිටියහ.

බැරෑරුම් අවස්ථාවන්හි දී කිසිදු ලෙසකින්වත් පක්ෂයත් පක්ෂ නායකත්වයත් තනි නො කොට  ඒ සමඟ එක් ව සිටගත්තේ  එය කළ යුතු වගකීම සහ යුතුකම බව අන් අයට ද පසක් කර දෙමිනි.

දක්ෂ කථිකත්වයත්, නායකත්වයත් ප‍්‍රදර්ශනය කරමින් විපක්ෂයේ වේදිකාව තුළ තමාට ම ආවේණික ශෛලියකින් ඔහු ජන හදවත් තුළ ලැගුම් ගත්තේ ප‍්‍රජාතන්ත‍්‍රවාදයේත්, සාධාරණත්වයේත්, යුක්තියේත් බලාපොරොත්තු දල්වාලමිනි.

එක්සත් ජාතික පක්ෂ කුරුණෑගල දිස්ත‍්‍රික් නායකයා ලෙසින් සේනා සංවිධානය කරමින් එවකට පැවති මහින්ද රාජපක්ෂ පාලනයට එරෙහිව ගෙන ගිය ජන අරගලයට  නායකත්වය සපයන මේ තරුණ නායකයා, 2015 වසරේ ජනවාරි 8 වැනි දා සිදු වූ බලපෙරළිය වෙනුවෙන් භාරදූර කාර්යභාරයක් ඉටු කළේය.

රටට යහපාලනය උදාකරනු වස්, දේශපාලන භේද පසෙක ලා නිර්මාණය කරන ලද නව රජයෙහි අධ්‍යාපන අමාත්‍ය ධූරය ඔහුට හිමි විය. ඒ 2015 ජනවාරි මස 12 වැනිදාය.

වසර ගණනාවක් විපක්ෂය තුළ අධ්‍යාපනය භාර මන්ත‍්‍රීවරයා ලෙස මෙරට අධ්‍යාපන ක්ෂේත‍්‍රයේ ගැටළු පිළිබඳ ලැබූ පුළුල් දැනුම සහ අවබෝධය, සිය නව අමාත්‍ය ධූරයේ කාර්යයන් සාර්ථක කර ගැනීම සඳහා ඔහු යොදා ගත්තේ නායකත්ව ගුණාංග නැවත නැවතත් පසක් කරමිනි.

2015 ජනවාරි 8 වැනි දා ජනතා පරමාධිපත්‍ය බලය හමුවේ පරාජයට පත් මහින්ද රාජපක්ෂ මහතා නැවත වතාවක් 2015 අගෝස්තු මස17 වැනි දා පැවති මහමැතිවරණයට ඉදිරිපත් වන්නේ පාර්ලිමේන්තුවට තේරී පත්වීමේ අරමුණිනි.

ඔහු එහි දී තරඟ කිරීමට තෝරාගන්නේ කුරුණෑගල දිස්ත‍්‍රික්කය යි. විපක්ෂයේ සිටිය දී ලැබූ පන්නරය තුළින්  ඕනෑම අභියෝගයකට සාර්ථකව මුහුණ දීමේ ගුණාංගය පුහුණු කළ අකිල විරාජ් කාරියවසම් මහතා එක්සත් ජාතික පක්ෂයේ අභිමානය වෙනුවෙන් ඇතුගල මෙන් නොසැලී සිය දේශපාලන මෙහෙවර ඉටු කළේය.

2015 මහමැතිවරණයේ දී මනාප ඡන්ද 2,86155 ක් ලබා ගනිමින්  කුරුණෑගල දිස්ත‍්‍රික් එක්සත් ජාතික පක්ෂයේ පළමුවැන්නා ලෙස නැවත තේරී පත්විය. ඒ මෙවර මැතිවරණයෙන් වත්මන් අගමැතිවරයා හැරුණුකොට එක්සත් ජාතික අපේක්ෂකයෙකු ලබාගත් වැඩිම මනාප ඡන්ද ප‍්‍රමාණය ලබා ගනිමිනි.

ඉන්පසු නව රජයේ ද අධ්‍යාපන අමාත්‍ය ධූරය ඔහුට හිමි වන අතර, පෙර පැවති විෂයය පථයට අමතරව පුරාවිද්‍යා සහ සංස්කෘතික විෂයයන්ගේ වගකීම ද ඔහු වෙත පැවරුණි.දූෂණ සහ අක‍්‍රමිකතාවන්ට එරෙහිව සහ රටේ දරුවන්ගේ හෙට දවස වෙනුවෙන් තීන්දු තීරණ ගනිමින් නීතියේ ආධිපත්‍යය ආරක්ෂා කරන පසුබිමක් තුළ රාජ්‍ය නිලධාරීන්ගේ අභිමානය ද ආරක්ෂා කරමින් සිය දේශපාලන නායකත්වය ලබා දීමට ඔහු කටයුතු කරන්නේ, එක්සත් ජාතික පක්ෂ නායක අග‍්‍රාමාත්‍ය රනිල් වික‍්‍රමසිංහ මහතාගේ සහ ජනාධිපති මෛත‍්‍රීපාල සිරිසේන මහතාගේ නො මඳ ආශිර්වාදයත් සමඟය.

එමෙන් ම දේශදේශාන්තරයන් තුළ ශ‍්‍රී ලංකාවේ කිතුගොස නංවමින් 2015 වසරේ සිට එක්සත් ජාතීන්ගේ අනුබද්ධ ආයතනයක් වූ යුනෙස්කෝ සංවිධානයේ මෙරට සභාපතිවරයා ලෙස තේරී පත්වන අකිල විරාජ් කාරියවසම් මහතා රටවල් 186 ක් අතරින් රටවල්149ක ඉහළ ඡන්ද සංඛ්‍යාවක් හිමි කරගනිමින් යුනෙස්කෝ සංවිධානයේ විධායක කමිටු සාමාජිකයෙකු ලෙස තේරී පත්වන්නේ ජාත්‍යන්තර සබඳතාවන්හි රන් හුයක් බවට පත්වෙමිනි. ඒ, 1968 වසරේ සිට අද දක්වා ශ‍්‍රී ලංකාව නියෝජනය කරමින් මෙම තනතුර සඳහා ඉදිරිපත් ව ලබාගත් ඉහළ ම ඡන්ද ප‍්‍රමාණය ද හිමි කරගනිමින්. එමෙන් ම සෙසු සාමාජිකයන් අතරින් ළාබාලතම සාමාජිකයා ඔහු වීම ද, විශේෂත්වයකි.

අධ්‍යාපන අමාත්‍යවරයා ලෙස ඔහු විසින් ක්‍රියාත්මක කළ වැඩසටහන් රැසක් මේ වන විටත් රටේ ලක්ෂ සංඛ්‍යාත දුවාදරුවන් වෙනුවෙන් සක්‍රිය ව පවතියි.

දූෂණ අක්‍රමිකතා, කොමිස් වංචාවලට තිත තබමින් දරුවන්ගේ පාසල් නිළ ඇඳුම් වෙනුවෙන් රජය වෙන් කරන ප්‍රතිලාභ ක්ෂය වීමකින් තොර ව දරුවන් අතට ම පත් කිරීමේ අරමුණින් හඳුන්වා දුන් නිළ ඇඳුම් වවුචර් ක්‍රමය, ජනප්‍රිය පාසල් මානසිකත්වය තුළ දුක්විඳින දරුවන් හා මවුපියන් වෙනුවෙන් තමන්ගේ නිවසට සමීපතම පාසල හොඳ ම පාසල බවට පත් කිරීමේ අරමුණින් දියත් කළ ළඟ ම පාසල හොඳ ම පාසල වැඩසටහන, ඒ මහතාගේ සංකල්පයට අනුව ක්‍රියාවට නැංවෙන්නකි.

සුපිරි පාසල් වෙනුවට සපිරි පාසල් නිර්මාණය කරමින් නගරයට පමණක් කේන්ද්‍ර වී තිබූ භෞතික සහ මානව සම්පත් ගම්බද පාසල්වලට ද ලබා දෙමින් නිදහස් අධ්‍යාපනයේ සැබෑ අර්ථය ප්‍රායෝගික තලයෙහි ක්‍රියාත්මක කිරීම මෙම වැඩසටහනෙහි අරමුණයි.

නූතනත්වයට ඔබින රැකියා වෙළෙඳපොළ ජය ගත හැකි තරුණ පුරවැසියන් නිර්මාණය කිරීම වෙනුවෙන් සහ නවයොවුන් වියේ දරුවන්ගේ අධ්‍යාපන අයිතිය සුරක්ෂිත කිරීම වෙනුවෙන් 13 වසරක අඛණ්ඩ අධ්‍යාපනය ලබා දීමේ වැඩසටහන ද අධ්‍යාපන අමාත්‍ය අකිල විරාජ් කාරියවසම් මහතාගේ මෙහෙයවීමෙන් ක්‍රියාත්මක වන්නකි.

සාමාන්‍ය පෙළ කඩඉම ජය ගත නො හැකි ව පාසල් අධ්‍යාපනය අතහැර යන ලක්ෂ සංඛ්‍යාත දරුවන්ගේ සුරක්ෂිත හෙට දවස වෙනුවෙන් වෘත්තීමය අධ්‍යාපනයක් පාසල් පද්ධතිය තළ දී ම ලබා දීම ද මේ වැඩසටහන යටතේ ක්‍රියාවට නැංවෙන්නකි.

නවීන තාක්ෂණ පන්ති කාමරය තුළට කැන්දාගෙන එමින් මෙරට ප්‍රථම වතාවට ඉදිරිපත් කෙරුණු සුහුරු පන්ති කාමර (Smart Classroom)  වැඩසටහනේ පුරෝගාමියා ද අධ්‍යාපන අමාත්‍ය අකිල විරාජ් කාරියවසම් මහතායි.

ලක්ෂ 45ක් වන සියලු පාසල් දරුවන් වෙත  රක්ෂණාවරණයක් ලබා දෙමින් ඔවුන්ගේ ජීවිත නීරෝගීමත් කර වීමට අවශ්‍ය ඉඩකඩ ලබා දීමට ද මවුපියන් වෙත පැවරී තිබූ වගකීමෙන් කොටසක් රජය වෙත ලබා ගැනීමට ද ඒ මහතා නායකත්වය ලබා දුන්හ.

දේශපාලන බලපෑම්වලින් ඔද්දල් ව, වල් වැදී තිබූ අධ්‍යාපන පද්ධතිය ඉන් මුදාගෙන නිසිකලට තරඟ විභාග පවත්වා දේශපාලන භේදයකින් තොර ව, සුදුස්සන් සුදුසු තැන්හි පිහිටුවා, ඔවුන්ගේ සක්‍රිය දායකත්වය මෙරට අධ්‍යාපන පද්ධතිය වෙත ලබා ගැනීමට අවශ්‍ය මඟ පෙන්වීම ලබා දීමට ද මේ ජනතාවාදී අමාත්‍යවරයා කටයුතු කර තිබේ. දස වසරකින් නො පැවැත්වූ විදුහල්පතිවරුන් බඳවා ගැනීමේ තරඟ විභාග පවත්වා, 21,000ක් අතුරින් විශිෂ්ටතමයින් 3,901 දෙනෙකු විදුහල්පති (iii) වන ශ්‍රේණියට එක් කර ගැනීමට කටයුතු කළ ඒ මහතා, ඔවුන්ගේ සේවය විදුහල්පතිවරුන් ලෙසින් ම පද්ධතියට ලබා ගැනීම සඳහා අවශ්‍ය සියලු කටයුතු ඉටු කිරීමට පියවර ගත්තේය.

වසර ගණනාවකින් පුරවා නො තිබූ පුරප්පාඩු පැවති අධ්‍යාපන පරිපාලන සේවයේ පත්වීම් 852ක් සඳහා සීමිත හා විවෘත තරඟ විභාග පවත්වා අතිදක්ෂයින් බඳවා ගැනීමට ද ඒ මහතා කටයුතු කළේය.

ඉන් නො නැවතී, ඔවුන් තුළ නායකත්ව, කළමනාකරණය ඇතුළු ගුණාංග සංවර්ධනය කරලීම සඳහා දෙස්විදෙස් පුහුණු අවස්ථා ලබා දීමට ද පියවර ගන්නේ මානව සම්පත සංවර්ධනය, අධ්‍යාපනයේ ගුණාත්මක සංවර්ධනය සඳහා ලබා දෙන මාහැඟි සහායය පිළිබඳ දුරදක්නා නුවණින් යුක්තවය.

අදූරදර්ශී දේශපාලන අතපෙවීම් හේතුවෙන් පාසල් පද්ධතිය තුළ පවතින ගුරුවරුන් බෙදී යාමේ විෂමතාවන් සඳහා ස්ථිරසාර විසඳුමක් ලබා දීමේ අරමුණින් ජාතික මට්ටමින් ගුරු තුලනයක් ඇති කිරීම සඳහා පුරෝගාමී මෙහෙවර ඉටු කරන්නේ ද අධ්‍යාපන අමාත්‍ය අකිල විරාජ් කාරියවසම් මහතායි.

පාසල් දරුවන් තුළ ශීඝ්‍රයෙන් හිස ඔසවන බෝ නො වන රෝග වළක්වා ගනිමින්, පාසල් ප්‍රජාව නීරෝගී, ජව සම්පන්න තරුණ ප්‍රජාවක් ලෙස සමාජගත කිරීමටත්, ලොව දිනන ක්‍රීඩකයින් බිහි කිරීමටත් අවශ්‍ය මාවත විවර කරමින් පාසල් ක්‍රීඩාව නංවාලීම සඳහා පස් අවුරුදු සැලැස්මක් හඳුන්වා දීම සඳහා ද ඒ මහතා මුල පුරන්නේ පාසල් ක්‍රීඩා ක්ෂේත්‍රය තුළ අද්විතීය වෙනස්කම් රැසක් සිදු කරමිනි.

වැරදි ආහාර පුරුදු සහ කෘත්‍රිම ආහාර, පැණිබීම වර්ග භාවිතය තුළින් දරුවන්ට මුහුණ දීමට සිදු වන පෝෂණ විෂමතා ආශ්‍රිත රෝගාබාධයන්ගෙන් ඔවුන් මුදා ගැනීම සඳහා පාසල් ආපන ශාලා නියාමනය කිරීමේ ක්‍රමවේදයට අධ්‍යාපන අමාත්‍යංශය මුල පුරන්නේ ද ඒ මහතාගේ උපදෙස් මතයි.

දූෂණ අක්‍රමිකතා, වංචා, ගසාකෑම් මෙන් ම අකාර්යක්ෂමතාව, ප්‍රමාදය සහ නිළධාරීවාදයට තිත තබමින් වේගයෙන් සංවර්ධනය වන අවශ්‍යතාව අනුව වෙනස් වන සමාජ සාධාරණය, සංස්කෘතිය අගයන යහපත් පුරවැසියන් පිරිසක් රට වෙනුවෙන් නිර්මාණය කළ හැකි අධ්‍යාපන පද්ධතියක් බිහි කිරීමට මේ තරුණ අධ්‍යාපන අමාත්‍යවරයා මේ වන විටත් සවිමත් අත්තිවාරමක් ඉදිකොට අවසන්ය.

ගතානුගතික, සමාජයට නොගැලපෙන, යල් පිනූ චක්‍රලේඛ වෙනස් කරමින් කාලෝචිත ව නව චක්‍රලේඛ නිකුත් කිරීම සඳහා උපදෙස් ලබා දෙමින් ඒ මහතා මෙරට අධ්‍යාපන පද්ධතියට ලබා දෙන දායකත්වය සමස්ථ ජනතාවගේ ප්‍රණාමයට පත් ව තිබේ.

අධ්‍යාපන අමාත්‍යාංශයට අමතර ව අමාත්‍යවරයා වෙත පැවරී ඇති පුරාවිද්‍යා දෙපාර්තමේන්තුව, මධ්‍යම සංස්කෘතික අරමුදල, ජාතික ලේඛනාරක්ෂක දෙපාර්තමේන්තුව, පුස්තකාල හා ප්‍රලේඛන සේවා මණ්ඩලය, ටවර් හෝල් රඟහල පදනම, අපේගම ඇතුළු ආයතන රැසකට ද නායකත්වය ලබා දෙමින් ඒවා වඩාත් සක්‍රීය ආයතන බවට පත් කිරීමටත්, ඒවායේ උපරිම ප්‍රතිඵල අත් කර ගැනීමටත් අවශ්‍ය මඟපෙන්වීම ලබා දී තිබේ.

ටවර් හෝල් කලාකරුවන් වෙනුවෙන් විශ්‍රාම වැටුප් ක්‍රමයක් හඳුන්වා දීමට පුරෝගාමී වූ අකිල විරාජ් කාරියවසම් මහතා රෝගී වූ සහ විශේෂ අවශ්‍යතාවන් සහිත කලාකරුවන් වෙනුවෙන් අතහිත ලබාදීම සඳහා ද විශේෂ වැඩසටහන් අරඹා තිබේ.

පුස්තකාල හා ප්‍රලේඛන සේවා මණ්ඩලය නව තාක්ෂණික ක්‍රමවේදයන්ගෙන් සවිබල ගැන්වීම සඳහාත්, ඩිජිටල් තාක්ෂණය ඒ සඳහා හඳුන්වාදීමටත් පුරෝගාමී මෙහෙවරක් මේ වනවිටත් ඉටු කර අවසන්ය.

රටේ ඓතිහාසික උරුමය රැකගැනීමේ භාරදූර වගකීම සිය ප්‍රමුඛ කාර්ය කරන අමාත්‍ය අකිල විරාජ් කාරියවසම් මහතා ජාතියේ ජීවනාලිය බඳු ජාතික ලේඛනාරක්ෂක දෙපාර්තමේන්තුව සහ පුරා විද්‍යා දෙපාර්තමේන්තුව සංවර්ධනය කිරීම සඳහා නූතනත්වයට ගැළපෙන අයුරින් නවීකරණය කිරීම සඳහාත් පියවර රැසක් ගැනීම සඳහා නායකත්වය ලබා දී තිබේ.

ලෝක උරුමයක් වන සීගිරියේ බිතුසිතුවම් සංරක්ෂණ කිරීම සඳහා විදේශීය විශේෂඥ සහයය ලබා ගැනීමේ කටයුත්තේ දී ද පුරෝගාමී වන්නේ ද අමාත්‍ය අකිල විරාජ් කාරියවසම් මහතාය. පුරාවිද්‍යා කැණීම්, නව සොයාගැනීම් පිළිබඳ නිරන්තර කරුණු සොයා බලමින් ඒවාට අවශ්‍ය පහසුකම් ලබා දීමේ කටයුත්ත ද ඒ මහතා නොපිරිහෙළා ඉටු කරයි.

සංචාරක ක්ෂේත්‍රයේ සංවර්ධනය සඳහා ද සිය අමාත්‍යාංශය හරහා ඍජු දායකත්වයක් ලබා දෙන අධ්‍යාපන අමාත්‍යවරයා, මධ්‍යම සංස්කෘතික අරමුදල යටතේ ඇති පුරාවිද්‍යා ස්ථාන සියල්ලෙහි පහසුකම් සංවර්ධනය කරමින් සංචාරක ආකර්ෂණය දිනා ගත හැකි ලෙස ඒවා නවීකරණය කිරීම සඳහා ද කටයුතු සකස් කර තිබේ.

මීට අමතරව සංචාරක ආකර්ෂණය දිනාගත හැකි අයුරින් අපගේ පාරම්පරික උරුමය සංරක්ෂණය කිරීමටත් ඒවා මතු පරපුරට උරුමකරදීම සඳහාත් රජය විසින් ගෙන යන වැඩසටහන සඳහා සක්‍රීයව දායකත්වය ලබාදෙන්නේ ද අධ්‍යාපන අමාත්‍ය අකිල විරාජ් කාරියවසම් මහතාය.

එක්සත් ජාතික පක්ෂයේ මහ ලේකම් තනතුරට පත්වන ලාබාලතම පුද්ගලයා වන්නේ අකිල විරාජ් කාරියවසම් අමාත්‍යවරයායි.


 

 

Rate this item
(0 votes)