ගෙදරකට බලු පැටියෙක් ගේන කොට උගේ අම්මා තාත්තා ගැන සොයා බලා උගේ වර්ගය ගැන හොයන නමුත් රට පාලනය කරන කෙනෙක්ව,රටේ නායකයාව තෝරන වෙලාවේදී ඡන්දය පාවිච්චි කරන විට ඒ කෙනාගේ වර්තමාන කෙරුම් ගැනවත් ඉතිහාසය ගැනවත් සොයා බලන්නේ නැතැයි මහනුවර දිස්ත්‍රික් පාර්ලිමේන්තු මන්ත්‍රී දිලුම් අමුණුගම මහතා පවසයි.
අක්මීමණ මැතිවරණ කොට්ඨාසයේ ශ්‍රී ලංකා පොදුජන පෙරමුණ තරුණ බල මණ්ඩලය පිහිටුවීමේ රැස්වීමේදී ඔහු මේ බව පැවසීය.
2015 දී අපි පැරදුණේ තරුණ ඡන්දයෙන්. නමුත් සමහරු කියනවා උතුරු නැගෙනහිර ඡන්දයෙන් කියලා. එක වැරදියි. තරුණ තරුණියන් අපිට විරුද්ධවයි හිටියේ. අම්මා තාත්තා අපට ඡන්දේ දෙද්දී දුලා පුතාලා දුන්නේ නැහැ. වර්තමානයේ මේ දුලා පුතාලට ලොකු වගකීමක් තියෙනවා. අවුරුදු 21න් පාර්ලිමේන්තු මන්ත්‍රීවරයෙකු වූ මහින්ද රාජපක්ෂ මහතා රටට විශාල වැඩ කොටසක් කළා.
තරුණයන්ට රැකියා ලබා දුන්නා. උපාධිධාරීන්ට රැකියා දුන්නා. වරාය හැදුවා, ගුවන් තොටුපොල හැදුවා. රට තුළ පැවති ත්‍රස්තවාදය නැති කළා. නමුත් 2015 දි මහින්ද මහත්තයාට විරුද්ධව ඡන්දය ඉල්ලන්න පැමිණි අපේ පක්ෂයේ හිටපු කෙනා එදත් වැඩක් කළේ නැහැ. මේ අවුරුදු හතරහමාර තුළත් කළ දෙයක් නැහැ.
මේ රටට ජංගම දුරකථන හඳුන්වා දුන් කෙනාම ෆේස්බුක් වලින් පරාජය කරන්න කටයුතු කළේ තරුණ තරුණියන්. සමහරු කියනවා උනුත් එකයි මුනුත් එකයි කියලා. පාර්ලිමේන්තුවේ 225 ම වැරදියි කියන මතයකුත් දැන් ගෙනියනවා.
අපි ඡන්දයට එනවිට රට කරවපු ඇත්තන්ගේ ඉතිහාස කෙරුම් ගැන සොයා බලන්න ඕන. තරුණයින්ට තැන දෙන රජයක් පිහිටුවා ගත යුතුයි. ඒ සඳහා අප සංවිධානගත විය යුතුයි. සෑම ග්‍රාම නිලධාරී කොට්ඨාසයකම ශ්‍රී ලංකා පොදු පෙරමුණේ තරුණ සමිති මේ වනවිට ක්‍රියාත්මක වෙනවා යැයි ඔහු පැවසීය.
