September 25, 2020

විදෙස් වෙළඳපොළ ඉලක්ක කර ගනිමින් මෙරට පොල්කටු භාණ්ඩ නිෂ්පාදන කර්මාන්තය ප්‍රවර්ධනය කිරීම සඳහා එම කර්මාන්තයේ නියුතු පිරිසට අවශ්‍ය ප්‍රතිපාදන, තාක්ෂණය හා වෙළඳපොළ අවස්ථා ලබා දීමට කඩිනමින් ව්‍යාපෘතියක් දියත් කරන ලෙස කර්මාන්ත අමාත්‍ය විමල් වීරවංශ මහතා ලංකා කාර්මික සංවර්ධන මණ්ඩලයට උපදෙස් ලබා දුන්නේය. 

පොල්කටු යොදා ගනිමින් විස්මිත භාණ්ඩ රැසක් නිපදවා විදෙස් වෙළඳපොළ ජයගත් ප්‍රවීණ හස්ත කර්මාන්ත ශිල්පියකු වන මහනුවර, බෝවල, කොකා සෙලා ෂෙල් ක්‍රාෆ්ටිං ආයතනයේ (Coca sela shell Crafting)  හිමිකරු ඇම්. වසන්ත ප්‍රනාන්දු මහතා ඊයේ (21) 73/1, ගාලු පාර, කොළඹ 03 යන ස්ථානයේ පිහිටි කර්මාන්ත අමාත්‍යාංශයේ දී තමන් හමු වූ අවස්ථාවේ වීරවංශ අමාත්‍යවරයා මෙසේ පැවසීය.

අමාත්‍යවරයා සමඟ සාකච්ඡාවෙන් අනතුරුව වසන්ත ප්‍රනාන්දු මහතා මාධ්‍ය වෙත අදහස් දක්වමින් මෙසේ පැවසීය. 

"මම 1970 සිට පොල්කටු භාණ්ඩ නිෂ්පාදන කර්මාන්තයේ නියැලී සිටිනවා. පොල්කටු භාණ්ඩ නිෂ්පාදකයන් බොහෝ විට සිය නිෂ්පාදන සිදු කරන්නේ දේශීය වෙළඳපොළ ඉලක්ක කර ගෙනයි. මා ක්‍රම ක්‍රමයෙන් ජාත්‍යන්තරය දිනාගත හැකි පොල්කටු භාණ්ඩ නිෂ්පාදනය සිදු කළා. මගේ විශාල බලාපොරොත්තුවක් තිබුණා මගේ ශිල්පීය දැනුම මේ ක්ෂේත්‍රයේ කර්මාන්ත ශිල්පීන්ට ලබා දී ඔවුන් ද ජාත්‍යන්තරය ජයගත හැකි පොල්කටු භාණ්ඩ නිර්මාණකරුවන් බවට පත් කිරීමට. එය මට තනිවම කරන්න පුළුවන් දෙයක් නොවෙයි. ඒ සඳහා රජයේ මැදිහත්වීම අවශ්‍යයි. 

අද මා කර්මාන්ත අමාත්‍යතුමන් හමු වී මගේ භාණ්ඩ ද එතුමන්ගේ අවධානයට ලක් කර මෙම කර්මාන්ත ක්ෂේත්‍රය ජාත්‍යන්තර තලයට ඔසවා තැබීමේ මගේ බලාපොරොත්තුවත් ඒ සඳහා වන මගේ අදහසුත් පවසා සිටියා. ඊට සාවධානව ඇහුම්කම් දුන් විමල් වීරවංශ ඇමතිතුමා දීපව්‍යාප්තව පොල්කටු නිෂ්පාදන කර්මාන්තය සිදු කිරීමටත් කර්මාන්තයේ නියැලෙන පිරිස් වෙත ජාත්‍යන්තර තලයේ භාණ්ඩ නිෂ්පාදනය සඳහා අවශ්‍ය පුහුණුව ලබා දීමටත් මා ද සම්බන්ධ කර ගනිමින් ව්‍යාපෘතියක් සකසන ලෙස ලංකා කාර්මික සංවර්ධන මණ්ඩලයේ සභාපති උපසේන දිසානායක මහතාට ඒ මොහොතේම උපදෙස් දෙනු ලැබුවා. 

මෙම ‘පොල්කටු භාණ්ඩ නිෂ්පාදන කර්මාන්තය’ සමෘද්ධිලාභීන් ව්‍යවසායකයන් බවට පත් කිරීමට හැකියාව ඇති කර්මාන්තයක්. ගමේ පොළ ඉලක්ක කර ගෙන පොල්කටු භාණ්ඩ නිපදවා පලක් නැහැ. අපිට සාර්ථක ව්‍යවසායකයන් පිරිසක් බිහි කළ හැක්කේ විදෙස් වෙළඳපොළ ඉලක්කකරගත් පොල්කටු භාණ්ඩ නිෂ්පාදන කර්මාන්තයක් බිහි කළහොත් පමණයි. මේ ශිල්පීන් පුහුණු කිරීමේ ව්‍යාපෘතිය සඳහා අවශ්‍ය ප්‍රතිපාදන, තාක්ෂණය ලබා දීමට ලංකා කාර්මික සංවර්ධන මණ්ඩලයේ සභාපතිතුමන් එකඟතාව පළ කළා. මෙම ජාත්‍යන්තර තලයේ පොල්කටු භාණ්ඩ නිෂ්පාදනය රට තුළ සිදුවන විට ඊට අදාළ අපනයන වෙළඳපොළ අවස්ථා නිර්මාණය කර දීමට ද අමාත්‍යතුමන් සූදානම් බව පැවසුවා."

විසිවැනි ආණ්ඩුක්‍රම ව්‍යවස්ථාවට පාර්ලිමේන්තුවේ කාරක සභා අවස්ථාවේදී ඡන්දය විමසීම වගන්තියෙන් වගන්තිය ගෙන වෙන වෙනම සිදු කිරීමේ සූදානමක් පවතින බව වාර්තා වේ.

එහිදී ව්‍යවස්ථා සංශෝධනය ගැන විකල්ප මත දරන්නන්ට සංශෝධන ඉදිරිපත් කර සම්මත කරගත හැකි බව පාර්ලිමේන්තුවේ ආරංචි මාර්ග පැවසීය.

පසුගිය අමාත්‍ය මණ්ඩල රැස්වීමේදී මෙම සංශෝධනය ගැන සාකච්ඡා වූ මොහොතේ වාසුදේව නානායක්කාර, විමල් වීරවංශ, උදය ගම්මන්පිල යන අමාත්‍යවරුන් යම් යම් වගන්ති ගැන විකල්ප මත ඉදිරිපත් කර තිබිණි.

එහෙත් ජනාධිපතිවරයා එහිදී දැඩිව ප්‍රකාශ කර තිබුණේ තමන් ජනපතිවරණයේදී 19 ව්‍යවස්ථා සංශෝධනය අහෝසි කරන බවට ජනතාවට ප්‍රතිඥා දුන් නිසා පළමුව එය අහෝසි කොට නව ව්‍යවස්ථාවක් සම්පාදනය කළ යුතු බවය. අවශ්‍ය සංශෝධන වෙතොත් කාරක සභා අවස්ථාවේදී සලකා බලමු යැයිද ජනාධිපතිවරයා ප්‍රකාශ කර තිබේ.

ඒ අනුව මේවන විට ඉදිරි කටයුතු සම්පාදනය වෙමින් පවතින බව වාර්තා වේ.

ලබන 22 වනදා 20 වැනි සංශෝධනය මැතිසබයට ඉදිරිපත් කොට නොවැම්බර් මස 4 වනදාට පෙර එය සම්මත කර ගැනීම රජයේ අරමුණ වී තිබේ.

කර්මාන්තකරුවාට සහ ව්‍යවසායකයාට ශක්තිමත්ව නැගී සිටීමට නම් මෙරට බැංකුවල ප්‍රතිපත්ති – ආකල්ප වෙනස් විය යුතු බවත් ඒවා සැබෑ ලෙසම සිය සේවාදායකයාට සුහද හදකින් යුතුව සේවය සැලසිය යුතු බවත් කර්මාන්ත අමාත්‍ය විමල් වීරවංශ මහතා පවසයි.

කොළඹ 07, බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ දී පැවැති ‘සිටුවර ජයබල ව්‍යාපාර සහයෝගිතා සංවිධානයේ’ දෙවැනි මහා සම්මේලනයේ ප්‍රධාන දේශනය සිදු කරමින් ඒ මහතා මෙසේ පැවසීය.

එහිදී වැඩිදුරටත් අදහස් දැක්වූ ඒ මහතා මෙසේ ද පැවසීය.

“සිටුවර ජයබල සහයෝගිතා සංවිධානයේ දෙවන ජාතික මහා සම්මේලනයට ප්‍රධාන ආරාධිතයා ලෙස සහභාගී වීමට හැකියාව ලැබීම පිළිබඳ ප්‍රථමයෙන් සතුටට පත්වෙනවා. අපේ සමාජයේ කාලයක පටන් ඇතැම් කොටස්වල මුල් බැසගත්තු අදහසක් තියෙනවා ‘කවුරු රට පාලනය කරත් අපි හම්බකරගෙනයි අපි කන්නේ’ කියලා. පසුගිය කාලයේ ඒ මූලධර්මය මත පිහිටා ජීවත් වුණු උදවියට තේරුම් ගියා එය එහෙම නොවෙයි කියලා. අපි හම්බකරගෙන, අපි ජීවත් වෙන්න සුදුසු වාතාවරණය හදන වගකීම තියෙන්නෙ අපි කලින් කලට බලයට පත්කරන පාලන තන්ත්‍රවලට. රටේ ආරක්ෂාව සුරක්ෂිත තත්ත්වයකට රැගෙන එන්න ඒ පාලන තන්ත්‍රවලට බැරි නම්, මුල්‍ය ක්ෂේත්‍රයේ හිතකර වාතාවරණයක් ගොඩනගන්න, සමාජයේ ආර්ථික ක්‍රියාවලියට බාධාකාරීව බලපාන සාධක ඉවත් කරන්න, රටේ පාලන තන්ත්‍රයට බැරි නම් ‘අපි හම්බකරගෙන අපි කනවා’ කියන එක පහසු කාර්යයක් වෙන්නේ නැහැ.

සහරාන්ලා මරාගෙන මැරෙනකල් නිසොල්මනේ බලාගෙන හිටපු පාලන තන්ත්‍රයක් යටතේ, මහ බැංකුවේ මුදල් මහ දවල් හොරකම් කරලා කෘත්‍රිමව බැංකු පොලී අනුපාතය ඉහළ යන්න කටයුතු සලස්වපු පාලන තන්ත්‍රයක් යටතේ, රටේ අරාජිකත්වයට මඟ පාදපු පාලන තන්ත්‍රයක් යටතේ ව්‍යාපාරවලට හිතකර වාතාවරණයක් නිර්මාණය වෙන්න විදියක් නැහැ.”

‘ව්‍යවසායකයන් වෙනුවෙන් පියවර රැසක්’

මෙහි සිටින ව්‍යාපාරික ප්‍රජාවේ මතු වී තිබෙන ගැටලු ඒ ඒ යුගවල රට පාලනය කරපු පාලන තන්ත්‍රයන් ගත් තීන්දු තීරණ අනුව ඇති වූ ඒවායි. කොවිඞ් වසංගතය හමුවේ ඉන්දියාව වසංගත තත්ත්වයෙන් අසරණ වෙලා තියෙන අයුරු දුුටුවාම ඇමරිකා එක්සත් ජනපදය පත්වෙලා තිබෙන අර්බුදය දුටුවාම, ලෝකයේ බොහෝ රටවල් අසරණව සිටින ආකාරය දිහා බැලුවාම කොවිඞ් 19 වසංගතයෙන් ශ්‍රී ලංකාවේ වෙසෙන අපි, සැලකිය යුතු දුරකට මිදෙන්න වාසනාවන්ත වෙලා තියෙනවා. වසංගත තත්ත්වයක් පාලනය කරගන්න පුළුවන් නායකත්වයක් යටතේ මේ රට පවත්වාගෙන යන්න හැකිවීම ඊට හේතුව වෙලා තියෙනවා. පසුගිය ආණ්ඩු සමයේ මෙම කොවිඞ් වසංගතය පැමිණියා නම් අපිට මුහුණ දෙන්න වෙන්නේ හිතකර වාතාවරණයකට නොවෙයි. මේ හැම දෙයකින්ම අවධාරණය කරන්නේ, ‘රටක ව්‍යාපාර හෝ වෙනත් කටයුතුවල සාර්ථකත්වය, ප්‍රගමනය තීරණය වෙන්නේ රාජ්‍ය පාලනයේ ස්වභාවයට සාපේක්ෂව මිසක් ඊට පටහැනිව නොවෙයි’ කියලයි.

පාස්කු ඉරිදා ප්‍රහාරයෙන් පසුව මේ රටේ ඇතිවුණු වාතාවරණයත් සමගම ඇතැම් බදු ප්‍රතිපත්ති අනුව ව්‍යාපාර කරගෙන යාමට බැරි වාතාවරණයකට ලක්වුණා. 2019 නොවැම්බර 16 වැනිදායින් පසුව ව්‍යාපාරිකයා යන්තම් හිස ඔසවාගෙන එනකොට කොවිඞ් වසංගතයට ගොදුරු වෙලා ව්‍යාපාර යළි අඩාල වුණා. නමුත් කොවිඞ් 19 වසංගතය මෙතරම් ඉක්මනින් පාලනය කරේ නැත්නම්, අපි පත්වෙලා තියෙන අසීරුතා සාකච්ඡා කිරීමට රැස් වීමට පවා හැකියාව ලැබෙන්නේ නැහැ. ගෝඨාභය රාජපක්ෂ ජනාධිපතිතුමන්ගේ නායකත්වයෙන් යුත් මේ රජය මහජනතාව සමග ගනුදෙනු කරන මුල්‍ය ආයතන කැඳවමින්, උපදෙස් දෙමින් හැකිතාක් දුරට මේ රටේ ව්‍යාපාරිකයන් වෙනුවෙන් පියවර රැසක් මේ වන විට අරගෙන තියෙනවා.

‘සුහද හදක් තියෙනවාද?’

බැංකු පොලී අනුපාතය අපි තනි ඉලක්කමකට අරගෙන තියෙනවා. එය තවදුරටත් පහළ අගයකට ගෙන ඒමට රජය කටයුතු කරන බව මේ අවස්ථාවේ දී කියන්න කැමතියි. (අත්පොළසන්). අපේ රටේ බැංකු සාමාන්‍යයෙන් කර්මාන්තවලට ණය දෙන්න තියෙන උනන්දුව අඩුයි. යම්කිසි ව්‍යාපාරිකයෙක් හැදෙනවා වගේ දැක්කාම බැංකු ගෙදරටම ඇවිත් ණය දෙන්න යනවා. සමහරවිට ඒ ව්‍යාපාරිකයා ඒ ණය ගන්නෙ ව්‍යාපාරය සඳහාම නොවෙයි. ගෙදරටම ඇවිත් හාදු දිදී ණය දෙන බැංකු තමන්ගේ සේවාදායකයා තරමක් අසීරුතාවකට පත් වුණාම තිබුණු හිතෛෂී මැදිහත්වීම තවදුරටත් පවත්වන්නේ නැහැ. ඊට පස්සේ මේ සේවාදායකයා ත්‍රස්තවාදියෙක් විදියට පෙනෙන්න ගන්නවා.

මම හොයලා බැලුවා, මේ අවුරුද්දේ මුල් මාස හතර තුළ බිලියන තුනකට වඩා ශුද්ධ ලාබ ලබපු බැංකු තුනක් තිබුණා. වෙනත් බැංකු බිලියන තුනක ලාබයක් නැති වුණාට දෙකක් හෝ එකයි දශම ගණනකට ලාබ ලබලා, තිබුණා. බැංකු ලාබ ලබලා, බැංකුවල රැකියා කරන අයට හොඳ ජීවන පැවැත්මක් හිමි කර දී තියෙනවා. නමුත් ඔවුන්ගේ ප්‍රබලතම සාධකය වුණු සේවාදායකයා දවසින් දවස අසරණ වෙනකොට සුහද හදක් ගැන කියන බැංකුවල ඒ හදවත සුහද වෙන්නේ නැහැ.

පසුගිය ආණ්ඩුව ඔවුන්ගේ ‘හෙන්චයියලාට’ කෝටි ගණනක ණය දුන්නෙ කිසිම ඇප කොන්දේසියක් නැතිව. සාමාන්‍ය මනුස්සයෙක් රුපියල් ලක්ෂයක ණයක් ගන්න ගියත් රජයේ සේවකයන්ගේ ඇප ඉල්ලනවා. අපේ රටේ බැංකු පවතින්නේ බැංකුවේ පැවැත්ම සඳහා මිසක් සේවාදායකයන් වෙනුවෙන් නොවෙයි. මම එක්තරා සජීවී වැඩසටහනකදී මේ බැංකු ලබන අසීමිත ලාබය ගැන වගේම ඒ මගින් සාමාන්‍ය ජනතාවට සිදුවන අසාධාරණය ගැන කිව්වා. පසුගිය දවසේ ඒ නාලිකාවේ පළවුණ වැඩසටහනේ මගේ කතාව බලන්න මට උවමනා වුණා, ඒ නාලිකාවට අයත් යූටියුබ් නාලිකාවෙන් නැවත වරක් බලන්න යද්දි ඒ බැංකු ගැන කියපු කොටස අතුරුදහන් වෙලා තිබුණා. පසුව එම නාලිකාවට දැනුම් දුන්නාම කිව්වෙ ‘දැන්වීම් දෙන එක නවත්වනවා කියලා බැංකු කියලා තිබුණ නිසා එය ඉවත් කළා’ කියලයි. මම කියපු දෙය ඇත්ත නිසා තමයි බැංකු බය වෙලා තියෙන්නෙ. තමන්ට තියෙන කේවල් කිරීමේ බලය යොදවලා ‘දැන්වීම් දෙන්නෙ නැහැ’ කියන තර්ජනයට ඒ නාලිකාව යටත් කරලා ඒ කොටස යූටියුබ් නාලිකාවෙන් අයින් කරවලා තියෙනවා.

‘කර්මාන්ත දියුණු වීමට, ප්‍රධාන සාධක දෙකක් වෙනස් විය යුතුයි’

අපේ රටේ ආර්ථිකය හා කර්මාන්ත දියුණු වෙන්න නම් අපේ රටේ ප්‍රධාන සාධක දෙකක් වෙනස් වෙන්න වෙනවා. එකක් අපේ රටේ බැංකු. අනික අපේ රටේ බලශක්තිය. අධික මිලක් ගෙවලා, විදුලි බලය අරගෙන කර්මාන්ත කරන්න පුළුවන් රටක් මම දැකලා නැහැ. ඒ වගේම අද පවතින බැංකුවල ප්‍රතිපත්තිය හා සමාන ප්‍රතිපත්ති තියන කිසිම රටක ව්‍යවසායකයන් හෝ කර්මාන්ත පණ ගැන්විලා නැහැ. ව්‍යවසායකයා මාසයක් පුරා මහන්සි වෙලා බැංකුව නඩත්තු කරනවා. එහෙම නඩත්තු කරත් අවසානයේ තමන්ව නඩත්තු කරන සේවාදායකයා ගැන සැලකිලිමත් වෙන්නෙ ඉතාම අඩුවෙන්. මේ බැංකුවල ස්වභාවය වෙනස් කර ගැනීම අත්‍යවශ්‍යයි.

අපේ රටේ මහ බැංකුවත් මුල්‍ය ප්‍රතිපත්ති ගොඩක් හදාගෙන තියෙන්නේ බැංකුකරුවන්ගේ යහපත උදෙසා මිසක් බැංකුවට එන සේවාදායකයන්ගේ යහපත සඳහා නොවෙයි. අපේ රට ඉදිරියට යන්න අසීරු කරවන මෙවැනි බාධා ඉවත් කරගත යුතු වෙනවා. මේ අනුව, ‘අවශ්‍ය කරන ප්‍රතිපත්තිමය හා ව්‍යුහාත්මක වෙනස් සිදු කිරීම සඳහා අපි රජයක් හැටියට උපරිම වශයෙන් කටයුතු කරනවා,’ කියන ස්ථාවරයක මම වගේම අතිගරු ජනාධිපතිතුමනුත් ඉන්නවා, කියන කාරණය කිව යුතුයි. මේ රටේ ව්‍යවසායකයාගේ ජයග්‍රහණය වෙනුවෙන් සුදුසු වාතාවරණය නිර්මාණය කර දීම වෙනුවෙන් අපට හැකි සෑම ප්‍රයත්නයක්ම දරන බව නැවතත් ඉතා ඕනෑකමින් අවධාරණය කරනවා”

‘සිටුවර ජයබල ව්‍යාපාර සහයෝගිතා සංවිධානයේ’ ක්‍රියාකාරී සාමාජිකයන් උදෙසා ඇගයීම් සම්මාන පිරිනැමීම අමාත්‍යවරයා අතින් සිදු කෙරුණු අතර ‘2020 ව්‍යාපාර යාවත්කාලීන කිරීමේ සිටුවර ජයබල යෝජනාවලිය‘ ඇතුළත් සමරු කලාපයේ මුල් පිටපත අමාත්‍යවරයාට පිළිගැන්වීම ද මෙහි දී සිදුවිය.

මහ බැංකුවේ මූල්‍ය ප්‍රතිපත්ති උපදේශක කමිටුවේ සාමාජික ආචාර්ය ඉශාන්ත සිරිබද්දන මහතාගේ දේශනයකින් සහ ‘ජාතික වෙළඳ ප්‍රතිපත්තියක අවශ්‍යතාව‘ යන තේමාව සහිත සංවාදයකින් මෙම ජාතික මහා සම්මේලනය සමන්විත විය.

කඩා වැටීමට ඉඩ ඇති මූල්‍ය ආයතන කඩා වැටීමට පෙර ඒවා සම්බන්ධව තීරණ ගෙන ගනුදෙනුකරුවන් ආරක්ෂා කර ගැනීම මහ බැංකුවේ වගකීම වියයුතු බව අමාත්‍ය විමල් වීරවංශ මහතා පවසයි.

"නමුත් ආරක්ෂාකර ගන්නේ ගනුදෙනුකරුවන් නොවෙයි අවිචාරවත් විදියට හැසිරුණු මූල්‍ය ආයතනය. මහ බැංකුව තියෙන්නේ මූල්‍ය ආයතනයක් කඩා වැටුනම කඩා වැටුනෝ කියල බදාගන්න නොවෙයි" ඔහු සඳහන් කළේය.

"අපේ රටට ඉදිරියට යන්න බාධා තියෙනවා ඒවා වෙනස් කර ගැනීම අත්‍යාවශ්‍ය වෙනවා." අමාත්‍යවරයා කියා සිටියේය.

කොළඹ පැවති වැඩසටහනකට එක්වෙමින් අමාත්‍යවරයා මේ බව පැවසීය.

ජනාධිපතිවරයාගේ පනිවිඩයක් රැගෙන විමල් වීරවංශ හා උදය ගම්මන්පිල යන මහත්වරුන් වරාය පරිශ්‍රවයේ පැවැති විරෝධතා පැවැත් වූ ස්ථානයට ගියේ එහි වෘත්තීය සමිතිවල ආරාධනාවකට බව වරාය අමාත්‍ය ජොන්සටන් ප්‍රනාන්දු මහතා සඳහන් කරයි.

ආරාධනාවකට අනුව එහි ගිය එම දෙපළට විරෝධතාකරුවන් හූ කීම සහ විරෝධය දැක්වීම පහත් ක්‍රියාවක් බවද ඔහු සඳහන් කරයි. විරෝධතාකරුවන්ගේ හූ තැබීම සහ විරෝධය මත වීරවංශ සහ ගම්මන්පිල යන මහත්වරුන්ට වෘත්තීය සමිති සමඟ කිරීමට බලාපොරොත්තු වූ සාකච්ඡාව වෙනත් ස්ථානයක කිරීමට සිදු වු අතර එය අසාර්ථක වූ බවද වාර්තා විය.

කොළඹ දිස්ත්‍රික් පොදුජන පෙරමුණු ලැයිස්තුවේ ප්‍රථමයා වීම සඳහා විමල් විරවංශ මහතා සහ රියර් අද්මිරාල් සරත් වීරසේකර මහතා අතර සටනක් තිබෙන බව වාර්තා වේ.

වීරවංශ මහතා 2004,2010,2015 මහ මැතිවරණ වලදී එජනිස ලැයිස්තුවේ ප්‍රථමයා බවට පත් විය.

වීරසේකර මහතා 2010 මහ මැතිවරණයේදී දිගාමඩුල්ල දිස්ත්‍රික්කයෙන් එජනිස ලැයිස්තුවෙන් තරඟ කොට එහි පළමු වැනියා විය.

ගම්පහ දිස්ත්‍රික්කයට පසු වැඩිම ජන්ද දායකයන් පිරිසක් සිටින දිස්ත්‍රික්කය වන්නේ කොළඹය.

එහි ලියාපදිංචි ජන්දදායකයින් දහසය ලක්ෂයකට ආසන්න පිරිසක් සිටියි.

කොවිඩ් 19 වෛරසයේ අවදානම රටින් පහව යනතෙක් ඇඳිරි නීතිය ක්‍රියාත්මක කිරීමට සිදුවනු ඇති බව අමාත්‍ය විමල් වීරවංශ මහතා පවසයි.

අවදානම ඉවත් කිරීම සඳහා මහජනතාව සතුවද දැවැන්ත කාර්යභාරයක් තිබෙන බව පෙන්වා දෙන වීරවංශ මහතා පවසන්නේ සියලු දෙනා ඒ සඳහා රජයට සහාය ලබාදෙනු ඇතැයි බලාපොරොත්තු වන බවයි.

දැනට ක්‍රියාත්මක කර ඇති ඇඳිරි නීතිය ලබන අප්‍රේල් 04 වැනිදා දක්වා ක්‍රියාත්මක වනු ඇති බවද ඇමතිවරයා පවසයි. ඉන්පසු තවදුරටත් ඇඳිරි නීතිය ක්‍රියාත්මක කරන්නේද යන්න ඉදිරියේදී තීරණය කරන බව ද ඔහු පෙන්වා දෙයි.

විශේෂයෙන් බස්නාහිර පළාත තුළ පවතින දැඩි අවදානම හේතුවෙන් කිසිසේත්ම ඇඳිරි නීතිය ඉවත් කිරීමට නොහැකි වනු ඇති බව ඔහු පවසයි.

පාස්කු ඉරුදින ප්‍රහාරයට සම්බන්ධ සියලු පුද්ගලයින්ට තරාතිරම නොබලා නීතිය ක්‍රියාත්මක වියයුතු බව විමල් වීරවංශ අමාත්‍යවරයා පවසයි. 

ඔහු පවසන්නේ ඒ සඳහා ඔවුන්ගේ නිලතල ආදාල නොවන බවයි. 

කොළඹදී මාධ්‍ය වෙත අදහස් දක්වමින් විමල් වීරවංශ අමාත්‍යවරයා මේ බව පැවසීය. 

ඉදිරි මහමැතිවරණයේදී ජනාධිපති ගෝඨාභය රාජපක්ෂ මහතාගේ දේශපාලන සංස්කෘතියට ගැළපෙන පුද්ගලයින්ගෙන් සමන්විත නව පාර්ලිමේන්තුවක් නිර්මාණය කරන බව අමාත්‍ය විමල් වීරවංශ මහතා පවසයි.

අමාත්‍යවරයා මේ බව පැවසුවේ අනුරාධපුර උපුල්දෙණිය රජයේ ධාන්‍ය ගබඩා සංකීර්ණයේ නීරික්ෂණයට එක්වෙමින්.

කර්මාන්ත හා සැපයුම් කළමනාකරණ අමාත්‍ය විමල් වීරවංශ මහතා අනුරාධපුර උපුල්දෙණිය රජයේ ධාන්‍ය ගබඩා සංකීර්ණයේ නීරික්ෂණයකට එක්විය.

මෙහිදී ධාන්‍ය වේලිමේ යන්ත්‍රය ද අමාත්‍යවරයා අතින් විවෘත කෙරුණි.

එහිදී මාධ්‍යවේදීන් විසින් එක්සත් ජාතික පක්ෂයේ අර්බුදය පිළිබඳ අමාත්‍යවරයාගෙන් ප්‍රශ්න කර සිටියේය.

එහිදී පිළිතුරු දුන් අමාත්‍ය විමල් වීරවංශ මහතා පවසා සිටියේ දිට්ඨධම්ම වේදණීය කර්මය අනුව රටට අවැඩක් කළහොත් එහි ප්‍රතිඵල ඉතා භයානක බවයි.

මේ අතර යල්පැන ගිය හා එහෙට මෙහෙට පැන්න දේශපාලන චරිත වෙනුවට ගෝඨාභය රාජපක්ෂ මහතාගේ දේශපාලන ගමන් මඟට ගැළපෙන චරිතවලින් පිරුණු පාර්ලිමේන්තුවක් මෙවර අනිවාර්යයෙන්ම නිර්මාණය වන බව ද ඒ මහතා පැවසීය.

ශ්‍රිලනිපයේ සභාපතිවරයා මෛත්‍රීපාල සිරිසේන මහතා වන බැවින් ඔහුට අවස්ථාවක් හිමිවී ඇති බවත් පැවසු විමල් වීරවංශ මහතා, හෙට දවසේ එහි නායකයා වෙන කෙනෙක් නම් ඔහු සභාපති බවට පත් වෙන බවත් කියා සිටි අමාත්‍යවරයා සභාපති පුටුවේ හෝ කොහේ සිටියත් පසුගිය කාලයේ කළ දේවල්වල ප්‍රතිවිපාකයන්ට මුහුණ දීමට සිදුවන බවත් කියා සිටියේය.

ශ්‍රී ලංකා නිදහස් පොදුජන සන්ධානයේ ප්‍රථම විධායක සභා රැස්වීම අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් ඊයේ (25) පස්වරුවේ අරලිය ගහ මන්දිරයේදී රැස්විය.

ජනාධිපති ගෝඨාභය රාජපක්ෂ මහතා, හිටපු ජනාධිපති මෛත්‍රිපාල සිරිසේන මහතා සහ ශ්‍රී ලංකා පොදු ජන පෙරමුණ නිර්මාතෘ බැසිල් රාජපක්ෂ මහතාද ඊට සහභාගි වූහ.

ශ්‍රී ලංකා පොදුජන පෙරමුණ, ශ්‍රී ලංකා නිදහස් පක්ෂය, මහජන එක්සත් පෙරමුණ, සමසමාජ පක්ෂය, කොමියුනිස්ට් පක්ෂය, මහජන පක්ෂය, ජාතික නිදහස් පෙරමුණ, ප්‍රජාතාන්ත්‍රික වාමාංශික පෙරමුණ, දේශවිමුක්ති ජනතා පක්ෂය යන පක්ෂ මෙම අවස්ථාවට සහභාගී වී තිබේ.

මෙම සන්ධානය තුළ පිළිගත් ලියාපදිංචි දේශපාලන පක්ෂ නවයක්  දැනට ඇතුළත් ව ඇති බවත් පසුගිය මැතිවරණයේදී පොදු ජන පෙරමුණ සමඟ සන්ධානගත වූ අනිකුත්  පක්ෂ ලියාපදිංචිය සම්පුර්ණ කළ විට ඊට ඇතුළත් කරගැනීමට කටයුතු කරන බව බැසිල් රාජපක්ෂ මහතා පෙන්වා දී තිබේ.

දැනට ප්‍රධාන පක්ෂ නවයක ප්‍රධානත්වයෙන් සන්ධාන  ගතව ඇති ශ්‍රී ලංකා නිදහස් පොදුජන පෙරමුණු සන්ධානය තුළට නව දේශපාලන පක්ෂ පහක් ඇතුළත් කර ගැනීම සඳහා වූ යෝජනාවට විධායක සභාව මෙහිදී අනුමැතිය ලබා දී ඇත.

ඒ අනුව ඊලාම් ජනතා ප්‍රජාතන්ත්‍රවාදී පක්ෂය,ලංකා කම්කරු කොංග්‍රසය,ජාතික කොංග්‍රසය, දෙමළ මහජන විමුක්ති සංවිධානය,එක්සත් මහජන පක්ෂය යන පක්ෂ ඉදිරියේදී ශ්‍රී ලංකා පොදුජන සන්ධානය නියෝජනය කරන පක්ෂ ලෙස මින් ඉදිරියට කටයුතු කරනු ඇත. මේ අනුව පක්ෂ 14 ක් ශ්‍රී ලංකා නිදහස් පොදුජන සන්ධානයට ඇතුළත් වේ.

මේ අතර ශ්‍රී ලංකා නිදහස් පොදුජන සන්ධානයේ නියෝජ්‍ය සභාපතිවරයෙක් ලෙස දිනේෂ් ගුණවර්ධන මහතාත්, ජාතික සංවිධායක ලෙස විමල් වීරවංශ මහතාත් පත්කර තිබේ.

මීට අමරතව එහි උප සභාපතිවරුන් ලෙස වාසුදේව නානයක්කාර, තිස්ස විතාරණ, ඩිව් ගුණසේකර යන මහත්වරුන් පත්කර ඇති අතර උප ලේකම්වරුන් ලෙස අසංක නවරත්න, ඩී කලංසූරිය යන මහත්වරුන් ද පත් කිරීමට සන්ධානයේ විධායක සභාවේදී තීරණය කර තිබේ.

Page 1 of 5

Live