බස්නාහිරින් පිටවන ස්ථාන 11 ක රැපිඩ් ඇන්ටිජන් පරික්ෂාව අද සිට
බස්නාහිර පළාත තුළින් පිටවන ස්ථාන 11 ක් ඉලක්ක කරගෙන සිදුකළ රැපිඩ් ඇන්ටිජන් පරික්ෂාවන් අද (13) සිට යළිත් ආරම්භ කර ඇති බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පවසයි.
මෙම පරීක්ෂණ ඉකුත් දෙසැම්බර් මස 18 වැනි දින සිට ජනවාරි 5 වැනි දින දක්වා කාලය තුළ ක්රියාත්මක කළ පරීක්ෂාවෙන් ආසාදිතයන් 106 දෙනෙකු හඳුනාගෙන තිබුණි.
මෙම කාලය තුළ පුද්ගලයන් 11,000 ට අධික පිරිසක් ඇන්ටිජන් පරීක්ෂාවට ලක් කළ බවද අජිත් රෝහණ මහතා සඳහන් කළේය.
බස්නාහිර පළාතින් පිට කොරෝනා අනුපොකුරු ව්‍යාප්ත වීම වැලැක්වීමේ අරමුණින් මෙම රැපිඞ් ඇන්ටිජන් පරීක්ෂාව කොළඹින් පිටවන ස්ථාන 11 ක් ඉලක්ක කරගෙන සිදුකළ බවත් අද සිට එය නැවත සිදුකරන බවද අජිත් රෝහණ මහතා සඳහන් කළේය.
ආසාදිත පිරිස ප්‍රතිකාර මධ්‍යස්ථාන වෙතත්, ආශ්‍රිත පිරිස් නිරෝධායනය සඳහා යොමු කර ඇති බව ද හෙතෙම සඳහන් කළේය.
රන්ජන්ට වසර 4ක බරපතළ වැඩ සහිත සිරදඬුවම්
අධිකරණයට අපහාස කළැයි චෝදනා ලැබු හිටපු රාජ්‍ය අමාත්‍ය රංජන් රාමනායක මහතා එම චෝදනාවට වරදකරු කළ ශ්‍රේෂ්ඨාධිකරණය ඔහුට වසර හතරක බරපලත වැඩ සහිත සිර දඩුවම් නියම කළේය.
අද (12) ශ්‍රේෂ්ඨාධිකරණය හමුවේ මෙම නඩුව කැඳවූ අවස්ථාවේදී මෙම දඩුවම් නියම කෙරිණි.
සිසිරද ආබෘ, විජිත් මලල්ගොඩ, ප්‍රීතිපද්මන් සූරසේන යන ත්‍රි පුද්ගල විනිසුරු මඩුල්ල හමුවේ අද නඩුව විභාගයට ගැණිනි.
කොවිඩ් ආසාදිතයන් බවට හඳුනාගත් මන්ත්‍රී රවුෆ් හකීම් සහ අගමැති මහින්ද රාජපක්ෂගේ දේශපාලන කටයුතු සම්බන්ධීකරණ ලේකම් කුමාරසිරි හෙට්ටිගේ යන දෙදෙනාම පසුගිය සතියේ පාර්ලිමේන්තුවට පැමිණ ඇත.
ඔවුන් මන්ත්‍රීවරුන් පහළොස් දෙනකු සහ කාර්ය මණ්ඩලයේ කිහිප දෙනකු සමීපව ඇසුරුකර ඇති බව සී.සී.ටී.වී දර්ශන ඔස්සේ අනාවරණය වී තිබේ.
මේ හේතුවෙන් පාර්ලිමේන්තු කාර්ය මණ්ඩලයේ සියලු දෙනා හෙට (12 වැනිදා) සහ අනිද්දා (13 වැනිදා) යන දෙදින ක්ෂණික ප්‍රතිදේහ පරික්ෂාවට (ඇන්ටිජන් පරික්ෂණයකට) ලක් කිරීමට තීරණය කර ඇත.
ඉන් පසුව ලබන සතියේ පාර්ලිමේන්තුව රැස්වන දිනවලදී සියලුම පාර්ලිමේන්තු මන්ත්‍රීවරුන්ද ඇන්ටිජන් පරික්ෂණයට ලක් කිරීමට තීරණයක් ගෙන ඇතැයි වේත්‍රධාරී නරේන්ද්‍ර ප්‍රනාන්දු ප්රකාශ කොට ඇත .
කොවිඩ් ආසාදිත දයාසිරි ජයසේකර ඇමැතිවරයා පසුගිය සතියේ පාර්ලිමේන්තුවට පැමිණ නැති අතර රවුෆ් හකීම් මන්ත්‍රීවරයා 05 වැනිදා පාර්ලිමේන්තු රැස්වීමට පැමිණ ඇත. අගමැති දේශපාලන කටයුතු සම්බන්ධීකරණ ලේකම් කුමාරසිරි හෙට්ටිගේ පසුගිය සිකුරාදා (08 වැනිදා) පාර්ලිමේන්තුවට පැමිණ සභා නායක කාර්යාලයේ නිධාරීන් කිහිප දෙනෙකු හමුවී තිබේ.
හකීම් මන්ත්‍රීවරයා පාර්ලිමේන්තු සංකීර්ණයේ සංචාරය කළ තැන් සහ ආශ්‍රය කළ පුද්ගලයන් සොයා සී.සී.ටී.වී. දර්ශන පරික්ෂා කර ඇත. එහිදී අනාවරණය වී තිබෙන්නේ මන්ත්‍රීවරයා පාර්ලිමේන්තු සංකීර්ණයේ රැඳී සිට ඇත්තේ පැය දෙකක පමණ කාලයක් පමණක් බවයි. එම කාලයේ ද ඔහු වැඩි වේලාවක් සභා ගැබ තුළ සිට ඇත. සභා ගැබ තුළ සිටින කාලයේදී හකීම් මන්ත්‍රීවරයා මුව ආවරණයක්ද පැලඳ නොසිටි බව සී.සී.ටී.වී. දර්ශන ඔස්සේ නිරීක්ෂණය වී ඇත. කෙසේ වෙතත් දිවා ආහාරයද නොගෙන මන්ත්‍රීවරයා පාර්ලිමේන්තු සංකීර්ණයෙන් පිටව ගොස් තිබේ. සභා ගැබෙහි හකීම් මන්ත්‍රීවරයාගේ ආසනයට වම්පස අසුනේ සිටන්නේ ගයන්ත කරුණාතිලක මන්ත්‍රීවරයාය. දකුණු පස අසුන තිස්ස අත්තනායක මන්ත්‍රීවරයාගේය.
හකීම් මන්ත්‍රීවරයා සමග සමීපව කතා බහ කළ බව කියන එම්.ඒ.සුමන්තිරන්, ශානක්‍ය රාසමානික්කම්, තලතා අතුකෝරළ සහ ගයන්ත කරුණාතිලක ඇතුළු මන්ත්‍රීවරුන් 15 දෙනකු පමණ සී.සී.ටී.වී. දර්ශන ඔස්සේ අනාවරණය වී ඇත. මෙම මන්ත්‍රීවරුන්ට සහ කුමාරසිරි හෙට්ටිගේ මහතා සමීපව ඇසුරු කළ නිලධාරීන්ටද පී.සී.ආර්. පරික්ෂණ සිදු කරන ලෙස හා නිරෝධායනය වන ලෙස දැනුම්දී ඇත. පාර්ලිමේන්තු සංකීර්ණයේ ස්ථාන කීපයක් විෂබීජහරණය කිරීමටද පියවර ගෙන තිබේ.
කෙසේ වෙතත් පාර්ලිමේන්තුවේ කටයුතු බාධාවකින් තොරව පවත්වාගෙන යන බව කථානායක මහින්ද යාපා අබේවර්ධන මාධ්‍යට පැවැසුවේය.
මුලාශ්‍ර -අරුණ
බෝවන බෝනොවන රෝගවලින් බේරෙන්න දේශීය ආහාර සංස්කෘතියට යන්න වෙනවා
දේශීය ආහාර භාවිතයට ගන්නේ නම් ඕනෑම වෛරසයකින් ආරක්ෂා වීමට හැකියාව ලැබෙනු ඇති බව රජයේ වෛද්‍ය නිලධාරීන්ගේ සංගමයේ සභාපති විශේෂඥ වෛද්‍ය අනුරුද්ධ පාදෙණිය මහතා පවසයි.
ගාල්ල, පිලාන ප්‍රදේශයේ පැවති උත්සවයකට එක්වෙමින් විශේෂඥ වෛද්‍ය අනුරුද්ධ පාදෙණිය මහතා මේ බව සඳහන් කළේය.
මෙහිදී වැඩිදුරටත් අදහස් දැක්වු විශේෂඥ වෛද්‍ය අනුරුද්ධ පාදෙණිය මහතා,
“බෝවෙන රෝගවලින් බේරෙන්න ඕනේ නම් අදට ආදේශ කරලා කිව හැකියි, කොරෝනාවලින් මැරෙන්නේ බෝවෙන රෝග තියෙන අය. දෙකෙන්ම බේරෙන්න ඕනේ. බෝවෙන බෝනොවෙන රෝග දෙකෙන්ම බේරෙන්න ඕනේ නම් පාරම්පරික දේශීය ආහාර සංස්කෘතියකට යන්න ඕනේ. මී පැණි කියන්නේ ලෝකෙ තියෙන හොඳම ආහාරය. ධම්මික පැණියට බනිනවා. ඒකෙත් තියෙන්නේ මී පැණි නේ. මගෙන් අහනවා බිව්වට කමක් නැද්ද කියලා. මී පැණිනම් බිව්වට කමක් නෑ කිව්වා. නවසීලන්තයේ මී පැණි හදන්නේ මල් තුනකින්. මෙහෙ එක මී මැස්සෙක් පැණි හදන්න මල් 595කින් ගන්නවා. මේ මී පැණි ලෝකයේ ඉහළම මී පැණි. ලංකාවේ අවශ්‍යතාවයෙන් සියයට 5යි මී පැණි තියෙන්නේ. සිංහල වෙදකමට මී පැණි පිටරටින් ගේනවා. කොස්, පොළොස් වගා කරන්න ඕනේ. ඒක වගා කරගත්තොත් 2024 එනවා කියන ඊළඟ වෛරස් එකත් අපිට ප්‍රශ්නයක් නෑ.“
ඉන්දීය විදේශ ඇමති හදිස්සියේ ආවේ ඇයි ?
ඉන්දීය විදේශ ඇමති ආචාර්ය එස්. ජයසංකර් මහතා (05) මෙරටට පැමිණ ආර්ථික හා සමාජීය ක්ෂේත්‍ර 06ක් කෙරෙහි ආණ්ඩුව සමග එකඟතාවලට පැමිණ ඇති බවට අනාවරණය වේ.
එම ක්ෂේත්‍ර 06 වන්නේ කොළඹ වරාය නැගෙනහිර ජැටිය, ද්‍රව හා ස්වභාවික වායු බලාගාර ව්‍යාපෘතිය, නිවාස හා මහාමාර්ග ඉදිකිරීම, කෘෂිකාර්මික සංවර්ධන හා පර්යේෂණ, සන්නිවේදන තාක්ෂණය මෙන්ම විවිධ විකල්ප බලශක්ති මූලාශ්‍ර සංවර්ධනය යන ක්ෂේත්‍රයන්නය. මෙම ක්ෂේත්‍රවලින් අන්නෝන්‍ය වශයෙන් උපරිම ප්‍රතිලාභ ලබාගැනීමට සූදානම් වන බව එම සංචාරයේදී ඉන්දීය විදේශ ඇමතිවරයා ප්රකාශ කර ඇත.
ඉන්දියාව මේ වනවිට ශ්රී ලංකාවට අයත් කාවේරි ද්‍රෝණියේ ස්වභාවික ගෑස් ලබා ගැනීමේ ව්‍යාපෘතිය සහ වතු ආශ්‍රිත නිවාස හා මාර්ග ඉකිරීමේ ව්‍යාපෘතිවලට සහයෝගය සපයයි . මීට අමතරව කොවිඩ් සදහා ලබාදෙන එන්නත ලබාදීමේදී මෙරටට ප්‍රමුකත්වය හිමි වන බව සදහන් .
අනෙක් යෝජනාව වන්නේ ඉන්දීය සංචාරකයන්ට මෙරටට පැමිණීමේ ඇති හැකියාව වර්ධනය කිරීමයි.
හොර බොරු බෑ ඉඩම් ලියාපදිංචිය ඩිජිටල් ක්‍රමයට
ඉඩම් ලියාපදිංචි කිරීමේ ක‍්‍රියාවලිය ඩිජිටල් සේවාවක් බවට පත්කිරීම ආරම්භ කර ඇතැයි ශ්රී ලංකා තොරතුරු හා සන්නිවේදන තාක්ෂණ නියෝජිතායතනය පවසයි.
කොළඹ දිස්ත‍්‍රික්කයෙන් ප‍්‍රථම පියවර ආරම්භ කරන ලද මෙම ක‍්‍රියාවලිය මෙම වසර අවසන් වන විට දිවයින පුරා ඉඩම් ලියාපදිංචි කිරීමේ කාර්යාල 45 ක ක්රියාත්මක කිරීමට නියමිතය. ඒ ස`දහා වූ ඉ-ඉඩම් මෘදුකාංගය නිල වශයෙන් ක්රියාත්මක කිරීම පෙරේදා (04දා* කොළඹ ඉඩම් ලියාපදිංචි කිරීමේ කාර්යාලයේදී සිදු කෙරිණි.
මෙම නව මෘදුකාංගය තුළින් ඉඩම් හා දේපළ ලේඛන අතින් ලියාපදිංචි ක‍්‍රමවේදය වෙනුවට මෘදුකාංගයක් මගින් ලේඛනගත කිරීම, ලියාපදිංචි කිරීම හා ආපසු නිකුත් කිරීම සිදු කෙරේ. මෙය දේපළ ලියාපදිංචි කිරීමේ කාර්යසාධක බළකායේ මගපෙන්වීම මත ශ්රී ලංකා ව්‍යාපාර කිරීමේ පහසුව ඉහළ නැංවීම අරමුණු කරගනිමින් ඉ- ඉඩම් ව්‍යාපෘතිය යටතේ ආරම්භ කරන ලදී. මෙම මෘදුකාංග ව්‍යාපෘතිය පූර්ණ වශයෙන්ම දියත් කරනු ලැබුවේ ශ්රී ලංකා තොරතුරු හා සන්නිවේදන තාක්ෂණ නියෝජිතායතනයේ තාක්ෂණික සහායෙනි.
නව වසරේ පළමු පාර්ලිමේන්තු රැස්වීම අද (05 වැනිදා) පෙ. ව. 9.30 ට
නව වසරේ පළමු පාර්ලිමේන්තු රැස්වීම අද (05 වැනිදා) පෙ. ව. 9.30 ට පැවැත්වේ. සෞඛ්‍ය ආරක්‍ෂණ මාර්ගෝපදේශවලට යටත්ව පාර්ලිමේන්තුවේ කටයුතු පවත්වාගෙන යෑමට තීරණය කර ඇත.
පාර්ලිමේන්තුවේ සියලූ කාර්යාල විවෘතව පවතින බවත් මාධ්‍යවේදීන්ටද රැස්වීම් ආවරණ කටයුතු සඳහා පහසුකම් සපයා ඇති බවත් මහලේකම්වරයා ප්රකාශ කළේය.
සාප්පු හා කාර්යාලයීය සේවකයන් පිළිබඳ සංශෝධන පනත් කෙටුම්පත ඇතුළු පනත් 4 ක් අද (05 වැනිදා) විවාදයට ගැනීමට නියමිතය.
කොවිඩ් වෛරසයට එරෙහි ප්‍රතිශක්තිය ශක්තිමත් කිරීම සඳහා කොත්තු රොටි ඇතුළු ක්ෂණික ආහාර ගැනීමෙන් වළකින ලෙස වෛද්‍යවරුන් මහජනතාවගෙන් ඉල්ලා සිටියි.
සමහර පුද්ගලයින්ගේ ජීවන රටාව නිසා කොරෝනා වෛරසයට එරෙහිව සටන් කිරීමට ශරීරයේ ඇති ප්‍රතිශක්තිය අඩු විය හැකි බවයි ශ්රී ජයවර්ධනපුර විශ්ව විද්‍යාලයේ වෛද්‍ය විද්‍යා පිඨයේ ක්ෂුද්‍රජීව විද්‍යා අධ්‍යයනාංශයේ මහාචාර්ය නීලිකා මලාවිගේ මහත්මිය පැවසුවාය.
මහජනයා නිරෝගීව සිටිය යුතු බවත්, සෞඛ්‍ය සම්පන්න ආහාර අනුභව කළ යුතු බවත්, අවශ්‍ය විටමින් පරිභෝජනය කළ යුතු බවත් ඇය පැවසිය.
කොත්තු රොටි, ෆ්‍රයිඩ් රයිස් සහ කෙටි ආහාර වැනි ක්ෂණික ආහාර පරිභෝජනයට ගැනීමෙන් මහජනතාව වැළකී සිටිය යුතු බවයි මහාචාර්ය නීලිකා මලවිගේ මහත්මිය පැවසිය.
ඒ වෙනුවට ඇය කියා සිටියේ ශ්රී ලාංකිකයන් වැඩි වශයෙන් එළවළු සහ පලතුරු අනුභව කිරීමෙන් සෞඛ්‍ය සම්පන්න ආහාර වේලක් පවත්වා ගෙන යායුතු බවයි.
මහජනයා ව්‍යායාම කළ යුතු අතර හොඳ විවේකයක් ලබා ගත යුතු බවත් විටමින් ඩී ඌණතාවයක් නොමැති බවට සහතික වීමද වැදගත් බවයි ඇය වැඩිදුරටත් සඳහන් කර සිටියි.
ජනපතිගෙන් නව වසරට සුභ පැතුම්
රටටත් ජනමතයටත් පිටු නොපාන බවට ජනතාව රජය කෙරෙහි තැබූ විශ්වාසය කිසිදු අයුරකින් පළුදු නොකරන බව ජනාධිපති ගෝඨාභය රාජපක්ෂ මහතා පවසයි.
නව වසර වෙනුවෙන් පණිවුඩයක් නිකුත් කරමින් මේ බව පවසන ජනාධිපතිවරයා එහි මෙසේද සඳහන් කර තිබේ.
නව වසර උදාවන සෑම මොහොතකම එළැඹෙන අභියෝග නිවැරදිව අවබෝධ කරගනිමින් ජීවිත සකසා ගැනීමටත්, අදිටනින් පෙරට යාමටත් අප දිරිගන්වයි. එබැවින් අප 2021 පිළිගන්නේ සුබවාදී ආකල්පයෙන් අධිෂ්ඨානයෙන් හා කැපවීමෙන්ද පරිපූර්ණවය.
සෞභාග්‍යය කරා යන ගමන සාර්ථකව ආරම්භ කර තිබියදී අනපේක්ෂිත ලෙස රට වෙලා ගත් කොවිඩ් වසංගතය ජය ගැනීමට සමස්ත ලෝකයා සමග අපි ද පෙරමුණ ගත්තෙමු. බරපතළ අභියෝග හා බාධක හමුවේ වුවද ජාතික අභිලාෂයන් මත පදනම්ව තිරසාර සංවර්ධනයක අත්තිවාරම සැකසීමට අපට හැකි විය.
ජනතා අපේක්ෂා සාක්ෂාත් කර ගැනීමට තැබූ පියවර නව වසරේ දී තව තවත් ශක්තිමත් කිරීමට රජය සූදානම්ය. නව රජය ගොඩනගනු ලැබූයේ ජනතා කේන්ද්‍රීය සංවර්ධනය සහ ජාතික අනන්‍යතාව සුරක්ෂිත කිරීමේ අභිලාෂය ඇතිවය.
සෞභාග්‍යයේ දැක්මේ” ඇතුළත් ඉලක්කගත සංවර්ධන සැලසුම් යථාර්ථයක් බවට පත් කිරීම රජයේ ප්‍රමුඛතම කාර්යයයි. මේ සඳහා මුළුමහත් රාජ්‍ය සේවයත්, පෞද්ගලික ආයතනත් එක්ව කටයුතු කිරීම ඉතා වැදගත් වේ. සෑම රාජ්‍ය සේවකයකුම තමාට පැවරෙන රාජකාරී කොටස මැනවින් ඉටු කරන්නේ නම් ඕනෑම බාධකයක් ජය ගැනීම රජයට අපහසු කාර්යයක් නොවේ. එම කැපවීම සෑම රජයේ සේවකයෙකුගෙන්ම මම බලාපොරොත්තු වෙමි. එසේම සෑම පුරවැසියෙකුම තම මව්බිම ගැන කැපවෙමින් කටයුතු කිරීමද අපේක්ෂා කරමි. එළැඹෙන වසරේදී කුමන බාධකයකට මුහුණ දීමට සිදුවුවත් ඒ සඳහා ආත්මශක්තිය හා ධෛර්යය අප සතුව ඇති බැව් අපි දැඩිව විශ්වාස කරමු. ඒ සඳහා අවශ්‍ය සැලසුම් සකස් කොට ඒවා ක්රියාත්මක වන නිසා රට තුළ එම විශ්වාසය අප තහවුරු කර ඇත. විනයගරුක රටක ආර්ථික සහ සාමාජයීය සශ්‍රීකත්වය ගැන අමුතුවෙන් කිව යුතු නැත. එබැවින්, අපි සියලුදෙනාම විනය ගරුකව අපගේ කාර්යභාරයන් මැනවින් ඉටු කිරීමට මේ වසර තුළදී අදිටන් කර ගනිමු.
මෙරට මෙන්ම එතෙර වෙසෙන සියලු ශ්රී ලාංකිකයන්ටත්, ඔවුන්ගේ දූ දරුවන්ටත් එළැඹෙන වසර රෝග පීඩාවලින් තොර, ඉසුරුබර අනාගතයක් උරුම කෙරෙන වසරක් වේවා! යි ඉත සිතින් ප්රාර්ථනා කරමි.
උත්සව නොපවත්වන්නැයි ඉල්ලීමක්
නව වසර උදාවත් සමග පවත්වනු ලබන උත්සව හා සාද පසුගිය වසරවල මෙන් සිදුනොකරන ලෙස සෞඛ්‍ය අංශ ජනතාවගෙන් ඉල්ලීමක් කරයි.
කොවිඩ් නයින්ටීන් වෛරස ව්‍යාප්තිය හමුවේ තවදුරටත් සෞඛ්‍යාරක්ෂිත ක්‍රමවේද අනුගමනය කළ යුතු බවත් ඉදිරි දිනවල කොවිඩ් ආසාදිත පොකුරු ඇති වීමේ වැඩි ප්‍රවණතාවයක් ඇති බවත් ඔවුන් පෙන්වා දෙයි.
මේ සම්බන්ධයෙන් කරුණු පැහැදිලි කරන ප්‍රධාන වසංගත රෝග විද්‍යාඥ විශේෂඥ වෛද්‍ය සුදත් සමරවීර මහතා,
“ඉදිරි දවස් දෙක තුළ අලුත් අවුරුද්ද උදාවීමත් සමගම නොයෙක් විදියේ උත්සව හා සාද පවත්වන කාලයක්. නමුත් තවදුරටත් අපේ රට තුළ කොවිඩ් 19 රෝගීන් දිනපතා සිය ගණනක් වාර්තා වන විට සාද හා උත්සව වෙනදා වගේ අපිට පැවැත්වීමේ අපහසුවක් තියෙනවා. අපි දැක්කා පහුගිය දවස්වලත් නොයෙක් අවස්ථාවල දී රෝගීන් පොකුරු වාර්තාවීමට ප්‍රධානතම හේතුව වුණේ විවිධ ආකාරයේ උත්සව. ඒ වගේ අවස්ථාවල දී ආසාදිතයෙක් හිටියොත් බොහෝම වේගයෙන් ඒ වගේ අවස්ථාවලදී පැතිරීමේ අවධානම තියෙනවා. ඒ නිසා මේ අවස්ථාවේ දී අලුත් අවුරුද්ද සැමරිය යුත්තේ අලුත් ආකාරයකට, කොවිඩ් රෝගය බෝ නොවන ආකාරයකට.“
More...
අපි කොහෙවත් කොවිඩ් මළ සිරුරු භූමදානයට අවසර දීලා නෑ -සෞඛ්‍ය සේවා අධ්‍යක්ෂ ජනරාල්
කොවිඩ් ආසාදිත මළ සිරුරු භූමදානය කිරීම සම්බන්ධයෙන් මෙතෙක් කිසිදු අවසරයක් ලබා දී නොමැති බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අසේල ගුණවර්ධන මහතා සඳහන් කළේය.
කොවිඩ් ආසාදිත මළ සිරුරු ආදාහනය කිරීම පිළිබඳ පවතින තීරණයේ වෙනසක් නොමැති බව ද පැවසු
වෛද්‍යවරයා, සමාජ මාධ්‍ය ඔස්සේ මේ පිළිබඳ වැරදි මතයක් ප්‍රචාරය කරමින් සිටින බව ද පැවසිය.
මේ පිළිබඳ වැඩිදුරටත් අදහස් දැක්වු සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අසේල ගුණවර්ධන මහතා,
“අපි කොහෙවත් භූමදානයට අවසර දීලා නෑ. කොවිඩ් - 19 පොසිටිව් මරණයක් නම් එය අනිවාර්යයෙන් ම ආදාහනය කළ යුතුයි. ඒ ස්ථීර තීරණය තමයි සෞඛ්‍ය අමාත්‍යාංශය තවමත් ඉන්නේ. අපි මේ පිළිබඳව විශේෂ කමිටුවක් පත්කරලා තමයි මේ තීරණයට ගිය මාර්තු මාසයේ පැමිණියේ. අපි මේ පිළිබඳ වෛරස් විශේඥයින්ගෙන් සමන්විත කමිටුවක් පත්කරලා තියෙනවා. ඒකේ වාර්තාව ලැබෙනකල් අපි බලන් ඉන්නවා. එතකොට මේ පිළිබඳ නැවත වරක් සාකච්ඡාවක් තියලා අපි මේ තීරණයේ වෙනසක් තියෙනවා නම්, අපි මහජනතාවට දැනුම් දෙනවා. එතකල් අපේ තීරණය සියලුම කොවිඩ් - 19 ආසාදිත වු මරණ ආදාහනය කළ යුතුයි. එය හැකි ඉක්මනින් ආදාහනය කළ යුතුයි. සෞඛ්‍ය අමාත්‍යාංශය වශයෙන් ඒ තීරණයේ කිසිදු වෙනසක් නෑ.“
කොරෝනා අධි අවධානම් කළාප 47ක්
මේ වනවිට කොරෝනා අධි අවධානම් කළාප 47ක් හඳුනාගෙන ඇති බව වසංගත රෝග විද්‍යා අංශය මගින් හෙළිකර තිබේ.
කොළඹ මහනගර සභා බලප්‍රදේශය සහ ඊට අමතරව එම දිස්ත්‍රික්කයේ තවත් ප්‍රදේශ 19ක්, ගම්පහ දිස්ත්‍රික්කයේ ප්‍රදේශ 15ක් සහ කළුතර දිස්ත්‍රික්කයේ ප්‍රදේශ 12ක් මේ අතර පවතී.
එම දිස්ත්‍රික්කවල අධි අවධානම් කළාප විසිරී ඇති ආකාරය මෙසේය. කොළඹ දිස්ත්‍රික්කයේ මහනගර සභා බලප්‍රදේශය, බත්තරමුල්ල, බොරලැස්ගමුව, දෙහිවල, එගොඩ උයන, ගොතටුය, හංවැල්ල, හෝමාගම, කඩුවෙල, කහතුඩුව, කැස්බෑව, පාදුක්ක, පිළියන්දල, කෝට්ටේ සහ රත්මලාන නම් කර තිබේ. නමුත් මේ වනවිට අවිස්සාවේල්ල පොලිස් වසම හුදකලා කර ඇත.
ගම්පහ දිස්ත්‍රික්කයේ අත්තනගල්ල, බියගම, දිවුලපිටිය, දොම්පෙ, ගම්පහ, ජා-ඇල, කටාන, කැළනිය, මහර, මිණුවන්ගොඩ, මීරිගම, මීගමුව, රාගම හා වත්තල යන ප්‍රදේශ නම් කර තිබේ. කළුතර දිස්ත්‍රික්කයට අදාලව එම අධි අවදානම් කලාප මොනවාදැයි නම් කර නැත.
පුද්ගලයින් 35,000කට ආසන්න පිරිසක් මියගොස් 5000ක පමණ පිරිසක් අතුරුදන් කල සුනාමියට වසර 16
මීට වසර 16කට පෙර 2004 වර්ෂයේ දෙසැම්බර් මස 26වන දින සිදුවූ සුනාමි ව්‍යසනයෙන් පුද්ගලයින් 35,000කට ආසන්න පිරිසක් මියගොස් 5000ක පමණ පිරිසක් අතුරුදන් විය.
2004 වසරේ දෙසැම්බර් මස 26වන දින සිදුවු සුනාමි ව්‍යසනයෙන් පසු සෑම වසරකම දෙසැම්බර් 26වන දින ජාතික සුරක්ෂිතතා දිනය ලෙස නම් කරනු ලැබීය.
ඒ අනුව මෙවර ජාතික සුරක්ෂිතතා දිනය අදට (26) යෙදී තිබේ.
අද පෙරවරු 9.25 සිට 9.27 දක්වා මිනිත්තු දෙකක නිශ්ශබ්දතාවයක් සුරකින ලෙසට ආපදා කළමනාකරණ මධ්‍යස්ථානය ජනතාවගෙන් ඉල්ලා සිටි.
ජාතික සුරක්ෂිතතා දිනය මෙවර සෞඛ්‍ය මාර්ගෝපදේශ හා නීති රීති අනුගමනය කරමින් සැමරීමට කටයුතු යොදාඇති බවද ආපදා කළමණාකරණ මධ්‍යස්ථානය සඳහන් කළේය.
ඒ අනුව සුනාමි ව්‍යසනයෙන් මියගිය ජනතාව සිහිපත් කරමින් අද දිනය පුරා සර්ව ආගමික වැඩසටහන් සිදුකිරීමට නියමිත බව එම මධ්‍යස්ථානයේ නියෝජ්‍ය අධ්‍යක්ෂ ප්‍රදීප් කොඩිප්පිලි මහතා පැවසීය.
ජනාධිපති ගෝඨාභය රාජපක්ෂ මහතා සිය නත්තල් දින පණිවිඩය
පාස්කු ප‍්‍රහාරයේ නීතිය හා අනාරක්ෂිත බව පහකොට සැකයෙන් බියෙන් තොරව ආගමික කටයුතුවල නිරතවීමට සියලූ දෙනාටම අවස්ථාව සපයා ඇතැයි ජනාධිපති ගෝඨාභය රාජපක්ෂ මහතා සිය නත්තල් දින පණිවිඩය මගින් කියා සිටී.
එසේම එම වින්දිතයන්ටද යුක්තිය ඉටු කිරීමද එලෙසින්ම සිදු කරන බව කියා සිටින ජනාධිපතිවරයා සිය නත්තල් පණිවුඩයේ වැඩිදුරටත් මෙසේද සඳහන් කර ඇත.
ලොව පුරා කෝටි සංඛ්‍යාත කිතුනුවන්ගේ සිත් දෙවියන් වහන්සේ කෙරෙහි උපන් භක්තියෙන් උද්දීපනය කරන නත්තල ජේසුස් ක‍්‍රිස්තුන් වහන්සේගේ උපත හා බැඳුණු, පාස්කුවට පමණක් දෙවැනි වන උතුම් ආගමික මංගල්‍යයකි. එය ජේසු සමිඳාණන් දේශනා කළ හා පැවැත්මෙන් ප‍්‍රදර්ශනය කළ සාමය, පේ‍්‍රමය, කරුණාව, සහජීවනය, සහකම්පනය බඳු, ශිෂ්ට මනුෂ්‍ය සමාජයේ පදනම නිර්මාණය කරන උත්තුංග සාරධර්ම මූර්තිමත් කරයි. සමාජයීය වශයෙන් ගත්කළ නත්තල කිතනු පවුල් එකට එකතුවෙන, තෑගි බෝග හුවමාරු කරගන්නා, නොමනාපකම් අමතක කොට බැඳීම් අලූත් කරගන්නා ප‍්‍රමෝදජනක අවස්ථාවක්ද වන්නේය.
ජේසුස් වහන්සේ දෙසූ ධර්මය සමාජ චිරස්ථිතියට ඉවහල් වන ඉගැන්වීම් සමුදායක් ගැබ්කොට ගනී. පාපයේ අන්ධකාරය දුරුකොට, නොසලකා හරිනු ලැබූවන්ට සහෝදර හැඟීමෙන් පිහිටවීම සහ සමස්ත මනුෂ්‍ය වර්ගයාගේ විමුක්තිය උදෙසා කැපවීම ඒ අතර ප‍්‍රමුඛ වේ. කොවිඞ් - 19 වසංගතය හමුවේ ආර්ථික, සමාජයීය හා සංස්කෘතික වශයෙන් අකර්මන්‍ය වූ ලෝකය යළි පුබුදු කිරීමට මේ දහම උපයෝගි කොට ගත හැකිය.
මෙරට කිතුනු ජනතාව නත්තල සමරනුයේ මින් වසරකට මඳක් වැඩි කලකට පෙර පාස්කු ඉරිදාවක සිදුකළ කුරිරු ප‍්‍රහාරයේ කටුක වේදනාව තවමත් සිත්දරාගෙන බව අප අමතක නොකළ යුතුය. එසේ වුවද එදා ජනිත කළ භීතිය හා අනාරක්ෂිත බව පිළිබඳ හැඟීම පහකොට සැකයෙන් බියෙන් තොරව ආගමික වතාවත්හි නිරතවීමට සියලූ දෙනාට අවස්ථාව සැලසීමට අපට හැකිවී තිබේ. වින්දිතනයන්ට යුක්තිය ඉටුකිරීම ද එලෙසින්ම සිදුවනු ඇත.
ජේසුස් ක‍්‍රිස්තුන් වහන්සේ දේශනා කළ සාමයේ හා පේ‍්‍රමයේ ශුභාරංචිය ලොව පැතිරේවා! ශ්රී ලංකාවාසී සියලූ කිතුනු ජනයාට ප‍්‍රීතිමත් සුබ නත්තලක් වේවා! යි ඉත සිතින් ප්රාර්ථනා කරමි
