February 24, 2020

පාර්ලිමේන්තු මැතිවරණය සම්බන්ධව එක්සත් ජාතික පෙරමුණේ මන්ත්‍රීවරුන් සමග සාකච්ඡා කර තීරණයක් ගන්නා බව ජනාධිපති ගෝඨාභය රාජපක්‍ෂ මහතා සමග ඊයේ (19) පැවැති සාකච්ඡාවකදී අග්‍රාමාත්‍ය රනිල් වික්‍රමසිංහ මහතා පවසා ඇතැයි වාර්තා වේ.

කොළඹ ජනාධිපති ලේකම් කාර්යාලයේ පැවැති මෙම සාකච්ඡාවේදී අගමැතිවරයා වැඩිදුරටත් සඳහන් කර ඇත්තේ ප්‍රජාතන්ත්‍රවාදය අගයන පුද්ගලයෙකු වශයෙන් මේ සම්බන්ධව සියලුම පාර්ශ්ව සමග සාකච්ඡා කර තීරණයක් ගැනීමට තමන් සූදානම් බවයි.

මෙම කරුණ පිළිබඳ කථානායක කරු ජයසුරිය මහතා, පක්‍ෂ නායකයන් සමග සාකච්ඡා කර අවසන් තීරණයක් ගැනීමට බලාපොරොත්තු වන බවද හෙතෙම ප්‍රකාශ කර තිබේ.

මේ අතර රනිල් වික්‍රමසිංහ මහතා ඇතුළු එක්සත් ජාතික පෙරමුණේ පක්‍ෂ නායකයන් සහ ගෝඨාභය රාජපක්‍ෂ මහතා අතර විශේෂ සාකච්ඡාවක් අද (20) දිනයේදී පැවැත්වීමට නියමිතය.

ආණ්ඩු පක්ෂය ගන්නා ඉදිරි ක්‍රියාමාර්ග පිළිබඳ අද පස්වරුවේ ප්‍රකාශයක් කරන බව සභානායක අමාත්‍ය ලක්ෂ්මන් කිරිඇල්ල මහතා පවසයි.

ඒ, අනුව අගමැති ද ඉවත් වී ආණ්ඩුව භාරදීමට සූදානම් බවට ප්‍රකාශයක් කරන බව ද ලක්ෂ්මන් කිරිඇල්ල මහතා වැඩි දුරටත් සඳහන් කළේය.

එක්සත් ජාතික පක්ෂ නායක රනිල් වික්‍රමසිංහ මහතා පක්ෂ නායකත්වයෙන් ඉවත් නොවුනහොත් වෙනම පක්ෂයක් බිහි කිරීමට සජිත් ප්‍රේමදාස පාර්ශවය  තීරණය කොට තිබෙන බව ඔහුට පක්ෂපාතී කණ්ඩායම් මෙන්ම වොක්ෂෝල් වීදියේ පිහිටි පක්ෂ කාර්යාලයේ සිට මැතිවරණය මෙහෙයවූ පිරිස් මේ වනවිට ඉඟි පළ කරමින් සිටි.

සජිත් ප්‍රේමදාස මහතා පරාජය කිරීමට රනිල් වික්‍රමසිංහ මහතා ඇතුළු කණ්ඩායමක් කටයුතු කළ බවටද මේ වන විට සජිත් ප්‍රේමදාස පාර්ශවය විසින් ප්‍රසිද්ධියේ චෝදනා එල්ල කරන්නේ එහි එක් පියවරක් ලෙසය.

70 වන වියේ පසු වන රනිල් වික්‍රමසිංහ මහතා 1994 සිට පුරා වසර විසිපහක් පක්ෂයේ නායකත්වය තුළ සිටීම මිසක් පක්ෂය අගාධයට ගියා මිස පක්ෂයේ කිසිදු වර්ධනයක් සිදු නොවූ බවද මෙම මන්ත්‍රීවරුන්ගේ අදහස වේ. මෙම තත්වය මත ඉදිරි මහා මැතිවරණය සඳහා රනිල් වික්‍රමසිංහ මහතාගේ නායකත්වය යටතේ තරග කිරීම තේරුමක් නැති වැඩක් බවද එම මන්ත්‍රීවරුන් පෙන්වා දෙයි. 

මෙම තත්වය මත ඉදිරි දින කිහිපය එක්සත් ජාතික පක්ෂයට ඉතාමත් වැදගත්වන අතර ඉදිරි මහ මැතිවරණය සඳහා ඉතා පැහැදිලි ලෙසම රනිල් වික්‍රමසිංහගේ නායකත්වය යටතේ තරග නොකිරීමට ද මෙම මන්ත්‍රී කණ්ඩායම තීරණය කර තිබේ.

වෙනම තරග කිරීම තුලින් පාර්ලිමේන්තුවේ විපක්ෂ නායක ධූරය ලබා ගැනීම සජිත් ප්‍රේමදාස මහතාට ඉදිරියේදී රාජ්‍ය නායකත්වය සඳහා යන ගමනට වඩාත්ම ප්‍රයෝජනවත් බව ඔහුට පක්ෂපාතී පිරිස පෙන්වා දෙයි.


එක්සත් ජාතික පක්ෂ නායක අග්‍රාමාත්‍ය රනිල් වික්‍රමසිංහ මහතා පසුගිය ජනාධිපතිවරණයේ දී සිය ඡන්දය ලබා දුන්නේ ජාතික ජන බලවේගයේ ජනපති අපේක්ෂක අනුර කුමාර දිසානායක මහතාට බවට සැකයක් එක්සත් ජාතික පක්ෂ මන්ත්‍රීවරුන් තුළ ඇති වී තිබේ.

කොළඹ විශ්වවිද්‍යාලයේ දී සිය ඡන්දය පාවිච්චි කළ එක්සත් ජාතික පක්ෂ නායකයා ඡන්ද පත්‍රිකාවේ උඩම තිබුණු නමක් ඉදිරියේ සිය  ඡන්දය පාවිච්චි කළ බවට තොරතුරු එම මන්ත්‍රීවරුන් වෙත ලැබී තිබේ.

ජනාධිපතිවරණය සඳහා එක්සත් ජාතික පෙරමුණ ප්‍රමුඛ සන්ධානයේ අපේක්ෂකයා ලෙස අනුර කුමාර දිසානායක මහතා ඉදිරිපත් කළ යුතු බවට යෝජනාවක්ද වික්‍රමසිංහ මහතා මීට පෙර ගෙන එන ලදී.

නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතා පරාජය කිරීමට රනිල් වික්‍රමසිංහ මහතා ඇතුළු කණ්ඩායම විසින් කටයුතු කළ බවට චෝදනාවක් සජිත් ප්‍රේමදාස පාර්ශ්වයේ මන්ත්‍රීවරුන් විසින් මේ වන විට ප්‍රසිද්ධියේ එල්ල කරමින් සිටී.


තරුණ පරපුර ඉල්ලා සිටින, සික්ස් ජී (6G) ඩිජිටල් සමාජය නිර්මාණය කළ හැකි එකම අපේක්‍ෂකයා සජිත් ප්‍රේමදාස මහතා බව අග්‍රාමාත්‍ය රනිල් වික්‍රමසිංහ මහතා පෙන්වාදුන්නේය.

ඊයේ (12) පැවැති ජන හමුවලදී අග්‍රාමාත්‍යවරයා මේ බව සඳහන් කළේය.

ජීවිතයේ නිදහස මෙන්ම සියළු තීරණ ඔන්ලයින් ගැනීමේ අවකාශය වත්මන් තරුණ පරපුරේ අපේක්‍ෂාව බවත් ඩේටාවලට නිදහස ලබා දෙමින් තරුණ පරපුරේ ඔන්ලයින් විප්ලවය සිදු කළ හැකි එකම පක්‍ෂය එක්සත් ජාතික පක්‍ෂය බවද වික්‍රමසිංහ මහතා අවධාරණය කළේය.

" අද තියෙන නිදහසට වඩා වැඩි නිදහසක් මේ රටේ තරුණ තරුණියන් ඉල්ලා සිටිනවා. ඩේටා ලබාගැනීමට ඇති නිදහස තරුණ තරුණියන් අද ඉල්ලා සිටිනවා. එමෙන්ම මේ සමාජ ක්‍රමයට විරුද්ධව ලියන්න, කියන්න, හිතන්න, නිර්මාණ කරන්න නිදහස ඉල්ලනවා. ඉලක්කම් හයක වැටුපක් ලැබෙන රැකියාවක් ලබාගන්නා හීනය සැබෑ කරගන්න නිදහස ඉල්ලනවා. ජීවිතේ හැම තීරණයක්ම, හැම සේවාවක්ම ඔන්ලයින් කරගන්න නිදහස ඉල්ලනවා. අද ලෝකයේ තිබෙන්නේ ෆෝ ජී (4G) තාක්‍ෂණය මෙන් ලබන අවුරුද්දේ ෆයු ජී (5G) වෙනවා. සික්ස් ජීත් (6G) දැන් ලෑස්තියි.  ඒත් අපි තාමත් ඇනලොග්. තරුණ පරපුර දෙන අභියෝගය භාරගන්න අප ලෑස්තියි. ඩේටාවලට නිදහස දෙන්න අප ලෑස්තියි. ඔන්ලයින් විප්ලවය ඇති කරන්න අප ලෑස්තියි. මෙලෙස තරුණ පරපුර බලාපොරොත්තු වන අසීමිත ඩිජිටල් නිදහස වෙනුවෙන් නොවැම්බර් 16 වැනිදායින් පසු දේශපාලනයේ ඩිජිටල් වෙනසක් කොට වේගවත් ගමනක් යන්න ලෑස්තියි. අපි ගැන විශ්වාසය තබන්න. රූපවාහිනිය, කොම්පියුටර්, ඩෙනිම්, බ්‍රෝඩ් බෑන්ඩ්, ඉලෙක්ට්‍රොනික්, මේවා මේ රටට ගෙනාවේ අපියි. ඒ ආකාරයටම අනිවාර්යෙන්ම සික්ස් ජී (6G) මේ රටට ගේන්නෙත් අපියි. ලෝකයේ සැරිසරන්න, රට රැකියාවලට යන්න හීන දකින ඔබේ සිහිනය සැබෑ කරන්නේ එක්සත් ජාතික පක්‍ෂයයි."

පිටු 80 කින් යුතු ගෝඨාභය රාජපක්‍ෂ මහතාගේ ප්‍රතිපත්ති ප්‍රකාශයේ ප්‍රජාතන්ත්‍රවාදය යන වචනය සඳහන් වී ඇත්තේ එකම එක තැනක පමණක් බව අග්‍රාමාත්‍ය රනිල් වික්‍රමසිංහ මහතා අවධාරණය කරයි.

එමගින් පිළිබිඹු වන්නේ ප්‍රජාතන්ත්‍රවාදී පාලන ක්‍රමයක් පිළිබඳව ඔවුන් තුළ කැපවීමක් හෝ විශ්වාසයක් හෝ නෙමැති බවද අග්‍රාමාත්‍යවරයා බවසයි.

මැද කොළඹ මැතිවරණ කොට්ඨාශයේ මාළිගාවත්ත සහ කෙසෙල්වත්ත ප්‍රදේශයන්හි පැවති පොකුරු රැස්වීම් මාලාවක් අමතමින් වික්‍රමසිංහ මහතා වැඩිදුරටත් පෙන්වා දුන්නේ රටේ නීතිය හා සාමය තමන් අතට ගෙන ක්‍රියා කළ අධිපතිවාදී කල්ලියකට රටේ බලය යළි අත්පත්වීම වළක්වා, වත්මන් නිදහස් හා ප්‍රජාතන්ත්‍රවාදී පරිසරය තවදුරටත් ශක්තිමත් කර, ඉදිරියට ගෙන යාම සඳහා සජිත් ප්‍රේමදාස මහතාට සහය ලබා දෙන ලෙසය.

එහිදී තවදුරටත් අදහස් දැක්වූ අග්‍රාමාත්‍ය රනිල් වික්‍රමසිංහ මහතා,

 "2015 බලයට පැමිණි අපේ ආණ්ඩුව ස්වාධීන කොමිෂන් සභා ස්ථාපිත කරමින් ප්‍රජාතන්ත්‍රවාදය ආරක්‍ෂා කර ජනතාවට බියෙන් සැකෙන් තොරව ජීවත් විය හැකි පරිසරයක් නිර්මාණය කළා. ඒරාමුව ආරක්‍ෂා කරමින් ඉදිරියට ගෙන යෑම අපේ අරමුණයි. නමුත් ජනාධිපති අපේක්‍ෂක ගෝඨාභය රාජපක්‍ෂ ප්‍රජාතන්ත්‍රවාදය ආරක්‍ෂා කිරීම සම්බන්ධව කුමක්ද කියන්නේ. ඔහු ඉදිරිපත් කර තිබෙන ප්‍රතිපත්ති ප්‍රකාශයේ පිටු 80 ක් තිබුණත් ප්‍රජාතන්ත්‍රවාදය යන වචනය තිබෙන්නේ එකතැනක පමණයි. අප ඇති කළ ස්වාධීන කොමිෂන් සභා ආරක්‍ෂා කරනවා ද? ඒවා තවදුරටත් ශක්තිමත් කරමින් ඉදිරියට යනවා ද? එසේත් නැතිනම් එයට විකල්පයක් ගෙන එනවා ද? සුදුවෑන් වැනි පැහැරගෙන යෑම් නතර කරනවා ද? මාධ්‍යවේදීන් අතුරුදහන් කිරීම නතර කරනවා ද? අධිකරණය ස්වාධීනත්වය ආරක්‍ෂා කරනවා ද? ජනතාව තුළ මතු වන මේ ප්‍රශ්නවලටගෝඨාභය රාජපක්‍ෂ පිළිතුරු ලබාදිය යුතුයි. මේ මැතිවරණයේ ප්‍රධාන මාතෘකාව බවට පත්ව තිබෙන්නේ ප්‍රජාතන්ත්‍රවාදය ආරක්‍ෂාකර ගැනීමයි. ඒ ගැන කිසිවක් ප්‍රතිපත්ති ප්‍රකාශයේ සඳහන් කොට නැති නම් එවැනි අයෙකුටඔබේ ඡන්දය ලබාදීමෙන් ඵලක් තිබෙනවා ද? මේ අනුව ප්‍රජාතන්ත්‍රවාදයආරක්‍ෂා කරන නිසි වැඩපිළිවෙළක් ඇති සජිත් ප්‍රේමදාස මහතාට ඡන්දය ලබා දෙනවා ද? ප්‍රජාතන්ත්‍රවාදය ආරක්‍ෂා කිරීම වෙනුවෙන් කිසිදු වැඩපිළිවෙළක් ඉදිරිපත්නොකර යළිත් රට අඳුරු යුගයකට ගෙන යෑමට සූදානම් වන ගෝඨාභය රාජපක්‍ෂට ඡන්දය දෙනවා දකියා ඔබ තීරණය කළ යුතුයි."

ශ්‍රී ලංකාවේ ජනතාව 2015 ජනවාරියේ ගත් නිවැරැදි තීරණය නිසා නිදහස, සාධාරණත්වය සහ සංවර්ධනය මුළු රට පුරාම පැතිරුණු බවත්, පීඩාවට පත්ව තිබූ උතුරු - නැගෙනහිර ප්‍රදේශයන්ට මේ නිසා විශාල සෙතක් සැලසුණු බවත් අග්‍රාමාත්‍ය රනිල් වික්‍රමසිංහ මහතා පවසයි.

ඊයේ (03) කිලිනොච්චියේ පැවැති පොකුරු රැස්වීමක් අමතමින් අග්‍රාමාත්‍යවරයා මේ බව පැවසීය.

එහිදී ඒ මහතා වැඩිදුරටත් පෙන්වාදුන්නේ යුද්ධයෙන් අගතියට පත්වූ උතුරු - නැගෙනහිර ජනතාවට සහන සැලසීම සඳහා විශේෂ ව්‍යාපෘති ගණනාවක් ක්‍රියාත්මක කෙරුණු බවයි. 

ස්වාධීන කොමිෂන් සභා ස්ථාපිත කිරීමෙන් රට පුරා නිදහස් පරිසරයක් නිර්මාණය කළ අතර, අතුරුදන්වූවන්ගේ කාර්යාලය සහ හානිපූර්ණ කාර්යාලය පිහිටුවීමෙන් යුද්ධයෙන් හානි වූ සියලූම ශ්‍රී ලාංකිකයන්ට සහන සැලසීමේ ක්‍රියාවලිය ආරම්භ කර ඇති බව ද වික්‍රමසිංහ මහතා පැවසීය. 

මේ වැඩපිළිවෙළ තවදුරටත් ඉදිරියට ගෙන ගොස් නිදහස, සංවර්ධනය හා සාධාරණත්වය තහවුරු කර ගන්නවා ද එසේ නැතිනම් යළි රාජපක්‍ෂලා බලයට ගෙනැවිත් දිනූ නිදහස අහිමි කරගනිමින් පීඩාවෙන් පීඩාවට පත් වෙනවා ද යන්න තීරණය කිරීමේ අවස්ථාව නොවැම්බර් 16 වැනිදා ලැබී ඇති බවත් අග්‍රාමාත්‍යවරයා පැවසීය. 

ඉදිරි ජනාධිපතිවරණයෙන් සජිත් ප්‍රේමදාස මහතා ජයග්‍රහණය කිරීමෙන් පසු තමන් දිගටම අගමැති ධුරයේ රැඳී සිටින බව  රනිල් වික්‍රමසිංහ මහතා පැවසීය.

ඔහු මේ බව කියා සිටියේ අද පෙරවරුවේ කොළඹ අරලියගහ මන්දිරයේ දී පැවති මාධ්‍ය හමුවක් අමතමිනි.

මේ අතර වාර්තා වූයේ තමන් ජනාධිපති වූ පසු අගමැති ධුරය රනිල් වික්‍රමසිංහ මහතාට නොදැන බව සජිත් ප්‍රේමදාස මහතා විසින් ඉදිරි සතියේ දී ප්‍රකාශයට පත් කිරීමට නියමිත බවයි.

මේ සම්බන්ධයෙන් දැනටම සජිත් පිලේ ප්‍රබලයන් අතර තීරණාත්මක සාකච්ඡා පැවැත්වෙමින් තිබෙන බවද වාර්තා වේ.

සජිත් පේ‍්‍රමදාස මහතාද මෑතකදී කියා සිටියේ තමන් ජනාධිපති වූ පසු පිහිටුවන්නේ ‘Brand new’ ආණ්ඩුවක් බවයි.

පොදුජන පෙරමුණු ජනපති අපේක්ෂක ගෝඨාභය රාජපක්ෂ මහතාට සහය දීම සඳහා අග්‍රාමාත්‍ය රනිල් වික්‍රමසිංහ මහතාට ඉතාමත්ම සමීප ඇමතිවරයෙකු පැමිණෙන බවට විපක්ෂ නායක මහින්ද රාජපක්ෂ මහතා නිරන්තරයෙන් කරන ප්‍රකාශය පිළිබඳව සමාජයේ දැඩි අවධානයක් යොමු වී තිබේ.

එම අමාත්‍යවරයා වන්නේ රනිල් වික්‍රමසිංහ මහතාට ඉතාමත් කිට්ටු වරාය සහ දක්ෂිණ සංවර්ධන අමාත්‍ය සාගල රත්නායක මහතා බවට තොරතුරු ඒෂියන් මිරර් වෙත වාර්තා වේ.

නව ප්‍රජාතන්ත්‍රවාදී පෙරමුණේ ජනපති අපේක්ෂක සජිත් ප්‍රේමදාස මහතාගේ මැතිවරණ කටයුතු සඳහා සාගල රත්නායක මහතා මේ වන තුරුත් කිසිදු සක්‍රීය දායකත්වයක් සපයා නොමැත. 

සජිත් ප්‍රේමදාස මහතාට අපේක්ෂකත්වය දීමට රනිල් වික්‍රමසිංහ මහතා එකඟවීම පිළිබඳව සාගල රත්නායක මහතා සිටින්නේ දැඩි කළ කිරීමකිනි. 

මාතර දිස්ත්‍රික්කය නියෝජනය කරන එක්සත් ජාතික පක්ෂය නියෝජනය කරන පාර්ලිමේන්තු මන්ත්‍රීවරුන් තිදෙනාගෙන් සාගල රත්නායක මහතා එක් අයෙකු වන අතර අන් දෙදෙනා වන මංගල සමරවීර සහ බුද්ධික පතිරණ යන මහත්වරුන් සජිත් ප්‍රේමදාස මහතාගේ ජයග්‍රහණය වෙනුවෙන් කැප වීමෙන් කටයුතු කරන බව දකින්නට තිබේ. මේ නිසා යම් හෙයකින් සජිත් ප්‍රේමදාස මහතා ජයග්‍රහණය කළ හොත් තමන්ගේ දේශපාලන අනාගතය දැඩි බලපෑමකට ලක් වන බැවින් සාගල රත්නායක මහතා ගෝඨාභය රාජපක්ෂ මහතාට සහය දීමට සූදානමින් සිටින බව වාර්තා වේ. 

ස්වයං රැකියාවල නිරත වන පුද්ගලයින්ට රක්ෂණ ක්‍රමයක් හදුන්වාදීමට බලාපොරොත්තු වන බව අග්‍රාමාත්‍ය රනිල් වික්‍රමසිංහ මහතා පවසයි.

කොළඹ පැවති උත්සවයකට එක්වෙමින් අග්‍රාමාත්‍ය රනිල් වික්‍රමසිංහ මහතා මෙම අදහස් පල කළේය.

මෙහිදී අදහස් දක්වමින් අග්‍රාමාත්‍යවරයා පවසා සිටියේ, ජනාධිපති අපේක්ෂක ගෝඨාභය රාජපක්ෂ මහතා දැවැන්ත ව්‍යාපාරිකයින් සියලු දෙනා කොළඹ ෂැංග්‍රල්ලා හෝටලයට ගෙන්වු බවයි.

තමා අද දිනයේ අඩි 100 පාරේ ඇවිත් පොඩි මිනිහාගේ ආර්ථිකය ගැන කථා කරන බවත් අගමැතිවරයා මෙහිදී පැවසීය.

මේ රටේ පොඩි මිනිසුන්ගේ ආර්ථිකය වර්ධනය කිරීමට ජේ.ආර්.ජයවර්ධන මහතා විවෘත ආර්ථිකය හඳුන්වා දුන් බවත් කියා සිටි අගමැතිවරයා, එයට අවස්ථාව රණසිංහ ප්‍රේමදාස මහතා විසින් ද සකසා දුන් බවද කියා සිටියේය.

අද දවසේ එතුමාගේ පුතා වන ජනාධිපති අපෙක්ෂක සජිත් ප්‍රේමදාස මහතාට ඡන්දය ලබා දී පොඩි මිනිසාගේ ආර්ථිකය ආරක්ෂා කර දෙන ලෙසත් අගමැතිවරයා මෙහිදී වැඩිදුරටත් සඳහන් කළේය.

2015 දී රට බාර ගන්නා විට මොවුන් ණය ලබා ගෙන ලබා ගෙන ණය ගෙවන්න ණයක් ගන්න නොහැකි තත්ත්වයක් පැවති බවද කියා සිටි රනිල් වික්‍රමසිංහ මහතා, අමාරු කාලයක් පැවති බවත් පැවසීය.

තමන්ගේ ස්වයං රැකියා අවසන් වු පසු මෙතැන සිටින පිරිස කුමක් සිදු කරන්නේ දැයි විමසා සිටි අගමැතිවරයා ස්වයං රැකියා කරන අයට අනාගතයේ රක්ෂණ ක්‍රමයක් ඇති කරන බවත් කියා සිටියේය.

ගෝඨාභය රාජපක්ෂ මහතාගේ පොහොට්ටුවට ඡන්දය ලබා දී ආරක්ෂා වීමට හැකි දැයි අසා සිටි වික්‍රමසිංහ මහතා, එසේ සිදු කරන්නේ නම් සෙරෙප්පු ගළවා “රනින් ෂූෂ්“ දාගන්න දුවන්න යැයි පැවසීය.

ඔවුන්ගෙන් පහර කන විට දුවන්න සිදු වෙන බවත්, තම ආණ්ඩුවක සෙරෙප්පු පැළඳ සිටිය හැකි බවත් පැවසු අගමැතිවරයා, මෙතෙක් වැඩ සියල්ල ඉටු කළේ ජනාධිපති හෝ කිසිවෙකු නොමැති බවත් පැවසීය.

එනිසා අපේම ජනාධිපතිවරයෙක්, අපේම පළාත් සභාවක්, අපිටම බහුතරයක් තියෙන පාර්ලිමේන්තුවක් ලබා දෙන ලෙසත් එවිට රොකට්ටුවක් වගේ  ඉදිරියට යන බවත් ඒ සඳහා සජිත් ප්‍රේමදාස මහතාට ශක්තියක් වන ලෙසත් අගමැතිවරයා මෙහිදී කියා සිටියේය.