February 29, 2020

සමඟි ජන බලවේගය මාර්තු 2 වනදා එළිදක්වන බව විපක්ෂ නායක සජිත් ප්‍රේමදාස මහතා පවසයි.

ඊයේ (26) පාර්ලිමේන්තුවේ පැවති විශේෂ මාධ්‍ය හමුවකට එක් වෙමින් ඔහු මෙම අදහස් පළ කළේය.

එහිදී වැඩිදුරටත් අදහස් දැක්වු ඒ මහතා පවසා සිටියේ, සමගි ජනබලවේගයේ නව ගමනාරම්භය වෙනුවෙන් අද පෙරවරුවේ එක්සත් ජාතික පක්ෂ නායක රනිල් වික්‍රමසිංහ මහතාට ඇරයුම් කළ බවත් ඔහු වැඩිදුරටත් පැවසීය.

පෞද්ගලිකව ඇති කරුණු මුදුන්පත් කර නොගෙන රටේ ජනතාවගේ පැතුම ප්‍රායෝගිකව ක්‍රියාවට නංවන මෙම නව සමගි ජනබලවේගය වෙනුවෙන් එක්සිත්ව මෙම ගමන යෑමට එකතු වෙන ලෙසත් විපක්ෂනායකවරයා මෙහිදී වැඩිදුරටත් කියා සිටියේය.

සංකේතාත්මකව නව සන්ධානයේ ගිවිසුම එළිදැක්වීමට බලාපොරොත්තු වන බවත් පැවසු සජිත් ප්‍රේමදාස මහතා, ප්‍රතිපත්ති ප්‍රකාශය මැතිවරණ ව්‍යාපාරය තුළ එළිදක්වන බවත් පැවසීය.

සලකුණ පිළිබඳව ඉදිරියේ දී බලාපොරොත්තු විය හැකි බවත් ඒ මහතා වැඩිදුරටත් කියා සිටියේය.

මේ අතර, දෙමළ ප්‍රගතිශීලි සන්ධානය , සමඟි ජන බලවේගය සමඟ නිල වශයෙන් එක්වූ බවත් විපක්ෂ නායක සජිත් ප්‍රේමදාස මහතා මෙහිදී පැවසීය.

එළඹෙන මාර්තු 02 වැනිදා අවබෝධතා ගිවිසුමක් අත්සන් කර සමගි ජනබලවේගය සන්ධානයේ කටයුතු ආරම්භ කිරීමට නියමිතය.

ඒ අනුව එදිනට එක්සත් ජාතික පක්‍ෂය ප්‍රමුඛ සන්ධානයට එකඟතාව පළ කළ සියලු පක්‍ෂ සමග ගිවිසුම්ගත වීමට නියමිත අතර ඒ වෙනුවෙන් මේ වනවිට සියලු පක්‍ෂ නායකයන්ට ආරාධනා කර ඇතැයි වාර්තා වේ.

මැතිවරණයට ඉදිරිපත් වන ලකුණ පිළිබඳ මේ වනතුරු නිශ්චිත තීරණයකට පැමිණ නැතත්, සන්ධානයේ ගිවිසුම අත්සන් කිරීමෙන් පසු ඒ පිළිබඳ සියලු පක්‍ෂ සමග සාකච්ඡා කර අවසන් තීරණයකට එළැඹීමට නියමිතය.

සමගි ජන බලවේගය සන්ධානයේ ගිවිසුම් අත්සන් කිරීමේ උත්සවයට විදේශ තානාපතිවරුන්, නියෝජිතයන් ඇතුළු විශාල පිරිසකට ආරාධනා කර ඇති අතර එම උත්සවය සන්ධානයේ නායක සජිත් ප්‍රේමදාස මහතාගේ ප්‍රධානත්වයෙන් පැවැත්වීමට නියමිතය.

සමගි ජනබලවේගය සන්ධානය සඳහා නාමයෝජනා ඉල්ලුම්පත්‍ර හෙට (27) සිට කැඳවීමට නියමිත බව වාර්තාවේ.

 

එක්සත් ජාතික පක්ෂය ප්‍රමුඛ සෙසු බලවේගද එකතු කරගනිමින් සමඟි ජාතික බලවේගයක් ලෙස රට තුළ දැවැන්ත පරිවර්තනයක් ඇති කිරීමට සූදානම් බව විපක්ෂ නායක සජිත් ප්‍රේමදාස මහතා පැවසුවේය.

ඔහු මේ බව සඳහන් කළේ ඊයේ (25) පාර්ලිමේන්තුවේදී පැවති මාධ්‍ය හමුවේදීය.

මෙහිදී අදහස් දැක්වු විපක්ෂ නායක සජිත් ප්‍රේමදාස මහතා, අත්‍යාවශ්‍ය ආහාර පාන වේදිකාවට ගෙනැවිත් ඒවායින් “සැපද ? සනීප ද? “ යන වචන භාවිතයෙන් යම් ප්‍රතිරූපයක් නිර්මාණය කිරීමට දේශපාලන ප්‍රබලයින් කටයුතු කරන බවත් පැවසීය.

නොවැම්බර් 16 වන දින සිදුවු පරිවාර්තනය තුළ ආහාර වර්ගවල හා අත්‍යාවශ්‍ය භාණ්ඩවල මිල ඉහළ යෑම තුළ “කාටද සැපක්, සනීපයක් දැනෙන්නේ“ යනුවෙන් ද මෙහිදී සජිත් ප්‍රේමදාස මහතා ප්‍රශ්න කර සිටියේය.

අද වන විට තෙල් මිල ලෝක වෙළඳ පොළ තුළ පහළ ගොස් ඇති බවත් බවත් පැවසු ඒ මහතා පසුගිය කාලයේ තෙල් මිල සුත්‍රයක් කථා කළ බවත්, ලෝක වෙළඳ පොළේ තෙල් මිල පහල යන විට ලංකාවේ පමණක් තෙල් මිල ඉහළ යන “අදූරදර්ශී සුත්‍රය කුමක් ද“ යනුවෙන් ද මෙහිදී ප්‍රශ්න කළේය.

ජනතාව ඇඳ වැටී ඇති මෙම ප්‍රපාතයෙන් ගොඩ ගැනීමේ මහා පරිවර්තනාත්මක යුගය මහ මැතිවරණ ජයග්‍රහණයෙන් ආරම්භ කිරීමට බලාපොරොත්තු වන බවත් පැවසු සජිත් ප්‍රේමදාස එහි තවත් එක් පියවරක් ලෙස ජාතික හෙළ උරුමයේ නායක පාර්ලිමේන්තු මන්ත්‍රී පාඨලි චම්පික රණවක මහතා අද දිනයේ දී සමගි ජන බලවේගයේ කොටස්කරුවෙක් වු බවත් පැවසීය‍.

ගෘහ මූලික පවුල් ඒකක කේන්ද්‍ර කරගත් සංවර්ධන වැඩ පිළිවෙළක් ක්‍රියාත්මක විය යුතු බව විපක්ෂ නායක සජිත් ප්‍රේමදාස මහතා පවසයි.

මෙහිදී වැඩිදුරටත් අදහස් දැක්වු ඒ මහතා පවසා සිටියේ, තමන්ගේ දේශපාලන ගමන තුළ 1994 සිටම දැවැන්ත අභියෝගවලට මුහුණ දීමට සිදුවු බවයි.

නමුත් හම්බන්තොට දිස්ත්‍රික්කය මහ මැතිවරණ දෙකකදීම ජයග්‍රහණය කළ බවත් පැවසු ප්‍රේමදාස මහතා, 2000 හා 2001 එලෙස ජය ලැබු බවත් අභියෝග මධ්‍යයේ ඉදිරියට යා යුතුව ඇතැයි ද පැවසිය.

පුද්ගලිකව තමාට ඇති අභියෝග ගැන සිතනවාට වඩා රටට මුහුණ දීමට ඇති අභියෝග ගැන වැඩි වශයෙන් සිතන බවත් විපක්ෂ නායකවරයා මෙහිදී කියා සිටියේය.

රට තුළ ක්‍රියාත්මක විය යුතු මනා කළමනාකාරීත්වය අලුත් දැක්මක් තුළින් රට ගොඩනැගීම යන ආදී කරුණු ගෘහ මුලික පවුල් ඒකකය කේන්ද්‍ර කර ගත් සංවර්ධන වැඩසටහන් ක්‍රියාත්මක කළ යුතු බවත් විපක්ෂ නායකවරයා පැවසීය.

ලස්සන වචන ක්‍රියාදාමයන්වලට පරිවර්තනය කිරීම ඉතා අසිරු බවත් පැවසු ප්‍රේමදාස මහතා, එය කරට ගෙන කටයුතු කිරිමට තමා සුදානම් බවත් තම කණ්ඩායම සතුව විශේෂ ගුණාංගයන් හා හැකියාවන් ඇති බවත් ඉලක්කයක් කරා යෑමේ පරපුරුද්ද ඇති බවත් සජිත් ප්‍රේමදාස මහතා කියා සිටියේය.

ඒ නිසාවෙන් කාර්යක්ෂමතාවය ශක්තිමත් කරමින් ක්‍රියාශීලී රාජ්‍ය පාලනයක් ක්‍රියාත්මක කරන බවත් විපක්ෂ නායකවරයා මෙහිදී පැවසීය.

මහ මැතිවරණයට කුරුණෑගල දිස්ත්‍රීක්කයෙන් ඉදිරිපත් වන ලෙස විපක්ෂ නායක සජිත් ප්‍රේමදාස මහතාට ආරාධනය කරන බව එක්සත් ජාතික පක්ෂ පාර්ලිමේන්තු මන්ත්‍රී තුෂාර ඉඳුනිල් මහතා ප්‍රකාශ කළේය.

මන්ත්‍රීවරයා මේ බව ප්‍රකාශ කළේ විපක්ෂ නායක කාර්යාලයේ ඊයේ (19) පැවැති මාධ්‍ය හමුවකට එක්වෙමිනි.

කුරුණෑගල දිස්ත්‍රික්කය තුළ විශාල ජනතාවක් සිටින බැවින් අග්‍රාමාත්‍ය මහින්ද රාජපක්ෂ මහතා පසුගිය මහ මැතිවරණයට කුරුණෑගලින් ඉදිරිපත් වූ බවත්, ඒ අනුව මෙවර මහ මැතිවරණයට කුරුණෑගල දිස්ත්‍රික්කයෙන් ඉදිරිපත් වන ලෙස සජිත් ප්‍රේමදාස මහතාට ආරාධනය කරන බවත් මන්ත්‍රීවරයා එහිදී වැඩිදුරටත් පැවැසීය.

පසුගිය ජනාධිපතිවරණයේදී සජිත් ප්‍රේමදාස මහතා නියෝජනය කළ හම්බන්තොට දිස්ත්‍රික්කයේදී එජාපයට හිමිව තිබූ ඡන්ද ප්‍රමාණය අඩු මට්ටමක පැවැති අතර එනිසා සජිත් ප්‍රේමදාස මහතාට කොළඹින් මහ මැතිවරණයට ඉදිරිපත් වන ලෙසද යෝජනා කර තිබේ.

අගමැති මහින්ද රාජපක්ෂ මහතාද මෙවර මහ මැතිවරණයට පොහොට්ටුව ලකුණින් කුරුණෑගල දිස්ත්‍රික්කයෙන් තරඟ කිරීමට නියමිතය.

මේ අතර එක්සත් ජාතික පක්ෂ හිටපු මහ ලේකම් තිස්ස අත්තනායක මහතා පවසන්නේ ඉදිරි මහා මැතිවරණයේදී සමගි ජන බලවේගය යටතේ මහනුවර දිස්ත්‍රික්කයෙන් තරග කිරීමට අපේක්ෂා කරන බවයි.

සමගි ජාතික බලවේගය හදවත ලකුණින් එළඹෙන මහ මැතිවරණයට ඉදිරිපත් වීම එක්සත් ජාතික පක්ෂ නායක රනිල් වික්‍රමසිංහ මහතා වැලක්වුවහොත් එළඹෙන 15 වනදා වන විට වෙනම තරඟ කිරීමේ තීන්දුවක් ගැනීමට එම සන්ධානයේ නායක සජිත් ප්‍රේමදාස මහතා තීරණය කොට තිබේ. 

ඊයේ (10) සිරිකොත පැවති කෘත්‍යාධිකාරී මණ්ඩල රැස්වීමේදී ඉදිරි මහ මැතිවරණයට ඉදිරිපත් විය යුත්තේ අලියා ලකුණෙන් යන්න රනිල් වික්‍රමසිංහ මහතා ප්‍රකාශ කිරීමත් සමඟ යළිත් අර්බුධකාරී තත්ත්වයක් ඉස්මතු වී තිබේ. අලියා ලකුණෙන් මහ මැතිවරණයට ඉදිරිපත් වුවහොත් නාම යෝජනා අත්සන් කිරීමේ හා ජාතික ලැයිස්තු මන්ත්‍රීවරුන් පත් කිරීමේ බලය එම පක්ෂයේ මහ ලේකම් අකිල විරාජ් කාරියවසම් මහතාට හිමි විය.

මෙම කෘත්‍යාධිකාරී මණ්ඩල රැස්වීමේදී නව සන්ධානයේ ලේකම් ලෙස රන්ජිත් මද්දුමබණ්ඩාර මහතාගේ නමට අනුමැතිය ලැබුණද මෙම සන්ධානයෙන් තරඟ කිරීම රනිල් වික්‍රමසිංහ මහතා ප්‍රතික්ෂේප කිරීමත් සමඟ සජිත් ප්‍රේමදාස මහතා හා ඔහුගේ පාර්ශවය වාදයක පැටලුණි.

රනිල් වික්‍රමසිංහ මහතාට ඕනේ නම් අලියා ලකුණෙන් ඉල්ලා ගන්නා ලෙසත් තමන් නව සන්ධානයෙන් ඉල්ලන බවත් පවසමිනි සජිත් ප්‍රේමදාස මහතා සහ ඔහුගේ පාර්ශවය මෙම රැස්වීමෙන් ඉවත්ව ගොස් තිබේ.

මාරාන්තික කොරොනා වෛරසය මැඩලීම සඳහා ජාතික වැඩපිළිවෙළක්, ජාතික සැලැස්මක් අවශ්‍ය බවත්  ඒ සඳහා ජනාධිපති කාර්ය සාධක බලකායක් පත් කරන ලෙසට රජයෙන් ඉල්ලා සිටින බවත් විපක්ෂනායක සජිත් ප්‍රේමදාස  මහතා පැවැසීය.

පටු දේශපාලන වාසි නොතකා මාරාන්තික කොරොනා වෛරසය මැඩලන්න අවශ්‍ය උපරිම සහයෝගය ලබා දීමට විපක්ෂය සූදානම් බවත් විපක්ෂනායකවරයා  සඳහන් කළේය.

ශ්‍රී ජයවර්ධනපුර කෝට්ටේ පිහිටි පාර්ලිමේන්තු සංකීර්ණයේ පැවති මාධ්‍ය හමුවකදී ඔහු මේ බව පැවැසීය.

කොරොනා වෛරසය හේතුවෙන් චීනයේ වූහාන් නගරයේ සිරවී සිටින සිසුන් ගෙන්වා ගැනීමට වහාම මැදිහත් වන ලෙසට විදේශ අමාත්‍යවරයාගෙන් ඉල්ලා සිටින බවත් ප්‍රේමදාස මහතා සඳහන් කළේය.

ශ්‍රී ලන්කන් ගුවන් සමාගමේ සේවයේ නියුතුවන්ට ලබාදී ඇති ආරකෂිත වැඩපිළිවෙළ සම්බන්ධයෙන්ද මෙහිදී විපක්ෂනායකවරයා රජයෙන් ප්‍රශ්න කර සිටියේය.

තමා පක්ෂ නායකත්වයෙන් යෑමට සූදානම් මුත් තමන්ව චන්ඩි කමින් යවන්න බැරි බවට වූ පණිවිඩයක් එක්සත් ජාතික පක්ෂ නායක රනිල් වික්‍රමසිංහ මහතා විසින් සජිත් ප්‍රේමදාස මහතාට අද දින යැවීමට නියමිත බවට වාර්තා වේ.

එමෙන්ම එක්සත් ජාතික පක්ෂ නායකත්වයෙන් තමාගේ නික්ම යාම කාල සටහනකට අනුව සිදුකරනු ලබන බවද එම පණිවිඩයට ඇතුළත්ය.

මෙම පණිවිඩය සජිත් ප්‍රේමදාස මහතා වෙත ගෙන යනු ලබන්නේ එක්සත් ජාතික පක්ෂයේ මන්ත්‍රීවරුන් හෝ ප්‍රබලයින් කිසිවෙකුවත් සිතාගැනීමට නොහැකි දේශපාලඥයෙකු විසිනි.

මේ දේශපාලනඥයා හා රනිල් වික්‍රමසිංහ මහතා අතර මීට ටික දිනකට පෙර මේ සම්බන්ධයෙන් වූ සාකච්ඡාවක් පවත්වා තිබිණි.

සජිත් ප්‍රේමදාස මහතාගේ නායකත්වයෙන් බිහි වීමට යෝජිත නව සන්ධානයේ මහලේකම් ධුරය එක්සත් ජාතික පක්ෂ මහ ලේකම් අකිල විරාජ් කාරියවසම් මහතාට ලබා නොදීමට සන්ධාන නායකයින් තීරණය කොට තිබේ.

සාමාන්‍යයෙන් එක්සත් ජාතික පක්ෂය මුල් වූ සන්ධානයක් ගොඩ නැගීමේ දී මහා ලේකම් ධුරය එක්සත් ජාතික පක්ෂයේ මහ ලේකම්වරයාට ලබාදීම සිරිතක් පැවතිනි.

අකිල විරාජ් කාරියවසම් මහතා එක්සත් ජාතික පක්ෂ නායක රනිල් වික්‍රමසිංහ මහතාට ගැති ව කටයුතු කිරීම සන්ධාන නායකයින්ගෙන් එම තීන්දුවට හේතුවී තිබේ.

යෝජිත සන්ධානයේ නව ලේකම්වරයා සම්බන්ධයෙන් තීන්දුවක් එම සන්ධානයේ නායකයින් එක්ව ඉතා නුදුරේදී ගනු ඇති බවට තොරතුරු වාර්තා වේ.

නාමයෝජනා ලබාදීම මෙන්ම ජාතික ලැයිස්තු මන්ත්‍රීධුර නම් කිරීමේදී ප්‍රධානතම කාර්යභාරය සිදුවන්නේ පක්ෂයක ලේකම්වරයා අතිනි.


තමන් බිහිකරන ආණ්ඩුවේ ප්‍රමුඛතම කාර්ය වන්නේ වත්මන් ආණ්ඩුව යටතේ පළිගැනීමට ලක් වූ සියලු දෙනාට සහන ලබා දීම බව විපක්ෂ නායක සජිත් ප්‍රේමදාස  මහතා අවධාරණය කළේය.

ඒ,මාතලේ ලග්ගල ජන හමුවේදීය.

ජනාධිපතිවරණයේදී සහයෝගය පළකළ ජනතාවට ස්තූතිය පළකිරීම සඳහා එම රැස්වීමද සංවිධානය කර තිබුණි. 

ආණ්ඩුව පැවසුවේ රට සෞභාග්‍යයේ පාරාදීසය කරන බවට වුවද මේ වන විට බෙහෙත් පෙත්තේ සිට සියල්ල අහස උසට නැග ඇති බව විපක්ෂ නායකයා සඳහන් කළේය. 

''අද හැමතැනම දේශපාලන පළිගැනීම්. විසිහතර පැයම පළිගන්නවා. උසස් වීම් කප්පසු කරලා. රැකියා අහිමි කරලා දරු පවුල් ඈත් කරලා. සෞභාග්‍ය වෙනුවට දේශපාලන භීතිය වපුරලා. ගැබිණි මාතාවන්ගේ පෝෂණ මල්ල කපා දාලා. වකුගඩු රෝගී දීමනාව කප්පාදු කරලා. සියලු සහන නැති කරලා. අනාගතයේ ආපි හදන ආණ්ඩුවේ මුලින්ම කරන්නේ මේ පළිගත්ත ජනතාවට සහන සැලැස්සීමයි. ජනතාව ඉල්ලන,ජනතාව බලාපොරොත්තු වෙන දර්ශනයක් ඔස්සේ පෙරට යන්න ඕනේ.''

ඒ අනුව නව දැක්මකින්,නව මුහුණුවරකින් සිය ගමන ක්‍රියාත්මක කරන අතර කිසිදු වෙලාවක පාක්ෂිකයන් හෝ සාමාජිකයන් පාවා නොදෙන බවයි සජිත් ප්‍රේමදාස මහතා කියාසිටියේ. 

එය තහවුරු කරමින් තනතුරු නිසා හෝ නොකැඩි පුළුල් සන්ධානයකින් ඉදිරියට එන බව හෙතෙම වැඩිදුරටත් ප්‍රකාශ කරන ලදී.  

Page 1 of 22