March 29, 2024
Main

Main (651)

පාර්ලිමේන්තුව අද (18) පෙරවරු 9.30 රැස්විය.

අයවැය දෙවන වර කියවීමේ විවාදය එහිදී පැවැත්වෙයි.  අද සිට ලබන 21 වනදා දක්වා අයවැය දෙවන වර කියවීමේ විවාදය පැවැත් වේ.

අයවැය දෙවන වර කියවීමේ ඡන්ද විමසීම නොවැම්බර් 21වන දින පස්වරු 05.00 ට සිදු කිරීමට නියමිත ය.

සෞඛ්‍ය ඇමති පවිත්‍රා වන්නිආරච්චි මහත්මිය පාර්ලිමේන්තුවේ විවාදයට එක්වෙමින් සඳහන් කළේ හිටපු සෞඛ්‍ය අධ්‍යක්ෂක ජෙනරාල්වෛද්‍ය අනිල් ජාසිංහ මහතාට උසස්වීමක් ලබා දුන් බවයි.

“දැන් රට වහන්න ඕනේ නැහැ - 2023 වෙනකන් කොවිඩ් එක්ක ඉන්න වෙයි“ පවිත්‍රා වන්නිආරච්චි මහත්මිය පැවසීය.

“දුරකථන, ටැබ්, ඩේටා ලබා දෙන්න දෙමව්පියන්ට වත්කමක් නැහැ“  සමඟි ජන බලවේගයේ පාර්ලිමේන්තු මන්ත්‍රී ගයන්ත කරුණාතිලක මහතා පාර්ලිමේන්තුවේදී පෙන්වා දුන්නේය.

මේ වන විට නිවෙස්වලට වී සිටින පාසල් දරු දැරියන්ට රූපවාහිනි හා අන්තර්ජාලය හරහා අධ්‍යාපනය ලබා දීමේදී නිදහස් අධ්‍යාපනයෙන් සමතුලිතතාවය බිඳ වැටි තිබෙන බව ගයන්ත කරුණාතිලක මන්ත්‍රීවරයා පැවසීය.

තම ආණ්ඩුව යටතේ හිස් කල මහනුවර නගර මධ්‍යයේ තිබෙන බෝගම්බර හිරගෙදර භුමිය මේ වන විට කොවිඩ් නිරෝධායන මධ්‍යස්ථානයක් ලෙස පවත්වා ගෙන යාම මහනුවර පිපිරීමට සුදානම් කර තිබෙන කාල බෝම්බයක් බව විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා අයවැය දෙවන වර කියවීමේ විවාදයට එක්වෙමින් පැවසීය.

“අපි ඉන්නේ අයි.සී.යූ එකේ නෙවෙයි කියලා අජිත් නිවාඩ් කබ්රාල් කියනවා.. ඒක බොරුවක්“ - සමගි ජනබලවේගයේ පාර්ලිමේන්තු මන්ත්‍රී හර්ෂද සිල්වා මහතා සඳහන් කළේය.

“ජනතාවට එකම විකල්පයයි. ඒ සමගි ජනබලවේග ආණ්ඩුවක් යටතේ ජනතාවට සෙත සැලසීමය“ සමගි ජනබලවේගයේ පාර්ලිමේන්තු මන්ත්‍රී හර්ෂද සිල්වා මහතා පැවසීය.

“මම සතුටු වෙනවා හර්ෂද සිල්වා මන්ත්‍රීතුමාගේ කතාවෙන් පසු මට කතා කරන්න ලැබීම ගැන. එතුමාගේ කතාවේදී එතුමා එතුමාටම බැන ගත්තා“ අමාත්‍ය බන්දුල ගුණවර්ධන මහතා විවාදයට එක්වෙමින් පැවසීය.

"අපි ඔක්කොම අතේ තියෙන මුදල කියද දන්නවද? - රුපියල් මිලියන 677000" අමාත්‍ය බන්දුල ගුණවර්ධන මහතා පැවසීය.

"කොවිඩ් 19ට බෙහෙත් දෙයක් හොයාගෙන තියෙනවා - දැන්ම එය ඇනවුම් කළ යුතුයි" පාර්ලිමේන්තු මන්ත්‍රී අනුර ප්‍රියදර්ශන යාපා මහතා පැවසීය.

"අද රට ගමන් කරන්නේ සෞභාග්‍යයේ වැඩ බිමට නොව අභාග්‍යයේ මුඩු බිමටයි" පාර්ලිමේන්තු මන්ත්‍රී පාඨලී චම්පික රණවක මහතා පැවසීය.

දිවා භෝජනය සඳහා පාර්ලිමේන්තුව සුළු මොහොතකට කල් තැබිණි.

දිවා භෝජන විවේකයෙන් පසු පාර්ලිමේන්තුව යළි රැස්වෙයි

“හර්ෂ ද සිල්වා මන්ත්‍රීතුමා ඉතා වටිනා අදහස් කිහිපයක් ඉදිරිපත් කළා. එතුමා පළකල අදහස් ක්‍රියාවට නංවන්න බැරිවුණේ ඇයි. චම්පික රණවක මන්ත්‍රීතුමාත් දක්ෂ කථිකයෙක් අලුත් අදහස් තියෙන කෙනෙක්. චම්පික මන්ත්‍රීතුමාගේ කතාව තුළ දැක්කේ වසර හතරහමාරක් තුළ එතුමා අසමත් වුණේ ඇයි? “ යනුවෙන් විවාදයට එක්වෙමින් පාර්ලිමේන්තු මන්ත්‍රී මහාචාර්ය රංජිත් බණ්ඩාර මහතා පැවසීය.

“කියන දේ ලියන දේ වෙන දේ අතර කොච්චර වෙනසක් තියෙනවාද. සංඛ්‍යා ලේඛන විජ්ජාවෙන් නොව ව්‍යුහාත්මක වෙනසක් අවශ්‍යයි. කොවිඩ් තුලින් පෙන්න තියෙන දේ තමා ධනවාද ක්‍රමයේ අර්බුදය ගැන.“ පාර්ලිමේන්තු මන්ත්‍රීනි හරිනි අමරසූරිය මහත්මිය පැවසුවාය.

“තමන් ඇමැති කලේ ආරම්භ කල යුනිවර්සිටි කොලේජ් ආයතන විශ්වවිද්‍යාල නගර සංකල්පය යටතේ ස්ථාපිත කල හැකියි. අධ්‍යාපනයට මීට වඩා අවධානය යොමු කල යුතුයි.“ පාර්ලිමේන්තු මන්ත්‍රී මහින්ද සමරසිංහ මහතා පැවසීය.

“තමන්ගේ හිත මිතුරන්ට බදු සහන දෙන්න. කළු සල්ලි සුදු කරන්න බදු සහන දෙන්න යෝජනා තියෙනවා. 2024වන විට ගෝඨාභය ජනාධිපතිතුමාගේ කාලයේ අවසන් වන විට එක් පුද්ගල ණය ප්‍රමාණය ලක්ෂ 10ක් විය හැකියි. මෙතන ඉන්න හුඟක් අය ඇප පිට ඉන්න ඕන අය. අපේ කාලේ හරි හැටි තීන්දු තීරණ ගත්තේ නැතිකම අපි වගකීම බාර ගන්නවා.“ සමගි ජන බලවේගයේ පාර්ලිමේන්තු මන්ත්‍රී අශෝක් අබේසිංහ මහතා පැවසීය. 

"විපක්ෂයේ අයගේ ඔය කට රනිල් වික්‍රමසිංහ ඉස්සරහා තිබ්බා නම් අදත් ආණ්ඩුවක ඉන්නවා" - පාර්ලිමේන්තු මන්ත්‍රී මොහොමඩ් මුසම්මිල් මහතා පැවසිය.

"ජනාධිපතිවරයා පාස්,සින්නදොරෙයි  සජිත් ප්‍රේමදාස ෆේල්" පොදුජන පෙරමුණු පාර්ලිමේන්තු මන්ත්‍රී ඩිලාන් පෙරේරා මහතා පැවසිය.

"මේ අයවැය එහෙන් මෙහෙන් කෑලි දාලා අටවපු එකක්" සමඟි ජනබලවේග පාර්ලිමේන්තු මන්ත්‍රී වේලුකුමාර් මහතා පැවසිය.

“පසුගිය දූෂිත ආණ්ඩුව විසින් විනාශ කරලා කුඩු පට්ටම් කරලා දාපු ආර්ථිකයක් මැද තමා අපි අයවැය ලේඛනයක් ඉදිරිපත් කළේ. රටේ ලෙඩේ තියෙනවා රට සාමාන්‍ය පරිදි වැඩ කරනවා. රට වහන්න ඕන තැන වහනවා. අරින්න ඕන තැන අරිනවා.“ පාර්ලිමේන්තු මන්ත්‍රී සංජීව එදිරිමාන්න මහතා පැවසීය.

“ආණ්ඩුව අසමත් කියන එක සමාජගත කළා. ගෝඨා ෆේල් කියලා. ගෝඨා ෆේල් නෑ ගෝඨා පාස් කියලා ජනතාව ඔප්පු කරලා තියෙනවා. හවුස් මෙට්ලා 10 දෙනෙක් යවනවා වෙනුවට නාවිකයන් එක්කෙනෙකු යවලාඅපිට පුළුවන් අපේ රටේ අවශ්‍යතාවය ඉටු කරන්න“ අමාත්‍ය රෝහිත අබේගුණවර්ධන මහතා සඳහන් කළේය.

විවාදයට එක්වෙමින් සමගි ජන බලවේගයේ පාර්ලිමේන්තු මන්ත්‍රී හේෂා විතානගේ මහතා පැවසූවේ“ ජනතාවගේ බදු මුදල් මංකොල්ලා කාපු හොරු අල්ලනවා කියලා තමා ආවේ. දැන් අවුරුද්දක් ගතවෙලා තියෙනවා. මේ රටේ ජනතාව රවටලා අපිට දීපු බලය තුල අපිට ඕන එකක් කරනවා කියන පණිවිඩය ජනතාවට දීපු අයවැයක්“

“බොහෝ ඉදිරිපත් කිරීම් ඇතුලේ තිබුණේ හුදු ආවේග සහ හුදු තමන්ගේ දේශපාලන ව්‍යාපෘතිවලට සමාජය විසින් තමන්ව බැහැර කරපු එකට විරුද්ධව කරපු ප්‍රකාශ තමයි“ යැයි මහාචාර්ය චරිත හේරත් මහතා සඳහන් කළේය.

“මේ අයවැය ලේඛනය දිහා බලන්න අයත් නෑ වැයත් නෑ ණය පමණයි. අය කරගන්න විදිහක් නෑ. ගජ මිතුරන් ආරක්ෂා කරගනිමින් ජාවාරම්කාරයන්ට මුල්තැන දීලා තියෙනවා.“ පාර්ලිමේන්තු මන්ත්‍රී චමින්ද විජේසිරි මහතා පැවසීය.

"සියලු ශක්ති විභවයන්ට නව උත්තේජනයක් දෙන්න තමයි මේ අයවැය හැදුවේ" පොදුජන පෙරමුණු පාර්ලිමේන්තු මන්ත්‍රී වසන්ත යාපා බණ්ඩාර මහතා පැවසිය.

"අයවැය ඉදිරි වසර තුල සමාජය හා ජනතාව අතර කර ගන්නා වූ සම්මුතියේ ප්‍රකාශනයක්."  පොදුජන පෙරමුණු පාර්ලිමේන්තු මන්ත්‍රී සුරේන් රාඝවන් මහතා පැවසිය.

ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ගුණතිලක රාජපක්ෂ මහතා පාර්ලිමේන්තුව අමතමින් සඳහන් කළේ අතිගරු ජනාධිපතිතුමාගෙන් ඉල්ලා සිටිනවා දුමින්ද සිල්වාගේ නඩු තීන්දුවෙන් කොළඹ දිස්ත්‍රික් පාර්ලිමේන්තු මන්ත්‍රී දුමින්ද සිල්වා මැතිතුමාට මහත් අසාධාරණයක් වෙලා තියෙනවා. එනිසා අතිගරු ජනාධිපතිතුමාගෙන් ඉල්ලා සිටිනවා මේ ගැන ඔබතුමා සිතා බලලා හැකි ඉක්මනින් අසරණ වෙලා ඉන්න දුමින්ද සිල්වා හිටපු මන්ත්‍රීතුමාට ජනාධිපති සමාව දෙන්න. අවුරුද්දක් පිරෙන මේ මොහොතේ අපි ඉල්ලා සිටිනවා“ යනුවෙනි.

පාර්ලිමේන්තුව හෙට දින (19) 9.30 දක්වා කල් තැබීමට යෝජනා කෙරිණි.

වැඩිදුර තොරතුරු බලන්න පහත සැබැදියට පිවිසෙන්න

මෙතන ක්ලික් කරන්න

20 වැනි ආණ්ඩුකම ව්‍යවස්ථා සංශෝධනයට පක්ෂව ආණ්ඩුවක් සමග ඡන්දය දුන් සමගි ජන බලවේගය මන්ත්‍රීවරුන් 9 දෙනා අතුරින් මුස්ලිම් මන්ත්‍රීවරුන් 7දෙනා හැර අන් දෙදෙනාට ආණ්ඩු පක්ෂයේ අසුන් පැනවීමට තීරණය කොට තිබේ.

ආණ්ඩු පක්ෂයේ ‍ප්‍රධාන සංවිධායක ජොන්ස්ටන් ප්‍රනාන්දු මහතා කථානායකවරයාගෙන් කළ ඉල්ලීමකට අනුව එම පියවර ගත් බව පාර්ලිමේන්තුවේ වේත්‍රධාරි පවසයි.

ඒ අනුව සමඟි ජන බලවේගය ජාතික ලැයිස්තු පාර්ලිමේන්තු මන්ත්‍රීවරියක වන ඩයනා ගමගේ මහත්මියට හා එම පක්ෂයෙන් බදුල්ල දිස්ත්‍රික්කයෙන් ජයග්‍රහණය කළ අරවින්ද් කුමාර් මහතාට ආණ්ඩු පක්ෂයේ අසුන් පැනවෙයි.

මින් අරවින්ද කුමාර් මහතා නියෝජනය කරන්නේ මනෝ ගනේෂන් මහතා නායකත්වය දරන දෙමල ප්‍රගතිශීලී පෙරමුණ වන අතර ඔහුව එම පෙරමුණෙන් ඉවත් කිරීමට මේ වන විට පියවර ගෙන තිබේ. ඩයනා ගමගේ මහත්මියද සමගි ජන බලවේගයේ ඉවත්කළ බව මිට ටික දිනකට පෙර එම පක්ෂය ප්‍රකාශ කරන ලදී.

එහෙත් 20 වැනි ආණ්ඩුක්‍රම ව්‍යවස්ථා සංශෝධනයට එරෙහිව ඡන්දය දීමට සමගි ජනබලවේගය ගත් තීරණයට එරෙහිව යමින් ආණ්ඩුවක් සමග ඡන්දය දුන් ඉෂාක් රහුමාන්, ෆයිසාල් කාසිම්, එච්.එම්.එම් හාරිස්, එම්.එස් තවුෆික්, නසිර් අහමඩ්, ඒ.ඒ.එස්.එම් රහීම්, එම්.එම්.එම්.මුෂාරෆ් යන මන්ත්‍රීවරුන් 7 දෙනාට ආණ්ඩු පක්ෂයේ අසුන් පැනවීම සම්බන්ධයෙන් ආණ්ඩුව මෙතෙක් ප්‍රතිචාර දක්වා නොමැත.

ඔවුන් හත්දෙනා අයත් වන්නේ රවුෆ් හකීම් මහතා නායකත්වය දරන ශ්‍රී ලංකා මුස්ලිම් කොංග්‍රසයට හා රිෂාඩ් බදියුදීන් මහතා නායකත්වය දරන සමස්ත ලංකා මුස්ලිම් කොංග්‍රසයට ය.

එම හත්දෙනාව ද සිය පක්ෂ වලින් නෙරපන ලෙස රවුෆ් හකීම් සහ රිෂාඩ් බදියුදීන් යන මහත්වරුන්ට සමගි ජන බලවේගයෙන් දිගින් දිගටම බලපෑම් එල්ල වුවද තාමත් ඒ සම්බන්ධයෙන් එම පක්ෂ පියවරක් ගෙන නොමැත.

20 වැනි ආණ්ඩුක්‍රම ව්‍යවස්ථා සංශෝධනයට පක්ෂව ආණ්ඩුවත් සමග ඡන්දය දුන් මෙම මන්ත්‍රීවරුන් පිරිස සමඟි ජන බලවේග මන්ත්‍රී කණ්ඩායමෙන් ඉවත් කර ඇති බැවින් ඔවුන්ට පාර්ලිමේන්තුවේ වෙනම ආසන පනවන ලෙස විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා කථානායකවරයාගෙන් මීට සති තුනකට පමණ පෙර ලිඛිතව ඉල්ලීමක් කරන ලදී.

ඒ සම්බන්ධයෙන් කිරිඇල්ල මහතා පාර්ලිමේන්තුවේදී කථානායකවරයාගෙන් කිහිප වතාවක්ම විමසූ අතර ඊට ප්‍රතිචාර ලෙස කතානායකවරයා "හා බලන්නං" යන්න පමණක් ප්‍රකාශ කර තිබුණි. මේ නිසා මේ කාරණය ගැන අද (17) අයවැය පාර්ලිමේන්තුවට ඉදිරිපත් කරන අවස්ථාවේදී යළිත් විමසීමට තමා සූදානමින් සිටින බව කිරිඇල්ල මහතා වෙත ඊයේ (16) ඒෂියන් මිරර් වෙත සඳහන් කරන ලදී.

20 වැනි ආණ්ඩුක්‍රම ව්‍යවස්ථා සංශෝධනය සම්මත කර ගැනීම සඳහා මෙම මුස්ලිම් මන්ත්‍රීවරුන් හත් දෙනාගේ සහයෝගය ලබා ගැනීම පිළිබඳව ආණ්ඩුවට ජනතාවගේ යම් අප්‍රසාදයක් ද එල්ල වී තිබුණි.

හිටපු අමාත්‍ය බැසිල් රාජපක්‍ෂ කඩිමුඩියේ පාර්ලිමේන්තුවට නොපැමිණෙන බව අමාත්‍ය සී බී රත්නායක මහතා පවසයි.

ශී‍්‍ර ලංකා පොදුජන පෙරමුණේ ජාතික සංවිධායක, හිටපු අමාත්‍ය බැසිල් රාජපක්ෂ මහතාට, පාර්ලිමේන්තුවට ප‍්‍රවේශ වන ලෙස ඉල්ලා ආණ්ඩු පක්ෂයේ මන්ත‍්‍රීවරුන් 19 දෙනෙකු ලිපියකට අත්සන් තබා තිබිණි.

රටේ ආර්ථික සංවර්ධනය උදෙසාත්, ශී‍්‍ර ලංකා පොදුජන පෙරමුණේ සක‍්‍රීය දායකත්වය රටට ලබාදීම සදහාත්, හිටපු අමාත්‍ය බැසිල් රාජපක්ෂ මහතා පාර්ලිමේන්තුවට ප‍්‍රවේශ වීම අත්‍යවශ්‍ය යැයි තමන් විශ්වාස කරන බව අදාළ මන්ත‍්‍රීවරුන් පිරිස යොමු කළ ලිපියේ දක්වා තිබිණි.

මේ අතර ස්වයං රැකියා නියුක්තිකයන්ගේ සම්මේලනය සඳහන් කරන්නේ හිටපු අමාත්‍ය බැසිල් රාජපක්ෂ මහතාට පාර්ලිමේන්තුවට පිවිසි ආර්ථික සංවර්ධන ඇමැති කම බාර ගන්නැයි ආරාධනා කරන බවයි.

එහි සභාපති මහින්ද කහඳගම මහතා පවසන්නේ ඒ සඳහා තම සම්මේලනය පූර්ණ එකඟත්වය පළ කරන බවයි.

තම සමාජ ජාල ගිණුමේ සටහනක් තබමින් ඔහු ඒ බව සඳහන් කර තිබේ.

මැතිවරණ කොමිසමේ සභාපති ධුරයෙන් විශ්‍රාමගත් මහින්ද දේශප්‍රිය මහතා මැතිවරණ සීමා නිර්ණය කොමිෂන් සභාවේ සභාපති ධුරයට පත්කෙරෙනු ඇතැයි දේශපාලන අංශ ආරංචි මාර්ග පවසයි.

මේ හැර ස්වාධීන කොමිෂන් සභා ගණනාවක සභාපති ධුර සඳහා සුදුස්සන් ගණනාවක් රජය විසින් තෝරාගෙන තිබේ.

අල්ලස් හෝ දූෂණ කොමිෂන් සභාවේ සභාපති ධුරයට හිටපු ශ්‍රේෂ්ඨාධිකරණ විනිසුරු ඊවා වනසුන්දර මහත්මියද, රාජ්‍ය සේවා කොමිෂන් සභාවේ සභාපති ධුරයට හිටපු ශ්‍රේෂ්ඨාධිකරණ විනිසුරු ඩී.ජේ. ද එස්. බාලපටබැඳි, රාජ්‍ය මුදල් කොමිසමේ සභාපති ධුරයට හිටපු කැබිනට් ලේකම් සුමිත් අබේසිංහ, මැතිවරණ කොමිෂන් සභාවේ සභාපති ධුරයට නීතිඥ නිමල් පුංචිහේවා, මානව හිමිකම් කොමිසමේ සභාපති ධුරයට හිටපු ආණ්ඩුකාරවරයකු වන ආචාර්ය ජගත් බාලසූරිය යන මහත්වරුන් පත්කෙරෙන බව රජයේ අභ්‍යන්තර ආරංචි මාර්ග සඳහන් කරයි. 

මෙම පත්වීම් අද හෙටම සිදුකෙරෙනු ඇතැයි දැනගන්නට තිබේ.

විශේෂඥ කමිටුවේ අවසන් වාර්තාව අනූව භූමිදානය පිළිබදව තීන්දුව ගනු ලබන බව සෞඛ්‍ය අමාත්‍ය පවිත්‍රා වන්නිආරච්චි මහත්මිය අවධාරණය කරයි.

සෞඛ්‍ය අමාත්‍ය පවිත්‍රා වන්නිආරච්චි මහත්මිය ඊයේ (13) විශේෂ ප්‍රකාශයක් සිදු කරමින් මෙම අදහස් දක්වන ලදි.

''කොවිඩ් - 19 වැළදී මියගිය පුද්ගලයින්ගේ මෘත දේහයන් භූමිදානය සම්බන්ධයෙන් විවිධ අයගෙන් ඉල්ලීම් ලැබී තිබෙනවා. නමුත් මේ සම්බන්ධයෙන් පත් කරන ලද විශේෂඥ කමිටුව ඔවුන්ගේ තව වාර්තා කිහිපයක් මා වෙත ලබාදීමට නියමිතව තිබෙනවා.

කෙසේ වෙතත් පසුගිය කැබිනට් මණ්ඩලයේ දී මෙම කාරණය සම්බන්ධයෙන් කැබිනට් මණ්ඩලය කිසිදු තීන්දුවක් ගනු ලැබුවේ නැහැ. කැබිනට් මණ්ඩලයට මෙම කාරණය මතු වූ අවස්ථාවේ දී කැබිනට් මණ්ඩලය මා වෙත දැනුම් දුන්නේ මේ සම්බන්ධයෙන් පත් කරන ලද විශේෂඥ කමිටුවේ වාර්තා අනුව කටයුතු කරන ලෙසයි. එම නිසා එම වාර්තා මා වෙත ලැබුණු පසු අවසන් තීන්දුව ගැනීමට බලාපොරොත්තු වෙනවා'' යැයිද අමාත්‍යවරිය සඳහන් කළාය.

කොළඹ නගර සීමා බල ප්‍රදේශය තුළ යම්කිසි රෝග ආසාදනය පාලනයකින් තොරව පොකුරු මතුවීමේ ප්‍රවණතාවයක් ඇති බව සෞඛ්‍ය අමාත්‍යංශයේ මාධ්‍ය ප්‍රකාශක, වෛද්‍ය ජයරුවන් බණ්ඩාර මහතා පවසයි.

මෙරට තුළ සමස්ත කොවිඩ් ආසාදිතයින් ගණන 15,000ක් ලෙස සිතාගෙන සිටිය ද, නිසියාකාරව පරීක්ෂණ සිදුකර සොයා බැලීමට පටන් ගතහොත් එම සංඛ්‍යාවට වඩා වැඩි ආසාදිතයින් ගණනක් හමුවිය හැකි බව වෛද්‍ය ජයරුවන් බණ්ඩාර මහතා සදහන් කරයි.

එමෙන්ම ලොව මෙතෙක් කල් කිසිදු ව්‍යසනයකින් වසරක් වැනි කෙටි කාලයක් තුළ මිනිසුන් මෙවැනි ප්‍රමාණයක් මියගිහින් නොමැති බවද වෛද්‍යවරයා වැඩිදුරටත් පවසයි.

හුදෙකලා කොට ඇති ප්‍රදේශවල ජනතාව සම්බන්ධයෙන් නිරීක්ෂණය කිරිම සඳහා අද සවස සිට ගුවන් හමුදාවේ සහය ඇතිව ඩ්‍රෝන යානා උපයෝගී කර ගනිමින් විශේෂ මෙහෙයුමක් දියත් කරන බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා ප්‍රකාශ කර සිටියි.

හුදෙකලා කොට ඇති ප්‍රදේශ යළි මුදවා හැරීම සිදුකරන තෙක් එම නිරීක්ෂණ කටයුතු සිදුකරන බව නියෝජ්‍ය පොලිස්පතිවරයා සඳහන් කළේය.

හුදෙකලා කොට ඇති ප්‍රදේශවල ජනතාව තමන්ගේ නිවෙස් තුළ රැඳී නොසිට විවිධ සංචරණ සීමාවන් සිදු කෙරෙන බවට තොරතුරු ලැබී ඇති බවත් මේ හේතුවෙන් එම සංචරණ කටයුතු සීමා පැනවීමට පියවරක් ලෙස මෙම පියවර ගත් බව පොලිස් මාධ්‍ය ප්‍රකාශකවරයා සඳහන් කළේය.

මෙලෙස සංචරණ කටයුතු සිදුකරන පුද්ගලයින් ගැන ඩ්‍රෝන යානා මගින් ලබා ගන්නා තොරතුරු මත විශේෂ ආරක්ෂක කණ්ඩායම් කිහිපයක් යොදවා ඔවුන් අත්අඩංගුවට ගැනීමට පියවර ගන්නා බව නියෝජ්‍ය පොලිස්පති අජිත් රෝහණ මහතා ප්‍රකාශ කළේය.

මෙහිදී වැඩිදුරටත් අදහස් පළකරමින් නියෝජ්‍ය පොලිස්පතිවරයා කියා සිටියේ හුදෙකලා කළ ප්‍රදේශවල ජනතාව සංචරණ සීමාවන්ට යටත් නොවී කටයුතු කිරීම හේතුවෙන් එම ප්‍රදේශ තුලින් කොවිඩ් ආසාදිතයින් හඳුනා ගැනීම සිදුවන බවයි.

හුදෙකලා කොට ඇති ප්‍රදේශයක සිටින යම් කිසි පුද්ගලයෙකුට හදිසි රෝගී තත්ත්වයක් ඇතිවුවහොත් පහත සඳහන් දුරකථන අංකය ඔස්සේ ගිලන් රථ සහය ලබා ගැනීමට හැකියාව පවතින බවයි පොලිස් මාධ්‍ය ප්‍රකාශක නියෝජ්‍ය අජිත් රෝහණ මහතා ප්‍රකාශ කර සිටියහ.

ඒ අනුව ගිලන් රථ සහය ලබා ගැනීමට හැකි දුරකථන අංකය වන්නේ 0113- 422558.

කොවිඩ් - 19 රෝගයෙන් මියයන මුස්ලිම් ජාතිකයින්ගේ මෘතදේහ වියළි කලාපයේ විශේෂිත භූමියක භූමදානය කිරීමට අවසර දීමට සෞඛ්‍ය අංශ සලකා බලමින් සිටින බව පරිසර අමාත්‍ය මහින්ද අමරවීර මහතා පවසයි.

අමාත්‍යවරයා සඳහන් කළේ මේ පිළිබඳ සොයා බැලීමට පත්කළ විශේෂඥ කමිටුවේ තීරණයට කැබිනට් මණ්ඩලය විරුද්ධ නොවූ බවයි.

කෙසේ වෙතත් ස්වාමීන් වහන්සේ ඇතුළු පාර්ශව රැසකින් මීට දැඩි විරෝධයක් එල්ල කර තිබේ.

කොවිඩ් -19 රෝගයෙන් මියයන පුද්ගලයින්ගේ අවසන් කටයුතු සිදුකරන ආකාරය සම්බන්ධයෙන් ඊට අදාළව පත්කළ විශේෂඥ කමිටුවේ අදහස් අනුව සියලුම දේහයන් අදාහනය කරන ලෙස හිටපු සොඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා විසින් චක්‍රලේඛයක් නිකුත් කර තිබිණි.

කෙසේ වෙතත් රෝගයෙන් මියයන මුස්ලිම් ජාතිකයන්ගේ දේහයන් ආදාහනය නොකර භූමදානය කිරීමට අවස්ථාව සලසාදීම සම්බන්ධයෙන් සලකා බැලීමට විද්වත් කමිටුවක් ස්ථාපිත කරන්නැයි අධිකරණ අමාත්‍ය අලි සබ්රි මහතා පසුගියදා පාර්ලිමේන්තුවේදී සෞඛ්‍ය අමාත්‍යවරියගෙන් ඉල්ලීමක් ද සිදුකළේය.

මෙලෙස කොවිඩ් රෝගය වැළඳී මියයන පුද්ගලයින්ගේ සිරුරු භූමදානය කිරීමක් පිළිබඳව අවසන් තීරණයක් ගෙන නොමැති බව සෞඛ්‍ය අමාත්‍යාංශයේ සෞඛ්‍ය අමාත්‍යාංශයේ මාධ්‍ය ප්‍රකාශක වෛද්‍ය ජයරුවන් බණ්ඩාර මහතා පවසයි.

නමුත් ඊයේ සමාජ මාධ්‍ය ඔස්සේ සංසරණය වු සිලෝන් තව්හීද් ජමාත් සංවිධානයේ ලේකම් අබ්දුල් රාසික් නැමැත්තාගේ අත්සනින් නිකුත් කර ඇති නිවේදනයක සඳහන් වන්නේ, “නව කොරෝනා වෛරස ආසාදනයෙන් මරණයට පත්වන මුස්ලිම් මෘත දේහ භූමදානය කිරීමට වත්මන් රජය අවසර ලබා දී ඇත.“ යනුවෙනි.

සමස්ත රටේම නිරෝධායන ඇඳිරි නීතිය මේ වන විට ඉවත් ඉවත් කර තිබුණද පොලිස් බල ප්‍රදේශ කිහිපයක් හුදකලා කිරීමට (lockdown) කොව්ඩ් 19 මර්දනය කිරීමේ කාර්ය සාධන බලකාය පියවර ගෙන තිබෙන අතර ඒ සම්බන්ධයෙන් ජනතාව තුල නිවැරදි අවබෝධයක් තිබෙන බවක් පෙනෙන්නට නොමැත.

ඊට හේතුවී තිබෙන්නේ හුදකලා කර තිබෙන ප්‍රදේශවල ජනතාව තුළ මෙන්ම ඒ හරහා ගමන් ගන්නා ජනතාව තුළ ද නිරෝධායන නීතිරීති පිළිබඳ නිසි බලධරයා වන සෞඛ්‍ය සේවා අධ්‍යක්ෂ ජනරාල්වරයා විසින් පනවා ඇති විධිවිධාන සම්බන්ධයෙන් දැනුවත් වී නොමැතිකමය.

අනිල් ජාසිංහ මහතා සෞඛ්‍ය සේවා අධ්‍යක්ෂ ජනරාල් ධූරයෙන් ඉවත්ව පරිසර අමාත්‍යංශයේ ලේකම් ධුරයට පත්වීමෙන් පසු සෞඛ්‍ය අධ්‍යක්ෂ ජනරාල් ධුරය පුරප්පාඩු ව තිබුණු අතර ඒ සඳහා සුදුස්සකු පත්කරනු ලැබුවේ මීට ටික දිනකට පෙර ය.

නව සෞඛ්‍ය අධ්‍යක්ෂක සේවා ජනරාල්වරයා පත්වීමට පෙර ක්‍රියාත්මක වූ නීතිය වූයේ හුදකලා කර ප්‍රදේශ හරහා නොනවත්වාම වාහන වලට ගමන් කිරිමට අවස්ථාව ලබාදීමය.

වැඩ බලන පොලිස්පතිවරයා විසින් 2020.11.09 වන දින නිකුත් කරන ලද නිවේදනයකට අනුව එම නීතිය මේ වන විට වෙනස් වී ඇති අතර හුදකලා කරන ලද ප්‍රදේශ වල හා ඒ ප්‍රදේශ හරහා ගමන් කිරීම සම්බන්ධයෙන් අවසර දීමේ පූර්ණ බලය සෞඛ්‍ය සේවා අධ්‍යක්ෂ ජනරාල්වරයා යටතට පත්කොට තිබෙන බව ජනතාව වෙත දැනුම් දී තිබේ.

එම නිවේදනයට අනුව හුදකලා කර ඇති ප්‍රදේශ තුළ හෝ එම ප්‍රදේශ හරහා සංචරණය කිරීමට අවසර ලබා දෙනු ලබන්නේ නිරෝධායන හා රෝග වැළැක්වීමේ ආඥා පනත යටතේ නිසි බලධරයා වන සෞඛ්‍ය අධ්‍යක්ෂ ජනරාල්වරයා පමණි.

එම නිවේදනයට අනුව 2020.11.09 දින සිට හුදකලා කර ඇති ප්‍රදේශ තුළ හෝ එම ප්‍රදේශ හරහා ගමන් කිරීමට සුවිශේෂී කාරණා මත අවශ්‍යතාවයක් තිබේ නම් ඒ සම්බන්ධයෙන් සෞඛ්‍ය සේවා අධ්‍යක්ෂ ජනරාල්වරයාගෙන් අවසර ලබා ගත යුතු අතර ඒ සඳහා පිරවිය යුතු ඉල්ලුම් පත්‍රයක් ද තිබේ.

මේ වන විට නිරෝධායන ඇඳිරි නීතිය ඉවත් කර ඇති බැවින් ඒ සම්බන්ධයෙන් නිකුත් කොට ඇති නිරෝධායන ඇදිරිනීති බලපත්‍ර හුදකලා කර ඇති ප්‍රදේශ තුළ හෝ ඒ හරහා ගමන් කිරීමට වලංගු නොවන බව ද එම නිවේදනයේ සඳහන් වේ.

හොරණ - බොඩිලයින් ඇඟළුම් කර්මාන්තශාලාවෙන් වාර්තාවන මුළු ආසාදිත සංඛ්‍යාව මේ වනවිට 170 දක්වා ඉහළ ගොස් තිබේ.

පෙරේදා (07) නව ආසාදිතයන් 80 දෙනෙකු හඳුනා ගෙන තිබිණි.

සේවකයන් 6,000 කට ආසන්න පිරිසක් සේවය කරන අදාළ ඇඟළුම් කර්මාන්තශාලාවේ රජය මගින් පසුගියදා පී සී ආර් පරීක්ෂණ සඳහා යොමුකළ පිරිස් නිරෝධායනයට යොමුකරන ලෙස සෞඛ්‍ය අංශ ලබාදුන් උපදෙස් මත ඔවුන් ඊයේ නිරෝධායනය සඳහා යොමුකළ බව හොරණ සෞඛ්‍ය වෛද්‍ය නිලධාරී කාර්යාලය සඳහන් කළේය.

එම කර්මාන්තශාලාවේ සිදුකළ පී සී ආර් පරීක්ෂණවල වාර්තා තවදුරටත් ලැබීමට නියමිත අතර, හොරණ, ඉංගිරිය, බුලත්සිංහල, අගලවත්ත, කිරිඇල්ල සහ පාදුක්ක ප්‍රදේශවල මෙන්ම මහනුවර, අනුරාධපුර වැනි දුරබැහැර ප්‍රදේශවල පදිංචිකරුවන් ද ඒ අතර සිටින බව සඳහන් වේ.

කෙසේ වෙතත්, එම කර්මාන්තශාලාව හිමි මාස් හෝල්ඩින්ග්ස් ආයතනය නිවේදනයක් නිකුත් කරමින් සඳහන් කළේ දිවයින පුරා පිහිටි තම කාර්මාන්තශාලාවල සේවකයන් වෙනුවෙන් පී.සී.ආර්. පරීක්ෂණ පුළුල් කර ඇති බවයි.

මෙම ඇඟලූම් කර්මාන්තශාලාවෙන් මතු වෙමින් තිබෙන කොවිඞ් පොකුර අතිශය භායනක තත්වයට පත් වෙමින් ඇති අතර හොරණ ගුරුගොඩ ඇඟලූම් කර්මාන්තශාලාවේ හයදහසකට ආසන්න පිරිසක් සේවයේ නියුතුව සිටින බව ද වාර්තා වේ.

හොරණ ගුරුගොඩ ප‍්‍රධාන ඇඟලූම් කර්මාන්තශාලාව තුළින් කොවිඞ් ආසාදිතයන් හඳුනා ගන්නා විට එම ආයතනයට අයත් පිඹුර, අගලවත්ත ඇඟලූම් කර්මාන්තශාලා තුළ ද සේවයේ නියුතු තම සේවකයන් සැකපිට අහඹු ලෙස පී. සී. ආර්. පරීක්‍ෂණවලට භාජන කිරීමට එම පාලනාධිකාරීන් කටයුතු කර තිබිණි. 

පැතිර යන කොරෝනා වසංගත තත්ත්වයත් සමඟ හොරණ ඇඟලූම් කර්මාන්තශාලව අවට ප‍්‍රදේශවල ජනතාව දැඩි භීතියෙන් පසු වන බව ද වාර්තා වේ. එමෙන්ම ගුරුගොඩ ඇඟලූම් ආයතනයේ සේවකයන් හයදහස අතර කළුතර, රත්නපුර දිස්ත‍්‍රික්කවල පුද්ගලයන් පමණක් නොව මෙරට විවිධ ප‍්‍රදේශවල පදිංචි පුද්ගලයන් එම ආයතනයේ සේවය කරනඅතර එම ඇඟලූම් ආයතනයේ පමණක් නොව සහෝදර මතුගම පිඹුර, අගලවත්ත ඇඟලූම් ආයතනවල ද මෙරට නොයෙක් ප‍්‍රදේශවල පදිංචිකරුවන් සේවය කරයි.