July 22, 2018

බැඳුම්කර නඩුව කඩිනම් කර කෙටි කාලයකින් දඬුවම් දීමට අලුතින් නීති - පක්ෂ රැසක් ජනපතිගෙන් ඉල්ලයි

බැඳුම්කර කොමිසමෙන් චෝදනා ලැබූවන්ට දැනට පවතින නීතිය යටතේ දඬුවම් ලබාදීමට වසර 10 කට අධික කාලයක් ගතවන නිසා, කෙටි කාලයකින් දඬුවම් ලබා දීමට හැකිවන පරිදි අලුතෙන් නීති සකස් කරන ලෙස දේශපාලන පක්ෂ ගණනාවකින් ජනාධිපති මෛ​ත්‍රීපාල සිරිසේන මහතාට යෝජනා ඉදිරිපත් කර ඇතැයි වාර්තා වේ.

දේශපාලන ආරංචි මාර්ග සඳහන් කළේ මේ සඳහා බැඳුම්කර වංචාවෙන් සිදුවන පාඩුව අයකර ගැනීමට විශේෂ විධි විධාන පනත් කෙටුම්පතක් පාර්ලිමේන්තුවට ඉදිරිපත් කිරීමට අවශ්‍ය උපදෙස් නිකුත් කරන ලෙස එම පක්ෂ ඉල්ලා ඇති බවයි.

සාමාන්‍ය නීතිය යටතේ නඩු පැවරීමේදී දිසා අධිකරණය, අභියාචනාධිකරණය ශ්‍රේෂ්ඨාධිකරණය වෙත අභියාචනා ඉදිරිපත් කිරීමේදී අවශ්‍ය තීන්දු ගැනීමට වසර 10 කට වඩා වැඩි කාලයක් ගතවන බැවින් මෙවැනි විශේෂ පනත් කෙටුම්පතකින් කෙටි කාලයක් තුළ තීන්දු ලබා දීමට හැකිවන පරිදි අලුතෙන් නීති සකස් කළ යුතුව ඇතැයි පිවිතුරු හෙළ උරුමය පක්ෂයේ නායක, පාර්ලිමේන්තු මන්ත්‍රී උදය ගම්මන්පිල මහතා පැවසී ය. 

මන්ත්‍රීවරයා පැවසූවේ වර්ෂ 1971 ජනතා විමුක්ති පෙරමුණේ කැරැලිකරුවන්ට දඬුවම් ලබාදීම සඳහා අපරාධ යුක්ති විනිශ්චය කොමිෂන් සභාව පත් කිරීම සඳහා ඉදිරිපත් කරන ලද පනත් කෙටුම්පත මේ සඳහා පූර්වාදර්ශයක් ලෙස සැළකිය හැකි බවයි.  

දූෂිතයන්ට දඬුවම් ලබා දීමට රජයට අවංක අවශ්‍යතාවක් තිබේ නම් ඒ සඳහා කඩිනම් පියවර ගැනීම සඳහා නීති සකස් කරන ලෙස ජනාධිපතිවරයාගෙන් ඉල්ලා සිටින බව ජනතා විමුක්ති පෙරමුණ පාර්ලිමේන්තු මන්ත්‍රී සුනිල් හඳුන්නෙත්ති මහතා පැවසී ය.

එජනිස ගාලු දිස්ත්‍රික් මන්ත්‍රී, අමාත්‍ය චන්දිම වීරක්කොඩි මහතා ප්‍රකාශ කළේ බිලියන 11 ක පාඩුව අයකර ගැනීමට පවතින ක්‍රමවේද යටතේ දීර්ඝ කාලයක් ගනු ලබන්නේ නම් ඒ සඳහා විකල්ප ක්‍රමවේදයන් අනුගමනය කළ යුතු බවට යෝජනා කරන බවයි.

විශ්වාසභංගයකට කලින් රනිල් ඉල්ලා අස් විය යුතුයි 

පාර්ලිමේන්තු මන්ත්‍රී සී.බී.රත්නායක මහතා පවසන්නේ අග්‍රමාත්‍යවරයාට විශ්වාසභංග යෝජනාවක් ගෙනඒමට පෙර ඔහු සිය ධූරයෙන් ඉල්ලා අස්විය යුතු බවයි.

අග්‍රමාත්‍යවවරයා මෙන්ම එක්සත් ජාතික පක්ෂයේ අමාත්‍යවරුන් ද සිය ධුරවලින් ඉල්ලා අස්විය යුතු බව මන්ත්‍රීවරයා පැවසී ය.
කෙසේවෙතත් සෞඛ්‍ය හා දේශීය වෛද්‍ය අමාත්‍ය රාජිත සේනාරත්න මහතා සඳහන් කළේ බැඳුම්කර සිද්ධියෙන් අග්‍රමාත්‍යවරයා සම්පූර්ණයෙන්ම නිදහස් කොට ඇති බවයි.
Rate this item
(0 votes)
Last modified on Monday, 08 January 2018 12:57