October 17, 2019

තමාත්, අගමැතිවරයාත් අතර විරසකයක් ඇති බවට ඇතැමුන් පවසන බවත්, එක්සත් ජාතික පෙරමුණේ රජයේ වාද විවාද කරන්න ඕන තරම් අවස්ථාව ඇති බවත් එය අගමැතිවරයා හොදින් අවබෝධකර ගෙන සිටින බවත් නගර සංවර්ධන ජල සම්බපත් හා උසස් අධ්‍යාපන අමාත්‍ය සහ ශ්‍රී ලංකා මුස්ලිම් කොංග්‍රසයේ නායක රවුෆ් හකීම් මහතා පවසයි.

අමාත්‍යවරයා එම අදහස් පකාශ කළේ, ශ්‍රී ලංකාවේ විශාලතම ජල යෝජනා ක්‍රමය වන මහනුවර උතුර සහ පාතදුම්බර ඒකාබද්ධ ජල යෝජනා ක්‍රමයට අගමැති රනිල් වික්‍රමසිංහ මහතා විසින් මුල් ගල් තැබීමෙන් අනතුරුව පාතදුම්බර දොරගමුව මහා විද්‍යාලීය ක්‍රීඩාංගණයේදී පැවැති ජනහමුව අමතමිනි.

මෙහිදී තව දුරටත් අදහස්  දැක්වූ අමාත්‍ය රවුෆ්  හකීම් මහතා පැවසුවේ සමහර අවස්ථාවල අගමැතිවරයා නිතරයෙන් පවසන ලිච්ඡවි පාලන ක්‍රමය ගැනත් වාද කර ගන්නා බවයි. 

ඒ සියල්ල සිදු කරන්නේ රටේ සුබසිද්ධිය වෙනුවෙන් බවද අමාත්‍යවරයා පවසයි.

එමෙන්ම සිය පාර්ශවයේ එකමුතුව වෙනුවෙන් බවත් ආණ්ඩුවේ එක්සත් භාවය වෙනුවෙන් බවත් අමාත්‍යවරයා පෙන්වා දෙයි.

කෘතහස්ත  දේශපාලඥයෙක් සෙල අග්‍රාමාත්‍යවරයා ඒක අවබෝධ කර ගෙන සිටින බවත් , තමා ආවේගශීලි  වු විට තමන්ව සන්සුන් කරන්න එතුමා නිතරම ඉදිරිපත් වන බවත් අමාත්‍යවරයා පවසයි.

ලබන සතිය වෙන වට මේ ප්‍රශ්න සියල්ලට විසඳුම් ලැබෙනු ඇති බවට විශ්වාස කරන බවත්, ජයග්‍රාහී අපේක්ෂකයා නම් කර මේ ජයග්‍රාහී ගමන යන බවත් අමාත්‍ය රවුෆ් හකීම් මහතා මෙහිදී කීය.

විශේෂ කැබිනට් රැස්වීම පැවැති දින පෙරවරුවේ ජනපති මෛත්‍රීපාල සිරිසේන මහතා තමාට දුරකතනයෙන් ඇමතූ බවත් එදින අමාත්‍ය රවී කරුණනායක මහතා තමාට කථා නොකල බවත් අග්‍රාමාත්‍ය රනිල් වික්‍රමසිංහ මහතා පවසයි.

මතභේදයට තුඩු දුන් එම කැබිනට් රැස්වීම පිළිබඳව එක්සත් ජාතික පක්ෂ ක්‍රියාකාරීන් ඊයේ (22) කොළඹ අරලිය ගහ මන්දිරියේදී හමුවූ අවස්ථාවේදී අගමැතිවරයා මේ බව පැවැසීය.

එහිදී ඒ මහතා මෙසේ අදහස් දැක්විය.

“පසුගිය සතියේ සිවිල් සංවිධාන නියෝජිත පිරිසක් මා හමුවී අපේ ආණ්ඩුව කළ කටයුතු හා කිරීමට අතපසු වූ කටයුතු ගැන අදහස් දැක්වූවා. අපේ පක්‍ෂය 2014 වසරේ විධායක ජනාධිපති ධූරය අහෝසි කරන බවට යෝජනාවක් සම්මත කර ගත් බවත්, විධායක ජනාධිපති ක්‍රමය අහෝසි කිරීම වෙනුවෙන් අපි තව දුරටත් පෙනී සිටින බවත් මම ඔවුන්ට දැන්වූවා. එවිට ඔවුන් ඉල්ලා සිටියේ 20 වන සංශෝධනය සඳහා සහය දීමේ කැබිනට්  තීරණයකට එළැඹෙන ලෙසයි. ඒ අනුව කැබිනට් මණ්ඩලය වෙත යොමු කිරීම සඳහා සැකසූ කෙටුම් පතක් ඔවුන් 16 වෙනිදා මට ලබා දුන්නා. අනෙකුත් දේශපාලන පක්‍ෂවල සහය ලැබීමෙන් තොරව 20 වන සංශෝධනය පාර්ලිමේන්තුවේ සම්මත කර ගැනීමට නොහැකි බව මම සිවිල් සංවිධාන නියෝජිතයන්ට පෙන්වා දුන්නා. ඒ නිසා අනෙකුත් දේශපාලන පක්‍ෂවල අදහස මා වෙත දැනුම් දෙන ලෙස මම ඔවුන්ගෙන් ඉල්ලා සිටියා. 17 වන දා පාර්ලිමේන්තුවේදී සුමන්තිරන් මන්ත්‍රීතුමා මට පැවසුවේ විධායක ක්‍රමය අහෝසි කිරීම පිළිබඳව ඔවුන් ජනතා විමුක්ති පෙරමුණ සමග සාකච්ඡා පැවැත්වූ බවයි. ඒ වගේම ජනාධිපතිතුමාටත් 20 වන සංශෝධනය ගෙන ඒමට අවශ්‍ය බව ජනාධිපතිතුමා තමාට දැනුම් දුන් බව මන්ත්‍රීතුමා වැඩිදුරටත් දැන්වුවා. එතැනදී මම සුමන්තිරන් මන්ත්‍රීතුමාට පෙන්වා දුන්නේ මේ යෝජනාව පාර්ලිමේන්තුවේ සම්මත කර ගැනීමට නම් පොදුජන පෙරමුණේ සහයෝගයද අවශ්‍ය බවයි."

"සුමන්තිරන් මන්ත්‍රීතුමා මේ පිළිබඳ ප්‍රසිද්ධ ප්‍රකාශයක් කර තිබෙනවා. ඒ ප්‍රකාශය කිසිවෙකු ප්‍රතික්ෂේප කර නැහැ. 19 වෙනිදා උදේ අටයි දාසයට ජනාධිපතිතුමා මට දුරකථන ඇමතුමක් දුන්නා. 20 වන සංශෝධනය පිළිබඳ සාකච්ඡා කිරීමට කැබිනට් රැස්වීමක් කැඳවන්නද කියා එතුමා මගෙන් විමසුවා. සිවිල් සමාජය මේ පිළිබඳ ඉල්ලීමක් කළ බව මම ජනාධිපතිතුමාට දැනුම් දුන්නා. ඒ වගේම මේ සම්බන්ධයෙන් ජනාධිපතිතුමාගේ ස්ථාවරය සුමන්තිරන් මන්ත්‍රී තුමා මට දැනුම් දී තිබුණා. ඒ නිසා කැබිනට් මන්ඩලය කැඳවා සාකච්ඡා කිරීම සුදුසු බව මම ජනාධිපතිතුමාට කිව්වා. බ්‍රහස්පතින්දා හෝ සිකුරාදා ඒ රැස්වීම කැඳවීම පහසු බවත් මම පැවසුවා. එදින රවි කරුණානායක මහතා මට දුරකථන ඇමතුමක් දුන්නේ නැහැ. උදේ නවය පමණ වෙද්දී කැබිනට් ලේකම්වරයා මගේ ලේකම්වරයාට එදින සවස තුනට කැබිනට් රැස්වීම පැවැත්වෙන බව දන්වා තිබුණා. ඉන් පසු මගේ ලේකම්වරයා සිවිල් සමාජය විසින් ඉදිරිපත් කරන ලද කෙටුම් පත අවශ්‍ය වුවහොත් ප්‍රයෝජනයට ගැනීම සඳහා කැබිනට් ලේකම්වරයා වෙත යොමු කළා. සවස 02 ට ඇමතිවරුන් කැඳවා මම මේ ගැන දැනුම් දුන්නා. ඒ සාකච්ඡාව ඉතා උණුසුම් වුණා. සියළු දෙනා විවෘතව අදහස් පළ කළා. එහිදී 20 වන සංශෝධනය සඳහා එකඟත්වයක් ලැබුණේ නෑ. මම කැබිනට් මණ්ඩල රැස්වීමට පෙර ජනාධිපතිතුමාට ඇමතිවරුන් අතර එකඟත්වයක් නැති බව දැනුම්දුන්නා. රැස්වීම  ආරම්භයේදී මම ජනාධිපතිතුමා ඉදිරිපිටදීම කැබිනට් ලේකම්වරයාට දැනුම් දුන්නේ, ඇමතිවරුන් අතර එකඟත්වයක් නැති නිසා කැබිනට් කෙටුම් පත ඉදිරිපත් කිරීමෙන් පලක් නොවන බවයි. ඇමතිවරුන් දැක්වූ අදහස් මම ඒ රැස්වීමේදී සම්පිණ්ඩනය කළා. ඇමැතිවරු විවිධ අදහස් පළ කළා. අවසන් තීරණය ගැනීම එක් එක් පක්‍ෂවලට භාර කිරීම සුදුසු බව අප නිගමනය කළා. කැබිනට් මණ්ඩලයේ සාමාජිකයන්ගේ ප්‍රකාශ පිළිබඳව ප්‍රශ්නයක් තියෙනවා නම් එය සාකච්ඡා කළ යුත්තේ කැබිනට් මණ්ඩලය තුළදීයි. එසේ නොකිරීම කැබිනට් සම්ප්‍රදාය කඩකිරීමක්. ඒ නිසා මම මෙතැනදී පෙන්වාදෙන්නේ සිදු වුණු කරුණු පමණයි. ඒ නිසා කිසිවෙකුට අවලාද නගන්නට හෝ ෙදාස් කියන්නට හෝ මම කටයුතු කරන්නේ නැහැ."

විධායක ජනාධිපති ධූරය අහෝසි කළ යුතුය යන්න එදා මෙන්ම අද ද තම දේශපාලන ප‍්‍රතිපත්තිය බව ප‍්‍රකාශ කළ ජනාධිපති මෛත්‍රීපාල සිරිසේන මහතා  එය අතපසු කළේ තමා නොව, පාර්ලිමේන්තුව බවත්, එහෙත් මැතිවරණයක් නිවේදනය කර ඇති මේ මොහොතේ ඊට උත්සාහ දැරීම විහිලුවට කරුණක් බවත් කියා සිටියේය.

ජනාධිපතිවරයා මේ බව ප‍්‍රකාශ කළේ නාවුල දී පැවති ශී‍්‍ර ලංකා නිදහස් පක්ෂ මාතලේ දිස්ති‍්‍රක් සමුළුව අමතමිනි.

විධායක ජනාධිපති ධූරය අහෝසි කිරීම පිළිබඳ පසුගියදා කැඳ වු හදිසි විශේෂ කැබිනට් රැස්වීම තම අවශ්‍යතාවයට අනුව කැඳවූ බවට අගමැතිවරයා කර ඇති ප‍්‍රකාශය පිළිබඳව ද අදහස් දැක්වූ ජනාධිපතිවරයා කියා සිටියේ එය ඉතා වැරදි ප‍්‍රකාශයක් බවත් එම කැබිනට් රැස්වීම් පැවැත්වීමට කටයුතු කෙරුණේ අග‍්‍රාමාත්‍යවරයාගේ ඉල්ලීම අනුව බවත් ය.

එමෙන්ම  මේ දිනවල මාධ්‍යවල පළවන අල්ලස් හා දූෂණ විමර්ශන කොමිෂන් සභාවේ හිටපු අධ්‍යක්ෂ ජනරාල්වරියගේ හඬ පටය පිළිබඳව ද අදහස් දැක්වූ ජනාධිපතිවරයා සිහිපත් කළේ, ඇය සිය තනතුර අතහැර ගියේ තම අනුදැනුමකින් තොරව හිටපු ත්‍රිවිධ හමුදාපතිවරු අධිකරණයට ගෙන ගිය අවස්ථාවේ තමා විසින් සිදුකළ ප‍්‍රකාශයක් හේතුවෙන් බවයි.

උදේ සිට සවස 4.00 වන තුරු අල්ලස් හෝ දූෂණ විමර්ශන කොමිසමේ රාජකාරි කර සවස 6.00න් පසු අරලිගයග මන්දිරයේ දූෂණ වංචා ලේකම් කාර්යාලයේ රාජකාරි කළ දිල්රුක්ෂි ඩයස් මහත්මිය ශ්‍රේෂ්ඨාධිකරණ විනිසුරු ධූරයක් සඳහා පත්කරන ලෙස මෑතක දී ද අග‍්‍රාමාත්‍යවරයා විසින් තමාගෙන් ඉල්ලීමක් කළ බව මෙහිදී සිහිපත් කළ ජනාධිපතිවරයා දිල්රුක්ෂි ඩයස් මහත්මියගේ හඬ පටයේ සඳහන් වන අන්දමින් වැරදි විදියට නඩු දමන්න ඇයට උපදෙස් ලබා දුන් එම පහත් පෙළේ දේශපාලනඥයන් කවුදැයි රටට හෙළිකරන ලෙස තමා ඇයට දන්වන බවත් එය රටට අනාවරණය කිරීම අත්‍යාවශ්‍ය බවත් කියා සිටියේය.

මේ අතර තමා සහ පාස්කු ඉරිදා ප‍්‍රහාරය පිළිබඳ කරුණු සෙවීමේ පාර්ලිමේන්තු තේරිම් කාරක සභා නියෝජිතයන් අතර පැවති හමුව මාධ්‍යයට අනාවරණය නොකිරීම තමාගේ ඉල්ලීමට අනුව සිදුවූ බවට කෙරෙන අසත්‍ය ප‍්‍රචාර පිළිබඳව ද අදහස් දැක්වූ ජනාධිපතිවරය කියා සිටියේ එම සාකච්ඡාව ආරම්භයේ සිට අවසානය දක්වා මාධ්‍යයට විවෘත කිරීමට තමා සියලූ කටයුතු සූදානම් කර තිබුණත් එසේ නොකරන ලෙස ඉල්ලා සිටියේ එම පාර්ලිමේන්තු තේරිම් කාරක සභාව විසින් ම බවයි.

 

විධායක ජනාධිපති ධුරය අහෝසි කිරීම ගැන කැබිනට් මණ්ඩලයේදී කතාකරමුදැයි ජනාධිපතිතුමා කතා කර තමාගෙන් විමසූ බව අග්‍රාමාත්‍ය රනිල් වික්‍රමසිංහ මහතා පස්යාල කල්ලේලියේදී ඊයේ (20) පැවැසීය.
 
විධායක ජනාධිපති ධුරය අහෝසි කිරීම ගැන තමා සෙසු පක්ෂ සමග සාකච්ඡා කර නොතිබූ හෙයින් තමා ජනාධිපතිවරයාගේ යෝජනාවට එකඟ වූ බව කී අග්‍රාමාත්‍යවරයා ඒ අනුව ජනපති පෙරේදා (19) දහවල් කැබිනට් මණ්ඩලය කැඳ වූ බව ද සඳහන් කළේය.
 
පස්යාල දොන් ස්ටීවන් නව ජාතික පාසල ඉදිකිරීම සඳහා මුල්ගල කැබීමේ උත්සවයේ ප්‍රධාන ආරාධිතයා ලෙස සහභාගී වෙමින් අග්‍රාමාත්‍යවරයා මේ බව කීය. කතානායක කරු ජයසූරිය මහතාගේ ඉල්ලීමක් පරිදි අධ්‍යාපනය අමාත්‍යංශයේ ‘ළඟම පාසල - හොඳම පාසල’ වැඩසටහන යටතේ මෙම නව පාසල ඉදිකෙරෙයි.

මේ සම්බන්ධයෙන් තවදුරටත් අදහස් දැක්වූ අග්‍රාමාත්‍ය රනිල් වික්‍රමසිංහ මහතා මෙසේ ද කීය.
 
“19 වන සංශෝධනයේ කොටසක් අප විසින් සිදුකර තිබෙනවා. ඉතිරි කාරණා ගැන ප්‍රශ්න ඇතිවී තිබෙනවා. ජනාධිපතිවරණයත් සමඟ විධායක ජනාධිපති ක්‍රමය ගැන විවිධ සංවිධාන ප්‍රශ්න මතුකිරීම පුදුමයක් නොවේ. මෙය අද රටේ ප්‍රශ්නයක්. මේ සතියේ මුල් භාගයේදී සමහර සිවිල් සංවිධාන අලුත් යෝජනා ඉදිරිපත් කළා. ජනතා විමුක්ති පෙරමුණේ 20 වන සංශෝධනය වහාම සම්මත කිරීම ගැන සාකච්ඡා ඇති වී තිබුණා. ඒ සාකච්ඡාවලට මා සහභාගී වී සිටියේ නැහැ. ඒ ගැන මටත් ආරංචි වුණා. විධායක  ජනාධිපති ධුරය අහෝසි කිරීම ගැන කැබිනට් මණ්ඩලයේදී කතාකරමුදැයි ජනාධිපතිතුමා අද කතාකර මගෙන් ඇසුවා. අපේ පක්ෂ අතර මේ ගැන සාකච්ඡා කර තිබුණේ නැහැ. ඒනිසා එය හොඳයි මෙතන කතාකරන්න පුලුවන් කියා මා පැවැසුවා. ජනාධිපතිතුමා ඒ අනුව දහවල් කැබිනට් මණ්ඩලය කැදෙව්වා. මා ඊට පෙර අපගේ ඇමති මණ්ඩලය කැදෙව්වා. එහි විවිධ අදහස් තිබුණා. ඒ බව මම ජනාධිපතිතුමාට දැනුම්දුන්නා. එකඟතාවක් තිබේදැයි නොදන්නා බවත් මා පැවසුවා."

"අවසානයේ ඒ ඒ පක්ෂ මේ ගැන තීරණය කිරීමට එකඟ වුණා. ඒ අනුව ඒ රැස්වීම අවසන් වුණා. මෙහි යථාර්ථය නම් පොහොට්ටුවේ ඡන්ද නැතිව ව්‍යවස්ථා සංශෝධනයක් අනුමත කරගත්තාට බැහැ. අපට 150ක මන්ත්‍රී පිරිසක් නැහැ. ඒ ගැන සාකච්ඡා කළත් පාර්ලිමේන්තුවේ සම්මත කරගැනීමට හැකිවන්නේ පොහොට්ටුවේ ඡන්ද තිබෙනවා නම් පමණයි යැයි මම දැනුම් දුන්නා. විධායක ජනාධිපති ක්‍රමය වෙනස් කළාදැයි බොහෝ සිවිල් සංවිධාන මට දොස් කිව්වා. කෙසේ වෙතත් මෙය විවෘතව කතාකිරීම රටේ යුතුකමක්. සෑම පක්ෂයකටම මේ ගැන තීරණයක් ගන්න වේවි. අප කාටවත් මේ ප්‍රශ්නයෙන් හැංගෙන්න බැහැ. විධායක ජනාධිපතික්‍රමය තබාගන්නවාද නැද්ද කියා සෑම පක්ෂයක්ම තීරණය කරන්නට වේවි. අවසන් තීරණය ගන්නේ ජනතාවයි” යැයි අග්‍රාමාත්‍ය රනිල් වික්‍රමසිංහ මහතා පැවසීය.

ජනාධිපතිවරණය ඉතා නිදහස් ඡන්දයක් ලෙස පවත්වා එයින් ජයගෙන ඉන් අනතුරුව පාර්ලිමේන්තු මැතිවරණයත් ජයගන්න බව අග්‍රාමාත්‍ය රනිල් වික්‍රමසිංහ මහතා කොළඹදී ඊයේ (19) පැවසීය.
 
මේ නිදහස දෙන්නේ අපට අප කෙරෙහි පවතින විශ්වාසය නිසා බව කී අග්‍රාමාත්‍යවරයා කිසි විටෙක පසුපසට යාමට අවශ්‍ය නොවන බවද සඳහන් කළේය.
 
දේශපාලන පළිගැනීම් හේතුවෙන් පීඩාවට පත්වූවන් සඳහා වන්දි ප්‍රදානය කිරීම වෙනුවෙන් කොළඹ අරලියගහ මන්දිරයේදී පැවැති උත්සවයට සහභාගී වෙමින් අග්‍රාමාත්‍ය රනිල් වික්‍රමසිංහ මහතා මේ බව පැවැසීය.
 
එහිදී ඉදිරි ජනාධිපතිවරණය පිළිබඳව අදහස් දැක්වූ අග්‍රාමාත්‍ය රනිල් වික්‍රමසිංහ මහතා ,
 
"මෙම ජනාධිපතිවරණය ඉතා නිදහස් ඡන්දයක් ලෙස පවත්වනවා.අපට කිසිඳු බියක් සැකයක් තබා ගැනීමට අවශ්‍ය නැත.අපට ඉදිරියට යන්නට හැකියාන තිබෙනවා.ඒ නිසා අප නිදහස් ජනාධිපතිවරණයක් පවත්වනවා.කිසිවකුත් ඒ ජනාධිපතිවරණයේදී තුවක්කු ගෙන එන්නේ නැහැ. අපට මේ ජනාධිපතිවරණයට මුහුණ දිය හැකියි.අපට මේ ජනාධිපතිවරණය ජයගත හැකියි.ඉන් පසුව අපට පාර්ලිමේන්තු මැතිවරණය ජයගන්න පුළුවන්.අපි පසුපසට යන්න අවශ්‍ය නැහැ.මේ නිදහස දෙන්නේ අපට අප කෙරෙහි තිබෙන විශ්වාසය නිසයි.අප සෑම අංශයකටම විවෘතව කටයුතු කරනවා." 

කෘෂිකර්ම අමාත්‍යංශය ඩි.පී.ජේ ගොඩනැගිල්ලට ගෙන යාමත්, පාර්ලිමේන්තු කාරක සභාවන් ගොවිජන මන්දිරයේ පිහිටුවීමත් මගින් රජය බලාපොරොත්තු වූ ඉලක්කයන් සම්පූර්ණ කර ගැනීමට  නොහැකි වූ බව අගමැති රනිල් වික්‍රමසිංහ මහතා ඊයේ (16) ජනාධිපති පරීක්ෂණ කොමිසම හමුවේ කියා  සිටියේය.
 
කෘෂිකර්ම අමාත්‍යංශය  රුපියල් මිලියන 21 මාසික කුලියට ඩී.පී.ජේ ගොඩනැගිල්ල ගෙන යාමෙන් රජය පාඩු සිදුව ඇතැයි කියමින් ගොනු වී ඇති පැමිණිල්ලට අදාළ සාක්කි දෙමින් හෙතෙම මේ බව කීය.
 
එවකට අමාත්‍ය දුමින්ද දිසානායක මහතා තම අධීක්ෂණය යටතේ නොව ජනාධිපතිවරයාගේ අධික්ෂණය යටතේ සිය ක්‍රියාකලාපයන් සිදුකර ගෙන ගිය බව අගමැතිවරයා වෙනුවෙන් පෙනී සිටි ජනාධිපති නීතීඥ රොනල්ඩ් පෙරේරා මහතාගේ වැඩිදුර ප්‍රශ්න කිරීම් හමුවේ කියා සිටියේය.

එක්සත් ජාතික පක්ෂයේ ජනාධිපතිවරණ අපේක්ෂකයා ඉක්මනින් නම් කරන ලෙස ඉල්ලා එජාප නායක අග්‍රාමාත්‍ය රනිල් වික්‍රමසිංහ මහතාට තමන් ලිඛිතව දැනුම් දුන් බව එජාප නියෝජ්‍ය නායක නිවාස, ඉදිකිරීම් හා සංස්කෘතික කටයුතු අමාත්‍ය සජිත් ප්‍රේමදාස මහතා පැවැසීය.
 
ජනාධිපති අපේක්ෂකවරයා නම් කිරීම තවදුරටත් ප්‍රමාද කළ නොහැකි බවත්, එම ප්‍රමාදය රටට හා පක්ෂයට සිදු කරන හානියක් සේම,  ප්‍රජාතන්ත්‍රවාදයට එල්ල කරන මරු පහරක් බවත් අමාත්‍ය සජිත් ප්‍රේමදාස මහතා සඳහන් කළේය. 
  
සෑමවිටම ප්‍රජාතන්ත්‍රවාදීව කටයුතු කරන තමන් ජනාධිපතිවරණ අපේක්ෂකත්වයට ඉදිරිපත් කිරීම ප්‍රශ්නයක් නම් එජාප කෘත්‍යාධිකාරී මණ්ඩලය සහ මන්ත්‍රී කණ්ඩායම කඩිනමින් රැස්කර ඔවුන්ගෙන් විමසා තීරණය කරන ලෙසත් අමාත්‍යවරයා වැඩිදුරටත් සඳහන් කළේය. 

කුමන ගැටළු පැමිණියත් එ.ජා.ප ය ජයග්‍රහණය කරවීමේ මෙහෙයුමට තමන් නායකත්වය ලබා දීමට සුදානම් බවත්, ඉතාම ඉක්මනින් ජනාධිපතිවරණය ප්‍රකාශයට පත් කිරීමට නියමිත බැවින් අප ඊට සුදානම් විය යුතු බවත් අමාත්‍යවරයා ප්‍රකාශ කළේය.

 

 

ඉදිරි ජනාධිපතිවරණය සම්බන්ධයෙන් එක්සත් ජාතික පක්ෂයේ නායක අග්‍රාමාත්‍ය රනිල් වික්‍රමසිංහ මහතා සහ දෙමළ ජාතික සන්ධානය අතර විශේෂ සාකච්ඡාවක් අද (17) පාර්ලිමේන්තු සංකීර්ණයේදී පැවැත්වීමට නියමිතව ඇතැයි දෙමළ සන්ධානයේ ආරංචි මාර්ග සදහන් කරයි.

මෙම සාකච්ඡාවෙන් අනතුරුව එක්සත් ජාතික පක්ෂයේ නියෝජ්‍ය නායක සජිත් ප්‍රේමදාස මහතාද හමුවී සාකච්ඡා කිරීමටද එම සන්ධානය තීරණය කර තිබේ.

ඉදිරි ජනාධිපතිවරණය සම්බන්ධයෙන් දෙමළ ජාතික සන්ධානයේ නායකත්වය ප්‍රමුඛ පාර්ලිමේන්තු කණ්ඩායම එක්සත් ජාතික් පක්ෂයේ නියෝජ්‍ය නායක අමාත්‍ය සජිත් ප්‍රේමදාස මහතා සමගින් පසුගියදා (15) සාකච්ඡාවක් පැවැත්වීමට සූදානම් කර තිබුණද එම සාකච්ඡාව කල්දමා තිබේ. 

සජිත් ප්‍රේමදාස මහතා හමුවීමට පෙර රනිල් වික්‍රමසිංහ මහතා හමුවී සාකච්ඡා කළ යුතු බවට දෙමළ ජාතික සන්ධානයේ නියෝජිතයින් තීරණය කිරීම මත එම සාකච්ඡාව කල්දැමීමට සිදුවූ බව දෙමළ ජාතික සන්ධාන පාර්ලිමේන්තු මන්ත්‍රීවරයෙක් සඳහන් කළේය.

මේ  අතර මලික් සමරවික්‍රම, මංගල සමරවීර සහ රාජිත සේනාරත්න යන අමාත්‍යවරුන් සහ දෙමළ ජාතික සන්ධානයේ නායක ආර්.සම්බන්ධන් පාර්ලිමේන්තු මන්ත්‍රී එම්.ඒ.සුමන්තිරන් යන මහත්වරුන් අතර හමුවක්ද පසුගියදා (15) සිදුව ඇතැයි දේශපාලන ආරංචිමාර්ග සඳහන් කරයි.

මෙවර ජනාධිපතිවරණයට ඉදිරිපත්වන සියලු පාර්ශව සමගින් දෙමළ ජාතික සන්ධානය සාකච්ඡා කරන බවත් දෙමළ ජනතාවගේ අයිතිවාසිකම් හා ගැටළුවලට විසඳුම් දෙන බවට සහතික වන නායකයාට සහාය ලබා දෙන බවත් දෙමළ ජාතික සන්ධානයේ නායක ආර්.සම්බන්ධන් මහතා දෙමළ මාධ්‍ය වෙත අදහස් දක්වමින් සඳහන් කර තිබිණි.

පුළුල් බලවේග එකතු කරගත හැකි වැඩපිළිවෙළක් සහ ඒ සඳහා වන ක්‍රියාකාරී සැලැස්මක් ඉදිරිපත් කරන ලෙස, එක්සත් ජාතික පක්ෂයේ ජනාධිපතිවරණ අපේක්ෂකයා ලෙස ඉදිරිපත් වීමට බලාපොරොත්තු වන සැමට  තමා ප්‍රකාශ කළැයි ද ඒ සියළු කරණා සළකා බලා කෘත්‍යාධිකාරී මණ්ඩලයේ දී ජනපතිවරණ අපේක්ෂකයා නම් කරන බවද අග්‍රාමාත්‍ය රනිල් වික්‍රමසිංහ මහතා සිවිල් සංවිධාන නියෝජිතයන් හමුවේ ඊයේ (15) පැවැසීය.

එජාප ඡන්ද පදනම මත පමණක් ජයග්‍රහණය කිරීම අසීරුවිය හැකි බව කී අග්‍රාමාත්‍යවරයා  ජනාධිපතිවරණය ජයගැනීමට සෙසු මිතුරු බලවේගවල සහය දිනාගැනීම අනිවාර්ය බව ද සඳහන් කළේය.

ජනාධිපතිවරණයට එක්සත් ජාතික පක්ෂයෙන් නාම යෝජනා ගන්නට බලාපොරොත්තු වන සියළුම අපේක්ෂකයන්ට දිනන වැඩපිළිවෙළ ඉදිරිපත් කරන ලෙස දැනුම් දී ඇතැයිද අග්‍රාමාත්‍ය රනිල් වික්‍රමසිංහ මහතා එහිදී පැවැසීය.

සිවිල් සංවිධාන සහ වෘත්තීය සමිති එකමුතුවේ ඉහළ පෙළේ නියෝජිත පිරිසක් අද (15) කොළඹ අරලියගහ මන්දිරයේ දී අග්‍රාමාත්‍ය රනිල් වික්‍රමසිංහ මහතා මුණ ගැසී සාකච්ඡා කළ අවස්ථාවේදී අග්‍රාමාත්‍යවරයා මේ අදහස් පළ කර තිබේ.

එළැඹෙන ජනාධිපතිවරණයේදී එක්සත් ජාතික පක්ෂය ප්‍රමුඛ ප්‍රජාතන්ත්‍රවාදී ජාතික පෙරමුණ විසින් ඉදිරිපත් කිරීමට බලාපොරොත්තු වන අපේක්ෂකයා කවුරුන් විය යුතුද යන්න මෙහිදී සිවිල් සංවිධාන නියෝජිතයන්ගේ අවධානයට ලක්වී ඇති අතර 2015 ජනාධිපතිවරණයේ දී එකඟ වූ පරිදි විධායක ජනාධිපති ධුරය අහෝසි කිරීමට සහ ජනවර්ග ප්‍රශ්නයට සාකච්ඡාමය දේශපාලන විසඳුමක් ලබා දීම යන ප්‍රධාන ඉල්ලීම් ඉදිරියට ගෙන යන්නේ කෙසේද යන්න ගැන ද මෙහිදී සාකච්ඡා වී තිබේ.

මෙහිදී අදහස් දක්වමින් ජ්‍යෙෂ්ඨ කථිකාචාර්ය දඹර අමිල නා හිමියන් සඳහන් කර ඇත්තේ "මෙම ජනාධිපතිවරණයේදී ජයග්‍රහණය කළ හැකි අපේක්ෂකයකු ඉදිරිපත් කළ යුතු බවයි. කවර අපේක්ෂකයකු ඉදිරිපත් කළද අග්‍රාමාත්‍ය රනිල් වික්‍රමසිංහ මහතා විසින් මෙම සන්ධානය සහ වැඩපිළිවෙළ මෙහෙයවිය යුතු බවත්, එමෙන්ම ඉදිරියේ දී ගොඩනගන ආණ්ඩුවකදී රනිල් වික්‍රමසිංහ මහතාගේ නායකත්වය අත්‍යවශ්‍ය බවත් දඹර අමිල හිමියන් ප්‍රකාශ කර ඇත.

 

අසීරු සෑම අවස්ථාවකදීම පක්ෂය ආරක්ෂා කරගත් නායකයා ලෙස එළඹෙන ජනාධිපතිවරණය ජයගත හැකිනම් ඊට ඉදිරිපත් වන බවත් එය කළ නොහැකි නම් පිටව යන බවත් අග්‍රාමාත්‍ය රනිල් වික්‍රමසිංහ මහතා අද (12) පැවසීය.

වයස අවරුදු 70 වන තෙක් ශ්‍රී ලාංකීය දේශපාලන ක්ෂේත්‍රයේ  තනතුරු රැසක් දැරූ තමාට දේශපාලනෙන් විශ්‍රාම ගැනීම එතරම් අසීරු කටයුත්තක් නොවේ යැයිද අග්‍රාමාත්‍යවරයා වැඩි දුරටත් ප්‍රකාශ කළේය.

අග්‍රාමාත්‍ය රනිල් වික්‍රමසිංහ මහතා මෙම අදහස් පළ කලේ බියගම සහ කැලණිය මැතිවරණ කොට්ඨාසවල එක්සත් ජාතික පක්ෂයේ පැරණිතම සාමාජික පිරිසක් කොළඹ අරලියගග මන්දිරයේ දී හමුවූ අවස්ථාවේදීය.

හොඳම පාසල ළඟම පාසල ව්‍යාපෘතීය යටතේ පාසල් ගොඩනැගිලි විවෘත කිරීමේ උත්සව සඳහා මන්නාරමට පිටත්ව යාමට පෙර අරලියගහ මැදුරේදී ඉහත හමුව පැවැත්විණි.

පක්ෂයේ නායකයන් එකා පිට එකා මැරී වැටෙද්දී පක්‍ෂ නායකත්වය බාර ගනිමින් අසීරුම කාලයේදී ක්‍රියා කළ ආකාරය එක්සත් ජාතික පක්ෂයේ පැරණිතම සාමාජිකයන්ට සිහිපත් කළ අග්‍රාමාත්‍ය රනිල් වික්‍රමසිංහ මහතා පක්ෂය වැටුණු සෑම අවස්ථාවකදීම එය ගොඩගත් ආකාරය ද සිහිපත් කර සිටියේය.

පක්‍ෂ නායක ලෙස පක්ෂයත් පක්ෂයේ මුලිකත්වයෙන් පිහිටුවන සන්ධානයත් දිනවීම සිය යුතුකම බව සඳහන් කළ අග්‍රාමාත්‍යවරයා එළඹෙන ජනාධිපතිවරණයේ දී ඉහත වගකීම ඉටු කළ නොහැකි නම් පිටව යෑම තමාට කිසිඳු ගැටළුවක් නොවේ යැයිද සඳහන් කර සිටියේය.



DLB Desktop